ಪಂಕ್ಚರ್ ಅಂಗಡಿಯಿಂದ ಉಪಕರಣಗಳ ಬಾಡಿಗೆ ತಂದು, ಥಾರ್ ಟೈರ್ ಕದಿಯುತ್ತಿದ್ದ ಎಂಬಿಎ ವಿದ್ಯಾರ್ಥಿ ಅರೆಸ್ಟ್​

ಹೈದರಾಬಾದ್, ನವೆಂಬರ್ 1: ಓದಿನಲ್ಲಿ ಎಂಬಿಎ ವಿದ್ಯಾರ್ಥಿ, ಆದರೆ ಕಳ್ಳತನಕ್ಕೆ ಬಳಸುತ್ತಿದ್ದ ತಂತ್ರ ಮಾತ್ರ ವಿಚಿತ್ರ, ಹೈದರಾಬಾದ್‌ನಲ್ಲಿ ನಿಲ್ಲಿಸಿದ್ದ ಕಾರುಗಳಿಂದ ಬಿಡಿ ಚಕ್ರಗಳು ಮತ್ತು ರಿಮ್‌ಗಳನ್ನು ಕಳವು ಮಾಡುತ್ತಿದ್ದ 23 ವರ್ಷದ ಎಂಬಿಎ ವಿದ್ಯಾರ್ಥಿಯನ್ನು ಪೊಲೀಸರು ಬಂಧಿಸಿದ್ದಾರೆ. ಮಹೀಂದ್ರಾ ಥಾರ್ ವಾಹನಗಳನ್ನೇ ಹೆಚ್ಚಾಗಿ ಗುರಿಯಾಗಿಸಿಕೊಂಡಿದ್ದ ಆರೋಪಿಯಿಂದ 15 ಚಕ್ರಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಇವುಗಳಲ್ಲಿ 12 ಥಾರ್ ವಾಹನಗಳ ಬಿಡಿ ಚಕ್ರಗಳಾಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಸೋಬನ್ ಅಲಿ ಖಾನ್ ಎಂದು ಗುರುತಿಸಲಾದ ಆರೋಪಿ, ಸ್ಕೂಟರ್‌ನಲ್ಲಿ ಬಂದು ರಸ್ತೆ ಬದಿಯಲ್ಲಿ ನಿಲ್ಲಿಸಿದ್ದ ಕಾರುಗಳ ಬಿಡಿ ಟೈರ್‌ಗಳನ್ನು ಕಳವು ಮಾಡುತ್ತಿದ್ದ ಎನ್ನಲಾಗಿದೆ. ಈತನ ಕೃತ್ಯ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ದೃಶ್ಯಾವಳಿಗಳ ಆಧಾರದ ಮೇಲೆ ಪೊಲೀಸರು ಆತನನ್ನು ಪತ್ತೆಹಚ್ಚಿದ್ದಾರೆ.

ಸಿಸಿಟಿವಿಯಲ್ಲಿ ಸೆರೆಯಾದ ಕಳ್ಳತನದ ದೃಶ್ಯ
ಅಕ್ಟೋಬರ್ 20ರಂದು ಹೈದರಾಬಾದ್‌ನ ರೇಥಿಬೌಲಿಯ ಗ್ಯಾಲಕ್ಸಿ ಎನ್‌ಕ್ಲೇವ್ ಅಪಾರ್ಟ್‌ಮೆಂಟ್‌ಗಳ ಬಳಿ ನಿಲ್ಲಿಸಿದ್ದ ಮಹೀಂದ್ರಾ ಥಾರ್ ಕಾರಿನ ಹಿಂಭಾಗದಲ್ಲಿದ್ದ ಬಿಡಿ ಟೈರ್ ಕಳವಾಗಿತ್ತು. ಈ ಸಂಬಂಧ ಕಾರಿನ ಮಾಲೀಕರು ಪೊಲೀಸರಿಗೆ ದೂರು ನೀಡಿದ್ದರು. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಸುತ್ತಮುತ್ತಲಿನ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಆರೋಪಿ ಸ್ಕೂಟರ್‌ನಲ್ಲಿ ಬಂದು ಕಳ್ಳತನಕ್ಕೆ ಯತ್ನಿಸುತ್ತಿರುವುದು ಕಂಡುಬಂದಿದೆ.

