ಮುಖದಲ್ಲಿ ಬ್ಲಾಕ್​ಹೆಡ್ಸ್​ ಹೆಚ್ಚಾಗಲು ಕಾರಣವೇನು?; ಇದಕ್ಕೆ ಪರಿಹಾರವೇನು?

ಕನ್ನಡಿ ಮುಂದೆ ನಿಂತಾಗ ಮೂಗಿನ ಮೇಲಿನ ಕಪ್ಪು ಅಥವಾ ಬಿಳಿ ಕಲೆಗಳನ್ನು ನೋಡಿ ಬೇಸರವಾಗುತ್ತಾ? ಅದನ್ನು ಹೋಗಲಾಡಿಸುವುದು ಹೇಗೆಂದು ಟೆನ್ಷನ್ ಆಗುತ್ತಾ? ಅದಕ್ಕೆ ಇಲ್ಲಿದೆ ಪರಿಹಾರ. ಈ ಬ್ಲಾಕ್ ಹೆಡ್ ಮತ್ತು ವೈಟ್ ಹೆಡ್​ಗಳು ಎಲ್ಲರನ್ನೂ ಕಾಡುವ ಸಮಸ್ಯೆ. ನಮ್ಮ ಚರ್ಮವು 3 ರೀತಿಯ ಗ್ರಂಥಿಗಳನ್ನು ಹೊಂದಿದೆ. ಸೆಬಾಸಿಯಸ್, ಎಕ್ರಿನ್ ಮತ್ತು ಅಪೊಕ್ರೈನ್ ಎಂಬ ಈ ಗ್ರಂಥಿಗಳು ಬಹಳ ಮುಖ್ಯವಾದುದು. ಸೆಬಾಸಿಯಸ್ ಗ್ರಂಥಿಗಳು ನಿಮ್ಮ ದೇಹದಿಂದ ಅನಗತ್ಯ ವಸ್ತುಗಳನ್ನು ತೊಡೆದುಹಾಕಲು ಸಹಾಯ ಮಾಡುವ ತೈಲಗಳನ್ನು ಬಿಡುಗಡೆ ಮಾಡುತ್ತವೆ.

ಕಪ್ಪು ಕೆರಟಿನ್‌ನಿಂದಾಗಿ ಕಪ್ಪು ಬಣ್ಣದಲ್ಲಿದ್ದಾಗ ತೆರೆದ ಕಾಮೆಡೋನ್‌ಗಳನ್ನು ಬ್ಲ್ಯಾಕ್‌ಹೆಡ್ಸ್ ಎಂದು ಕರೆಯಲಾಗುತ್ತದೆ. ಕೂದಲ ಕಿರುಚೀಲಗಳು ಮುಚ್ಚಿಹೋಗಿರುವಾಗ ಈ ಬ್ಲಾಕ್​ಹೆಡ್​ ಉಂಟಾಗುತ್ತದೆ. ಇದು ಹೆಚ್ಚಾಗಿ ಮೂಗಿನ ಮೇಲೆ ಕಾಣಿಸಿಕೊಳ್ಳುತ್ತದೆ. ಜೊತೆಗೆ ಆಗಾಗ ಗಲ್ಲ, ಬೆನ್ನು, ತೋಳುಗಳು ಮತ್ತು ಎದೆಯ ಮೇಲೂ ಕಾಣಿಸಿಕೊಳ್ಳುತ್ತದೆ. ಗರ್ಭಾವಸ್ಥೆ, ಮುಟ್ಟು ಮತ್ತು ಹದಿಹರೆಯದಂತಹ ಹಾರ್ಮೋನುಗಳ ಬದಲಾವಣೆಯ ಸಮಯದಲ್ಲಿ ಈ ಗ್ರಂಥಿಗಳಿಂದ ಅತಿಯಾದ ತೈಲ ಉತ್ಪಾದನೆಯಾಗುತ್ತದೆ. ಇದು ಬ್ಲಾಕ್ ಹೆಡ್ ಉಂಟಾಗಲು ಮತ್ತೊಂದು ಕಾರಣ. ಹಾಗೇ, ಸೌಂದರ್ಯವರ್ಧಕಗಳಲ್ಲಿನ ಕೆಲವು ರಾಸಾಯನಿಕಗಳು ಮತ್ತು ಗ್ರಂಥಿಗಳು ಬಿಡುಗಡೆ ಮಾಡುವ ತೈಲಗಳಲ್ಲಿನ ಲಿನೋಲೆನಿಕ್ ಆಮ್ಲದಲ್ಲಿನ ಬದಲಾವಣೆಗಳಿಂದಾಗಿ ಕೂಡ ಬ್ಲಾಕ್​ ಹೆಡ್ ಉಂಟಾಗುತ್ತದೆ.

ಇದನ್ನೂ ಓದಿ: ಹಾರ್ಮೋನುಗಳ ಬದಲಾವಣೆಯಿಂದ ತ್ವಚೆಯ ಕಾಂತಿ ಕಡಿಮೆಯಾಗುತ್ತಾ?

