‘ಭಾರತ-ಪಾಕ್-ಬಾಂಗ್ಲಾ ಸೇರಿ ಒಂದು ರಾಷ್ಟ್ರವಾಗಲಿ..’ NCP ನವಾಬ್ ಮಲ್ಲಿಕ್ ಆಶಯ

ಮುಂಬೈ: ಮೊನ್ನೆಯಷ್ಟೇ ಮಹಾರಾಷ್ಟ್ರದ ಮಾಜಿ ಮುಖ್ಯಮಂತ್ರಿ, ಬಿಜೆಪಿ ನಾಯಕ ದೇವೇಂದ್ರ ಫಡ್ನವಿಸ್ ಮುಂದೊಂದು ದಿನ ಕರಾಚಿಯೂ ಭಾರತಕ್ಕೆ ಸೇರಲಿದೆ ಎಂದು ತಮ್ಮ ಅಖಂಡ ಭಾರತದ ಪರಿಕಲ್ಪನೆಯನ್ನು ಪ್ರಸ್ತುತ ಪಡಿಸಿದ ಬೆನ್ನಲ್ಲೇ, ಎನ್​ಸಿಪಿ ಮುಖ್ಯಸ್ಥ ನವಾಬ್ ಮಲ್ಲಿಕ್ ತಮ್ಮ ಅಖಂಡ ಭಾರತದ ಪರಿಕಲ್ಪನೆ ಏನೆಂಬುದನ್ನು ಹೇಳಿದ್ದಾರೆ.

ದೇವೇಂದ್ರ ಫಡ್ನವೀಸ್ ಕರಾಚಿ ಭಾರತದ ಭಾಗವಾಗಬಹುದು ಎಂದಿದ್ದಾರೆ. ಆದರೆ ನಾವು ಭಾರತ, ಪಾಕಿಸ್ತಾನ, ಬಾಂಗ್ಲಾದೇಶ ಮೂರೂ ಸೇರಬೇಕು ಎಂದು ಹೇಳುತ್ತೇವೆ. ಈ ಮೂರೂ ದೇಶಗಳನ್ನು ಸೇರಿಸಿ ಒಂದು ರಾಷ್ಟ್ರ ನಿರ್ಮಾಣ ಮಾಡಲು ಬಿಜೆಪಿ ಸರ್ಕಾರ ಮುಂದಾದರೆ ಖಂಡಿತ ಅದನ್ನು ನಮ್ಮ ಪಕ್ಷ ಸ್ವಾಗತಿಸುತ್ತದೆ. ಬರ್ಲಿನ್​ ಗೋಡೆಯನ್ನೇ ಧ್ವಂಸ ಮಾಡಲು ಸಾಧ್ಯ ಎಂದಾದ ಮೇಲೆ ಭಾರತ-ಪಾಕಿಸ್ತಾನ-ಬಾಂಗ್ಲಾದೇಶವನ್ನು ಸೇರಿಸಲು ಯಾಕೆ ಸಾಧ್ಯವಿಲ್ಲ? ಎಂದು ಪ್ರಶ್ನಿಸಿದ್ದಾರೆ.

ಮೊದಲು PoK ತನ್ನಿ.. ದೇವೇಂದ್ರ ಫಡ್ನವಿಸ್ ಹೇಳಿಕೆಗೆ ಶಿವಸೇನಾ ಮುಖಂಡ ಸಂಜಯ್ ರಾವತ್ ಪ್ರತಿಕ್ರಿಯೆ ನೀಡಿದ್ದು, ಕರಾಚಿಯನ್ನು ಭಾರತಕ್ಕೆ ಸೇರಿಸುವುದು ಇರಲಿ.. ಮೊದಲು ಪಾಕ್ ಆಕ್ರಮಿತ ಕಾಶ್ಮೀರವನ್ನು (ಪಿಒಕೆ) ಭಾರತಕ್ಕೆ ಸೇರಿಸಿ ಎಂದಿದ್ದಾರೆ.