ಬ್ರಿಕ್ಸ್ ಶೃಂಗಸಭೆ ಎಫೆಕ್ಟ್; ದೆಹಲಿಯಲ್ಲಿ ಗಗನಕ್ಕೇರಿದ ಹೋಟೆಲ್ ದರ, ಒಂದು ರಾತ್ರಿಗೆ 2.4 ಲಕ್ಷ ರೂ.!

ನವದೆಹಲಿ, ಸೆಪ್ಟೆಂಬರ್ 10: ಸೆಪ್ಟೆಂಬರ್ 12 ಮತ್ತು 13ರಂದು ದೆಹಲಿಯಲ್ಲಿ ನಡೆಯಲಿರುವ ಬಹುನಿರೀಕ್ಷಿತ ಬ್ರಿಕ್ಸ್ ಶೃಂಗಸಭೆಯ ಹಿನ್ನೆಲೆಯಲ್ಲಿ ದೆಹಲಿಯ ಪ್ರಮುಖ ಐಷಾರಾಮಿ ಹೋಟೆಲ್‌ಗಳ ಬಾಡಿಗೆ ದರ ಆಕಾಶಕ್ಕೇರಿದೆ. ಸೆಂಟ್ರಲ್ ದೆಹಲಿ ವಲಯದ ಪ್ರಮುಖ ಪಂಚತಾರಾ ಹೋಟೆಲ್‌ಗಳಲ್ಲಿ ಕೊಠಡಿಗಳು ಬಹುತೇಕ ಬುಕ್ ಆಗಿವೆ. ದೆಹಲಿಯ ತಾಜ್ ಮಹಲ್ ಹೋಟೆಲ್, ಐಟಿಸಿ ಮೌರ್ಯ ಮತ್ತು ದಿ ಲಲಿತ್ ಸೇರಿದಂತೆ ದೆಹಲಿಯ ಪ್ರಸಿದ್ಧ ಐಷಾರಾಮಿ ಹೋಟೆಲ್‌ಗಳಲ್ಲಿ ವಿಶ್ವನಾಯಕರ ಹಾಗೂ ರಾಜತಾಂತ್ರಿಕ ನಿಯೋಗಗಳ ತಂಗುವಿಕೆಗಾಗಿ ಭಾರಿ ಪ್ರಮಾಣದಲ್ಲಿ ಕೊಠಡಿಗಳನ್ನು ಕಾಯ್ದಿರಿಸಲಾಗಿದೆ.

ಸಾಮಾನ್ಯವಾಗಿ ದಿನಕ್ಕೆ 18,000 ರೂ. ಇರುತ್ತಿದ್ದ ಐಷಾರಾಮಿ ಕೊಠಡಿಗಳ ದರ ಪ್ರಸ್ತುತ 80,000 ರೂ. ಇದ್ದುದು ಈಗ 1 ಲಕ್ಷದಿಂದ 2.4 ಲಕ್ಷ ರೂ.ವರೆಗೆ ತಲುಪಿದೆ. ಪ್ರಮುಖ ವಿದೇಶಿ ನಿಯೋಗಗಳು, ರಾಜತಾಂತ್ರಿಕರು, ಸಚಿವರು ಹಾಗೂ ಹಿರಿಯ ಅಧಿಕಾರಿಗಳ ಆಗಮನದಿಂದಾಗಿ ಲ್ಯೂಟಿಯನ್ಸ್ ದೆಹಲಿ ಮತ್ತು ಏರೋಸಿಟಿ ಭಾಗದ ಪಂಚತಾರಾ ಹೋಟೆಲ್‌ಗಳಲ್ಲಿ ಕೊಠಡಿಗಳು ಸಂಪೂರ್ಣ ಭರ್ತಿಯಾಗಿವೆ. ಹೋಟೆಲ್ ದರಗಳ ಈ ಏರಿಕೆಯು ಸೆಪ್ಟೆಂಬರ್ 20ರವರೆಗೆ ಮುಂದುವರಿಯುವ ನಿರೀಕ್ಷೆಯಿದೆ.

