ಆನ್ಲೈನ್ ವಹಿವಾಟು ಸಹವಾಸ ಎಚ್ಚರ !- ಹಸು ಮಾರಲು ಹೋಗಿ 1 ಲಕ್ಷ ರೂಪಾಯಿ ಕಳೆದುಕೊಂಡ ಯುವಕ
Online Frauds: ನನಗೆ ಹಸು ಇಷ್ಟವಾಯಿತು, ಕೊಳ್ಳುತ್ತೇನೆ. ಆದರೆ ನಾನು ಭಾರತೀಯ ಸೇನೆಯಲ್ಲಿ ಇರುವುದರಿಂದ ಫೋನ್ಪೇ ಬಳಕೆ ಮಾಡುತ್ತಿಲ್ಲ. ಹಾಗಾಗಿ ನಾನೊಂದು QR ಕೋಡ್ ಕಳಿಸುತ್ತೇನೆ. ಅದನ್ನು ಸ್ಕ್ಯಾನ್ ಮಾಡಿದರೆ ನಿಮ್ಮ ಅಕೌಂಟ್ಗೆ ನನ್ನ ಅಕೌಂಟ್ನಿಂದ ಹಣ ಬರುತ್ತದೆ ಎಂದಿದ್ದ ವಂಚಕ.
Updated on:Mar 16, 2021 | 1:43 PM
ಭುವನೇಶ್ವರ್: ನೀವೇನೇ ಹೇಳಿ, ಈ ಆನ್ಲೈನ್ ವಹಿವಾಟಿನಿಂದ ಉಪಯೋಗಗಳು ಎಷ್ಟೋ..ಅಷ್ಟೇ ಅಪಾಯವೂ ಇದೆ ಎಂಬುದನ್ನು ಒಪ್ಪಿಕೊಳ್ಳಲೇಬೇಕು. ಕಳೆದ ಕೆಲವು ವರ್ಷಗಳಿಂದ ಡಿಜಿಟಲ್ ಬಳಕೆ ಜಾಸ್ತಿಯಾಗಿದೆ. ಹಣ ವರ್ಗಾವಣೆ, ಖರೀದಿ, ಮಾರಾಟ..ಹೀಗೆ ಅನೇಕ ವಿಚಾರಗಳಲ್ಲಿ ನಾವು ಆನ್ಲೈನ್ ಮೊರೆ ಹೋಗಿದ್ದೇವೆ. ಆದರೆ ಇನ್ನೊಂದೆಡೆ ಸೈಬರ್ ಕ್ರೈಂಗಳೂ ಅಷ್ಟೇ ಹೆಚ್ಚಾಗಿವೆ. ಆನ್ಲೈನ್ನಲ್ಲಿ ವಂಚನೆ ಮಾಡುವವರ ಗುಂಪು ಸದ್ದಿಲ್ಲದೆ ಬೆಳೆಯುತ್ತಿದೆ. ಈಗ ಅಂಥದ್ದೇ ಒಂದು ಪ್ರಕರಣ ಒಡಿಶಾದಲ್ಲಿ ನಡೆದಿದ್ದು ವರದಿಯಾಗಿದೆ. ಆನ್ಲೈನ್ನಲ್ಲಿ ಹಸು ಮಾರಲು ಹೋದ ಯುವಕನಿಗೆ ಬರೋಬ್ಬರಿ 1 ಲಕ್ಷ ರೂ. ವಂಚನೆಯಾದ ಘಟನೆ ಇದು !
ದೇಬಾಸಿಶ್ ಸಾಹೂ ಎಂಬುವರು ತಮ್ಮ ಸದೃಢ ಹಸುವನ್ನು ಮಾರಾಟ ಮಾಡಲು ನಿಶ್ಚಯಿಸಿದರು. ಇದಕ್ಕೆ ಆನ್ಲೈನ್ ವೇದಿಕೆ ಆಯ್ಕೆ ಮಾಡಿಕೊಂಡ ಅವರು, ಕೃಷಿಫೈ (ಕೃಷಿಗೆ ಸಂಬಂಧಪಟ್ಟ ಆ್ಯಪ್)ನಲ್ಲಿ ಜಾಹೀರಾತನ್ನೂ ನೀಡಿದರು. ಅದಾದ ಬಳಿಕ ಅವರಿಗೆ, ತನ್ನನ್ನು ಮಂಜಿತ್ ಎಂದು ಪರಿಚಯಿಸಿಕೊಂಡು ಒಬ್ಬ ಕರೆ ಮಾಡಿದ್ದ. ಅಷ್ಟೇ ಅಲ್ಲ, ತಾನು ಸೇನೆಯಲ್ಲಿ ಅಧಿಕಾರಿಯಾಗಿದ್ದೇನೆ ಎಂದೂ ದೇಬಾಸಿಶ್ಗೆ ಆತ ಹೇಳಿದ್ದ. ಇಬ್ಬರ ನಡುವೆಯೂ ಮಾತುಕತೆ ನಡೆದು ವ್ಯವಹಾರ 20,000ಕ್ಕೆ ಕುದುರಿತು. ಅಂದರೆ ದೇಬಾಸಿಶ್ ತನ್ನ ಹಸುವನ್ನು ಮಂಜಿತ್ಗೆ 20,000 ರೂಪಾಯಿಗೆ ಮಾರಾಟ ಮಾಡಲು ಒಪ್ಪಿಕೊಂಡ.
