ಚುನಾವಣಾ ಆಯೋಗದಲ್ಲಿ ಬಿರುಕು ಇಲ್ಲ, ಎಲ್ಲವೂ ಸರ್ವಾನುಮತದ ತೀರ್ಮಾನ: ಆಂತರಿಕ ವರದಿಗಳಿಗೆ ಆಯೋಗ ಸ್ಪಷ್ಟನೆ

ನವದೆಹಲಿ, ಸೆಪ್ಟೆಂಬರ್ 23: ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (SIR) ಹಾಗೂ ಸಾಫ್ಟ್‌ವೇರ್ ನಿರ್ವಹಣೆ ಕುರಿತು ಆಯೋಗದೊಳಗೆ ತೀವ್ರ ಭಿನ್ನಾಭಿಪ್ರಾಯ ತಲೆದೋರಿದೆ ಎಂಬ ಮಾಧ್ಯಮ ವರದಿಗಳನ್ನು ಭಾರತೀಯ ಚುನಾವಣಾ ಆಯೋಗ (ECI) ಸಾರಾಸಗಟಾಗಿ ತಳ್ಳಿಹಾಕಿದೆ. ಆಯೋಗದ ಸದಸ್ಯರು ದಾಖಲಿಸುವ ಲಿಖಿತ ಆಕ್ಷೇಪಣೆಗಳು, ತಾಂತ್ರಿಕ ಟಿಪ್ಪಣಿಗಳು ಮತ್ತು ಆಂತರಿಕ ಅವಲೋಕನಗಳು ಯಾವುದೇ ಸಂಸ್ಥೆಯ ಸಹಜ ಆಡಳಿತ ಪ್ರಕ್ರಿಯೆಯ ಸಾಮಾನ್ಯ ಭಾಗವೇ ಹೊರತು, ಅವು ಆಂತರಿಕ ಕಂದಕ ಅಥವಾ ಭಿನ್ನಾಭಿಪ್ರಾಯವಲ್ಲ ಎಂದು ಆಯೋಗ ಅಧಿಕೃತವಾಗಿ ಸ್ಪಷ್ಟಪಡಿಸಿದೆ.

ಸಾಂವಿಧಾನಿಕ ಚೌಕಟ್ಟು ಮತ್ತು ಸರ್ವಾನುಮತ: ಚುನಾವಣಾ ಆಯೋಗವು ಸಂವಿಧಾನದ 324ನೇ ವಿಧಿ ಹಾಗೂ 2023ರ ಮುಖ್ಯ ಚುನಾವಣಾ ಆಯುಕ್ತರು ಮತ್ತು ಇತರ ಚುನಾವಣಾ ಆಯುಕ್ತರ ಕಾಯ್ದೆಯ ಅಡಿಯಲ್ಲಿ ಕಾರ್ಯನಿರ್ವಹಿಸುವ ಬಹು-ಸದಸ್ಯ ಸಾಂಸ್ಥಿಕ ಸಮಿತಿಯಾಗಿದೆ. ಆಯೋಗ ಹೊರಡಿಸುವ ಪ್ರತಿಯೊಂದು ಆದೇಶ ಮತ್ತು ನಿರ್ಧಾರಗಳು ಸಂಪೂರ್ಣ ಕಾನೂನುಬದ್ಧವಾಗಿದ್ದು, ಮೂವರು ಆಯುಕ್ತರ ಸರ್ವಾನುಮತ ಅಥವಾ ಬಹುಮತದ ಆಧಾರದಲ್ಲೇ ಜಾರಿಗೆ ಬಂದಿವೆ.

ಅವಲೋಕನಗಳು ಭಿನ್ನಾಭಿಪ್ರಾಯವಲ್ಲ: ಕರಡು ಹಂತದಲ್ಲಿ ಆಯುಕ್ತರು ಎತ್ತುವ ಪ್ರಶ್ನೆಗಳು, ಸಲಹೆಗಳು ಚುನಾವಣಾ ವ್ಯವಸ್ಥೆಯನ್ನು ಬಲಪಡಿಸಲು ಮತ್ತು ಮತದಾರರ ಹಕ್ಕುಗಳನ್ನು ರಕ್ಷಿಸಲು ನೆರವಾಗುತ್ತವೆ. ಪ್ರಜಾಪ್ರಭುತ್ವ ಸಂಸ್ಥೆಯಲ್ಲಿ ವಿಭಿನ್ನ ದೃಷ್ಟಿಕೋನಗಳನ್ನು ವ್ಯಕ್ತಪಡಿಸುವುದು ಸಾಮಾನ್ಯ ಪದ್ಧತಿಯಾಗಿದೆ.

ಅರ್ಧ ಸತ್ಯದ ವರದಿ: ಕಳೆದ 10 ತಿಂಗಳ ಅವಧಿಯಲ್ಲಿ ಆಯೋಗ ತೆಗೆದುಕೊಂಡ ನೂರಾರು ನಿರ್ಧಾರಗಳು, ಜಾರಿಗೆ ತಂದ 40ಕ್ಕೂ ಹೆಚ್ಚು ಹೊಸ ಉಪಕ್ರಮಗಳು ಮತ್ತು ಸಮಗ್ರ ಸುಧಾರಣೆಗಳನ್ನು ಕಡೆಗಣಿಸಿ, ಕೇವಲ ಕೆಲವೇ ಕೆಲವು ಆಂತರಿಕ ಟಿಪ್ಪಣಿಗಳನ್ನು ಮುಂದಿಟ್ಟುಕೊಂಡು ವರದಿ ಮಾಡುವುದು ವಾಸ್ತವದ ಒಂದು ಭಾಗವನ್ನು ಮಾತ್ರ ಬಿಂಬಿಸಿದಂತಾಗುತ್ತದೆ ಎಂದು ಆಯೋಗ ಅಸಮಾಧಾನ ವ್ಯಕ್ತಪಡಿಸಿದೆ.

