ಜಗತ್ತಿನ ಶ್ರೀಮಂತರ ಪಟ್ಟಿಯಲ್ಲಿ ರಿಲಯನ್ಸ್ ಇಂಡಸ್ಟ್ರೀಸ್ ಮಾಲೀಕ ಮುಕೇಶ್ ಅಂಬಾನಿಗೆ 8ನೇ ಸ್ಥಾನ !..ನಂ.1 ಪಟ್ಟ ಯಾರಿಗೆ?
ಭಾರತದ ಇತರ ಕೆಲವು ಬಿಲಿಯನೇರ್ಗಳೂ ಕೂಡ ಈ ಬಾರಿಯ ಹುರುನ್ ರಿಚ್ ಲಿಸ್ಟ್ನಲ್ಲಿ ಸ್ಥಾನ ಪಡೆದಿದ್ದಾರೆ. ಅವರಲ್ಲಿ ಗೌತಮ್ ಅದಾನಿ ಮತ್ತು ಕುಟುಂಬದ ಬಳಿ 2.34 ಲಕ್ಷ ಕೋಟಿ ರೂ.ಸಂಪತ್ತು ಇದ್ದು, 48ನೇ ರ‍್ಯಾಂಕ್ನಲ್ಲಿದ್ದಾರೆ.
Updated on:Mar 02, 2021 | 2:44 PM
ನವದೆಹಲಿ: ಭಾರತದ ಶ್ರೀಮಂತರ ಪಟ್ಟಿಯಲ್ಲಿ ನಂ.1ಸ್ಥಾನದಲ್ಲಿರುವ ರಿಲಯನ್ಸ್ ಇಂಡಸ್ಟ್ರೀಸ್ ಅಧ್ಯಕ್ಷ ಮತ್ತು ಎಂಡಿ ಮುಕೇಶ್ ಅಂಬಾನಿ, ಜಗತ್ತಿನ ಶ್ರೀಮಂತರ ಪಟ್ಟಿಯಲ್ಲಿ 8ನೇ ಸ್ಥಾನದಲ್ಲಿದ್ದಾರೆಂದು ಹುರುನ್ ಗ್ಲೋಬಲ್ ರಿಚ್ ಲಿಸ್ಟ್ 2021ರಲ್ಲಿ ಉಲ್ಲೇಖವಾಗಿದೆ. ಹುರುನ್ ಗ್ಲೋಬಲ್ ರಿಚ್ ಲಿಸ್ಟ್ ಇಂದು ಬಿಡುಗಡೆಯಾಗಿದ್ದು, ಅದರಲ್ಲಿ ಮುಕೇಶ್ ಅಂಬಾನಿಯವರ ಸಂಪತ್ತಿನ ಮೌಲ್ಯ ಕಳೆದ ಒಂದು ವರ್ಷದಲ್ಲಿ ಶೇ.24ರಷ್ಟು ಏರಿಕೆಯಾಗಿ, ಸುಮಾರು 83 ಬಿಲಿಯನ್ ಡಾಲರ್ ಅಂದರೆ 6.09 ಲಕ್ಷ ಕೋಟಿ ರೂಪಾಯಿಗಳಷ್ಟಾಗಿದೆ ಎಂದು ಹೇಳಲಾಗಿದೆ.
