ಸಂಸದರ ಸಾಮೂಹಿಕ ಅಮಾನತು ಆಡಳಿತ ಪಕ್ಷದಿಂದ ‘ಪೂರ್ವಯೋಜಿತ’ ಮತ್ತು ‘ಅಸ್ತ್ರ’: ಖರ್ಗೆ

ದೆಹಲಿ ಡಿಸೆಂಬರ್ 25: ಪ್ರಜಾಪ್ರಭುತ್ವವನ್ನು ಹಾಳುಗೆಡವಲು, ಸಂಸತ್ತಿನ ಪದ್ಧತಿಗಳನ್ನು ಹಾಳು ಮಾಡಲು ಮತ್ತು ಸಂವಿಧಾನವನ್ನು ಹದಗೆಡಿಸಲು ಆಡಳಿತ ಪಕ್ಷವು ಸಂಸದರ ಅಮಾನತನ್ನು “ಅಸ್ತ್ರ”ವಾಗಿಸಿದೆ ಎಂದು ಪ್ರತಿಪಕ್ಷದ ನಾಯಕ ಮಲ್ಲಿಕಾರ್ಜುನ ಖರ್ಗೆ (Mallikarjun Kharge) ರಾಜ್ಯಸಭಾ ಅಧ್ಯಕ್ಷ ಜಗದೀಪ್ ಧನ್ಖರ್ (Jagdeep Dhankhar) ಅವರಿಗೆ ಬರೆದ ಪತ್ರದಲ್ಲಿ ತಿಳಿಸಿದ್ದಾರೆ. ಜಗದೀಪ್ ಧನ್ಖರ್ ಅವರು ಬರೆದ ಪತ್ರಕ್ಕೆ ಉತ್ತರ ಬರೆದಿರುವ ಖರ್ಗೆ, ರಾಜ್ಯಸಭಾ ಅಧ್ಯಕ್ಷರ ಪತ್ರವು “ದುರದೃಷ್ಟವಶಾತ್ ಸಂಸತ್ತಿನ ಬಗ್ಗೆ ಸರ್ಕಾರದ ನಿರಂಕುಶಾಧಿಕಾರ ಮತ್ತು ದುರಹಂಕಾರದ ಧೋರಣೆಯನ್ನು ಸಮರ್ಥಿಸುತ್ತದೆ” ಎಂದು ಹೇಳಿದರು. ಧನ್ಖರ್ ಅವರು ಎತ್ತಿದ ಅಂಶಗಳಿಗೆ ಉತ್ತರಿಸುತ್ತಾ, ಹಿರಿಯ ಕಾಂಗ್ರೆಸ್ ನಾಯಕರು ರಾಜ್ಯಸಭೆಯ ಅಧ್ಯಕ್ಷರಾಗಿ “ವಸ್ತುನಿಷ್ಠವಾಗಿ ಮತ್ತು ತಟಸ್ಥವಾಗಿ” ಅವರ ಕಳವಳಗಳನ್ನು ಪರಿಶೀಲಿಸುವಂತೆ ಒತ್ತಾಯಿಸಿದರು.

“ಯಾವುದಾದರೂ ವಿಶೇಷಾಧಿಕಾರದ ಪ್ರಸ್ತಾವನೆಗಳು ವಿರೋಧ ಪಕ್ಷದ ಧ್ವನಿಯನ್ನು ಮರೆಮಾಚಲು ಅಸ್ತ್ರಗೊಳಿಸಿದ್ದರೆ, ಇದು ಸಂಸತನ್ನೇ ಹಾಳುಮಾಡಲು ಆಡಳಿತ ಪಕ್ಷದ ಉದ್ದೇಶಪೂರ್ವಕ ಕೆಲಸ. ಸಂಸದರನ್ನು ಅಮಾನತುಗೊಳಿಸುವ ಮೂಲಕ ಸರ್ಕಾರವು 146 ಸಂಸದರ ಮತದಾರರ ಧ್ವನಿಯನ್ನು ಮೌನಗೊಳಿಸುತ್ತಿದೆ ಎಂದು ಖರ್ಗೆ ಹೇಳಿದ್ದಾರೆ.

ಗದ್ದಲ ಉದ್ದೇಶಪೂರ್ವಕ ಮತ್ತು ಕಾರ್ಯತಂತ್ರ ಮತ್ತು ಪೂರ್ವನಿರ್ಧರಿತವಾಗಿದೆ ಎಂದು ಸಹ ನೀವು ಉಲ್ಲೇಖಿಸಿದ್ದೀರಿ. ಸಂಸತ್ತಿನ ಉಭಯ ಸದನಗಳಿಂದ ವಿರೋಧ ಪಕ್ಷದ ಸಂಸದರ ಸಾಮೂಹಿಕ ಅಮಾನತು ಸರ್ಕಾರದಿಂದ ಪೂರ್ವನಿರ್ಧರಿತ ಮತ್ತು ಪೂರ್ವನಿಯೋಜಿತವಾಗಿದೆ ಎಂದು ತೋರುತ್ತಿದೆ ಎಂದು ನಾನು ಹೇಳಲು ಬಯಸುತ್ತೇನೆ. ಯಾವುದನ್ನೂ ಯೋಚಿಸದೆಯೇ ಇದನ್ನು ಕಾರ್ಯಗತಗೊಳಿಸಲಾಗಿದೆ ಎಂದು ಹೇಳಲು ನಾನು ವಿಷಾದಿಸುತ್ತೇನೆ. ಸಂಸತ್ತಿನಲ್ಲಿಯೂ ಹಾಜರಿರದ ಇಂಡಿಯಾ ಒಕ್ಕೂಟ ಸಂಸದರನ್ನು ಅಮಾನತುಗೊಳಿಸಿರುವುದನ್ನು ನೋಡಬಹುದು ಎಂದಿದ್ದಾರೆ ಖರ್ಗೆ.

