ರಾಹುಲ್ ಗಾಂಧಿ ಸುಂದರವಾಗಿಯೇ ಇದ್ದಾರೆ, ಆದರೂ ಸದ್ದಾಂ ಹುಸೇನ್ ರೀತಿ ಕಾಣುತ್ತಾರೆ; ಅಸ್ಸಾಂ ಸಿಎಂ ಮತ್ತೆ ಲೇವಡಿ

ನವದೆಹಲಿ: ರಾಹುಲ್ ಗಾಂಧಿ (Rahul Gandhi) ನೋಡಲು ಚೆನ್ನಾಗಿಯೇ ಕಾಣುತ್ತಾರೆ. ಆದರೆ, ಅವರು ಗಡ್ಡ ಬಿಟ್ಟಿರುವುದರಿಂದ ಥೇಟ್ ಸದ್ದಾಂ ಹುಸೇನ್ (Saddam Hussein) ರೀತಿಯೇ ಕಾಣುತ್ತಾರೆ ಎಂದು ಅಸ್ಸಾಂ ಮುಖ್ಯಮಂತ್ರಿ ಹಾಗೂ ಗುಜರಾತ್ ವಿಧಾನಸಭಾ ಚುನಾವಣೆಯ ಬಿಜೆಪಿ ಸ್ಟಾರ್ ಪ್ರಚಾರಕ ಹಿಮಾಂತ ಬಿಸ್ವ ಶರ್ಮ ಲೇವಡಿ ಮಾಡಿದ್ದಾರೆ. ಈ ಹಿಂದೆ ಕೂಡ ರಾಹುಲ್ ಗಾಂಧಿಯನ್ನು ಟೀಕಿಸಿದ್ದಕ್ಕೆ ಹಿಮಾಂತ ಬಿಸ್ವ ಶರ್ಮ (Himanta Biswa Sarma) ವಿವಾದಕ್ಕೀಡಾಗಿದ್ದರು. ಇದೀಗ ಮತ್ತೆ ಅದನ್ನೇ ಪುನರುಚ್ಛರಿಸಿರುವ ಅವರು, ರಾಹುಲ್ ಗಾಂಧಿ ಬಹಳ ಗ್ಲಾಮರಸ್ ವ್ಯಕ್ತಿ. ಆದರೆ, ಅವರು ಗಡ್ಡ ಬಿಟ್ಟಿರುವುದರಿಂದ ಸದ್ದಾಂ ಹುಸೇನ್ ರೀತಿ ಕಾಣುತ್ತಿದ್ದಾರೆ ಅಷ್ಟೆ ಎಂದು ತಮಾಷೆ ಮಾಡಿದ್ದಾರೆ.

ಈ ಹಿಂದೆ ರಾಹುಲ್ ಗಾಂಧಿ ಬಗ್ಗೆ ನೀಡಿದ್ದ ಹೇಳಿಕೆಯನ್ನು ಸಮರ್ಥಿಸಿಕೊಂಡಿರುವ ಸಿಎಂ ಹಿಮಾಂತ ಬಿಸ್ವ ಶರ್ಮ, ರಾಹುಲ್ ಗಾಂಧಿ ಅವರ ಕಾರ್ಯಗಳ ಬಗ್ಗೆ ನಾನು ಪ್ರತಿಕ್ರಿಯಿಸಿಲ್ಲ. ಅವರ ಲುಕ್ ಹೇಗಿದೆ ಎಂದು ಮಾತ್ರ ಹೇಳಿದ್ದೇನೆ ಎಂದು ಹೇಳಿದ್ದಾರೆ. ಇದಕ್ಕೂ ಮುನ್ನ ಅಸ್ಸಾಂ ಸಿಎಂ ಹಿಮಾಂತ ಬಿಸ್ವ ಶರ್ಮ ಗಡ್ಡ ಬಿಟ್ಟಿರುವ ರಾಹುಲ್ ಗಾಂಧಿ ಸೇಮ್ ಸದ್ದಾಂ ಹುಸೇನ್ ರೀತಿ ಕಾಣುತ್ತಾರೆ ಎಂದು ವಿವಾದಾತ್ಮಕ ಹೇಳಿಕೆ ನೀಡಿದ್ದರು.

