Cross-border Oil Pipeline: ಭಾರತ-ಬಾಂಗ್ಲಾದೇಶ ಫ್ರೆಂಡ್ಶಿಪ್ ಪೈಪ್ಲೈನ್ ಇಂದು ಉದ್ಘಾಟನೆ; ಗಡಿಯಾಚೆಗಿನ ತೈಲ ಪೈಪ್ಲೈನ್ನ ವಿಶೇಷತೆ ಏನು?
ಇದು ಭಾರತ ಮತ್ತು ಬಾಂಗ್ಲಾದೇಶದ ನಡುವಿನ ಮೊದಲ ಗಡಿಯಾಚೆಗಿನ ಇಂಧನ ಪೈಪ್ಲೈನ್ ಆಗಿದ್ದು, 377 ಕೋಟಿ ರೂ.ಗಳ ಅಂದಾಜು ವೆಚ್ಚದಲ್ಲಿ ನಿರ್ಮಿಸಲಾಗಿದೆ. ಬಾಂಗ್ಲಾದೇಶದ ಪೈಪ್ಲೈನ್ಗೆ ₹285 ಕೋಟಿ ವೆಚ್ಚವಾಗಿದೆ.
ದೆಹಲಿ: ಪ್ರಧಾನಿ ನರೇಂದ್ರ ಮೋದಿ (Narendra Modi) ಮತ್ತು ಬಾಂಗ್ಲಾದೇಶದ ಪ್ರಧಾನಿ ಶೇಖ್ ಹಸೀನಾ (Sheikh Hasina) ಭಾರತ-ಬಾಂಗ್ಲಾದೇಶ ಫ್ರೆಂಡ್ಶಿಪ್ ಪೈಪ್ಲೈನ್ (IBFPL) ಅನ್ನು ಇಂದು(ಶನಿವಾರ) ವಿಡಿಯೊ ಕಾನ್ಫರೆನ್ಸ್ ಮೂಲಕ ಉದ್ಘಾಟಿಸಲಿದ್ದಾರೆ. ಇದು ಭಾರತ ಮತ್ತು ಬಾಂಗ್ಲಾದೇಶದ ನಡುವಿನ ಮೊದಲ ಗಡಿಯಾಚೆಗಿನ ಇಂಧನ ಪೈಪ್ಲೈನ್ ಆಗಿದ್ದು, 377 ಕೋಟಿ ರೂ.ಗಳ ಅಂದಾಜು ವೆಚ್ಚದಲ್ಲಿ ನಿರ್ಮಿಸಲಾಗಿದೆ. ಬಾಂಗ್ಲಾದೇಶದ ಪೈಪ್ಲೈನ್ಗೆ ₹285 ಕೋಟಿ ವೆಚ್ಚವಾಗಿದೆ. ಪೈಪ್ಲೈನ್ ಪ್ರತಿ ವರ್ಷಕ್ಕೆ 1 ಮಿಲಿಯನ್ ಮೆಟ್ರಿಕ್ ಟನ್ (MMTPA) ಹೈ-ಸ್ಪೀಡ್ ಡೀಸೆಲ್ (HSD) ಅನ್ನು ಸಾಗಿಸುವ ಸಾಮರ್ಥ್ಯವನ್ನು ಹೊಂದಿದೆ. ಇದು ಆರಂಭದಲ್ಲಿ ಉತ್ತರ ಬಾಂಗ್ಲಾದೇಶದ ಏಳು ಜಿಲ್ಲೆಗಳಿಗೆ ಹೈ-ಸ್ಪೀಡ್ ಡೀಸೆಲ್ ಅನ್ನು ಪೂರೈಸುತ್ತದೆ. ಭಾರತ-ಬಾಂಗ್ಲಾದೇಶ ಫ್ರೆಂಡ್ಶಿಪ್ ಪೈಪ್ಲೈನ್ನ ಕಾರ್ಯಾಚರಣೆಯು ಸುಸ್ಥಿರ, ವಿಶ್ವಾಸಾರ್ಹ, ಪರಿಸರ ಸ್ನೇಹಿ ಮೋಡ್ ಅನ್ನು ಭಾರತದಿಂದ ಬಾಂಗ್ಲಾದೇಶಕ್ಕೆ ಸಾಗಿಸುತ್ತದೆ. ಇದು ಉಭಯ ದೇಶಗಳ ನಡುವೆ ಇಂಧನ ಭದ್ರತೆಯಲ್ಲಿ ಸಹಕಾರವನ್ನು ಇನ್ನಷ್ಟು ಹೆಚ್ಚಿಸುತ್ತದೆ ಎಂದು ಪ್ರಕಟಣೆ ತಿಳಿಸಿದೆ.
