ಈ ರೀತಿ ಸಂಗ್ರಹಿಸಿಟ್ಟರೆ ಹುಣಸೆ ವರ್ಷಗಳವರೆಗೆ ಕೆಡೋದೇ ಇಲ್ಲ
ಚಟ್ನಿ, ಸಾಂಬರ್‌, ರಸಂ ಯಾವುದೇ ಭಾರತೀಯ ಅಡುಗೆಗಳಿಗೂ ಹುಣಸೆ ಹಣ್ಣು ಬೇಕೇಬೇಕು. ಅದಕ್ಕಾಗಿಯೇ ಪ್ರತಿಯೊಬ್ಬರೂ ಹೆಚ್ಚಿನ ಪ್ರಮಾಣದ ಹುಣಸೆ ಹಣ್ಣನ್ನು ಒಂದೇ ಬಾರಿಗೆ ಖರೀದಿಸುತ್ತಾರೆ. ಆದರೆ ಇದನ್ನು ಸಂಗ್ರಹಿಸುವಾಗ ಮಾಡುವ ಕೆಲವೊಂದು ತಪ್ಪುಗಳು ಹುಣಸೆಹಣ್ಣು ಹಾಳಾಗಲು ಕಾರಣವಾಗುತ್ತದೆ. ಹೀಗಿರುವಾಗ ಈ ಕೆಲವು ಟಿಪ್ಸ್‌ಗಳನ್ನು ಅನುಸರಿಸುವ ಮೂಲಕ ಹುಣಸೆಹಣ್ಣು ವರ್ಷಗಳವರೆಗೆ ಕೆಡದಂತೆ ಸಂಗ್ರಹಿಸಬಹುದು.
ಭಾರತೀಯ ಅಡುಗೆಗಳಲ್ಲಿ ಹುಣಸೆ (Tamarind) ಕೂಡ ಬಹುಮುಖ್ಯ ಪಾತ್ರವನ್ನು ವಹಿಸುತ್ತದೆ. ಇದು ಅಡುಗೆಯ ರುಚಿಯನ್ನು ಹೆಚ್ಚಿಸುವಲ್ಲಿ ಬಹುಮುಖ್ಯ ಪಾತ್ರವನ್ನು ವಹಿಸುತ್ತದೆ. ಪ್ರತಿನಿತ್ಯ ಹುಣಸೆಹಣ್ಣನ್ನು ಬಳಸುವ ಕಾರಣ ಮಾರುಕಟ್ಟೆಯಿಂದ ಹೆಚ್ಚಿನ ಪ್ರಮಾಣದ ಹುಣಸೆಯನ್ನು ಒಂದೇ ಬಾರಿಗೆ ಖರೀದಿಸುತ್ತೇವೆ ಮತ್ತು ಡಬ್ಬದಲ್ಲಿ ಸ್ಟೋರ್‌ ಮಾಡಿಡುತ್ತೇವೆ. ಆದರೆ ಕೆಲವೊಮ್ಮೆ ಸ್ಟೋರ್‌ ಮಾಡಿಟ್ಟ ಹುಣಸೆಹಣ್ಣು ಹಾಳಾಗುತ್ತವೆ. ಹೌದು ಹುಣಸೆಹಣ್ಣು ಮೃದು ಮತ್ತು ಜಿಗುಟಾಗಬಹುದು, ಅವುಗಳ ಬಣ್ಣ ಬದಲಾಗಬಹುದು ಮತ್ತು ಅಚ್ಚುಗಳೂ ಬೆಳೆಯಬಹುದು. ಹೀಗಿರುವಾಗ ಈ ಕೆಲವೊಂದು ಸಲಹೆ ಸಲಹೆಗಳನ್ನು ಪಾಲಿಸುವ ಮೂಲಕ ಹುಣಸೆಹಣ್ಣು ಹಾಳಾಗದಂತೆ ದೀರ್ಘಕಾಲ ಸಂಗ್ರಹಿಸಿಡಬಹುದು.
ಹುಣಸೆಹಣ್ಣನ್ನು ಸರಿಯಾಗಿ ಸ್ವಚ್ಛಗೊಳಿಸಿ:
ಹುಣಸೆಹಣ್ಣನ್ನು ದೀರ್ಘಕಾಲದವರೆಗೆ ಸಂರಕ್ಷಿಸಲು, ಮಾರುಕಟ್ಟೆಯಿಂದ ಖರೀದಿಸಿದ ನಂತರ ಅದನ್ನು ನೇರವಾಗಿ ಡಬ್ಬದಲ್ಲಿ ಸ್ಟೋರ್‌ ಮಾಡಿ ಇಡುವ ಬದಲು, ಮೊದಲು ಅದನ್ನು ಸ್ವಚ್ಛಗೊಳಿಸಿ ಅದರಿಂದ ನಾರು, ಬೀಜಗಳನ್ನು ತೆಗೆದುಹಾಕಿ, ಬಿಸಿಲಿನಲ್ಲಿ ಸ್ವಲ್ಪ ಒಣಗಿಸಿ ನಂತರವೇ ಡಬ್ಬದಲ್ಲಿ ಸಂಗ್ರಹಿಸಿಡಿ.
