SBI ಅಪ್ರೆಂಟಿಸ್ ನೇಮಕಾತಿ: ರಾಜ್ಯದ 600 ಪದವೀಧರರಿಗೆ ಅವಕಾಶ, ಬೇಗನೆ ಅರ್ಜಿ ಹಾಕಿಕೊಳ್ಳಿ

ಬೆಂಗಳೂರು: ಖಾಸಗಿ ಅಂತಲೇ ಅಲ್ಲ; ಸರ್ಕಾರಿ ಬ್ಯಾಂಕ್​ಗಳಲ್ಲಿ ನಮ್ಮ ಕರ್ನಾಟಕದ ಬಿಟ್ಟು ಇತರೆ ರಾಜ್ಯದವರೇ ಎದ್ದು ಕಾಣಿಸುತ್ತಾರೆ, ಕನ್ನಡದ ಅವಗಣನೆ ನಡೆದೇ ಇದೆ ಎಂಬ ಆರೋಪಗಳು ಸಾಮಾನ್ಯವಾಗಿಬಿಟ್ಟಿದೆ. ಆದರೆ ಇದಕ್ಕೆ ಅಪವಾದವೆಂಬಂತೆ ಈಚೆಗೆ ಪ್ರಕಟವಾಗಿರುವ ಅಪ್ರೆಂಟಿಸ್​ ನೇಮಕಾತಿ ಅಧಿಸೂಚನೆಯಲ್ಲಿ ಇಂಥ ಆರೋಪಗಳಿಗೆ ಎಸ್​ಬಿಐ (SBI-State Bank of India) ಸದ್ದಿಲ್ಲದೆ ಉತ್ತರಿಸಿದೆ.

ಭಾರತದ ಅತಿದೊಡ್ಡ ಬ್ಯಾಂಕ್ ಎನಿಸಿರುವ ಭಾರತೀಯ ಸ್ಟೇಟ್​ ಬ್ಯಾಂಕ್ 8,500 ಅಪ್ರೆಂಟಿಸ್​ಗಳ ನೇಮಕಾತಿಗೆ​ ಅರ್ಜಿ ಆಹ್ವಾನಿಸಿದೆ. ಈ ಪೈಕಿ ಕರ್ನಾಟಕದಲ್ಲಿ 600 ಮಂದಿಗೆ ಅವಕಾಶವಿದೆ. ಈ ಹುದ್ದೆಗಳನ್ನೂ ಜಿಲ್ಲಾವಾರು ಹಂಚಿಕೆ ಮಾಡಿ, ಪ್ರಾದೇಶಿಕವಾಗಿಯೂ ಈ ಹುದ್ದೆಗಳನ್ನು ಅರ್ಹರು ದಕ್ಕಿಸಿಕೊಳ್ಳಲು ಅವಕಾಶ ಮಾಡಿಕೊಟ್ಟಿದೆ. ಅಷ್ಟರಮಟ್ಟಿಗೆ ಕನ್ನಡಿಗರು ಸಮಾಧಾನಪಟ್ಟಿಕೊಳ್ಳಬಹುದು.

ಬೀದರ್​ಗೆ 27, ಚಾಮರಾಜನಗರಕ್ಕೆ 24, ಕಲಬುರ್ಗಿಗೆ 26, ದಾವಣಗೆರೆಗೆ 21, ಮಂಡ್ಯಕ್ಕೆ 34, ಯಾದಗಿರಿಗೆ 18… ಹೀಗೆ ರಾಜ್ಯದ ಬಹುತೇಕ ಹಿಂದುಳಿದ ಜಿಲ್ಲೆಗಳಿಗೆ ಆದ್ಯತೆಯ ಮೇರೆಗೆ ಹುದ್ದೆಗಳನ್ನು ಮೀಸಲಿರಿಸಿರುವುದು ಈ ನೇಮಕಾತಿ ಜಾಹೀರಾತಿನಲ್ಲಿ ಎದ್ದು ಕಾಣುತ್ತದೆ. ಮುಂದಿನ ದಿನಗಳಲ್ಲಿ ಬ್ಯಾಂಕ್​ ಅಧಿಕಾರಿಗಳ ನೇಮಕಾತಿ ಪರೀಕ್ಷೆ ತೆಗೆದುಕೊಳ್ಳುವವರಿಗೆ ಈ ಅವಕಾಶ ಒಂದು ಚಿಮ್ಮುಹಲಗೆ ಎಂದೇ ಪರಿಗಣಿಸಲಾಗುತ್ತದೆ.

ಜನವರಿಯಲ್ಲಿ ಆನ್​ಲೈನ್ ಪರೀಕ್ಷೆಗಳು..ಅರ್ಜಿ ಸಲ್ಲಿಸುವುದು ಹೇಗೆ? ಎಸ್​ಬಿಐ ವೆಬ್​ಸೈಟ್​ನಲ್ಲಿಯೇ ಅರ್ಜಿಗಳನ್ನು ಭರ್ತಿ ಮಾಡಿ, ಡಿಸೆಂಬರ್ 10ರ ಒಳಗೆ ಸಬ್​ಮಿಟ್​ ಮಾಡಬೇಕು. ಆಯ್ಕೆಯಾದ ಅಭ್ಯರ್ಥಿಗಳಿಗೆ ಜನವರಿ 2021ರಲ್ಲಿ ಆನ್​ಲೈನ್ ಪರೀಕ್ಷೆಗಳು ನಡೆಯಲಿವೆ.

