2006ರಲ್ಲಿ ನಡೆದಿದ್ದ ಆ ದುರಂತದ ಬಗ್ಗೆ ವಾಟ್ಸ್​ಆ್ಯಪ್​ ಸ್ಟೇಟಸ್​ ಹಾಕಿದ್ದಕ್ಕೆ ಪತ್ರಕರ್ತನ ವಿರುದ್ಧ ಎಫ್​ಐಆರ್​..

ಜಮ್ಮು-ಕಾಶ್ಮೀರದಲ್ಲಿ 23 ವರ್ಷದ ಪತ್ರಕರ್ತನೊಬ್ಬನ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿ, ಎಫ್​ಐಆರ್​ ದಾಖಲಿಸಿದ್ದಾರೆ. ಆತ 2006ರಲ್ಲಿ ನಡೆದಿದ್ದ ಘಟನೆಯೊಂದರ ಬಗ್ಗೆ ವಾಟ್ಸ್​​ಆ್ಯಪ್​​ ಸ್ಟೇಟಸ್​ ಹಾಕಿದ್ದೇ ಇದಕ್ಕೆ ಕಾರಣ. 15ವರ್ಷಗಳ ವಾಲೂರು ಸರೋವರದಲ್ಲಿ ನಡೆದ ದೋಣಿ ದುರಂತದಲ್ಲಿ 22 ಮಕ್ಕಳು ಮೃತಪಟ್ಟಿದ್ದರು. ಅದರ ಫೋಟೋ ಹಾಕಿದ್ದ ಬಂಡೀಪೋರಾದ ಪತ್ರಕರ್ತ, ವಾಲೂರು ಲೇಕ್​ ಹುತಾತ್ಮರು ಎಂದು ಹಾಕಿದ್ದರು. ಅದೇ ಈಗ ಅವರ ವಿರುದ್ಧ ಕೇಸ್​ ದಾಖಲಾಗಲೂ ಕಾರಣ.

ಈ ಪತ್ರಕರ್ತನ ಹೆಸರು ಸಜೀದ್​ ರೈನಾ. ಇವರು ಮೇ 30ರಂದು ವಾಲೂರು ದೋಣಿ ದುರಂತಕ್ಕೆ ಸಂಬಂಧಪಟ್ಟ ವಾಟ್ಸ್​ಆ್ಯಪ್ ಸ್ಟೇಟಸ್​ ಹಾಕಿದ್ದರು. ಈಗ್ಯಾಕೆ ಮತ್ತೆ ಆ ದುರಂತದ ಫೋಟೋ ಹಾಕಿದ್ದಾರೆ ಎಂಬುದು ತನಿಖಾರ್ಹವಾಗಿದೆ. ಸೋಷಿಯಲ್​ ಮೀಡಿಯಾಗಳಲ್ಲಿ ಮತ್ತೆ ವೈರಲ್ ಆಗುತ್ತಿದೆ. ಹಾಗಾಗಿ ವಿಚಾರಣೆ ಅಗತ್ಯವಿದೆ ಎಂದು ಬಂಡಿಪೋರಾ ಠಾಣೆ ಪೊಲೀಸರು ಟ್ವೀಟ್​ ಮಾಡಿದ್ದಾರೆ.

