ನಾಲ್ವರನ್ನು ಕೊಂದು ತನ್ನ ಮಕ್ಕಳನ್ನೇ ಒತ್ತೆಯಾಳಾಗಿರಿಸಿಕೊಂಡಿದ್ದ ಹಂತಕನ ಕೊಂದು ಕಮಾಂಡೋಗಳು ಮಕ್ಕಳನ್ನು ರಕ್ಷಿಸಿದ್ಹೇಗೆ?

ಲಕ್ನೋ, ಸೆಪ್ಟೆಂಬರ್ 23:ಮನೆಯಲ್ಲೇ ಪತ್ನಿ ಹಾಗೂ ಇಬ್ಬರು ಪುರೋಹಿತರನ್ನು ಕೊಂದು, ತನ್ನ ಮೂವರು ಮಕ್ಕಳನ್ನೇ ಕೋಣೆಯಲ್ಲಿ ಕೂಡಿಹಾಕಿದ್ದ ಆರೋಪಿ ಕೊನೆಗೂ ಎನ್​ಕೌಂಟರ್​ನಲ್ಲಿ ಹತನಾಗಿದ್ದಾನೆ. ಆ ಏಳು ಗಂಟೆ ಆ ಮನೆಯಲ್ಲಿ ಏನು ನಡೀತು ಕಮಾಂಡೋಗಳು ಇಬ್ಬರು ಮಕ್ಕಳನ್ನು ರಕ್ಷಣೆ ಮಾಡಿದ್ಹೇಗೆ ಎನ್ನುವ ಕುರಿತಾದ ಮಾಹಿತಿ ಇಲ್ಲಿದೆ.
ಬರೋಬ್ಬರಿ ಏಳು ಗಂಟೆಗಳ ಕಾಲ ತನ್ನ ಮಕ್ಕಳನ್ನೇ ಒತ್ತೆಯಿಟ್ಟು ಹಠ ಹಿಡಿದಿದ್ದ ಹಂತಕನನ್ನು ಕಮಾಂಡೋಗಳು ಸ್ಟನ್ ಗ್ರೆನೇಡ್ ಸಿಡಿಸಿ ಬಾಗಿಲು ಮುರಿದು ಹೊಡೆದುರುಳಿಸಿದ್ದಾರೆ. ಆದಾಗ್ಯೂ, ಈ ಭೀಕರ ಘಟನೆಯಲ್ಲಿ ಆರೋಪಿ, ಆತನ ಪತ್ನಿ, ಇಬ್ಬರು ಅರ್ಚಕರು ಹಾಗೂ ಸ್ವಂತ ಮಗ ಸೇರಿ ಒಟ್ಟು ಐದು ಮಂದಿ ಸಾವನ್ನಪ್ಪಿದ್ದು, ಇಬ್ಬರು ಮುಗ್ಧ ಹೆಣ್ಣುಮಕ್ಕಳು ಅದೃಷ್ಟವಶಾತ್ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.

ಮೂಢನಂಬಿಕೆ ಮತ್ತು ತಾಂತ್ರಿಕ ಆಚರಣೆಯ ವಿವಾದದಿಂದಾಗಿ ಪತ್ನಿ ಬಬಿತಾ ಮತ್ತು ಇಬ್ಬರು ಪುರೋಹಿತರನ್ನು ಕೊಂದು, ತನ್ನ ಮೂವರು ಮಕ್ಕಳನ್ನೇ ಕೋಣೆಯಲ್ಲಿ ಕೂಡಿಹಾಕಿದ್ದ ಆರೋಪಿ ಅರವಿಂದ್ ಸಿಂಗ್, ಪೊಲೀಸರ ದಿಟ್ಟ ಪ್ರತಿದಾಳಿಯಲ್ಲಿ ಹತನಾಗಿದ್ದಾನೆ.

7 ಗಂಟೆಗಳ ನಿರಂತರ ಸಂಧಾನ ಮತ್ತು ಹಂತಕನ ಹಠಮಾರಿ ಧೋರಣೆ

ಘಟನೆ ನಡೆದ ತಕ್ಷಣವೇ ಇಡೀ ಮನೆಯನ್ನು ಪೊಲೀಸರು ಸುತ್ತುವರೆದಿದ್ದರು. ಹಿರಿಯ ಪೊಲೀಸ್ ಅಧಿಕಾರಿಗಳು ಮತ್ತು ಕುಟುಂಬದ ಸಂಬಂಧಿಕರ ಮೂಲಕ ಬರೋಬ್ಬರಿ 7 ಗಂಟೆಗಳ ಕಾಲ ಶರಣಾಗುವಂತೆ ಆರೋಪಿಯ ಮನವೊಲಿಸಲು ತೀವ್ರ ಯತ್ನ ನಡೆಸಲಾಯಿತು. ಆದರೆ, ಒಳಗಿದ್ದ ಅರವಿಂದ್ ಸಿಂಗ್ ಕ್ಯಾರೇ ಎನ್ನಲಿಲ್ಲ. “ಮಕ್ಕಳು ನನ್ನ ಜೊತೆಯಲ್ಲಿದ್ದಾರೆ, ಅವರೇ ನನ್ನ ರಕ್ಷಣಾ ಗುರಾಣಿ. ಯಾವುದೇ ರಾಜಿ ಇಲ್ಲ, ಬೆಳಗ್ಗೆ ನೋಡೋಣ, ಈಗ ನೀವೆಲ್ಲಾ ವಾಪಸ್ ಹೋಗಿ ಎಂದು ಹಠ ಸಾಧಿಸುತ್ತಿದ್ದ.