ಇದನ್ನೂ ಓದಿ:

ಯೂಟ್ಯೂಬ್ ನೋಡಿ ಮೊಬೈಲ್ ಕಳವು ಮಾಡುತ್ತಿದ್ದ ಕಳ್ಳ ಅರೆಸ್ಟ್: ಹೊಸಕೋಟೆ ಪೊಲೀಸರ ಬಲೆಗೆ ಬಿದ್ದ ಒಡಿಶಾ ಮೂಲದ ವ್ಯಕ್ತಿ

ಮೊದಲು ತನ್ನ ಸ್ಕೂಟರ್‌ನ ಚಕ್ರವನ್ನು ತೆಗೆದಂತೆ ನಟಿಸಿದ ಆತ, ಬಳಿಕ ಥಾರ್ ಕಾರಿನ ಬಳಿ ತೆರಳಿ ಹಿಂಭಾಗದಲ್ಲಿ ಅಳವಡಿಸಿದ್ದ ಬಿಡಿ ಟೈರ್ ತೆಗೆಯಲು ಪ್ರಯತ್ನಿಸಿದ್ದಾನೆ. ರಸ್ತೆಯಲ್ಲಿ ಇತರ ವಾಹನಗಳು ಸಂಚರಿಸುತ್ತಿದ್ದುದನ್ನು ಗಮನಿಸಿ ಹಲವು ಬಾರಿ ಹಿಂದಕ್ಕೆ ಸರಿದಿದ್ದಾನೆ. ಕೊನೆಗೆ ಯಾರೂ ಇಲ್ಲದ ಸಮಯ ನೋಡಿಕೊಂಡು ಕೆಲವೇ ಸೆಕೆಂಡುಗಳಲ್ಲಿ ಟೈರ್ ತೆಗೆದು ಸ್ಕೂಟರ್‌ನಲ್ಲಿ ಪರಾರಿಯಾಗಿದ್ದಾನೆ. ಈ ದೃಶ್ಯಾವಳಿಗಳ ಆಧಾರದ ಮೇಲೆ ತನಿಖೆ ನಡೆಸಿದ ಪೊಲೀಸರು ಶನಿವಾರ ಆರೋಪಿಯನ್ನು ಬಂಧಿಸಿದ್ದಾರೆ.

ಪಂಕ್ಚರ್ ಅಂಗಡಿಯಿಂದಲೇ ಉಪಕರಣ ಪಡೆಯುತ್ತಿದ್ದ
ಈ ಕಳ್ಳತನದಲ್ಲಿ ಆರೋಪಿ ಅನುಸರಿಸುತ್ತಿದ್ದ ವಿಧಾನ ಪೊಲೀಸರ ಗಮನ ಸೆಳೆದಿದೆ. ಪಂಕ್ಚರ್ ರಿಪೇರಿ ಅಂಗಡಿಗಳಿಗೆ ತೆರಳಿ, ಟೈರ್ ದುರಸ್ತಿಗೆ ಉಪಕರಣಗಳು ಬೇಕೆಂದು ಹೇಳಿ 200 ರೂ.ನಿಂದ 300 ರೂ.ವರೆಗೆ ಮರುಪಾವತಿಸಬಹುದಾದ ಠೇವಣಿ ನೀಡುತ್ತಿದ್ದ ಎನ್ನಲಾಗಿದೆ. ನಂತರ ಆ ಉಪಕರಣಗಳನ್ನು ಬಳಸಿ ಕಾರುಗಳ ಬಿಡಿ ಚಕ್ರ ಮತ್ತು ರಿಮ್‌ಗಳನ್ನು ತೆಗೆಯುತ್ತಿದ್ದ. ಕಳ್ಳತನದ ಬಳಿಕ ಉಪಕರಣಗಳನ್ನು ಅಂಗಡಿಗೆ ಹಿಂದಿರುಗಿಸಿ ಠೇವಣಿ ಹಣವನ್ನೂ ವಾಪಸ್ ಪಡೆಯುತ್ತಿದ್ದ ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ.ಸ್ಪ್ಯಾನರ್‌ನಂತಹ ಸಾಮಾನ್ಯ ಉಪಕರಣ ಬಳಸಿ ಥಾರ್‌ನ ಬಿಡಿ ಟೈರ್‌ಗಳನ್ನು ಸುಲಭವಾಗಿ ತೆಗೆಯುತ್ತಿದ್ದ ಎನ್ನುವುದು ಪೊಲೀಸರ ತನಿಖೆಯಲ್ಲಿ ತಿಳಿದುಬಂದಿದೆ.