ನನಗೆ ಹಸು ಇಷ್ಟವಾಯಿತು, ಕೊಳ್ಳುತ್ತೇನೆ. ಆದರೆ ನಾನು ಭಾರತೀಯ ಸೇನೆಯಲ್ಲಿ ಇರುವುದರಿಂದ ಫೋನ್ಪೇ ಬಳಕೆ ಮಾಡುತ್ತಿಲ್ಲ. ಹಾಗಾಗಿ ನಾನೊಂದು QR ಕೋಡ್ ಕಳಿಸುತ್ತೇನೆ. ಅದನ್ನು ಸ್ಕ್ಯಾನ್ ಮಾಡಿದರೆ ನಿಮ್ಮ ಅಕೌಂಟ್ಗೆ ನನ್ನ ಅಕೌಂಟ್ನಿಂದ ಹಣ ಬರುತ್ತದೆ ಎಂದು ಹೇಳಿದ. ಆತ ಎಷ್ಟೆಂದರೂ ಸೇನಾ ಅಧಿಕಾರಿ ಎಂದು ಸಂಪೂರ್ಣವಾಗಿ ನಂಬಿದ್ದ ಸಾಹೂ, ಹಿಂದೆಮುಂದೆ ಯೋಚಿಸದೆ ಒಪ್ಪಿಕೊಂಡ. ಅದಾದ ಬಳಿಕ ಮಂಜಿತ್ ಒಟ್ಟು 5 ಬಾರಿ ಸಾಹೂ ಮೊಬೈಲ್ಗೆ ಕ್ಯೂಆರ್ ಕೋಡ್ ಕಳಿಸಿದ. ಒಟ್ಟು 5 QR ಕೋಡ್ಗಳನ್ನೂ ಸಾಹೂ ಸ್ಕ್ಯಾನ್ ಮಾಡಿದ್ದರಿಂದ 5 ಬಾರಿ 20,000 ರೂ.ನಂತೆ 1 ಲಕ್ಷ ರೂಪಾಯಿ ಸಾಹೂ ಅಕೌಂಟ್ನಿಂದ ಮಂಜಿತ್ ಅಕೌಂಟ್ಗೆ ವರ್ಗಾವಣೆ ಆಗಿದೆ. ಅಷ್ಟಾದ ಮೇಲೆ ತಾನು ಮೋಸ ಹೋಗಿದ್ದು ಸಾಹೂಗೆ ಅರ್ಥವಾಗಿದೆ.
ಇನ್ನು ಈ ಬಗ್ಗೆ ಪೊಲೀಸರಿಗೆ ದೂರು ನೀಡಿದ ಸಾಹೂ, ಮೊದಲು ನನಗೆ 5 ರೂಪಾಯಿಯ ಕ್ಯೂಆರ್ ಸ್ಕ್ಯಾನ್ ಕೋಡ್ ಕಳಿಸಿದ. ನಾನು ಸ್ಕ್ಯಾನ್ ಮಾಡುತ್ತಿದ್ದಂತೆ 5 ರೂ.ಕ್ರೆಡಿಟ್ ಆಯಿತು. ಅದಾದ ಮೇಲೆ ಇನ್ನೊಂದು ಕಳಿಸಿದ. ಆಗ ನಾನು ಸ್ಕ್ಯಾನ್ ಮಾಡುತ್ತಿದ್ದಂತೆ 20,000ರೂ. ನನ್ನ ಅಕೌಂಟ್ನಿಂದಲೇ ಡೆಬಿಟ್ ಆಯಿತು. ಅದನ್ನು ನಾನವನಿಗೆ ಹೇಳಿದ್ದಕ್ಕೆ, ಇದು ಟೆಕ್ನಿಕಲ್ ಸಮಸ್ಯೆ ಎಂದು ಹೇಳಿದ. ಹೀಗೆ 1 ಲಕ್ಷ ರೂ.ನನ್ನ ಅಕೌಂಟ್ನಿಂದ ಡೆಬಿಟ್ ಆಗಿದೆ ಎಂದು ತಿಳಿಸಿದ್ದಾರೆ. ಭರತ್ಪುರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಪ್ರಾರಂಭಿಸಿದ್ದಾರೆ. ಆನ್ಲೈನ್ನಲ್ಲಿ ಹಣವಹಿವಾಟು ಮಾಡುವಾಗ ತುಂಬ ಎಚ್ಚರಿಕೆಯಿಂದ ಇರಿ ಎಂದು ದೇಬಾಸಿಶ್ ಸಾಹೂ ಒಂದು ವಿಡಿಯೋ ಮೂಲಕ ಸಾಮಾನ್ಯ ಜನರಿಗೆ ಮನವಿಯನ್ನೂ ಮಾಡಿದ್ದಾರೆ.
ಇದನ್ನೂ ಓದಿ: Bigg Boss Kannada 8: ಅರವಿಂದ್ ಪ್ರಪೋಸಲ್ಗೆ ಓಕೆ ಎಂದ ದಿವ್ಯಾ ಉರುಡುಗ!
Published On - 12:58 pm, Tue, 16 March 21
