ಅತ್ತೆ ಸೊಸೆ ಜಗಳ ಶುರುವಾಗುವುದೇ ಇಲ್ಲಿಂದ!

ವೈವಾಹಿಕ ಜೀವನದಲ್ಲಿ ಎಲ್ಲವೂ ಸರಿಯಿದ್ದರೂ ಅದೆಷ್ಟೋ ಮನೆಗಳಲ್ಲಿ ಅತ್ತೆ ಸೊಸೆ ನಡುವಿನ ಸಂಬಂಧವು ಸರಿ ಇರುವುದೇ ಇಲ್ಲ. ಹೌದು, ಈ ಅತ್ತೆ ಸೊಸೆ ಒಂದೇ ಮನೆಯಲ್ಲಿ ಇದ್ದ ಮೇಲೆ ಜಗಳ, ಗಲಾಟೆ ಮಾಮೂಲಿ. ಸಣ್ಣ-ಪುಟ್ಟ ವಿಷಯಕ್ಕೂ ಇಬ್ಬರ ನಡುವೆ ಜಗಳಗಳು ನಡೆಯುತ್ತಲೇ ಇರುತ್ತದೆ. ಇದ್ರಿಂದ ಮನೆಯ ನೆಮ್ಮದಿಯಂತೂ ಹಾಳು, ಅದಲ್ಲದೇ ಅತ್ತೆ ಸೊಸೆಯಿಬ್ಬರೂ ಆಡಿಕೊಳ್ಳುವ ಬಾಯಿಗೂ ಸಿಕ್ಕಿಕೊಳ್ಳಬೇಕಾಗುತ್ತದೆ.

ಅತ್ತೆ ಸೊಸೆ ಜಗಳಕ್ಕೆ ಕಾರಣಗಳಿವು

• ಸೊಸೆಯನ್ನು ಒಪ್ಪಿಕೊಳ್ಳದ ಅತ್ತೆ : ಒಂದು ವೇಳೆ ಮಗನದ್ದು ಪ್ರೇಮ ವಿವಾಹವಾದರೆ, ಅತ್ತೆ ಮನಸ್ಸಿನಲ್ಲಿ ತಾನು ನೋಡಿದ ಹುಡುಗಿಯನ್ನು ಮಗನು ಮದುವೆಯಾಗಲಿಲ್ಲ ಎನ್ನುವುದು ಸದಾ ಕಾಡುತ್ತಿರುತ್ತದೆ. ಹೀಗಾಗಿ ಅತ್ತೆಯೂ ಸೊಸೆಯನ್ನು ಒಪ್ಪಿಕೊಳ್ಳಲು ಸಿದ್ಧಳಿರುವುದಿಲ್ಲ. ಸೊಸೆಯೂ ಮಾಡುವ ಎಲ್ಲಾ ಕೆಲಸದಲ್ಲಿಯೂ ತಪ್ಪನ್ನು ಹುಡುಕುತ್ತ, ಅದೇ ಜಗಳಕ್ಕೆ ಕಾರಣವಾಗುತ್ತದೆ.
• ಅಸ್ತಿತ್ವ ಕಳೆದುಕೊಳ್ಳುವ ಭಯ : ಇಷ್ಟು ದಿನ ಏನೇ ಮಾಡುವುದಾದರೂ ತನ್ನನ್ನು ಕೇಳುತ್ತಿದ್ದ ಮಗ, ಆದರೆ ಈಗ ಪತ್ನಿ ಮಾತು ಕೇಳುತ್ತಾನೆ. ತನ್ನ ಮಾತಿಗೆ ಬೆಲೆಯಿಲ್ಲ, ತನಗೆ ಅಸ್ತಿತ್ವವೇ ಇಲ್ಲ, ಸೊಸೆಯೂ ನನ್ನಿಂದ ಮಗನನ್ನು ದೂರ ಮಾಡುತ್ತಿದ್ದಾಳೆ ಎನ್ನುವ ಭಯದಿಂದಲೇ ಅತ್ತೆ ಸೊಸೆ ನಡುವೆ ಜಗಳಗಳು ನಡೆಯುತ್ತವೆ.
• ತಾವೇ ಸರಿ ಎನ್ನುವ ಮನೋಭಾವ : ಅತ್ತೆ ಸೊಸೆ ಇಬ್ಬರೂ ಕೂಡ ತಾವೇ‌ ಸರಿ, ತಮ್ಮಿಂದ ಏನೂ ತಪ್ಪು ಆಗಿಯೇ ಇಲ್ಲ ಎಂದುಕೊಳ್ಳುವುದರಿಂದಲೇ ಹೆಚ್ಚಿನ ಮನೆಯಲ್ಲಿ ಜಗಳಗಳು ಆರಂಭವಾಗುತ್ತದೆ. ಇಲ್ಲಿ ಅತ್ತೆ ಸೊಸೆ ಇಬ್ಬರೂ ಕೂಡ ತಾವೇ ಸರಿಯೆಂದುಕೊಳ್ಳದೇ ತಪ್ಪಿದ್ದರೆ ಒಪ್ಪಿಕೊಂಡು ಹೊಂದಿಕೊಂಡು ಹೋಗುವುದು ಮುಖ್ಯ.
• ಅಧಿಕಾರ ಸೊಸೆ ಪಾಲಾದರೆ ಎನ್ನುವ ಆತಂಕ : ಮನೆಯ ಎಲ್ಲಾ ಆಗು ಹೋಗುಗಳನ್ನು ನೋಡಿಕೊಳ್ಳುತ್ತಿದ್ದ ಅತ್ತೆಯೂ, ಮಗನಿಗೆ ಮದುವೆಯಾದ ಕೂಡಲೇ ಎಲ್ಲಾ ಅಧಿಕಾರವು ಸೊಸೆಯ ಪಾಲಾಗುತ್ತದೆ ಎನ್ನುವ ಭಯವಿರುತ್ತದೆ. ಇದನ್ನು ಯಾರೊಂದಿಗೂ ಹೇಳಿಕೊಳ್ಳಲಾಗದೇ ಅತ್ತೆಯೂ ಸೊಸೆಯೊಂದಿಗೆ ಜಗಳಕ್ಕೆ ಇಳಿಯಬಹುದು.

ಜೀವನಶೈಲಿಗೆ ಸಂಬಂಧಿಸಿದ ಇನ್ನಷ್ಟು ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ: