ಕ್ರೀಡಾಪಟುವಿನಿಂದ ರಾಷ್ಟ್ರಪತಿಗೆ ಎಡಿಸಿ ಅಧಿಕಾರಿಯವರೆಗೆ: ಲೆಫ್ಟಿನೆಂಟ್ ಕಮಾಂಡರ್ ಯಶಸ್ವಿ ಸೊಲಂಕಿ ಸಾಧನೆ ಹೇಗಿತ್ತು ನೋಡಿ

ದೆಹಲಿ, ಸೆ.30: ಭಾರತೀಯ ಸಶಸ್ತ್ರ ಪಡೆಗಳ ಇತಿಹಾಸದಲ್ಲೇ ಮಹತ್ವದ ಮೈಲಿಗಲ್ಲೊಂದು ದಾಖಲಾಗಿದೆ. ಭಾರತದ ಮೂರು ಸೇನಾ ಪಡೆಗಳಿಂದ (ಸೇನೆ, ನೌಕಾಪಡೆ, ವಾಯುಪಡೆ) ಭಾರತದ ಗೌರವಾನ್ವಿತ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರ ‘ಏಡ್-ಡಿ-ಕ್ಯಾಂಪ್’ ಆಗಿ ನೇಮಕಗೊಂಡ ಮೊದಲ ಮಹಿಳಾ ಅಧಿಕಾರಿ ಎಂಬ ಹೆಗ್ಗಳಿಕೆಗೆ ಲೆಫ್ಟಿನೆಂಟ್ ಕಮಾಂಡರ್ ಯಶಸ್ವಿ ಬಿ ಸೊಲಂಕಿ ಭಾಜನರಾಗಿದ್ದಾರೆ. ರಾಷ್ಟ್ರಪತಿ ಭವನದಲ್ಲಿ ನಡೆದ ಔಪಚಾರಿಕ ಸಮಾರಂಭದಲ್ಲಿ ಮೇ 9, 2025 ರಂದು ಯಶಸ್ವಿ ಸೊಲಂಕಿ ಅವರಿಗೆ ಸಾಂಪ್ರದಾಯಿಕ ‘ಎಗುಲೆಟ್’ ತೊಡಿಸುವ ಮೂಲಕ ಈ ಐತಿಹಾಸಿಕ ಹುದ್ದೆಗೆ ಅಧಿಕೃತವಾಗಿ ಪದಗ್ರಹಣ ಮಾಡಿಸಲಾಯಿತು. ಇವರ ಸೇವಾ ಅವಧಿಯು ಸುಮಾರು 2.5 ರಿಂದ 3 ವರ್ಷಗಳ ಕಾಲ ಇರಲಿದೆ.

ಸಾಮಾನ್ಯವಾಗಿ ರಾಷ್ಟ್ರಪತಿಗಳಿಗೆ ನೆರವಾಗಲು ಐವರು ಎಡಿಸಿಗಳು (Armyಯಿಂದ 3, Navy ಹಾಗೂ Air Force ನಿಂದ ತಲಾ 1) ಇರುತ್ತಾರೆ. ಈ ಹುದ್ದೆಗೆ ಕನಿಷ್ಠ 5 ರಿಂದ 7 ವರ್ಷಗಳ ಅತ್ಯುತ್ತಮ ಹಾಗೂ ನಿರಂತರ ಸೇವಾ ಅನುಭವ ಹೊಂದಿರುವ ಅಧಿಕಾರಿಗಳನ್ನು ಆಯ್ಕೆ ಮಾಡಲಾಗುತ್ತದೆ. ಭದ್ರತಾ ತಪಾಸಣೆಗಳು, ಪ್ರತ್ಯೇಕ ತರಬೇತಿ ಹಾಗೂ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರೊಂದಿಗಿನ ನೇರ ಸಂದರ್ಶನ ಒಳಗೊಂಡ ಕಠಿಣ ಹಂತಗಳನ್ನು ಯಶಸ್ವಿಯಾಗಿ ಪೂರೈಸಿ ಯಶಸ್ವಿ ಸೊಲಂಕಿ ಈ ಸ್ಥಾನಕ್ಕೇರಿದ್ದಾರೆ.

ರಾಷ್ಟ್ರಪತಿಗಳ ಅಧಿಕೃತ ಕಾರ್ಯಕ್ರಮಗಳ ಸಮನ್ವಯತೆ, ಪ್ರಮುಖ ರಾಜತಾಂತ್ರಿಕ ಭೇಟಿಗಳು, ಹೂಡಿಕೆ ಸಮಾರಂಭಗಳು ಹಾಗೂ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮಗಳಲ್ಲಿ ರಾಷ್ಟ್ರಪತಿಗಳನ್ನು ಹಿಂಬಾಲಿಸುವುದು ಮತ್ತು ಶಿಷ್ಟಾಚಾರ ಪಾಲಿಸುವುದು ಎಡಿಸಿಯ ಪ್ರಮುಖ ಕರ್ತವ್ಯವಾಗಿದೆ.

