ಅಸ್ಸಾಂ 2 ಬೋಟ್​​ಗಳ ಡಿಕ್ಕಿ: 6 ಜನರನ್ನು ಬಂಧಿಸಿದ ಪೊಲೀಸರು, ಹಲವರ ವಿಚಾರಣೆ

ಎರಡೂ ಬೋಟ್​ಗಳ ಮಾಲೀಕರಿಗೂ ಸಮನ್ಸ್ ನೀಡಲಾಗಿದ್ದು, ವಿಚಾರಣೆಗೆ ಹಾಜರಾಗಬೇಕಾಗುತ್ತದೆ. ನಾವು ಕ್ರಿಮಿನಲ್ ಕೇಸ್​​ ದಾಖಲಿಸಿಯೇ ತನಿಖೆ ಶುರು ಮಾಡಿದ್ದೇವೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಅಸ್ಸಾಂ 2 ಬೋಟ್​​ಗಳ ಡಿಕ್ಕಿ: 6 ಜನರನ್ನು ಬಂಧಿಸಿದ ಪೊಲೀಸರು, ಹಲವರ ವಿಚಾರಣೆ
ಅಸ್ಸಾಂ ಬೋಟ್​ ದುರಂತ

ಅಸ್ಸಾಂನ ಬ್ರಹ್ಮಪುತ್ರಾ ನದಿಯಲ್ಲಿ((Brahmaputra River) ಸೆಪ್ಟೆಂಬರ್​ 8ರಂದು ನಡೆದ ಎರಡು ಬೋಟ್​​ಗಳ ಡಿಕ್ಕಿಗೆ ಸಂಬಂಧಪಟ್ಟಂತೆ ಪೊಲೀಸರು ಇದೀಗ 6 ಮಂದಿಯನ್ನು ಬಂಧಿಸಿದ್ದಾರೆ. ಹಾಗೇ, ವಿಚಾರಣೆಗಾಗಿ ಮೂವರನ್ನು ವಶಕ್ಕೆ ಪಡೆದಿದ್ದಾರೆ. ಅಸ್ಸಾಂನ ಜೋರ್ಹತ್​ ಜಿಲ್ಲೆಯ ನೇಮತಿಘಾಟ್​ ಎಂಬಲ್ಲಿ ಎರಡು ಬೋಟ್​ಗಳು ಡಿಕ್ಕಿಯಾಗಿದ್ದವು. ಎರಡೂ ಬೋಟ್​​ಗಳಿಂದ ಸುಮಾರು 90 ಮಂದಿ ಪ್ರಯಾಣಿಕರಿದ್ದರು. ಅದರಲ್ಲಿ ಒಬ್ಬರು ಮೃತಪಟ್ಟಿದ್ದಾರೆ. ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿ, ಸೂಕ್ತ ತನಿಖೆ ನಡೆಸುವುದಾಗಿ ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವಾ ಶರ್ಮಾ ಹೇಳಿದ್ದರು.  ಹಾಗೇ, ಘಟನೆ ಸಂಬಂಧ ಕ್ರಿಮಿನಲ್​ ಪ್ರಕರಣ ದಾಖಲಿಸುವಂತೆ ಪೊಲೀಸರಿಗೆ ಸೂಚನೆ ನೀಡಿದ್ದರು. 

ಇದೀಗ  ತನಿಖೆಯ ಬೆಳವಣಿಗೆಗಳ ಬಗ್ಗೆ ಇಂಡಿಯಾ ಟುಡೆ ಮಾಧ್ಯಮಕ್ಕೆ ಮಾಹಿತಿ ನೀಡಿರುವ ಜೋರ್ಹತ್​​ ಜಿಲ್ಲಾ ಎಸ್​ಪಿ ಅಂಕುರ್​ ಜೈನ್​, ಜೋರ್ಹತ್​ ಪೊಲೀಸರು ಈಗಾಗಲೇ ಆರು ಮಂದಿಯನ್ನು ಬಂಧಿಸಿದ್ದಾರೆ. ಮಜುಲಿ ಜಿಲ್ಲೆ ಪೊಲೀಸರು ಮೂವರನ್ನು ವಶಕ್ಕೆ ಪಡೆದು, ವಿಚಾರಣೆ ನಡೆಸುತ್ತಿದ್ದಾರೆ ಎಂದು ಹೇಳಿದ್ದಾರೆ.  ಹಾಗೇ, ತಾವು ಕ್ರಿಮಿನಲ್​ ಕೇಸ್​ ದಾಖಲಿಸಿಕೊಂಡೇ ತನಿಖೆ ನಡೆಸುತ್ತಿರುವುದಾಗಿ ಮಾಹಿತಿ ನೀಡಿದ್ದಾರೆ. ಇನ್ನು ಬಂಧಿತ ಆರೂ ಮಂದಿ ಒಳನಾಡು ಜಲಸಾರಿಗೆ ವಿಭಾಗದ ಸಿಬ್ಬಂದಿಯೇ ಆಗಿದ್ದಾರೆ. ಅಂದು ನಡೆದ ಬೋಟ್​ ಆ್ಯಕ್ಸಿಡೆಂಟ್​​ನಲ್ಲಿ ಮೃತಪಟ್ಟವರ ಸಂಖ್ಯೆ ಕಡಿಮೆಯಾದರೂ ಇದು ದೊಡ್ಡ ದುರಂತವೇ ಹೌದು ಎಂದು ಅಂಕುರ್ ಜೈನ್​ ಹೇಳಿದ್ದಾರೆ.