ಸ್ಟನ್ ಗ್ರೆನೇಡ್ ಸಿಡಿಸಿ ಬಾಗಿಲು ಮುರಿದ ಪೊಲೀಸರು:

ಪೊಲೀಸರು ತಮ್ಮ ಮುಂದಿನ ರಕ್ಷಣಾ ತಂತ್ರ ರೂಪಿಸುತ್ತಿದ್ದ ಸಂದರ್ಭದಲ್ಲೇ, ಕೋಣೆಯ ಒಳಗಿನಿಂದ ಇದ್ದಕ್ಕಿದ್ದಂತೆ ಗುಂಡಿನ ಸದ್ದು ಕೇಳಿಸಿತು. ಆರೋಪಿ ಮಕ್ಕಳ ಮೇಲೆಯೇ ಗುಂಡು ಹಾರಿಸಿರಬಹುದು ಎಂದು ಆತಂಕಗೊಂಡ ಕಮಾಂಡೋ ಮತ್ತು ವಿಶೇಷ ಕಾರ್ಯಾಚರಣೆ ಪಡೆ (SOG), ಒಂದು ಕ್ಷಣವೂ ತಡಮಾಡದೆ ಮಿಂಚಿನ ದಾಳಿ ನಡೆಸಿತು. ಒಳಗಿದ್ದವರನ್ನು ಕ್ಷಣಕಾಲ ದಿಗ್ಭ್ರಮೆಗೊಳಿಸಲು ಸ್ಟನ್ ಗ್ರೆನೇಡ್ ಮತ್ತು ಅಶ್ರುವಾಯು ಪ್ರಯೋಗಿಸಿ, ಬಾಗಿಲನ್ನು ಒಡೆದು ಒಳನುಗ್ಗಿದರು.

ಮತ್ತಷ್ಟು ಓದಿ:
ಆಧಾರ್ ಕೇಳಿ ಶುರುವಾದ ರಾದ್ಧಾಂತ: ಪತ್ನಿ, ಮಗ, ಇಬ್ಬರು ಪುರೋಹಿತರು ಸೇರಿ ನಾಲ್ವರನ್ನು ಕೊಂದಿದ್ದ ಆರೋಪಿ ಎನ್‌ಕೌಂಟರ್‌ನಲ್ಲಿ ಸಾವು

ಮಗಳನ್ನು ಗುರಾಣಿ ಮಾಡಿಕೊಂಡು ಗುಂಡಿನ ಮಳೆ:

ಪೊಲೀಸರು ಒಳನುಗ್ಗುತ್ತಿದ್ದಂತೆ ಹತಾಶನಾದ ಆರೋಪಿ ಅರವಿಂದ್ ಸಿಂಗ್ ತನ್ನ ಕೈಯಲ್ಲಿದ್ದ ಬಂದೂಕಿನಿಂದ ಪೊಲೀಸರ ಮೇಲೆ ಸತತ 4-5 ಸುತ್ತು ಗುಂಡು ಹಾರಿಸಿ ಮದ್ದುಗುಂಡುಗಳನ್ನು ಖಾಲಿ ಮಾಡಿದ್ದ. ಅಷ್ಟರಲ್ಲಾಗಲೇ ಆತನ ಮಗ ಗುಂಡೇಟು ತಿಂದು ರಕ್ತದ ಮಡುವಿನಲ್ಲಿ ಬಿದ್ದಿದ್ದನು. ಗಾಬರಿಯಿಂದ ಕಿರಿಯ ಮಗಳು ಆತನ ಹಿಡಿತದಿಂದ ಕೆಳಗೆ ಬಿದ್ದಾಗ, ಆತ ಹಿರಿಯ ಮಗಳನ್ನೇ ಕುತ್ತಿಗೆಗೆ ಗನ್ ಹಿಡಿದಿದ್ದ. ಆದಾಗ್ಯೂ, ಮಗುವಿಗೆ ಅಪಾಯವಾಗದಂತೆ ಅತ್ಯಂತ ಜಾಗರೂಕತೆಯಿಂದ ಪೊಲೀಸರು ಆತನ ಮೇಲೆ ನಿಖರ ಪ್ರತಿದಾಳಿ ನಡೆಸಿದರು.