ಸಜೀದ್​ ರೈನಾ ಶ್ರೀನಗರ ಮೂಲದ ಸುದ್ದಿ ಮಾಧ್ಯಮವೊಂದರಲ್ಲಿ ಕೆಲಸ ಮಾಡುತ್ತಿದ್ದಾರೆ. ಈ ಸ್ಟೇಟಸ್​ ಹಾಕಿದ ಬಳಿಕ ಅವರಿಗೆ ಪೊಲೀಸರು ಕರೆಮಾಡಿದ್ದರು. ಪೊಲೀಸರು ಕರೆ ಮಾಡುತ್ತಿದ್ದಂತೆ ತಮ್ಮ ಸ್ಟೇಟಸ್​ನ್ನು ಡಿಲೀಟ್ ಮಾಡಿದ್ದಾರೆ. ವಾಲೂರು ದೋಣಿ ದುರಂತಕ್ಕೆ ಮೇ 30ರಂದು ಸರಿಯಾಗಿ 15 ವರ್ಷ ತುಂಬಿತ್ತು. ಹಾಗಾಗಿ ಅದರಲ್ಲಿ ಮೃತಪಟ್ಟ ಮಕ್ಕಳ ಫೋಟೋವನ್ನು ವಾಟ್ಸ್​ಆ್ಯಪ್ ಸ್ಟೇಟಸ್​​ಗೆ ಹಾಕಿದ್ದೆ. ಸಂಜೆ ಹೊತ್ತಿಗೆ ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ಕರೆ ಮಾಡಿದರು. ನಾನು ಸ್ಟೇಟಸ್​ ಹಾಕಿದ್ದರ ಹಿಂದೆ ಯಾವುದೇ ಬೇರೆ ಉದ್ದೇಶವಿಲ್ಲ ಎಂದು ಕ್ಷಮೆ ಕೇಳಿದೆ. ಕೇವಲ 20 ಜನರಷ್ಟೇ ನೋಡಿದ್ದಾಗ ನಾನು ಅದನ್ನು ಡಿಲೀಟ್ ಮಾಡಿದ್ದೆ ಎಂದು ಪತ್ರಕರ್ತ ತಿಳಿಸಿದ್ದಾರೆ. ನಾನಂದುಕೊಂಡೆ ಆ ವಿಷಯ ಅಲ್ಲಿಗೇ ಮುಗಿಯಿತೆಂದು. ಈ ವಿಚಾರಕ್ಕೆ ಸಂಬಂಧಪಟ್ಟಂತೆ ನನ್ನ ವಿರುದ್ಧ ಎಫ್​ಐಆರ್​ ದಾಖಲಾಗಿದೆ ಎಂಬುದು ಎರಡು ದಿನಗಳ ಬಳಿಕವಷ್ಟೇ ಗೊತ್ತಾಯಿತು ಎಂದು ಹೇಳಿಕೊಂಡಿದ್ದಾರೆ.

ಏನಾಗಿತ್ತು 2006ರಲ್ಲಿ? 2006ರ ಮೇ 30ರಂದು ಹಂದ್ವಾರಾದಲ್ಲಿರುವ ಬರ್ನಿಂಗ್​ ಕ್ಯಾಂಡಲ್​ ಸ್ಕೂಲ್​​ನ ಮಕ್ಕಳು ವಾಲೂರು ನದಿ ದಡಕ್ಕೆ ಪಿಕ್ನಿಕ್​​ಗೆ ಹೋಗಿದ್ದರು. ಅದರಲ್ಲಿ ಒಂದು ಗುಂಪು ಸರೋವರದಲ್ಲಿ ಬೋಟಿಂಗ್​​ಗೆ ಹೋದಾಗ ದೋಣಿ ಮಗುಚಿ 22 ಮಕ್ಕಳು ಮೃತಪಟ್ಟಿದ್ದರು. ಅವತ್ತು ಬೋಟಿಂಗ್​ಗೆ ಕರೆದುಕೊಂಡು ಹೋಗಿದ್ದು ನೌಕಾಪಡೆಯ ಮಾರ್ಕೋಸ್ ಬೋಟ್ ಆಗಿತ್ತು. ಅಂದು ಮೃತಪಟ್ಟವರೆಲ್ಲ 10 ವರ್ಷದ ಒಳಗಿನ ಮಕ್ಕಳೇ ಆಗಿದ್ದರು. ಹೀಗೆ ಮೃತಪಟ್ಟವರ ನೆನಪಲ್ಲಿ ನೌಕಾದಳ, ಹಂದ್ವಾರಾದ ಜಿಲ್ಲಾಸ್ಪತ್ರೆಯಲ್ಲಿ ಮಕ್ಕಳ ವಿಭಾಗವನ್ನು ಸ್ಥಾಪಿಸಿದೆ.

ಇದನ್ನೂ ಓದಿ: ಲಾಕ್​ಡೌನ್​ನಿಂದ ಬೆಳೆದ ಬೆಳೆಗೆ ಬೆಲೆ ಇಲ್ಲ; ಹೊಲದಲ್ಲಿಯೇ ಬದನೆಕಾಯಿಯನ್ನು ನಾಶ ಮಾಡಿದ ಬೆಳಗಾವಿ ರೈತ

Published On - 5:14 pm, Sun, 6 June 21