ವರ್ಕ್ ಫ್ರಮ್ ಹೋಂ ಆಸೆಯಿಂದ 54 ಲಕ್ಷ ರೂ. ಕಳೆದುಕೊಂಡ ಮಹಿಳೆ
Online Fraud: ಮನೆಯಲ್ಲೇ ಕುಳಿತು ಕೆಲಸ ಮಾಡಿ ಸಾಕಷ್ಟು ಹಣ ಗಳಿಸಬಹುದು ಎಂಬ ಮೆಸೇಜ್ಗಳು ನಿಮ್ಮ ಮೊಬೈಲ್ಗೂ ಬಂದಿರಬಹುದು. ಸ್ಮಾರ್ಟ್ ಫೋನ್ ಇದ್ದರೆ ಕೇವಲ ಕೆಲವು ವೆಬ್ಸೈಟ್ಗಳಿಗೆ ರಿವ್ಯೂ ಕೊಡುವ ಮೂಲಕ, ಕೆಲವು ಪೋಸ್ಟ್ಗಳಿಗೆ ಲೈಕ್ ಕೊಡುವ ಮೂಲಕ ಸಾವಿರಾರು ರೂ. ದುಡಿಯಬಹುದು ಎಂದು ನಂಬಿಸುವವರಿದ್ದಾರೆ. ಆದರೆ, ಅದನ್ನು ನಂಬಿ ಯಾಮಾರಿದ ಮಹಿಳೆಯೊಬ್ಬರ ಕತೆ ಇಲ್ಲಿದೆ.
Updated on:May 17, 2024 | 6:04 PM
ಮುಂಬೈ: ಮುಂಬೈನಲ್ಲಿ ಗರ್ಭಿಣಿ (Pregnant) ಮಹಿಳೆಯೊಬ್ಬರು ಆನ್‌ಲೈನ್ ವಂಚನೆ ಪ್ರಕರಣದಲ್ಲಿ (Online Fraud Case) 54 ಲಕ್ಷಕ್ಕೂ ಹೆಚ್ಚು ಹಣವನ್ನು ಕಳೆದುಕೊಂಡಿದ್ದಾರೆ. ವರ್ಕ್ ಫ್ರಂ ಹೋಂ (Work From Home) ಮಾಡುವವರಿಗೆ ಆಮಿಷಗಳನ್ನೊಡ್ಡುವ ಹಗರಣಗಳ ಅಪಾಯಗಳನ್ನು ಇದು ಎತ್ತಿ ತೋರಿಸುತ್ತದೆ. ನವ ಮುಂಬೈನಲ್ಲಿ ಇತ್ತೀಚಿನ ಘಟನೆಯೊಂದು ಆನ್‌ಲೈನ್ ವಂಚನೆಯ ಅಪಾಯಗಳನ್ನು ತಿಳಿಸಿದೆ. ವಿಶೇಷವಾಗಿ ಮನೆಯಿಂದ ಕೆಲಸ ಮಾಡುವ ಅವಕಾಶಗಳನ್ನು ಹುಡುಕುವವರಿಗೆ ಏನೆಲ್ಲ ಅಪಾಯಗಳು ಎದುರಾಗಬಹುದು ಎಂಬುದನ್ನು ತಿಳಿಯುವುದು ಅಗತ್ಯ.
ಸುದ್ದಿ ಸಂಸ್ಥೆ ಪಿಟಿಐ ವರದಿಯ ಪ್ರಕಾರ, ಐರೋಲಿಯ 37 ವರ್ಷದ ಗರ್ಭಿಣಿ ಮಹಿಳೆ 54 ಲಕ್ಷ ರೂ. ಹಣವನ್ನು ಕಳೆದುಕೊಂಡಿದ್ದಾರೆ. ಕಂಪನಿಯಿಂದ ಹೆರಿಗೆ ರಜೆ ಪಡೆದು ಆನ್‌ಲೈನ್‌ನಲ್ಲಿ ಹೆಚ್ಚುವರಿ ಆದಾಯ ಗಳಿಸುವ ಮಾರ್ಗಗಳನ್ನು ಹುಡುಕುತ್ತಿದ್ದ ಮಹಿಳೆಗೆ ಫ್ರೀಲಾನ್ಸ್ ಕೆಲಸದ ಭರವಸೆ ನೀಡಿ ಆಮಿಷ ಒಡ್ಡಲಾಗಿತ್ತು.