ಉಭಯ ದೇಶಗಳ ನಡುವಿನ ಮೊದಲ ಗಡಿಯಾಚೆಗಿನ ಇಂಧನ ಪೈಪ್ಲೈನ್ ಅನ್ನು ಉದ್ಘಾಟಿಸುವ ಕಾರ್ಯಕ್ರಮ ಸಂಜೆ 5 ಗಂಟೆಗೆ ನಡೆಸಲಿದೆ.
ಭಾರತ-ಬಾಂಗ್ಲಾದೇಶ ಫ್ರೆಂಡ್ಶಿಪ್ ಪೈಪ್ಲೈನ್ನಲ್ಲಿ ಪ್ರಮುಖ ಅಂಶಗಳು ಇಲ್ಲಿವೆ:
- ಅಂದಾಜು ₹377 ಕೋಟಿ ವೆಚ್ಚದಲ್ಲಿ ಪೈಪ್ಲೈನ್ ನಿರ್ಮಿಸಲಾಗಿದೆ. ಬಾಂಗ್ಲಾದೇಶದ ಪೈಪ್ಲೈನ್ಗೆ ₹285 ಕೋಟಿ ವೆಚ್ಚವಾಗಿದೆ.
ಸಂಪೂರ್ಣ ಪೈಪ್ಲೈನ್ 131.5-ಕಿಮೀ ಉದ್ದವಾಗಿದ್ದು ಇದು ಭಾರತದಿಂದ ಬಾಂಗ್ಲಾದೇಶಕ್ಕೆ ಡೀಸೆಲ್ ಸರಬರಾಜು ಮಾಡಲು ಬಳಸಲಾಗುತ್ತದೆ. - ಈ ವರ್ಷದ ಜೂನ್ನಲ್ಲಿ ಪ್ರಾಯೋಗಿಕ ಆಧಾರದ ಮೇಲೆ ಪೂರೈಕೆ ಪ್ರಾರಂಭವಾಗುತ್ತದೆ.
- ಯೋಜನೆಯ ನಿರ್ಮಾಣವು 2018 ರಲ್ಲಿ ಭಾರತದ ಅನುದಾನ ನಿಧಿಯ ಸಹಾಯದಿಂದ ಪ್ರಾರಂಭವಾಯಿತು.
- ಪೈಪ್ಲೈನ್ ಪ್ರತಿ ವರ್ಷ 1 ಮಿಲಿಯನ್ ಮೆಟ್ರಿಕ್ ಟನ್ ಹೈಸ್ಪೀಡ್ ಡೀಸೆಲ್ ಅನ್ನು ಉತ್ತರ ಬಾಂಗ್ಲಾದೇಶದ ಏಳು ಜಿಲ್ಲೆಗಳಿಗೆ ಸಾಗಿಸುತ್ತದೆ.
- ಪೈಪ್ಲೈನ್ ನುಮಾಲಿಗಢ್ ರಿಫೈನರಿ ಲಿಮಿಟೆಡ್ನ (NRL) ಸಿಲಿಗುರಿ ಮೂಲದ ಮಾರ್ಕೆಟಿಂಗ್ ಟರ್ಮಿನಲ್ನಿಂದ ಬಾಂಗ್ಲಾದೇಶ ಪೆಟ್ರೋಲಿಯಂ ಕಾರ್ಪೊರೇಶನ್ನ (BPC) ಪರ್ಬತಿಪುರ ಡಿಪೋಗೆ ಸಾಗುತ್ತದೆ.
