Covid 4th Wave: ಚೀನಾ, ಯುರೋಪ್ನಲ್ಲಿ ಹೆಚ್ಚಿದ ಕೊರೊನಾವೈರಸ್ ಕೇಸ್; ಭಾರತದಲ್ಲಿ ಕೊವಿಡ್ 4ನೇ ಅಲೆಯ ಭೀತಿ
ಜೂನ್ ತಿಂಗಳಲ್ಲಿ ಭಾರತದಲ್ಲಿ ಕೊವಿಡ್-19 ನಾಲ್ಕನೇ ಅಲೆ ಉಂಟಾಗುತ್ತದೆ ಎಂದು ಸೂಚಿಸುವ ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಐಐಟಿ) ಕಾನ್ಪುರ ನಡೆಸಿದ ಅಧ್ಯಯನವನ್ನು ನಾವು ಮರೆಯುವಂತಿಲ್ಲ.
Updated on: Mar 25, 2022 | 4:36 PM
ನವದೆಹಲಿ: ಕಳೆದ 2 ವರ್ಷಗಳಿಂದ ಇಡೀ ವಿಶ್ವವನ್ನು ಕೊರೊನಾವೈರಸ್ (Coronavirus) ಆವರಿಸಿಕೊಂಡಿದೆ. ಇದೀಗ ಭಾರತ ಸೇರಿದಂತೆ ಬಹುತೇಕ ದೇಶಗಳಲ್ಲಿ ಕೊರೊನಾ ಲಸಿಕೆ (Covid Vaccine) ಪ್ರಮಾಣ ಹೆಚ್ಚಾಗಿರುವುದರಿಂದ ಭಾರತವು ಮಾರ್ಚ್ 31ರಿಂದ ಎಲ್ಲಾ ಕೋವಿಡ್ -19 ನಿರ್ಬಂಧಗಳನ್ನು ತೊಡೆದುಹಾಕಲು ಯೋಜಿಸುತ್ತಿದೆ. ಆದರೆ, ಇತರ ದೇಶಗಳಾದ ಚೀನಾ, ಅಮೆರಿಕಾ ಮತ್ತು ಇತರ ದಕ್ಷಿಣ ಏಷ್ಯಾದ ದೇಶಗಳಲ್ಲಿ ಕೊವಿಡ್ ಪ್ರಕರಣಗಳಲ್ಲಿ (COVID Cases) ಭಾರೀ ಏರಿಕೆ ಕಂಡಿವೆ ಎಂಬುದನ್ನು ಯಾರೂ ಮರೆಯಬಾರದು. ಈ ಹಿಂದೆಯೂ ಈ ದೇಶಗಳು ಕೋವಿಡ್ ಪ್ರಕರಣಗಳೊಂದಿಗೆ ಉತ್ತುಂಗದಲ್ಲಿರುವಾಗ ಭಾರತವು ಕೋವಿಡ್ ಮುಕ್ತವಾಗಿತ್ತು. ಹಾಗೇ, ಈ ದೇಶಗಳಲ್ಲಿ ಕೊರೊನಾವೈರಸ್ ಪ್ರಕರಣಗಳಲ್ಲಿ ಇಳಿಕೆಯನ್ನು ಕಾಣಲು ಪ್ರಾರಂಭಿಸಿದಾಗ ಭಾರತದಲ್ಲಿ ಮತ್ತೊಂದೆಡೆ ಕೊವಿಡ್ ಕೇಸುಗಳ ಏರಿಕೆಯಾಗಲಾರಂಭಿಸಿತು.
ಅಲ್ಲದೆ, 2022ರ ಜೂನ್ ತಿಂಗಳಲ್ಲಿ ಭಾರತದಲ್ಲಿ ಕೊವಿಡ್-19 ನಾಲ್ಕನೇ ಅಲೆ ಉಂಟಾಗುತ್ತದೆ ಎಂದು ಸೂಚಿಸುವ ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಐಐಟಿ) ಕಾನ್ಪುರ ನಡೆಸಿದ ಅಧ್ಯಯನವನ್ನು ನಾವು ಮರೆಯುವಂತಿಲ್ಲ. ಭಾರತದಲ್ಲಿ ಕೊವಿಡ್ ಕೇಸುಗಳ ಸಂಖ್ಯೆ ಕಡಿಮೆಯಾಗುತ್ತಿದೆ. ರಾಷ್ಟ್ರೀಯ ರೋಗ ನಿಯಂತ್ರಣ ಕೇಂದ್ರ (ಎನ್‌ಸಿಡಿಸಿ) ಪ್ರಕಾರ, ಒಮಿಕ್ರಾನ್ ಉಪ-ವಂಶಾವಳಿಯ ಬಿಎ.2 ದ ಹರಡುವಿಕೆಯು ಭಾರತದಲ್ಲಿ ಕ್ರಮೇಣ ಹೆಚ್ಚುತ್ತಿದೆ.
