ಜೈಲಿಂದ ಬಿಡುಗಡೆಗೊಂಡ ಬೆನ್ನಲ್ಲೇ ಅಜಮ್ ಖಾನ್ ಬಂಧನ; 14 ದಿನ ನ್ಯಾಯಾಂಗ ಕಸ್ಟಡಿಗೆ

ನವದೆಹಲಿ, ನವೆಂಬರ್ 1: ಸಮಾಜವಾದಿ ಪಕ್ಷದ ಹಿರಿಯ ನಾಯಕ ಮತ್ತು ಮಾಜಿ ಸಚಿವ ಮೊಹಮ್ಮದ್ ಅಜಮ್ ಖಾನ್ (Mohammad Azam Khan) ಅವರಿಗೆ ಕಾನೂನು ಸಂಕಷ್ಟ ಮುಂದುವರಿದಿದೆ. ಎರಡು ಪಾನ್ ಕಾರ್ಡ್ ಹೊಂದಿರುವ ಪ್ರಕರಣದಲ್ಲಿ ಅಲಹಾಬಾದ್ ಹೈಕೋರ್ಟ್‌ನಿಂದ ಜಾಮೀನು ಪಡೆದು ಜೈಲಿನಿಂದ ಬಿಡುಗಡೆಯಾದ ಕೇವಲ ಒಂದೇ ದಿನದಲ್ಲಿ, ಜಾರಿ ನಿರ್ದೇಶನಾಲಯವು (ED) ಅವರನ್ನು ಹಣ ವರ್ಗಾವಣೆ (Money Laundering) ಪ್ರಕರಣದಲ್ಲಿ ಮತ್ತೆ ಬಂಧಿಸಿದ್ದು, ವಿಶೇಷ ನ್ಯಾಯಾಲಯವು ಅವರಿಗೆ 14 ದಿನಗಳ ನ್ಯಾಯಾಂಗ ಬಂಧನ ವಿಧಿಸಿದೆ.

ಡ್ಯುಯಲ್ ಪಾನ್ ಕಾರ್ಡ್ ಪ್ರಕರಣದಲ್ಲಿ ಹೈಕೋರ್ಟ್ ಶಿಕ್ಷೆಯನ್ನು ತಡೆಹಿಡಿದು ಜಾಮೀನು ನೀಡಿದ್ದರಿಂದ ಅಜಮ್ ಖಾನ್ ಜೈಲಿನಿಂದ ಹೊರಬಂದಿದ್ದರು. ಆದರೆ ರಾಂಪುರದ ಮೊಹಮ್ಮದ್ ಅಲಿ ಜೋಹರ್ ವಿಶ್ವವಿದ್ಯಾಲಯಕ್ಕೆ (Mohammad Ali Jauhar University) ಸಂಬಂಧಿಸಿದ ಹಣ ಅಕ್ರಮ ವರ್ಗಾವಣೆ ಪ್ರಕರಣದಲ್ಲಿ ಇಡಿ (ED) ಅಧಿಕಾರಿಗಳು ಅವರನ್ನು ತಕ್ಷಣವೇ ವಶಕ್ಕೆ ಪಡೆದರು.

ಇದನ್ನೂ ಓದಿ: ದೆಹಲಿಯಲ್ಲಿ ಬಿಎಸ್-6 ನಿಯಮಗಳು ಜಾರಿ; ಬಿಎಸ್-6 ಅಲ್ಲದ ವಾಹನಗಳಿಗೆ ಇಲ್ಲ ಪ್ರವೇಶ; ಹೊರವಲಯದಲ್ಲಿ ಟ್ರಾಫಿಕ್ ಜಾಮ್