- ಇಂಧನ ಸಾರಿಗೆ ಒಪ್ಪಂದವು 15 ವರ್ಷಗಳವರೆಗೆ ಪರಿಣಾಮಕಾರಿಯಾಗಿರುತ್ತದೆ ಮತ್ತು ಮತ್ತಷ್ಟು ವಿಸ್ತರಣೆಯ ಆಯ್ಕೆಯೂ ಇಲ್ಲಿದೆ.
ಈ ಯೋಜನೆಯನ್ನು ಭಾರತದ ನುಮಾಲಿಗಢ್ ರಿಫೈನರಿ ಲಿಮಿಟೆಡ್ ಮತ್ತು ಬಾಂಗ್ಲಾದೇಶದ ಮೇಘನಾ ಪೆಟ್ರೋಲಿಯಂ ಲಿಮಿಟೆಡ್ ಜಂಟಿಯಾಗಿ ಅನುಷ್ಠಾನಗೊಳಿಸಿದೆ. - ಆರಂಭದಲ್ಲಿ ಬಾಂಗ್ಲಾದೇಶ ಸುಮಾರು 2.5 ಲಕ್ಷ ಟನ್ ಡೀಸೆಲ್ ಖರೀದಿಸಲಿದೆ. ಮುಂದಿನ ವರ್ಷಗಳಲ್ಲಿ ಅದನ್ನು 4 ರಿಂದ 5 ಲಕ್ಷ ಟನ್ಗಳಿಗೆ ಹೆಚ್ಚಿಸಲಾಗುವುದು. ಒಪ್ಪಂದದಡಿಯಲ್ಲಿ, ಬಾಂಗ್ಲಾದೇಶವು 15 ವರ್ಷಗಳವರೆಗೆ ಪೂರೈಕೆ ಪ್ರಾರಂಭವಾದ ದಿನದಿಂದ ಡೀಸೆಲ್ ಅನ್ನು ಆಮದು ಮಾಡಿಕೊಳ್ಳುತ್ತದೆ.
- ಭಾರತ-ಬಾಂಗ್ಲಾದೇಶ ಫ್ರೆಂಡ್ ಶಿಪ್ ಪೈಪ್ಲೈನ್ ಬಾಂಗ್ಲಾದೇಶದ ರಂಗ್ಪುರ ಮತ್ತು ರಾಜ್ಶಾಹಿ ಅಡಿಯಲ್ಲಿ ಎಲ್ಲಾ 16 ಉತ್ತರ ಜಿಲ್ಲೆಗಳಲ್ಲಿ ಸ್ಥಿರವಾದ ಡೀಸೆಲ್ ಪೂರೈಕೆಯನ್ನು ಒದಗಿಸಲು ಸಹಾಯ ಮಾಡುತ್ತದೆ. ಇದು ಕನಿಷ್ಟ ವೆಚ್ಚದಲ್ಲಿ ಇಂಧನದ ವೇಗದ ಗತಿಯ ವಿತರಣೆಯನ್ನು ಖಚಿತಪಡಿಸುತ್ತದೆ. ಪ್ರಸ್ತುತ, ಆಮದು ಮಾಡಿಕೊಂಡ ಡೀಸೆಲ್ ಅನ್ನು ಚಟ್ಟೋಗ್ರಾಮ್ ಮತ್ತು ಮೊಂಗ್ಲಾ ಬಂದರುಗಳಿಂದ ವ್ಯಾಗನ್ಗಳು ಮತ್ತು ಟ್ರಾಲರ್ಗಳ ಮೂಲಕ ಈ ಪ್ರದೇಶಗಳಿಗೆ ಸರಬರಾಜು ಮಾಡಲಾಗುತ್ತದೆ.
ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 8:55 am, Sat, 18 March 23