ಒಮಿಕ್ರಾನ್ ಸೋಂಕು ಪತ್ತೆಗಾಗಿ ಅಭಿವೃದ್ಧಿ ಪಡಿಸಲಾದ ದೇಶದ ಮೊದಲ ಆರ್ಟಿ-ಪಿಸಿಆರ್ ಕಿಟ್ ಒಮಿಶ್ಯೂರ್ಗೆ ಐಸಿಎಂಆರ್ ಅನುಮೋದನೆ
ದೇಶದಲ್ಲಿ ಈಗ ಮತ್ತೆ ಕೊರೊನಾ ಕೇಸ್ಗಳು, ಒಮಿಕ್ರಾನ್ ಪ್ರಕರಣಗಳು ಹೆಚ್ಚುತ್ತಿವೆ. ಕೊವಿಡ್ 19 ಪ್ರಕರಣಗಳ ಪತ್ತೆಗಾಗಿ ಸೂಕ್ತ ತಪಾಸಣೆ ವ್ಯವಸ್ಥೆ ದೇಶಾದ್ಯಂತ ಇದ್ದರೂ, ಈ ಒಮಿಕ್ರಾನ್ ಸೋಂಕಿನ ಪತ್ತೆ ಸ್ವಲ್ಪ ವಿಳಂಬವಾಗುತ್ತಿದೆ.
Updated on:Jan 04, 2022 | 1:38 PM
ಮುಂಬೈನ ಟಾಟಾ ಮೆಡಿಕಲ್ ಮತ್ತು ಡಯಾಗ್ನೋಸ್ಟಿಕ್ಸ್ ಸಂಸ್ಥೆ (Tata Medical & Diagnostics, Mumbai) ಅಭಿವೃದ್ಧಿ ಪಡಿಸಿದ ಒಮಿಕ್ರಾನ್ ತಪಾಸಣಾ ಕಿಟ್ ಒಮಿಶ್ಯೂರ್ಗೆ ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ (ICMR) ಅನುಮೋದನೆ ನೀಡಿದೆ. ಇಷ್ಟು ದಿನ ನಮ್ಮ ದೇಶದಲ್ಲಿ ಒಮಿಕ್ರಾನ್ ಸೋಂಕು (Omicron) ಪತ್ತೆ ಹಚ್ಚಲು, ಯುಎಸ್ ಮೂಲದ ವೈಜ್ಞಾನಿಕ ಉಪಕರಣ ಕಂಪನಿ ಥರ್ಮೋ ಫಿಶರ್ ಅಭಿವೃದ್ಧಿಪಡಿಸಿದ ಕಿಟ್ನ್ನು ಬಳಸಲಾಗುತ್ತಿತ್ತು. ಈ ಕಿಟ್ ಎಸ್ ಜೀನ್ ಟಾರ್ಗೆಟ್ ಫೇಲ್ಯೂರ್ ತಂತ್ರದ ಮೂಲಕ ಒಮಿಕ್ರಾನ್ನ್ನು ಪತ್ತೆ ಹಚ್ಚುತ್ತಿದೆ.
ಭಾರತದ ಖ್ಯಾತ ಉದ್ಯಮ ಸಂಸ್ಥೆ ಟಾಟಾದ ಮೆಡಿಕಲ್ ಮತ್ತು ಡಯಾಗ್ನೋಸ್ಟಿಕ್ಸ್ ಅಭಿವೃದ್ಧಿ ಪಡಿಸಿರುವ ಈ ಒಮಿಕ್ರಾನ್ ಆರ್ಟಿ-ಪಿಸಿಆರ್ ತಪಾಸಣಾ ಕಿಟ್ಗೆ ಡಿಸೆಂಬರ್ 31ರಂದು ಐಸಿಎಂಆರ್ ಅನುಮೋದನೆ ಕೊಟ್ಟಿದೆ. ಕಿಟ್ ತಯಾರಕರು ನೀಡಿದ ಮಾರ್ಗದರ್ಶನದಂತೆ ಈ ಕಿಟ್ ಬಳಸಿ ಅದನ್ನು ಟೆಸ್ಟ್ ಮಾಡಿದ್ದೇವೆ. ಉಳಿದ ಬ್ಯಾಚ್ ಟು ಬ್ಯಾಚ್ ಸ್ಥಿರತೆಯ ಜವಾಬ್ದಾರಿ ತಯಾರಕ ಕಂಪನಿಯದ್ದೇ ಆಗಿರುತ್ತದೆ ಎಂದು ಐಸಿಎಂಆರ್ ತಿಳಿಸಿದೆ. ಟಾಟಾ ಮೆಡಿಕಲ್ಸ್, ಈ ಕಿಟ್ ತಯಾರಿಸಿ, ಪರೀಕ್ಷೆಗಾಗಿ ಐಸಿಎಂಆರ್ಗೆ ಕಳಿಸಿತ್ತು. ಸದ್ಯ ಈ ಕಿಟ್ನ್ನು ಭಾರತದಲ್ಲಿ ಮಾತ್ರ ಬಳಕೆ ಮಾಡಲಾಗುತ್ತದೆ. ಹಾಗೇ, ಇದು ಭಾರತದಲ್ಲಿ ಅಭಿವೃದ್ಧಿಯಾಗಿ, ಅನುಮೋದನೆ ಪಡೆದ ಮೊದಲ ಒಮಿಕ್ರಾನ್ ಟೆಸ್ಟ್ ಕಿಟ್ ಆಗಿದೆ.