ಮತ್ತಷ್ಟು ಓದಿ: ಚುನಾವಣಾ ಆಯೋಗದೊಳಗೆ ತೀವ್ರ ಭಿನ್ನಾಭಿಪ್ರಾಯ: 10 ತಿಂಗಳಲ್ಲಿ 14 ಬಾರಿ ಆಕ್ಷೇಪ ಎತ್ತಿದ ಇಬ್ಬರು ಆಯುಕ್ತರು

ECINet ಮತ್ತು ಡೇಟಾ ಭದ್ರತೆ: ‘ಇಸಿಐನೆಟ್’ (ECINet) ಸಾಫ್ಟ್‌ವೇರ್ ಸೇರಿದಂತೆ ಆಯೋಗದ ಸಂಪೂರ್ಣ ಡಿಜಿಟಲ್ ಮೂಲಸೌಕರ್ಯವು ಅತ್ಯುನ್ನತ ಸೈಬರ್ ಭದ್ರತಾ ಮಾನದಂಡಗಳು ಮತ್ತು ಆಡಿಟ್ ನಿಯಂತ್ರಣಗಳಡಿ ಸುರಕ್ಷಿತವಾಗಿದೆ. ಸ್ಥಳೀಯ ಮಟ್ಟದಲ್ಲಿ ಮತದಾರರ ನೋಂದಣಿ ಅಧಿಕಾರಿಗಳು (ERO) ಮತ್ತು ಜಿಲ್ಲಾ ಚುನಾವಣಾ ಅಧಿಕಾರಿಗಳು (DEO) ನಿಯಮಾನುಸಾರವೇ ಹೆಸರು ಸೇರ್ಪಡೆ ಹಾಗೂ ಪರಿಶೀಲನೆ ಕಾರ್ಯ ನಡೆಸುತ್ತಿದ್ದಾರೆ.

ವರದಿಯ ಹಿನ್ನೆಲೆ: ಚುನಾವಣಾ ಆಯುಕ್ತರಾದ ಸುಖ್‌ಬೀರ್ ಸಿಂಗ್ ಸಂಧು ಮತ್ತು ವಿವೇಕ್ ಜೋಶಿ ಅವರು ಕಳೆದ 10 ತಿಂಗಳಲ್ಲಿ ನಮೂನೆ-6 ಬದಲಾವಣೆ ಮತ್ತು ಮತದಾರರ ಡೇಟಾಬೇಸ್ ಕೇಂದ್ರೀಕರಣದಂತಹ ವಿಚಾರಗಳಲ್ಲಿ ಕನಿಷ್ಠ 14 ಬಾರಿ ಔಪಚಾರಿಕ ಆಕ್ಷೇಪಣೆ ಎತ್ತಿದ್ದರು ಎಂದು ಪತ್ರಿಕೆಯೊಂದು ವರದಿ ಮಾಡಿತ್ತು.

ಚುನಾವಣೆಗಳ ಯಶಸ್ವಿ ನಿರ್ವಹಣೆ: ಬಿಹಾರ, ಪಶ್ಚಿಮ ಬಂಗಾಳ, ತಮಿಳುನಾಡು, ಅಸ್ಸಾಂ ಮತ್ತು ಕೇರಳ ಸೇರಿದಂತೆ ಪ್ರಮುಖ ರಾಜ್ಯಗಳಲ್ಲಿ ಇತ್ತೀಚೆಗೆ ನಡೆದ ಸಾರ್ವತ್ರಿಕ ಚುನಾವಣೆಗಳನ್ನು ಅತ್ಯಂತ ಯಶಸ್ವಿಯಾಗಿ, ನಿಷ್ಪಕ್ಷಪಾತವಾಗಿ ಹಾಗೂ ವ್ಯವಸ್ಥಿತವಾಗಿ ನಿರ್ವಹಿಸಿರುವುದನ್ನು ಆಯೋಗವು ತನ್ನ ಸಮಗ್ರತೆಯ ಪುರಾವೆಯಾಗಿ ಉಲ್ಲೇಖಿಸಿದೆ.

ವಿಪಕ್ಷಗಳ ಅನುಮಾನ ಶಮನದ ಯತ್ನ: ಬಿಹಾರದಿಂದ ಆರಂಭವಾದ ಎಸ್‌ಐಆರ್ ಪ್ರಕ್ರಿಯೆಯ ಮೂಲಕ ಕೋಟ್ಯಂತರ ಮತದಾರರ ಹೆಸರುಗಳನ್ನು ಕೈಬಿಡಲಾಗಿದೆ ಎಂದು ವಿರೋಧ ಪಕ್ಷಗಳು ಎತ್ತಿದ್ದ ರಾಜಕೀಯ ಆರೋಪಗಳಿಗೆ, ಆಯೋಗವು ತನ್ನ ಸಾಂವಿಧಾನಿಕ ಬದ್ಧತೆ ಹಾಗೂ ಪಾರದರ್ಶಕ ದಾಖಲೆಗಳನ್ನು ಮುಂದಿಟ್ಟುಕೊಂಡು ಸ್ಪಷ್ಟ ಪ್ರತ್ಯುತ್ತರ ನೀಡಿದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