ಇದನ್ನೂ ಓದಿ: ಜಾಹೀರಾತು ನಂಬಿ ಮೋಸಹೋದ ಮಹಿಳೆ; DGF ಗೋಲ್ಡ್ ಆ್ಯಂಡ್ ಡೈಮಂಡ್ಸ್ ಕಂಪನಿ ವಿರುದ್ದ ದೂರು
ವಂಚಕರು ಆಕೆಗೆ ಬಹಳಸರಳವಾದ ಕೆಲಸವನ್ನು ನೀಡುವುದಾಗಿ ಹೇಳಿದರು. ಕಂಪನಿಗಳಿಗೆ ರೇಟಿಂಗ್ ನೀಡುವುದು ಮತ್ತು ರೆಸ್ಟೋರೆಂಟ್‌ಗಳಿಗೆ ರಿವ್ಯೂ ನೀಡುವ ಕೆಲಸವನ್ನು ಆಕೆಗೆ ನೀಡಲಾಗಿತ್ತು. ಅಂತಹ 5 ಕಾರ್ಯಗಳನ್ನು ಪೂರ್ಣಗೊಳಿಸಿದ ನಂತರ ದುಡ್ಡು ನೀಡುವುದಾಗಿ ಆಕೆಗೆ ತಿಳಿಸಲಾಗಿತ್ತು.
ಅವರ ಮಾತನ್ನು ನಂಬಿದ ಮಹಿಳೆ ಅವರು ನೀಡಿದ ಸೂಚನೆಗಳನ್ನು ಅನುಸರಿಸಿ ಮೇ 7 ಮತ್ತು 10ರ ನಡುವೆ ವಿವಿಧ ಖಾತೆಗಳಿಗೆ ಒಟ್ಟು 54,30,000 ರೂ.ಗಳನ್ನು ಪಾವತಿಸಿದ್ದಾರೆ. ಆದರೆ, ಕಾರ್ಯಗಳನ್ನು ಪೂರ್ಣಗೊಳಿಸಿದ ನಂತರ, ವಂಚಕರನ್ನು ಸಂಪರ್ಕಿಸಲು ಸಾಧ್ಯವಾಗಲಿಲ್ಲ. ಅವರು ಆಕೆಯ ಫೋನ್ಗೆ ಉತ್ತರಿಸಲಿಲ್ಲ. ಇದರಿಂದ ಆಕೆಗೆ ತಾನು ಮೋಸ ಹೋಗಿರುವುದು ಅರಿವಾಯಿತು.
ಇದನ್ನೂ ಓದಿ: ಹುಬ್ಬಳ್ಳಿ: ಮಗು ಆಗುತ್ತಿದ್ದಂತೆ ಪತ್ನಿ ಬಿಟ್ಟು ಪರಾರಿಯಾದ ಪತಿ; ಅನೇಕ ಹೆಣ್ಮಕ್ಕಳಿಗೆ ಮೋಸ ಮಾಡಿರುವ ಆರೋಪ
ಆಕೆ ನವ ಮುಂಬೈ ಸೈಬರ್ ಪೊಲೀಸರಿಗೆ ಘಟನೆಯ ಕುರಿತು ದೂರು ನೀಡಿದರು. ಸದ್ಯ ಪೊಲೀಸರು ಅಪರಾಧದ ತನಿಖೆ ನಡೆಸುತ್ತಿದ್ದಾರೆ. ಇದುವರೆಗೂ ತಪ್ಪಿತಸ್ಥರ ಬಗ್ಗೆ ಯಾವುದೇ ಮಾಹಿತಿ ಲಭ್ಯವಾಗಿಲ್ಲ.
ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 6:04 pm, Fri, 17 May 24