ಇನ್ನು ಘಟನೆ ಸಂಬಂಧ ಹಲವರ ಹೇಳಿಕೆಗಳು ನಮಗೆ ಅಗತ್ಯವಿದೆ. ಎರಡೂ ಬೋಟ್​ಗಳ ಮಾಲೀಕರಿಗೂ ಸಮನ್ಸ್ ನೀಡಲಾಗಿದ್ದು, ವಿಚಾರಣೆಗೆ ಹಾಜರಾಗಬೇಕಾಗುತ್ತದೆ.  ಜೋಗನ್ ದಾಸ್, ಧನ್​ಬರ್​ ದಾಸ್, ಬಿಜು ಕುಮಾರ್ ದಾಸ್, ಜಯಂತ ದತ್ತ, ಬಿನೋದ್ ಬರುವಾ ಮತ್ತು ಬಾಬುಲ್ ನಿಯೋಗ್ ಬಂಧಿತರು ಎಂದು ಅಂಕುರ್ ಜೈನ್ ಮಾಹಿತಿ ನೀಡಿದ್ದಾರೆ.

ಅಂದು ಜೋರ್ಹತ್​ನ ನೇಮತಿ ಘಾಟ್​ನಲ್ಲಿ ಸಂಜೆ 4.30ರ ವೇಳೆಗೆ ಈ ದುರಂತ ಸಂಭವಿಸಿತ್ತು. ಎದುರು ಬದುರಾಗಿ ಚಲಿಸುತ್ತಿದ್ದ ಎರಡು ಬೋಟ್​ಗಳು ಡಿಕ್ಕಿ ಹೊಡೆದಿದ್ದವು.  ಗುವಾಹಟಿಯಿಂದ 350 ಕಿ.ಮೀ. ದೂರದಲ್ಲಿ ಈ ಘಟನೆ ನಡೆದಿದೆ. ಒಂದು ಬೋಟ್ ಬ್ರಹ್ಮಪುತ್ರನದಿಯ ದ್ವೀಪವಾದ ಮಜುಲಿ ಕಡೆಯಿಂದ ನೇಮತಿ ಘಾಟ್​ಗೆ ಬರುತ್ತಿತ್ತು. ಇನ್ನೊಂದು ಬೋಟ್ ನೇಮತಿ ಘಾಟ್​ನಿಂದ ವಾಪಾಸ್ ತೆರಳುತ್ತಿತ್ತು. ಹೀಗಾಗಿ ಘಟನೆ ಬಗ್ಗೆ ಜೋರ್ಹತ್ ಮತ್ತು ಮಜುಲಿ ಎರಡೂ ಜಿಲ್ಲೆಗಳ ಪೊಲೀಸರೂ ತನಿಖೆ ಶುರು ಮಾಡಿದ್ದಾರೆ.

ಇದನ್ನೂ ಓದಿ: ಅಸ್ಸಾಂ ಬೋಟ್​​ಗಳ ಡಿಕ್ಕಿ; ಕ್ರಿಮಿನಲ್​ ಕೇಸ್​ ದಾಖಲಿಸುವಂತೆ ಪೊಲೀಸರಿಗೆ ಸೂಚಿಸಿದ ಸಿಎಂ ಹಿಮಂತ ಬಿಸ್ವಾ ಶರ್ಮಾ

ಚಿಕ್ಕಬಳ್ಳಾಪುರ: ಬೀದಿ ನಾಯಿಗೆ ಅದ್ದೂರಿ ಹುಟ್ಟುಹಬ್ಬ ಆಚರಣೆ; ಕೇಕ್ ಕತ್ತರಿಸಿ ಸನ್ಮಾನ ಮಾಡಿದ ಸ್ಥಳೀಯರು

Click on your DTH Provider to Add TV9 Kannada