ದೇಶದಲ್ಲಿ ಈಗ ಮತ್ತೆ ಕೊರೊನಾ ಕೇಸ್ಗಳು, ಒಮಿಕ್ರಾನ್ ಪ್ರಕರಣಗಳು ಹೆಚ್ಚುತ್ತಿವೆ. ಕೊವಿಡ್ 19 ಪ್ರಕರಣಗಳ ಪತ್ತೆಗಾಗಿ ಸೂಕ್ತ ತಪಾಸಣೆ ವ್ಯವಸ್ಥೆ ದೇಶಾದ್ಯಂತ ಇದ್ದರೂ, ಈ ಒಮಿಕ್ರಾನ್ ಸೋಂಕಿನ ಪತ್ತೆ ಸ್ವಲ್ಪ ವಿಳಂಬವಾಗುತ್ತಿದೆ. ಹೀಗಿರುವಾಗ ಒಮಿಶ್ಯೂರ್ ಕಿಟ್ಗೆ ಅನುಮೋದನೆ ಸಿಕ್ಕಿದ್ದು ಸಮಾಧಾನಕರ ಸಂಗತಿಯಾಗಿದೆ. ಆದರೆ ಸಾಮಾನ್ಯ ಕೊವಿಡ್ 19 ತಪಾಸಣಾ ಕಿಟ್ಗೆ ಹೋಲಿಸಿದರೆ ಈ ಒಮಿಕ್ರಾನ್ ಸೋಂಕಿನ ತಪಾಸಣಾ ಕಿಟ್ ದುಬಾರಿ ಎಂದು ಹೇಳಲಾಗಿದೆ. ಭಾರತಕ್ಕೆ ಒಮಿಕ್ರಾನ್ ಕಾಲಿಟ್ಟಾಗಿನಿಂದಲೂ ಅದರ ತಪಾಸಣೆ ಕಿಟ್ ತಯಾರಿಕೆಯ ಕಾರ್ಯಗಳೂ ನಡೆಯುತ್ತಿವೆ. ಈ ನಿಟ್ಟಿನಲ್ಲಿ ಹಲವು ಔಷಧ ಕಂಪನಿಗಳು ಪ್ರಯತ್ನ ಮಾಡುತ್ತಲೇ ಇದ್ದವು. ಈ ಮಧ್ಯೆ ನೀವು ಅಭಿವೃದ್ಧಿ ಪಡಿಸಿದ ಒಮಿಕ್ರಾನ್ ಪತ್ತೆ ಕಿಟ್ಗಳನ್ನು ವಾಣಿಜ್ಯೀಕರಿಸಲು ಆಸಕ್ತಿ ಇರುವವರು ಅದನ್ನು ನಮ್ಮೆದುರು ಸಲ್ಲಿಸಿ ಎಂದು ಡಿಸೆಂಬರ್ 17ರಂದು ಐಸಿಎಂಆರ್ ಕೂಡ ಹೇಳಿತ್ತು. ದೆಹಲಿ ಐಐಟಿ ಕೂಡ ಒಮಿಕ್ರಾನ್ ಸೋಂಕು ಪತ್ತೆಗೆ ನಿರ್ದಿಷ್ಟ ಆರ್ಟಿ-ಪಿಸಿಆರ್ ವಿಧಾನವನ್ನು ಅಭಿವೃದ್ಧಿ ಪಡಿಸಿದೆ. ಆದರೆ ಅದಕ್ಕೆ ಅನುಮೋದನೆ ಸಿಕ್ಕ ಬಗ್ಗೆ ಮಾಹಿತಿ ಸಿಕ್ಕಿಲ್ಲ.
Published On - 1:38 pm, Tue, 4 January 22