ಈ ಕುರಿತು ಮಾಹಿತಿ ನೀಡಿರುವ ಎನ್‌ಸಿಡಿಸಿಯ ನಿರ್ದೇಶಕ ಸುಜೀತ್ ಕುಮಾರ್ ಸಿಂಗ್, “ಈ ಹಿಂದೆ ಪ್ರಯಾಣಿಕರಿಂದ ಸಂಗ್ರಹಿಸಲಾದ ಮಾದರಿಗಳಲ್ಲಿ ಬಿಎ.1 ರೂಪಾಂತರವು ಪ್ರಬಲವಾಗಿತ್ತು. ಈಗ ಸಮುದಾಯ ಸೆಟ್ಟಿಂಗ್‌ಗಳಲ್ಲಿ ಬಿಎ.2 ಕೇಸುಗಳು ಕ್ರಮೇಣ ಹೆಚ್ಚುತ್ತಿದೆ” ಎಂದು ನಾವು ಕಂಡುಕೊಂಡಿದ್ದೇವೆ ಎಂದಿದ್ದಾರೆ.
ಇನ್ನೊಬ್ಬ ವೈರಾಲಜಿಸ್ಟ್ ಡಾ.ಟಿ. ಜಾಕೋಬ್ ಜಾನ್, ನಮಗೆ ಮೊದಲೇ ತಿಳಿದಿಲ್ಲದ ಹೊಸ ರೂಪಾಂತರದ ಹೊರತು ಕೋವಿಡ್ -19 ಪ್ರಕರಣಗಳು ಉಲ್ಬಣಗೊಳ್ಳುವುದಿಲ್ಲ ಎಂದು ಸೂಚಿಸಿದ್ದಾರೆ. ಹೆಚ್ಚಿನ ಜನರು ಕೊರೊನಾ ಲಸಿಕೆಯನ್ನು ಪಡೆದಿರುವುದರಿಂದ ಕೊವಿಡ್ ನಾಲ್ಕನೇ ತರಂಗವು ಕೆಟ್ಟದ್ದಲ್ಲ ಎಂದು ವೈದ್ಯರು ಅಭಿಪ್ರಾಯಪಟ್ಟಿದ್ದಾರೆ.
ನೆರೆಯ ಚೀನಾ, ಅಮೆರಿಕ, ದಕ್ಷಿಣ ಏಷ್ಯಾ, ಜರ್ಮನಿ ಸೇರಿದಂತೆ ಅನೇಕ ದೇಶದಲ್ಲಿ ಕೊವಿಡ್ ಪ್ರಮಾಣ ಭಾರೀ ಏರಿಕೆ ಕಂಡಿವೆ. ಈ ಹಿನ್ನೆಲೆಯಲ್ಲಿ ಭಾರತದಲ್ಲೂ ಕೊವಿಡ್ ನಾಲ್ಕನೇ ಅಲೆ ಬರಲಿದೆಯಾ ಎಂಬ ಆತಂಕ ವ್ಯಕ್ತವಾಗಿದೆ. ಈ ಕಾರಣದಿಂದ ಈ ಹಿಂದೆ ಈ ದೇಶದಲ್ಲಿ ಕೋವಿಡ್ ಅಲೆ ಏರಿಕೆ ಕಂಡು ಇಳಿಕೆಯಾದ ಬಳಿಕ ಭಾರತದಲ್ಲಿ ಕೋವಿಡ್ ಹೊಸ ಅಲೆ ಎದುರಾಗಿ, ಸೋಂಕಿನ ಮಟ್ಟ ಏರಿಕೆ ಕಂಡಿತ್ತು. ಕೇಂದ್ರ ಆರೋಗ್ಯ ಸಚಿವ ಮನ್ಸುಖ್ ಮಾಂಡವಿಯಾ ಈಗಾಗಲೇ ಆರೋಗ್ಯ ಸಚಿವಾಲಯದ ಅಧಿಕಾರಿಗಳೊಂದಿಗೆ ಉನ್ನತ ಮಟ್ಟದ ಸಭೆಯ ಸಭೆ ನಡೆಸಿದ್ದಾರೆ.
ಇದನ್ನೂ ಓದಿ: ಭಾರತದಲ್ಲಿ ಕೊವಿಡ್ 4ನೇ ಅಲೆಯ ಭೀತಿ; ಎಚ್ಚರ ವಹಿಸಲು ರಾಜ್ಯಗಳಿಗೆ ಕೇಂದ್ರ ಸರ್ಕಾರ ಸೂಚನೆ
Covid 4th Wave: ಕೊವಿಡ್ 4ನೇ ಅಲೆ ಡೆಲ್ಟಾದಷ್ಟೇ ಅಪಾಯಕಾರಿಯಾಗಿರುತ್ತಾ?; ವಿಜ್ಞಾನಿಗಳ ಉತ್ತರ ಹೀಗಿದೆ