ಇದನ್ನೂ ಓದಿ: ಬ್ರಿಕ್ಸ್ ಶೃಂಗಸಭೆಗೆ ದೆಹಲಿ ಸಜ್ಜು; ಕ್ಸಿ ಜಿನ್‌ಪಿಂಗ್, ಪುಟಿನ್‌ಗೆ ಹೇಗಿರಲಿದೆ ಹೋಟೆಲ್ ವ್ಯವಸ್ಥೆ?

ಆನ್‌ಲೈನ್ ಬುಕಿಂಗ್‌ನಲ್ಲಿ ಶೇ. 50ರಷ್ಟು ಏರಿಕೆ:

ಪ್ರಮುಖ ಪ್ರವಾಸೋದ್ಯಮ ವೇದಿಕೆ ‘ಇಕ್ಸಿಗೋ’ ಸಂಸ್ಥೆಯ ಸಿಇಒ ಅಲೋಕ್ ಬಾಜಪೇಯಿ ಪ್ರಕಾರ, ದೆಹಲಿಯ ಪಂಚತಾರಾ ಹೋಟೆಲ್‌ಗಳ ಹುಡುಕಾಟದಲ್ಲಿ ಶೇ. 50ರಷ್ಟು ಹೆಚ್ಚಳವಾಗಿದೆ. ಲೀಲಾ ಪ್ಯಾಲೇಸ್, ತಾಜ್ ಗ್ರೂಪ್, ರೇಡಿಸನ್ ಮತ್ತು ಐಟಿಸಿ ಗ್ರೂಪ್‌ಗಳ ಬಹುತೇಕ ಹೋಟೆಲ್‌ಗಳು ಸೆಪ್ಟೆಂಬರ್ 12ರಿಂದ 13ರವರೆಗೆ ಸಂಪೂರ್ಣ ಬುಕ್ ಆಗಿವೆ.

ಇದನ್ನೂ ಓದಿ: 7 ವರ್ಷಗಳ ನಂತರ ಬ್ರಿಕ್ಸ್ ಶೃಂಗಸಭೆಗೆ ಭಾರತಕ್ಕೆ ಆಗಮಿಸಲಿದ್ದಾರೆ ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್

ಕೊಠಡಿಗಳ ಅಭಾವ ಕೇವಲ ಸೆಂಟ್ರಲ್ ದೆಹಲಿಗೆ ಮಾತ್ರ ಸೀಮಿತವಾಗಿರದೆ, ಗುರುಗ್ರಾಮ, ನೊಯ್ಡಾ ಮತ್ತು ಏರೋಸಿಟಿ ಹೋಟೆಲ್‌ಗಳ ಮೇಲೂ ತೀವ್ರ ಪರಿಣಾಮ ಬೀರಿದೆ. ಎನ್‌ಸಿಆರ್‌ನ ಬಹುತೇಕ ಹೋಟೆಲ್‌ಗಳ ಕೊಠಡಿಗಳು ಭರ್ತಿಯಾಗಿವೆ.

ಐಟಿಸಿ ಮೌರ್ಯದಲ್ಲಿ ಕೊಠಡಿ ದರ 2.4 ಲಕ್ಷ ರೂ.ಗೆ ಜಿಗಿತ:

ಶೃಂಗಸಭೆಯ ದಿನಗಳಲ್ಲಿ ಐಟಿಸಿ ಮೌರ್ಯ ಹೋಟೆಲ್‌ನ ಅಧಿಕೃತ ವೆಬ್‌ಸೈಟ್‌ನಲ್ಲಿ ಒಂದು ರಾತ್ರಿಯ ತಂಗುವಿಕೆಗೆ ಸುಮಾರು 2.33 ಲಕ್ಷ ರೂ. ದರ ನಿಗದಿಪಡಿಸಲಾಗಿದೆ. ‘ಮೇಕ್‌ಮೈಟ್ರಿಪ್’ನಂತಹ ಥರ್ಡ್-ಪಾರ್ಟಿ ಬುಕಿಂಗ್ ಪ್ಲಾಟ್‌ಫಾರ್ಮ್‌ಗಳಲ್ಲಿ ಇದೇ ಕೊಠಡಿಯ ದರ 2.5 ಲಕ್ಷ ರೂ.ವರೆಗೆ ತಲುಪಿದೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