ಇದನ್ನೂ ಓದಿ: ರಾಹುಲ್ ಗಾಂಧಿ ನಿಮ್ಮ ಮನಸ್ಸಿನಲ್ಲಿ ಇದ್ದಾರೆ, ನನ್ನಲ್ಲಿ ಅಲ್ಲ: ಪತ್ರಕರ್ತರ ಪ್ರಶ್ನೆಗೆ ವಯನಾಡ್ ಸಂಸದರ ಉತ್ತರ

ರಾಹುಲ್ ಗಾಂಧಿ ಸುಂದರವಾಗಿ ಕಾಣುತ್ತಿದ್ದಾರೆ. ಅವರೊಬ್ಬ ಗ್ಲಾಮರಸ್ ವ್ಯಕ್ತಿ. ಆದರೆ, ಸದ್ಯಕ್ಕೆ ಅವರ ಫೋಟೋಗೂ, ಸದ್ದಾಂ ಹುಸೇನ್ ಫೋಟೋಗೂ ಹೋಲಿಕೆ ಮಾಡಿ ನೋಡಿದರೆ ನಾನು ಹೇಳುವುದು ಸತ್ಯವೆಂದು ನಿಮಗೇ ಗೊತ್ತಾಗುತ್ತದೆ. ನಾನು ರಾಹುಲ್ ಗಾಂಧಿಗೆ ಕೇವಲ ಸಲಹೆಯನ್ನಷ್ಟೇ ನೀಡಿದ್ದೇನೆ. ಅವರು ಗಡ್ಡ ಬೋಳಿಸಿಕೊಂಡರೆ ಜವಾಹರಲಾಲ್ ನೆಹರು ಅವರಂತೆ ಕಾಣುತ್ತಾರೆ ಎಂದು ಅಸ್ಸಾಂ ಸಿಎಂ ಹೇಳಿದ್ದಾರೆ.

ಇದನ್ನೂ ಓದಿ: ರಾಹುಲ್ ಗಾಂಧಿ ಸದ್ದಾಂ ಹುಸೇನ್​​ನಂತೆ ಕಾಣುತ್ತಿದ್ದಾರೆ: ಅಸ್ಸಾಂ ಸಿಎಂ ಹಿಮಂತ ಬಿಸ್ವಾ ಶರ್ಮಾ

ಕಳೆದ ತಿಂಗಳು, ಹಿಮಂತ ಬಿಸ್ವಾ ಶರ್ಮಾ ಅವರು ಭಾರತ್ ಜೋಡೋ ಯಾತ್ರೆಯ ಸಮಯದಲ್ಲಿ ರಾಹುಲ್ ಗಾಂಧಿಯವರ ಹೊಸ ಲುಕ್ ಅನ್ನು ಸದ್ದಾಂ ಹುಸೇನ್‌ಗೆ ಹೋಲಿಸಿದ್ದರು. ರಾಹುಲ್ ಗಾಂಧಿ ಸರ್ದಾರ್ ವಲ್ಲಭಭಾಯಿ ಪಟೇಲ್, ಜವಾಹರಲಾಲ್ ನೆಹರು ಅಥವಾ ಮಹಾತ್ಮ ಗಾಂಧಿಯಂತೆ ಕಾಣಲು ಪ್ರಯತ್ನಿಸಿದರೆ ಅವರಿಗೇ ಒಳ್ಳೆಯದು. ಅದು ಬಿಟ್ಟು ಸದ್ದಾಂ ಹುಸೇನ್ ರೀತಿ ಗಡ್ಡ ಬಿಟ್ಟಿರುವುದೇಕೆ? ಎಂದು ಅವರು ಹೇಳಿದ್ದರು.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