ಕೇರಳದ ಸ್ಥಳೀಯ ಸಂಸ್ಥೆಗಳ ಚುನಾವಣೆ: ಎರಡನೇ ಹಂತದಲ್ಲಿ ಶೇ 76 ಮತದಾನ

ತಿರುವನಂತಪುರಂ: ಕೇರಳದ ಸ್ಥಳೀಯ ಸಂಸ್ಥೆಗಳ ಚುನಾವಣೆಯ ಎರಡನೇ ಹಂತದ ಮತದಾನ ಇಂದು ನಡೆದಿದ್ದು ಶೇ 76 ಮತದಾನವಾಗಿದೆ. ಕೋಟ್ಟಯಂ, ಎರ್ನಾಕುಳಂ, ತ್ರಿಶ್ಶೂರ್, ಪಾಲಕ್ಕಾಡ್, ವಯನಾಡ್ ಜಿಲ್ಲೆಗಳ ಜನರು ಗುರುವಾರ ಮತಚಲಾಯಿಸಿದ್ದಾರೆ.

ಬೆಳಗ್ಗೆ 7 ಗಂಟೆಯಿಂದ ಸಂಜೆ 6 ಗಂಟೆವರಗೆ ಎಲ್ಲರಿಗೂ ಮತದಾನ ಮಾಡುವ ಅವಕಾಶ ಕಲ್ಪಿಸಿದ್ದು , 6 ಗಂಟೆಯಿಂದ 7 ಗಂಟೆವರೆಗೆ ಕೋವಿಡ್ ರೋಗಿಗಳಿಗೆ ಮತ್ತು ಕ್ವಾರಂಟೈನ್ ನಲ್ಲಿರುವವರಿಗೆ ಮತದಾನ ಮಾಡಲು ಅವಕಾಶ ನೀಡಲಾಗಿದೆ.

ಸಂಜೆ 6.30ರವರೆಗೆ ಕೋಟ್ಟಯಂನಲ್ಲಿ ಶೇ 73.72, ಎರ್ನಾಕುಳಂನಲ್ಲಿ ಶೇ 76.74, ತ್ರಿಶ್ಶೂರ್​ನಲ್ಲಿ ಶೇ 74.58, ಪಾಲಕ್ಕಾಡ್​ನಲ್ಲಿ ಶೇ 77.53, ವಯನಾಡ್​ನಲ್ಲಿ ಶೇ 79.22ರಷ್ಟು ಮತದಾನವಾಗಿದೆ. ಕೊಚ್ಚಿ, ತ್ರಿಶ್ಶೂರ್ ಮುನ್ಸಿಪಲ್ ಕಾರ್ಪೊರೇಷನ್ ನಲ್ಲಿ ಕ್ರಮವಾಗಿ ಶೇ 61.45, ಶೇ 63.39ರಷ್ಟು ಮತದಾನ ದಾಖಲಾಗಿದೆ.

ಎರಡನೇ ಹಂತದ ಮತದಾನದಲ್ಲಿ 47,28,489 ಪುರುಷರು, 51,28,361 ಮಹಿಳೆಯರು, 93  ಟ್ರಾನ್ಸ್ ಜೆಂಡರ್, 265-ಅನಿವಾಸಿ ಭಾರತೀಯರು ಸೇರಿದಂತೆ 98,57,208 ಮತದಾರರಿದ್ದರು.  12,643 ಮತಗಟ್ಟೆಗಳನ್ನು ಸ್ಥಾಪಿಸಲಾಗಿತ್ತು.

ಕೇರಳ ಚುನಾವಣೆ: ಮೊದಲ ಹಂತದಲ್ಲಿ ಶೇ 71.59 ಮತದಾನ