ವಿರೋಧ ಪಕ್ಷದ ನಾಯಕರನ್ನು ಭೇಟಿ ಮಾಡುವ ಪ್ರಯತ್ನವನ್ನು ತಿರಸ್ಕರಿಸಲಾಗಿದೆ ಎಂದು ಧನ್ಖರ್ ತಮ್ಮ ಪತ್ರದಲ್ಲಿ ಹೇಳಿದ್ದಕ್ಕೆ ಪ್ರತಿಕ್ರಿಯಿಸಿದ ಖರ್ಗೆ, ಅಮಾನತು ಪ್ರಾರಂಭವಾಗುವ ಮೊದಲು ಡಿಸೆಂಬರ್ 14 ರಂದು ಭದ್ರತಾ ಲೋಪದ ಬಗ್ಗೆ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರಿಂದ ಹೇಳಿಕೆಯನ್ನು ಕೇಳಿದ್ದೇನೆ. “ಈ ನೋಟಿಸ್‌ಗಳ ಬಗ್ಗೆ ನಿರ್ಧರಿಸಲು ಸಭಾಪತಿಯಾಗಿ ನಿಮ್ಮ ಅಧಿಕಾರದಲ್ಲಿದೆ ಎಂದು ನಾನು ಗುರುತಿಸುತ್ತೇನೆ. ಆದರೆ, ಸದನದಲ್ಲಿ ಹೇಳಿಕೆ ನೀಡಲು ಇಚ್ಛಿಸದ ಗೌರವಾನ್ವಿತ ಗೃಹ ಸಚಿವರು ಮತ್ತು ಸರ್ಕಾರದ ಧೋರಣೆಯನ್ನು ಅಧ್ಯಕ್ಷರು ಕ್ಷಮಿಸಿರುವುದು ವಿಷಾದನೀಯ ಎಂದಿದ್ದಾರೆ.

ಇದನ್ನೂ ಓದಿ: ರಾಹುಲ್ ಗಾಂಧಿಯನ್ನು ಚುನಾವಣಾ ಗಾಂಧಿ ಎಂದು ಲೇವಡಿ ಮಾಡಿದ ಬಿಆರ್​​ಎಸ್ ನಾಯಕಿ ಕವಿತಾ

ಸಂಸತ್ತಿನ ಅಧಿವೇಶನ ನಡೆಯುತ್ತಿರುವಾಗ ಗೌರವಾನ್ವಿತ ಗೃಹ ಸಚಿವರು ಟಿವಿ ವಾಹಿನಿಯೊಂದರ ಮುಂದೆ ತಮ್ಮ ಮೊದಲ ಸಾರ್ವಜನಿಕ ಹೇಳಿಕೆಯನ್ನು ನೀಡಿದ್ದು, ಪ್ರಜಾಪ್ರಭುತ್ವದ ದೇಗುಲವನ್ನು ಅಪಹಾಸ್ಯ ಮಾಡುತ್ತಿರುವುದು ಸಭಾಪತಿಗೆ ಕಂಡುಬಂದಿಲ್ಲ ಎಂದು ಖರ್ಗೆ ಹೇಳಿದರು.

ಗೃಹ ಸಚಿವರು ರಾಜ್ಯಸಭೆಗೆ ಹಾಜರಾಗುವ ಮೊದಲು ಹೆಚ್ಚಿನ ವಿರೋಧ ಪಕ್ಷದ ಸಂಸದರನ್ನು ಅಮಾನತುಗೊಳಿಸಲಾಗುವುದು ಎಂದು ಕೇಂದ್ರ ಸಚಿವರೊಬ್ಬರು ವಿರೋಧ ಪಕ್ಷದ ಸಂಸದರಿಗೆ ತಿಳಿಸಿದ್ದಾರೆ ಎಂದು ಅವರು ಹೇಳಿದರು. “ಅಂತಹ ಬೆದರಿಕೆಯನ್ನು ನಿಜವಾಗಿಯೂ ನೀಡಲಾಗಿದೆಯೇ ಎಂದು ಅಧ್ಯಕ್ಷರು ವಿಚಾರಣೆ ನಡೆಸುತ್ತಾರೆ ಎಂದು ನಾವು ನಿರೀಕ್ಷಿಸಿದ್ದೇವೆ. ಅಂತಹ ಹೇಳಿಕೆಗಳು ಸದಸ್ಯರ ಅಮಾನತು ಸೇರಿದಂತೆ ಸದನವನ್ನು ನಡೆಸುವ ಅಂತಿಮ ಅಧಿಕಾರ ಎಂದು ನಾವು ನಂಬುವ ಅಧ್ಯಕ್ಷರನ್ನು ತೀವ್ರವಾಗಿ ದುರ್ಬಲಗೊಳಿಸುತ್ತವೆ. ಸಂಸದರನ್ನು ಅಮಾನತು ಮಾಡುವ ಮೂಲಕ ಸರ್ಕಾರವು 146 ಸಂಸದರ ಮತದಾರರ ಧ್ವನಿಯನ್ನು ಪರಿಣಾಮಕಾರಿಯಾಗಿ ಮೌನಗೊಳಿಸುತ್ತಿದೆ ಎಂದು ಮಲ್ಲಿಕಾರ್ಜುನ ಖರ್ಗೆ ಹೇಳಿದ್ದಾರೆ.

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