ಗಾಳಿಯಾಡದ ಡಬ್ಬದಲ್ಲಿ ಸಂಗ್ರಹಿಸಿಡಿ:
ಹುಣಸೆಹಣ್ಣನ್ನು ಸಂಗ್ರಹಿಸಲು ಡಬ್ಬದ ಆಯ್ಕೆಯೂ ಮುಖ್ಯವಾಗಿದೆ. ಹುಣಸೆಹಣ್ಣನ್ನು ತೇವಾಂಶದಿಂದ ರಕ್ಷಿಸಲು, ಯಾವಾಗಲೂ ಗಾಳಿಯಾಡದ ಪಾತ್ರೆಯಲ್ಲಿ ಸಂಗ್ರಹಿಸಿ. ಇದು ತೇವಾಂಶ ಮತ್ತು ಗಾಳಿಯ ಸಂಪರ್ಕಕ್ಕೆ ಬರದಂತೆ ತಡೆಯುತ್ತದೆ, ಬೇಗನೆ ಹಾಳಾಗುವುದನ್ನು ತಡೆಯುತ್ತದೆ. ಇದಕ್ಕಾಗಿ ಸ್ವಚ್ಛವಾದ, ಸಂಪೂರ್ಣವಾಗಿ ಒಣಗಿದ ಮತ್ತು ಗಾಳಿಯಾಡದ ಗಾಜಿನ ಡಬ್ಬವನ್ನು ಬಳಸಿ. ಸ್ವಚ್ಛವಾದ ಮತ್ತು ಒಣಗಿದ ಮಣ್ಣಿನ ಪಾತ್ರೆಯನ್ನು ಸಹ ಬಳಸಬಹುದು. ಹುಣಸೆಹಣ್ಣು ನೈಸರ್ಗಿಕ ಆಮ್ಲಗಳನ್ನು ಹೊಂದಿರುತ್ತದೆ, ಆದ್ದರಿಂದ ಅದನ್ನು ಲೋಹದ, ಪ್ಲಾಸ್ಟಿಕ್‌ ಪಾತ್ರೆಯಲ್ಲಿ ದೀರ್ಘಕಾಲ ಇಡುವುದು ಸೂಕ್ತವಲ್ಲ.
ಉಪ್ಪು ಬಳಸಿ:
ಹುಣಸೆಹಣ್ಣನ್ನು ದೀರ್ಘಕಾಲದವರೆಗೆ ಸಂರಕ್ಷಿಸಲು, ನೀವು ಅದಕ್ಕೆ ಸ್ವಲ್ಪ ಉಪ್ಪನ್ನು ಸೇರಿಸಬಹುದು. ಉಪ್ಪು ತೇವಾಂಶವನ್ನು ಹೀರಿಕೊಳ್ಳುತ್ತದೆ ಮತ್ತು ಕೀಟಗಳ ಬಾಧೆಯನ್ನು ತಡೆಯುತ್ತದೆ.
ಇದನ್ನೂ ಓದಿ: ಕಿತ್ತಳೆ ಸಿಪ್ಪೆಯ ಸಾಬೂನು; ಈ ಕೆಮಿಕಲ್‌ ಫ್ರೀ ಸೋಪ್ ತಯಾರಿಸೋದು ಬಲು ಸುಲಭ
ಜಾರ್‌ಗೆ ಬೇವು ಮತ್ತು ಪಲಾವ್ ಎಲೆಗಳನ್ನು ಸೇರಿಸಿ:
ನೀವು ಹುಣಸೆಹಣ್ಣನ್ನು ಸಂಗ್ರಹಿಸುತ್ತಿರುವ ಜಾರ್‌ಗೆ ಬೇವಿನ ಎಲೆ ಅಥವಾ ಪಲಾವ್ ಎಲೆಗಳನ್ನು ಸೇರಿಸಿ. ಈ ಎಲೆಗಳು ನೈಸರ್ಗಿಕ ಸೋಂಕುನಿವಾರಕಗಳಾಗಿವೆ ಮತ್ತು ಹುಣಸೆಹಣ್ಣನ್ನು ಕೀಟಗಳಿಂದ ರಕ್ಷಿಸುತ್ತವೆ.
ಹುಣಸೆ ಹಣ್ಣನ್ನು ಫ್ರೀಜರ್‌ನಲ್ಲೂ ಸಂಗ್ರಹಿಸಿಡಬಹುದು:
ನಿಮ್ಮ ಬಳಿ ಅಗತ್ಯಕ್ಕಿಂತ ಹೆಚ್ಚು ಹುಣಸೆಹಣ್ಣು ಇದ್ದರೆ, ನೀವು ಅದರಿಂದ ಬೀಜಗಳನ್ನು ತೆಗೆದು ಅದರ ತಿರುಳನ್ನು ಬೇರ್ಪಡಿಸಿ, ಅದನ್ನು ಗಾಳಿಯಾಡದ ಡಬ್ಬದಲ್ಲಿಟ್ಟು ಫ್ರೀಜರ್‌ನಲ್ಲಿಡಿ. ಇದು ಹುಣಸೆಹಣ್ಣನ್ನು ಹೆಚ್ಚು ಕಾಲ ತಾಜಾವಾಗಿರಿಸುತ್ತದೆ.
ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 6:40 pm, Mon, 2 November 26