ಇಬ್ಬರು ಹೆಣ್ಣುಮಕ್ಕಳ ರಕ್ಷಣೆ, ಸಾವಿನ ಸಂಖ್ಯೆ 5ಕ್ಕೆ ಏರಿಕೆ:

ಗುಂಡಿನ ಚಕಮಕಿಯ ನಂತರ ತೀವ್ರ ಗಾಯಗೊಂಡಿದ್ದ ಆರೋಪಿ ಅರವಿಂದ್ ಮತ್ತು ಆತನ ಮಗನನ್ನು ತಕ್ಷಣ ಜಿಲ್ಲಾ ಆಸ್ಪತ್ರೆಗೆ ಸಾಗಿಸಲಾಯಿತಾದರೂ, ಚಿಕಿತ್ಸೆ ಫಲಕಾರಿಯಾಗದೆ ಇಬ್ಬರೂ ಸಾವನ್ನಪ್ಪಿದರು. ಇದರೊಂದಿಗೆ ಪತ್ನಿ, ಇಬ್ಬರು ಪುರೋಹಿತರು, ಆರೋಪಿ ಹಾಗೂ ಮಗ ಸೇರಿ ಒಟ್ಟು ಸಾವಿನ ಸಂಖ್ಯೆ 5ಕ್ಕೆ ಏರಿಕೆಯಾಗಿದೆ. ಪೊಲೀಸರ ಸಮಯಪ್ರಜ್ಞೆಯಿಂದಾಗಿ ಇಬ್ಬರು ಮುಗ್ಧ ಹೆಣ್ಣುಮಕ್ಕಳು ಪ್ರಾಣಾಪಾಯದಿಂದ ಸುರಕ್ಷಿತವಾಗಿ ಪಾರಾಗಿದ್ದಾರೆ.

ಒತ್ತೆಯಾಳುಗಳಿರುವ ಇಕ್ಕಟ್ಟಾದ ಕೊಠಡಿಗಳಲ್ಲಿ ಕಾರ್ಯಾಚರಣೆ ನಡೆಸುವಾಗ ಮಾರಣಾಂತಿಕವಲ್ಲದ ‘ಫ್ಲ್ಯಾಶ್‌ಬ್ಯಾಂಗ್’ ಅಥವಾ ‘ಸ್ಟನ್ ಗ್ರೆನೇಡ್’ ಬಳಸಲಾಗುತ್ತದೆ. ಇದು ಅತಿಯಾದ ಪ್ರಖರ ಬೆಳಕು ಹಾಗೂ ಕಿವಿಗಡಚಿಕ್ಕುವ ಶಬ್ದ ಹೊರಡಿಸುವ ಮೂಲಕ ಕೆಲ ಕ್ಷಣಗಳ ಕಾಲ ಆರೋಪಿಯ ಕಣ್ಣು ಮತ್ತು ಕಿವಿಯನ್ನು ನಿಷ್ಕ್ರಿಯಗೊಳಿಸಿ, ಪೊಲೀಸರು ಒಳನುಗ್ಗಿ ಮಕ್ಕಳನ್ನು ರಕ್ಷಿಸಲು ನೆರವಾಯಿತು.

ವಿಧಿವಿಜ್ಞಾನ ಮತ್ತು ಎಸ್‌ಒಜಿ ತನಿಖೆ: ಎಸ್‌ಎಸ್‌ಪಿ ಡಾ. ಅನಿಲ್ ಕುಮಾರ್ ನೇತೃತ್ವದಲ್ಲಿ ವಿಧಿವಿಜ್ಞಾನ (Forensic) ತಜ್ಞರ ತಂಡ ಸ್ಥಳದಿಂದ ಖಾಲಿ ಕಾಡತೂಸುಗಳು, ಪರವಾನಗಿ ಪಡೆದ ಗನ್ ಹಾಗೂ ಇತರ ಅಪರಾಧ ಸಾಕ್ಷ್ಯಗಳನ್ನು ವಶಪಡಿಸಿಕೊಂಡಿದೆ.

ಮಕ್ಕಳಿಗೆ ಕೌನ್ಸೆಲಿಂಗ್ ವ್ಯವಸ್ಥೆ: ಕಣ್ಣೆದುರೇ ತಾಯಿ, ಸಹೋದರನ ರಕ್ತಪಾತ ಮತ್ತು ತಂದೆಯ ರೌದ್ರಾವತಾರ ಕಂಡು ತೀವ್ರ ಮಾನಸಿಕ ಆಘಾತಕ್ಕೆ (PTSD) ಒಳಗಾಗಿರುವ ಬದುಕುಳಿದ ಇಬ್ಬರು ಮುಗ್ಧ ಬಾಲಕಿಯರಿಗೆ ಮಕ್ಕಳ ಕಲ್ಯಾಣ ಸಮಿತಿಯ (CWC) ಮೂಲಕ ತುರ್ತು ಮನೋವೈದ್ಯಕೀಯ ಕೌನ್ಸೆಲಿಂಗ್ ಒದಗಿಸಲು ಜಿಲ್ಲಾಡಳಿತ ಕ್ರಮ ಕೈಗೊಂಡಿದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