10 ಪೊಲೀಸ್ ಠಾಣೆಗಳ ವ್ಯಾಪ್ತಿಯಲ್ಲಿ 11 ಪ್ರಕರಣಗಳು
ಆರೋಪಿಯ ವಿಚಾರಣೆ ವೇಳೆ ಹೈದರಾಬಾದ್‌ನ 10 ಪೊಲೀಸ್ ಠಾಣೆಗಳ ವ್ಯಾಪ್ತಿಯಲ್ಲಿ ದಾಖಲಾಗಿರುವ 11 ಕಳ್ಳತನ ಪ್ರಕರಣಗಳಲ್ಲಿ ಆತನ ಕೈವಾಡವಿರುವುದು ಬೆಳಕಿಗೆ ಬಂದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಅತ್ತಾಪುರ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಎರಡು ಪ್ರಕರಣಗಳು ದಾಖಲಾಗಿವೆ. ಉಳಿದಂತೆ ಫಿಲ್ಮ್ ನಗರ, ಲಂಗರ್ ಹೌಸ್, ಗುಡಿಮಲ್ಕಾಪುರ್, ಸೈಫಾಬಾದ್, ಚಂದ್ರಾಯಣಗುಟ್ಟ, ಚಾದರ್ಘಾಟ್, ಚತ್ರಿನಕ, ಮೀರಪೇಟೆ ಮತ್ತು ನಾರಾಯಣಗುಡ ಠಾಣೆಗಳ ವ್ಯಾಪ್ತಿಯಲ್ಲಿಯೂ ಕಳ್ಳತನ ಪ್ರಕರಣಗಳು ವರದಿಯಾಗಿವೆ.

ಬಂಧಿತನಿಂದ 12 ಮಹೀಂದ್ರಾ ಥಾರ್ ಬಿಡಿ ಚಕ್ರಗಳ ಜೊತೆಗೆ ಎರಡು ಫೋರ್ಡ್ ಎಂಡೀವರ್ ಚಕ್ರಗಳು ಮತ್ತು ಒಂದು ಫೋರ್ಡ್ ಇಕೋಸ್ಪೋರ್ಟ್ ಚಕ್ರವನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಒಟ್ಟು 15 ಚಕ್ರಗಳನ್ನು ವಶಕ್ಕೆ ಪಡೆಯಲಾಗಿದೆ. ಆರೋಪಿ ಯಾವಾಗಿನಿಂದ ಈ ಕೃತ್ಯದಲ್ಲಿ ತೊಡಗಿದ್ದ, ಇನ್ನೂ ಎಷ್ಟು ವಾಹನಗಳ ಚಕ್ರಗಳನ್ನು ಕದ್ದಿದ್ದಾನೆ ಮತ್ತು ಕದ್ದ ಚಕ್ರಗಳನ್ನು ಯಾರಿಗೆ ಮಾರಾಟ ಮಾಡಿದ್ದಾನೆ ಎಂಬುದನ್ನು ಪತ್ತೆಹಚ್ಚಲು ಪೊಲೀಸರು ಮುಂದಾಗಿದ್ದಾರೆ. ಕದ್ದ ವಸ್ತುಗಳನ್ನು ಖರೀದಿಸಿದವರ ಜೊತೆಗೆ ಅವುಗಳನ್ನು ಮಾರಾಟ ಮಾಡಲು ನೆರವಾದ ಜಾಲವಿದೆಯೇ ಎಂಬ ಬಗ್ಗೆಯೂ ತನಿಖೆ ನಡೆಯುತ್ತಿದೆ.

ಕಾರಿನ ಹಿಂಭಾಗದಲ್ಲಿ ಹೊರಗಡೆ ಅಳವಡಿಸಿರುವ ಬಿಡಿ ಟೈರ್‌ಗಳು ಸುಲಭವಾಗಿ ಕಳ್ಳರ ಗುರಿಯಾಗಬಹುದು. ಆದ್ದರಿಂದ ವಾಹನವನ್ನು ಸಾಧ್ಯವಾದಷ್ಟು ಸಿಸಿಟಿವಿ ಇರುವ ಸುರಕ್ಷಿತ ಸ್ಥಳದಲ್ಲಿ ನಿಲ್ಲಿಸುವುದು ಮತ್ತು ಬಿಡಿ ಟೈರ್‌ಗೆ ಹೆಚ್ಚುವರಿ ಲಾಕ್ ಅಳವಡಿಸಬಹುದಾಗಿದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