ಕ್ರೀಡಾಪಟುವಿನಿಂದ ರಾಷ್ಟ್ರಪತಿ ಭವನದವರೆಗೆ: ಯಶಸ್ವಿ ಪಯಣ

ಮಹಾರಾಷ್ಟ್ರ ಮೂಲದವರಾದ ಯಶಸ್ವಿ ಸೊಲಂಕಿ, ಸೇನೆಗೆ ಸೇರುವ ಮುನ್ನ ಜಿಲ್ಲಾ ಮಟ್ಟದ ಬ್ಯಾಡ್ಮಿಂಟನ್ ಹಾಗೂ ವಾಲಿಬಾಲ್ ಆಟಗಾರ್ತಿಯಾಗಿದ್ದರು. ಕ್ರೀಡೆಯು ತಮಗೆ ಶಿಸ್ತು ಮತ್ತು ಏಕಾಗ್ರತೆಯನ್ನು ಕಲಿಸಿತು ಎಂದು ಸ್ಮರಿಸುವ ಅವರು, 2019 ರಲ್ಲಿ ಭಾರತೀಯ ನೌಕಾಪಡೆಯ ‘ನೆವಲ್ ಆರ್ಮಮೆಂಟ್ ಇನ್‌ಸ್ಪೆಕ್ಷನ್’ ಕೆಡರ್‌ಗೆ ಅಧಿಕಾರಿಯಾಗಿ ಸೇರ್ಪಡೆಗೊಂಡರು. ಮೂರು ವರ್ಷಗಳ ಕಾಲ ಶಸ್ತ್ರಾಸ್ತ್ರಗಳ ಕಠಿಣ ತರಬೇತಿ ಮುಗಿಸಿದ ನಂತರ ಹೈದರಾಬಾದ್‌ನಲ್ಲಿ ನೌಕಾಪಡೆಯ ಪ್ರಮುಖ ರಕ್ಷಣಾ ಯೋಜನೆಗಳನ್ನು ನಿರ್ವಹಿಸಿದ ಅನುಭವ ಹೊಂದಿದ್ದಾರೆ.

ಇದನ್ನೂ ಓದಿ: 2 ಬಾರಿ ಪ್ರಿಲಿಮ್ಸ್ ಫೇಲ್, 14 ಅಂಕಗಳಲ್ಲಿ ತಪ್ಪಿದ್ದ ಐಎಎಸ್ ಕನಸು: 4ನೇ ಯತ್ನದಲ್ಲಿ ಯುಪಿಎಸ್‌ಸಿ 26ನೇ ರ್ಯಾಂಕ್ ಪಡೆದ ಇಷಿತಾ ಶರ್ಮಾ

ಮಹಿಳಾ ಸಬಲೀಕರಣಕ್ಕೆ ಹೊಸ ದಿಕ್ಸೂಚಿ:

ಯಶಸ್ವಿ ಸೊಲಂಕಿ ಅವರ ಈ ಸಾಧನೆಯು ಭಾರತೀಯ ಸೇನೆಯಲ್ಲಿ ಮಹಿಳೆಯರಿಗೆ ದೊರೆಯುತ್ತಿರುವ ಸಮಾನ ಅವಕಾಶಗಳಿಗೆ ಹಿಡಿದ ಕನ್ನಡಿಯಾಗಿದೆ. ಈ ಐತಿಹಾಸಿಕ ನೇಮಕಾತಿಯ ಬೆನ್ನಲ್ಲೇ, ಜುಲೈ 2026 ರಲ್ಲಿ ಭಾರತೀಯ ಭೂಸೇನೆಯ (Indian Army) ಮೇಜರ್ ನವ್ಯಾ ಶೇಖಾವತ್ ಅವರು ರಾಷ್ಟ್ರಪತಿಯವರ ಎರಡನೇ ಮಹಿಳಾ ಎಡಿಸಿ ಹಾಗೂ ಭೂಸೇನೆಯಿಂದ ಆಯ್ಕೆಯಾದ ಮೊದಲ ಮಹಿಳಾ ಎಡಿಸಿಯಾಗಿ ನೇಮಕಗೊಳ್ಳುವ ಮೂಲಕ ಇತಿಹಾಸವನ್ನು ಮುಂದುವರಿಸಿದ್ದಾರೆ.

ದೇಶದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