ಇನ್ನು ಭಾರತದ ಇತರ ಕೆಲವು ಬಿಲಿಯನೇರ್ಗಳೂ ಕೂಡ ಈ ಬಾರಿಯ ಹುರುನ್ ರಿಚ್ ಲಿಸ್ಟ್ನಲ್ಲಿ ಸ್ಥಾನ ಪಡೆದಿದ್ದಾರೆ. ಅವರಲ್ಲಿ ಗೌತಮ್ ಅದಾನಿ ಮತ್ತು ಕುಟುಂಬದ ಬಳಿ 2.34 ಲಕ್ಷ ಕೋಟಿ ರೂ.ಸಂಪತ್ತು ಇದ್ದು, 48ನೇ ರ‍್ಯಾಂಕ್ನಲ್ಲಿದ್ದಾರೆ. ಹಾಗೇ, ಶಿವ್ ನಾದರ್ ಮತ್ತು ಕುಟುಂಬ (58 ನೇ ರ‍್ಯಾಂಕ್, 1.94 ಲಕ್ಷ ಕೋಟಿ ರೂ. ಮೌಲ್ಯದ ಸಂಪತ್ತು), ಲಕ್ಷ್ಮಿ ಎನ್ ಮಿತ್ತಲ್ (104ನೇ ರ‍್ಯಾಂಕ್, 1.40 ಲಕ್ಷ ಕೋಟಿ ರೂ.), ಸೀರಮ್ ಸಂಸ್ಥೆಯ ಸೈರಸ್ ಪೂನವಾಲ್ಲಾ (113ನೇ ರ‍್ಯಾಂಕ್, 1.35 ಲಕ್ಷ ಕೋಟಿ ರೂ.) ಕೂಡ ಶ್ರೀಮಂತರ ಪಟ್ಟಿಯಲ್ಲಿದ್ದಾರೆ.
ನಂ.1 ಶ್ರೀಮಂತ ಯಾರು? ಹುರುನ್ ಗ್ಲೋಬಲ್ ರಿಚ್ ಲಿಸ್ಟ್ 2021ರ ಪ್ರಕಾರ ಜಗತ್ತಿನ ನಂಬರ್ 1 ಶ್ರೀಮಂತ ತೆಸ್ಲಾ ಕಂಪನಿ ಸಿಇಒ ಎಲಾನ್ ಮಸ್ಕ್. ಇವರ ಸಂಪತ್ತು ಶೇ.328ರಷ್ಟು ಏರಿಕೆಯಾಗಿದ್ದು, ಒಟ್ಟಾರೆ 197 ಬಿಲಿಯನ್ ಡಾಲರ್ನಷ್ಟಾಗಿದೆ. ಅಂದರೆ ಒಂದೇ ವರ್ಷದಲ್ಲಿ 151 ಬಿಲಿಯನ್ ಡಾಲರ್ ಏರಿಕೆಯಾಗಿದೆ.
ಬ್ಲೂಮ್ಬರ್ಗ್ ಪಟ್ಟಿಯಲ್ಲಿ ಮುಕೇಶ್ ಅಂಬಾನಿಗೆ 6ನೇ ಸ್ಥಾನ ಇನ್ನು ಕಳೆದ ವರ್ಷ ಜುಲೈನಲ್ಲಿ ಬ್ಲೂಬ್ಬರ್ಗ್ ಬಿಡುಗಡೆ ಮಾಡಿದ್ದ ಜಗತ್ತಿನ ಅತ್ಯಂತ ಶ್ರೀಮಂತರ ಪಟ್ಟಿಯಲ್ಲಿ ಮುಕೇಶ್ ಅಂಬಾನಿ 6ನೇ ಸ್ಥಾನದಲ್ಲಿ ಇದ್ದರು. ಕೊರೊನಾ ಸಂಕಷ್ಟ ಕಾಲದಲ್ಲೂ ಮುಕೇಶ್ ಅಂಬಾನಿ ಆಸ್ತಿಯ ನಿವ್ವಳ ಮೌಲ್ಯ ಬರೋಬ್ಬರಿ 72.4 ಬಿಲಿಯನ್ ಡಾಲರ್ (5.44 ಲಕ್ಷ ಕೋಟಿ) ಇತ್ತು.
ಇದನ್ನೂ ಓದಿ: ಮುಕೇಶ್ ಅಂಬಾನಿ ಮನೆ ಬಳಿ ಪತ್ತೆಯಾದ ಕಾರಿನಲ್ಲಿ ಸ್ಫೋಟಕದ ಜತೆಗಿತ್ತು ಬೆದರಿಕೆ ಪತ್ರ
ಮುಕೇಶ್ ಅಂಬಾನಿ ಮನೆ ಬಳಿ ಸ್ಫೋಟಕ ಇರಿಸಿದ ಹೊಣೆ ಹೊತ್ತ ಜೈಶ್-ಉಲ್-ಹಿಂದ್ ಸಂಘಟನೆ
Published On - 2:44 pm, Tue, 2 March 21
