ದುಬಾರಿಯಾಗಲಿದೆ ತಾಜ್​​ಮಹಲ್​ ವೀಕ್ಷಣೆ; ಪ್ರವಾಸಿಗರ ಪ್ರವೇಶ ಶುಲ್ಕ ಹೆಚ್ಚಿಸಲು ಆಗ್ರಾ ಅಭಿವೃದ್ಧಿ ಪ್ರಾಧಿಕಾರ ನಿರ್ಧಾರ

ಆಗ್ರಾ: ತಾಜ್​ಮಹಲ್ (Taj Mahal ) ಪ್ರವಾಸಿಗರಿಗೆ​ ಪ್ರವೇಶ ಶುಲ್ಕವನ್ನು ಹೆಚ್ಚು ಮಾಡಲು ಆಗ್ರಾ ಅಭಿವೃದ್ಧಿ ಪ್ರಾಧಿಕಾರ (ಎಡಿಎ) ನಿರ್ಧಾರ ಮಾಡಿದೆ.ಇಷ್ಟುದಿನ ದೇಶೀಯ ಅಂದರೆ ನಮ್ಮ ದೇಶದ ಪ್ರವಾಸಿಗರು ತಾಜ್​​ಮಹಲ್​ ವೀಕ್ಷಣೆಗೆ ಹೋಗುವಾಗ ಪ್ರವೇಶ ಶುಲ್ಕವೆಂದು 50 ರೂ.ಕೊಡಬೇಕಿತ್ತು. ಹಾಗೇ ವಿದೇಶೀ ಪ್ರವಾಸಿಗರು 1100 ರೂ.ನೀಡಬೇಕಿತ್ತು. ಆದರೆ ಇದೀಗ ಎರಡೂ ವಿಧದ ಪ್ರವಾಸಿಗರ ಪ್ರವೇಶ ಶುಲ್ಕವನ್ನೂ ಹೆಚ್ಚಿಸುವ ಪ್ರಸ್ತಾಪವನ್ನು ಎಡಿಎ ಇಟ್ಟಿದೆ.

ಇನ್ನು ಮುಂದೆ ತಾಜ್​ಮಹಲ್​​ಗೆ ಭೇಟಿ ನೀಡಲಿರುವ ದೇಶೀಯ ಪ್ರವಾಸಿಗರ ಪ್ರವೇಶ ಶುಲ್ಕವನ್ನು 80 ರೂ.ಗೆ ಏರಿಸಲು, ವಿದೇಶಿ ಪ್ರವಾಸಿಗರಿಗೆ ಎಂಟ್ರಿ ಶುಲ್ಕವನ್ನು 1200 ರೂ.ಗೆ ಏರಿಕೆ ಮಾಡುವ ಬಗ್ಗೆ ಎಡಿಎ ಪ್ರಸ್ತಾಪದಲ್ಲಿ ಉಲ್ಲೇಖಿಸಿದ್ದು, ಇನ್ನು ತಾಜ್​ನ ಮುಖ್ಯ ಗುಮ್ಮಟ ಪ್ರವೇಶ ಮಾಡುವವರಿಗೆ 200 ರೂ.ಪ್ರವೇಶ ಶುಲ್ಕವಿಧಿಸಲು ನಿರ್ಧಾರ ಮಾಡಿದೆ. ತಾಜ್​ಮಹಲ್​ನ ಮುಖ್ಯ ಗುಮ್ಮಟವನ್ನು ಪ್ರವೇಶಿಸುವವರಿಗೆ ಆರ್ಕಿಯಲಾಜಿಕಲ್ ಸರ್ವೆ ಆಫ್ ಇಂಡಿಯಾ (ASI) ಈಗಾಗಲೇ 200 ರೂ.ವಿಧಿಸುತ್ತಿದ್ದು, ಅದರ ಹೊರತಾಗಿ ಈಗ ಆಗ್ರಾ ಅಭಿವೃದ್ಧಿ ಪ್ರಾಧಿಕಾರವೂ 200 ರೂ. ಶುಲ್ಕ ನಿಗದಿಪಡಿಸಲು ಮುಂದಾಗಿದೆ.

ಈ ಹೊಸ ನಿಯಮ ಅನ್ವಯ ಆದ ತಕ್ಷಣದಿಂದ ಮುಖ್ಯ ಗುಮ್ಮಟ ಪ್ರವೇಶಿಸಲು ಇಚ್ಛಿಸುವ ದೇಶೀಯ ಪ್ರವಾಸಿಗರು ಒಟ್ಟೂ 480 ರೂ. ಮತ್ತು ವಿದೇಶೀ ಪ್ರವಾಸಿಗರು 1600 ರೂ. ಪ್ರವೇಶ ಶುಲ್ಕ ನೀಡಬೇಕು. ಆದರೆ ತಾಜ್​ಮಹಲ್​ ಪ್ರವೇಶ ಟಿಕೆಟ್​ ಬೆಲೆ ಹೆಚ್ಚುತ್ತಿದೆ ಎಂಬುದನ್ನು ಕೇಳುತ್ತಿದ್ದಂತೆ ಪ್ರವಾಸಿಗರು ಬೇಸರ ವ್ಯಕ್ತಪಡಿಸಿದ್ದಾರೆ. ಭಾರತೀಯರು ತಮ್ಮ ಪರಂಪರೆಯ ಸೌಂದರ್ಯ ನೋಡಲು ಇಷ್ಟು ಪ್ರಮಾಣದ ಹಣ ತುಂಬಬೇಕಾಗಿ ಬಂದಿರುವುದು ಬೇಸರದ ಸಂಗತಿ. ಹೀಗಾದರೆ ತಾಜ್​ಮಹಲ್​​ಗೆ ಭೇಟಿ ನೀಡುವವರ ಸಂಖ್ಯೆ ಕಡಿಮೆಯಾಗಲಿದೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ಆಗ್ರಾ: ವಿಶ್ವ ಪ್ರಸಿದ್ಧ ತಾಜ್​ಮಹಲ್​ಗೆ ಬಾಂಬ್ ಬೆದರಿಕೆ; ಪ್ರವಾಸಿಗರು ಹೊರಕ್ಕೆ – ಹುಸಿ ಕರೆ ಮಾಡಿದ ವ್ಯಕ್ತಿ ಅಂದರ್

ತಾಜ್​ಮಹಲ್ ಮುಂದೆ ಕೇಸರಿ ಧ್ವಜ ಹಾರಿಸಿದ ಹಿಂದೂ ಜಾಗರಣ್ ಮಂಚ್ ಸದಸ್ಯರ ಬಂಧನ