ಅಕ್ಟೋಬರ್ 31, 2020ಕ್ಕೆ ಕನಿಷ್ಠ 20 ವರ್ಷ, ಗರಿಷ್ಠ 28 ವಯೋಮಿತಿಯೊಳಗಿರುವ ಅಭ್ಯರ್ಥಿಗಳು ಅರ್ಜಿ ಸಲ್ಲಿಸಬಹುದಾಗಿದೆ. ‘ವಯೋಮಿತಿಯ ನಿಯಮಗಳು ಸಾಮಾನ್ಯ ಅಭ್ಯರ್ಥಿಗಳಿಗೆ ಅನ್ವಯಿಸಲಿದೆ. ಎಸ್​ಸಿ, ಎಸ್​ಟಿ, ಒಬಿಸಿ ಮತ್ತು ಅಂಗವಿಕಲ ಅಭ್ಯರ್ಥಿಗಳಿಗೆ ಭಾರತ ಸರ್ಕಾರದ ನಿಯಮಾವಳಿಗಳ ಅನ್ವಯ ವಯೋಮಿತಿ ರಿಯಾಯ್ತಿ ಸಿಗಲಿದೆ’ ಎಂದು ಅಧಿಸೂಚನೆಯಲ್ಲಿ ಎಸ್​ಬಿಐ ತಿಳಿಸಿದೆ. ಅಪ್ರೆಂಟಿಸ್​ ತರಬೇತಿ ಅವಧಿ 3 ವರ್ಷಗಳು. ಭಾರತೀಯ ಬ್ಯಾಂಕಿಂಗ್​ ಮತ್ತು ಫೈನಾನ್ಸ್​ ಸಂಸ್ಥೆ (IIBF -Indian Institute of Banking and Finance) ನಡೆಸುವ ವಿವಿಧ ಪರೀಕ್ಷೆಗಳಿಗೆ ತರಬೇತಿ ಅವಧಿಯಲ್ಲಿ ಅಭ್ಯರ್ಥಿಗಳು ಸಿದ್ಧತೆ ಮಾಡಿಕೊಳ್ಳುವ ಆಸಕ್ತಿ ಹೊಂದಿರಬೇಕು ಎಂದು ಅಧಿಸೂಚನೆ ಹೇಳಿದೆ.

ಅಪ್ರೆಂಟಿಸ್​ಗಳಿಗೆ ಮೊದಲ ವರ್ಷದಲ್ಲಿ ತಿಂಗಳಿಗೆ ₹ 15,000, 2ನೇ ವರ್ಷದಲ್ಲಿ ₹ 16,500 ಮತ್ತು 3ನೇ ವರ್ಷದಲ್ಲಿ ₹ 19,000 ಸ್ಟೇಫಂಡ್ ಸಿಗಲಿದೆ. ಇತರ ಯಾವುದೇ ಭತ್ಯೆ ಅಥವಾ ಸೌಲಭ್ಯಗಳು ಅಪ್ರೆಂಟಿಸ್​ಗಳಿಗೆ ಸಿಗುವುದಿಲ್ಲ.

ಹುದ್ದೆಯ ಹೆಸರು: ಅಪ್ರೆಂಟಿಸ್ ಖಾಲಿ ಇರುವ ಒಟ್ಟಾರೆ ಹುದ್ದೆಗಳು: 8,500 (ಕರ್ನಾಟಕದಲ್ಲಿ 600) ಅರ್ಜಿ ಶುಲ್ಕ: ಸಾಮಾನ್ಯ ಅಭ್ಯರ್ಥಿಗಳಿಗೆ ₹300. ಎಸ್​ಸಿ, ಎಸ್​ಟಿ ಮತ್ತು ಅಂಗವಿಕಲ ಅಭ್ಯರ್ಥಿಗಳಿಗೆ ಶುಲ್ಕ ವಿನಾಯ್ತಿ. ಅರ್ಜಿ ಸಲ್ಲಿಸಲು ಕೊನೆಯ ದಿನ: ಡಿಸೆಂಬರ್ 10 ಪರೀಕ್ಷೆ ಎಂದು ನಡೆಯುತ್ತೆ: 2021ರ ಜನವರಿ ಪ್ರವೇಶ ಪತ್ರ ವಿತರಣೆ: 2020ರ ಡಿಸೆಂಬರ್ ಕೊನೆಯ ವಾರ ಶೈಕ್ಷಣಿಕ ಅರ್ಹತೆ: ಯಾವುದೇ ಪದವಿ

ಎಸ್​ಬಿಐ ಅಪ್ರೆಂಟಿಸ್​ ತರಬೇತಿ ಕುರಿತು ಹೆಚ್ಚಿನ ಮಾಹಿತಿಗೆ https://bank.sbi/web/careers/current-openings ಲಿಂಕ್ ನೋಡಬಹುದು.

Published On - 3:53 pm, Fri, 20 November 20