ನ್ಯಾಯಾಂಗ ಬಂಧನದ ಜೊತೆ ಸೂಕ್ತ ವೈದ್ಯಕೀಯ ವ್ಯವಸ್ಥೆ

ಇಡಿ ಅಧಿಕಾರಿಗಳು ಅಜಮ್ ಖಾನ್ ಅವರನ್ನು ವಿಶೇಷ ನ್ಯಾಯಾಲಯಕ್ಕೆ ಹಾಜರುಪಡಿಸಿ, ಹಣಕಾಸು ಅಕ್ರಮಗಳು ಮತ್ತು ಸಾಕ್ಷ್ಯಗಳ ಮರೆಮಾಚುವಿಕೆ ಕುರಿತು ವಿಚಾರಣೆ ನಡೆಸಲು ಕಸ್ಟಡಿಗೆ ನೀಡುವಂತೆ ಕೋರಿದರು. ವಾದ-ಪ್ರತಿವಾದಗಳನ್ನು ಆಲಿಸಿದ ನ್ಯಾಯಾಲಯವು ಖಾನ್ ಅವರನ್ನು 14 ದಿನಗಳ ನ್ಯಾಯಾಂಗ ಬಂಧನಕ್ಕೆ ಒಳಪಡಿಸಿದೆ ಮತ್ತು ಅವರಿಗೆ ಸೂಕ್ತ ವೈದ್ಯಕೀಯ ಚಿಕಿತ್ಸೆ ಖಚಿತಪಡಿಸುವಂತೆ ಜೈಲು ಅಧಿಕಾರಿಗಳಿಗೆ ಸೂಚಿಸಿದೆ.

ಜೋಹರ್ ವಿಶ್ವವಿದ್ಯಾಲಯ ಹಗರಣದ ಆರೋಪ

ರಾಜಸ್ಥಾನ ಹಾಗೂ ರಾಂಪುರದಲ್ಲಿ ಜೋಹರ್ ವಿಶ್ವವಿದ್ಯಾಲಯದ ನಿರ್ಮಾಣ ಮತ್ತು ಫಂಡಿಂಗ್​ನಲ್ಲಿ ಬೃಹತ್ ಮಟ್ಟದ ಹಣಕಾಸು ಅಕ್ರಮಗಳು ನಡೆದಿವೆ ಎಂದು ಇಡಿ ಆರೋಪಿಸಿದೆ. ರೈತರ ಭೂಮಿಯನ್ನು ಬಲವಂತವಾಗಿ ಸ್ವಾಧೀನಪಡಿಸಿಕೊಂಡಿರುವುದು, ಸಾರ್ವಜನಿಕ PWD ಗುತ್ತಿಗೆಗಳನ್ನು ಪಡೆದವರು ಡೊನೇಶನ್ ಹೆಸರಲ್ಲಿ ಖಾಸಗಿ ವಿಶ್ವವಿದ್ಯಾಲಯದ ಕಟ್ಟಡ ನಿರ್ಮಾಣಕ್ಕೆ ತಿರುಗಿಸಿರುವುದು ಮತ್ತು ಸರ್ಕಾರಿ ಅನುದಾನವನ್ನು ದುರುಪಯೋಗಪಡಿಸಿಕೊಂಡಿರುವ ಗಂಭೀರ ಆರೋಪಗಳು ಇವರ ಮೇಲಿವೆ.

ಇದನ್ನೂ ಓದಿ: ಅರ್ನಬ್ ಚಂಡಮಾರುತದ ಹೊಡೆತದ ಬೆನ್ನಲ್ಲೇ ಮತ್ತೊಂದು ಅಪಾಯ: ಆಂಧ್ರಕ್ಕೆ ಹೊಸ ಚಂಡಮಾರುತದ ಆತಂಕ

ಇಡಿ ಈಗಾಗಲೇ ಈ ವಿಶ್ವವಿದ್ಯಾಲಯದ ಸುಮಾರು 426 ಕೋಟಿ ರೂ ಮೂಲ ಮೌಲ್ಯದ (ಮಾರುಕಟ್ಟೆ ಮೌಲ್ಯ ಸುಮಾರು 1,170 ಕೋಟಿ ರೂ.) ಆಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಂಡಿದೆ.

ಐಟಿ ರಿಟರ್ನ್ಸ್​ನಲ್ಲಿ ತೋರಿಸಿದ್ದಕ್ಕೂ ವಾಸ್ತವಕ್ಕೂ ವ್ಯತ್ಯಾಸ

ಯೂನಿವರ್ಸಿಟಿ ಕ್ಯಾಂಪಸ್​ನ 59 ಕಟ್ಟಡಗಳ ನಿರ್ಮಾಣ ವೆಚ್ಚ 494.46 ಕೋಟಿ ರೂ ಎಂದು ಜಿಲ್ಲಾ ಮೌಲ್ಯಮಾಪನ ಅಧಿಕಾರಿ ಗಣಿಸಿದ್ದಾರೆ. ಆದರೆ, ಟ್ರಸ್ಟ್​ನಿಂದ ಸಲ್ಲಿಸಲಾದ ಇನ್ಕಮ್ ಟ್ಯಾಕ್ಸ್ ರಿಟರ್ನ್ಸ್​ನಲ್ಲಿ ವೆಚ್ಚ ಕೇವಲ 78.32 ಕೋಟಿ ರೂ ಎಂದು ತೋರಿಸಲಾಗಿದೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