ಬ್ಲಾಕ್​ಹೆಡ್ಸ್​ ಬಾರದಂತೆ ತಡೆಗಟ್ಟಲು ಚರ್ಮ ಸ್ವಚ್ಛವಾಗಿರುವಂತೆ ಎಚ್ಚರ ವಹಿಸಬೇಕಾದುದು ಅಗತ್ಯ. ಚರ್ಮಕ್ಕೆ ಸಕ್ಕರೆ ಮತ್ತು ಜೇನುತುಪ್ಪದ ಸ್ಕ್ರಬ್ ಮಾಡಿಕೊಳ್ಳಿ. ಇದು ಚರ್ಮವನ್ನು ಎಫ್ಫೋಲಿಯೇಟ್ ಮಾಡುತ್ತದೆ. ಜೇನುತುಪ್ಪದ ಉರಿಯೂತದ ಮತ್ತು ಬ್ಯಾಕ್ಟೀರಿಯಾ ವಿರೋಧಿ ಗುಣಲಕ್ಷಣಗಳು ಎಲ್ಲಾ ಚರ್ಮದ ಪ್ರಕಾರಗಳಿಗೂ ಪ್ರಯೋಜನಕಾರಿಯಾಗಿದೆ. ಜೇನುತುಪ್ಪದ ಫೇಸ್​ಪ್ಯಾಕ್ ಹಾಕಿಕೊಂಡ ನಂತರ ಮುಖವನ್ನು ತೊಳೆಯಲು ಉಗುರು ಬೆಚ್ಚಗಿನ ನೀರನ್ನು ಬಳಸಬಹುದು.

ನಿಮ್ಮ ಮುಖವನ್ನು ಸ್ವಚ್ಛಗೊಳಿಸಲು ಯಾವಾಗಲೂ ಸೌಮ್ಯವಾದ ಸೋಪ್ ಮತ್ತು ಫೇಸ್ ವಾಶ್ ಬಳಸಿ. ರಾಸಾಯನಿಕವಿರುವ ಸೋಪು ಮತ್ತು ಫೇಸ್​ವಾಶ್ ನಿಮ್ಮ ಮುಖದಲ್ಲಿನ ಅಗತ್ಯವಾದ ನೈಸರ್ಗಿಕ ತೈಲಗಳನ್ನು ತೆಗೆದುಹಾಕಬಹುದು. ಇದು ಚರ್ಮದ ತೇವಾಂಶವನ್ನು ಕಡಿಮೆ ಮಾಡುತ್ತದೆ. ಇದು ಶುಷ್ಕತೆ, ಕಿರಿಕಿರಿ ಮತ್ತು ಉರಿಯೂತಕ್ಕೆ ಕಾರಣವಾಗಬಹುದು. ನಿಮ್ಮದು ಒಣ ಚರ್ಮವೋ, ಎಣ್ಣೆ ಚರ್ಮವೋ ಅಥವಾ ನಾರ್ಮಲ್ ಚರ್ಮವೋ ಎಂಬುದನ್ನು ತಿಳಿದುಕೊಂಡು ನಂತರ ಅದಕ್ಕೆ ಸರಿಯಾಗಿ ಹೊಂದುವ ಫೇಸ್​ವಾಶ್, ಮೇಕಪ್ ಉತ್ಪನ್ನಗಳನ್ನು ಬಳಸಿ.

ಇದನ್ನೂ ಓದಿ: ಕಾಂತಿಯುತ ಚರ್ಮ ನಿಮ್ಮದಾಗಲು ದಿನಕ್ಕೆ ಎಷ್ಟು ನೀರು ಕುಡಿಯಬೇಕು?

ನಿಮ್ಮ ಮುಖವನ್ನು ಸ್ವಚ್ಛಗೊಳಿಸಿದ ನಂತರ ಒಣಗಿಸುವುದು ಮುಖ್ಯ. ಹಾಗೆ ಮಾಡಲು ಯಾವಾಗಲೂ ಕ್ಲೀನ್ ಆಗಿರುವ ಟವೆಲ್ ಅನ್ನು ಬಳಸಲು ಮರೆಯದಿರಿ. ಗಲೀಜಾದ ಟವೆಲ್‌ಗಳನ್ನು ಬಳಸುವುದರಿಂದ ನಿಮ್ಮ ಚರ್ಮಕ್ಕೆ ಬ್ಯಾಕ್ಟೀರಿಯಾ ಮತ್ತು ಕೊಳಕು ಅಂಟಿಕೊಳ್ಳುತ್ತದೆ. ಇದು ಸೋಂಕುಗಳು, ಮೊಡವೆಗಳು ಅಥವಾ ಚರ್ಮದ ಕಿರಿಕಿರಿಯನ್ನು ಉಂಟುಮಾಡಬಹುದು. ಮಲಗುವ ಮೊದಲು ಮೇಕ್ಅಪ್ ಅನ್ನು ತೆಗೆದುಕೊಳ್ಳದಿದ್ದರೆ ಅದು ಚರ್ಮದ ರಂಧ್ರಗಳನ್ನು ಮುಚ್ಚಬಹುದು, ಮೊಡವೆಗಳಿಗೆ ಕಾರಣವಾಗಬಹುದು. ಆದ್ದರಿಂದ ಈ ಸಮಸ್ಯೆಗಳನ್ನು ತಪ್ಪಿಸಲು ಮಲಗುವ ಮುನ್ನ ನಿಮ್ಮ ಮುಖವನ್ನು ಚೆನ್ನಾಗಿ ತೊಳೆದುಕೊಳ್ಳಲು ಮರೆಯಬೇಡಿ.

ಇನ್ನಷ್ಟು ಜೀವನಶೈಲಿಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