ಪ್ರತಿದಿನ 84 ಲಕ್ಷ ಮಹಿಳೆಯರಿಗೆ ಉಚಿತ ಬಸ್ ಪ್ರಯಾಣ ವಿಸ್ತರಣೆ; ತಮಿಳುನಾಡು ಸಿಎಂ ವಿಜಯ್ ಘೋಷಣೆ
ಗಾಂಧಿ ಜಯಂತಿಯ ದಿನವಾದ ಇಂದು ತಮಿಳುನಾಡು ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ ರಾಜ್ಯದ ಮಹಿಳೆಯರ ಉಚಿತ ಬಸ್ ಪ್ರಯಾಣ ಯೋಜನೆಯನ್ನು ಬೃಹತ್ ಪ್ರಮಾಣದಲ್ಲಿ ವಿಸ್ತರಿಸಿ, 'ವೆಟ್ರಿ ಪಯಣಂ' ಯೋಜನೆಯನ್ನು ಅಧಿಕೃತವಾಗಿ ಚಾಲನೆಗೊಳಿಸಿದ್ದಾರೆ. ಇಂದು ಚಾಲನೆ ನೀಡಲಾದ ಈ ಯೋಜನೆಯಿಂದಾಗಿ ರಾಜ್ಯದ ಸುಮಾರು 84.32 ಲಕ್ಷ ಮಹಿಳೆಯರು ದಿನಂಪ್ರತಿ ಉಚಿತ ಪ್ರಯಾಣದ ಪ್ರಯೋಜನ ಪಡೆಯಲಿದ್ದಾರೆ. ಈ ಹಿಂದೆ ಉಚಿತ ಪ್ರಯಾಣದಿಂದ ಹೊರಗುಳಿದಿದ್ದ ಹಲವಾರು ವರ್ಗದ ಸರ್ಕಾರಿ ಬಸ್ಗಳನ್ನು ಇದೀಗ ಯೋಜನೆಯ ವ್ಯಾಪ್ತಿಗೆ ತರಲಾಗಿದೆ.
Updated on: Oct 02, 2026 | 6:08 PM
ಚೆನ್ನೈ, ಅಕ್ಟೋಬರ್ 2: ತಮಿಳುನಾಡು ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ ರಾಜ್ಯದ ಮಹಿಳೆಯರು ಮತ್ತು ತೃತೀಯಲಿಂಗಿಗಳಿಗೆ ಬಿಗ್ ಗಿಫ್ಟ್ ನೀಡಿದ್ದಾರೆ. ರಾಜ್ಯದಲ್ಲಿ ಜಾರಿಯಲ್ಲಿದ್ದ ಮಹಿಳೆಯರ ಉಚಿತ ಬಸ್ ಪ್ರಯಾಣ ಯೋಜನೆಯಾದ ‘ವೆಟ್ರಿ ಪಯಣಂ’ ಯೋಜನೆಯನ್ನು ವಿಸ್ತರಿಸಲಾಗಿದ್ದು, ಇದರಿಂದ ದಿನಂಪ್ರತಿ ಸುಮಾರು 84.32 ಲಕ್ಷ ಮಹಿಳೆಯರಿಗೆ ನೇರ ಅನುಕೂಲವಾಗಲಿದೆ. ತಾವೇ ಸ್ವತಃ ಬಸ್‌ನಲ್ಲಿ ಪ್ರಯಾಣಿಸಿ ಮಹಿಳಾ ಪ್ರಯಾಣಿಕರಿಗೆ ಉಚಿತ ಟಿಕೆಟ್‌ಗಳನ್ನು ವಿತರಿಸಿ ಸಿಎಂ ವಿಜಯ್ ಸಂವಾದ ನಡೆಸಿದರು. ಈ ಹಿಂದೆ ಕೇವಲ ಸಾಧಾರಣ ನಗರ ಬಸ್‌ಗಳಿಗೆ ಸೀಮಿತವಾಗಿದ್ದ ಉಚಿತ ಪ್ರಯಾಣದ ಸೌಲಭ್ಯವನ್ನು ಇದೀಗ ಎಕ್ಸ್‌ಪ್ರೆಸ್, ಡೀಲಕ್ಸ್, ಲಿಮಿಟೆಡ್ ಸ್ಟಾಪ್ (ಎಲ್ಎಸ್ಎಸ್), ಮೊಫುಸಿಲ್ ಸಾಮಾನ್ಯ ಬಸ್‌ಗಳು ಮತ್ತು ಘಾಟ್ ರಸ್ತೆಗಳ ಬಸ್‌ಗಳಿಗೂ ವಿಸ್ತರಿಸಲಾಗಿದೆ.
ಈ ಯೋಜನೆಗೆ ಯಾವುದೇ ವಾರ್ಷಿಕ ಆದಾಯದ ಮಿತಿ ಇರುವುದಿಲ್ಲ. ಜೊತೆಗೆ ದಿನಕ್ಕೆ ಇಷ್ಟೇ ಬಾರಿ ಪ್ರಯಾಣಿಸಬೇಕು ಎಂಬ ನಿಯಮವಾಗಲಿ ಅಥವಾ ಕಿಲೋಮೀಟರ್ ಮಿತಿಯಾಗಲಿ ಇರುವುದಿಲ್ಲ. ವಿಸ್ತರಿತ ಯೋಜನೆಯಡಿ ಒಟ್ಟು 12,692 ಸರ್ಕಾರಿ ಬಸ್ಗಳನ್ನು ಒಳಪಡಿಸಲಾಗಿದ್ದು, ರಾಜ್ಯ ಸರ್ಕಾರಕ್ಕೆ ಪ್ರತಿವರ್ಷ ಸುಮಾರು 6,000 ಕೋಟಿ ವೆಚ್ಚ ತಗಲಲಿದೆ. ಬಸ್‌ಗಳಲ್ಲಿರುವ ಎಲೆಕ್ಟ್ರಾನಿಕ್ ಟಿಕೆಟಿಂಗ್ ಯಂತ್ರಗಳಿಗೆ (ಇಟಿಎಂ) ಉಚಿತ ಪ್ರಯಾಣದ ಮಾಹಿತಿ ದಾಖಲಿಸಲು ವಿಶೇಷ ಸಾಫ್ಟ್‌ವೇರ್ ಅಳವಡಿಸಲಾಗಿದೆ.
ಇದನ್ನೂ ಓದಿ: ಮೇಕೆದಾಟು ಯೋಜನೆ: ಕೇಂದ್ರದ ಮಧ್ಯಸ್ಥಿಕೆ ಕೋರಿದ ಸಿಎಂ ಡಿಕೆ ಶಿವಕುಮಾರ್, ನಿಯೋಗ ಕಳುಹಿಸಲು ತಮಿಳುನಾಡಿಗೆ ಸೂಚಿಸಲು ಮನವಿ
ಎಕ್ಸ್‌ಪ್ರೆಸ್ ಮತ್ತು ಡೀಲಕ್ಸ್ ಬಸ್‌ಗಳಿಗೂ ಉಚಿತ ಪ್ರಯಾಣ ವಿಸ್ತರಣೆ:
ನೂತನ ವಿಸ್ತರಿತ ಯೋಜನೆಯಡಿ, ಕೇವಲ ಸಾಧಾರಣ ನಗರ ಮತ್ತು ಪಟ್ಟಣ ಬಸ್‌ಗಳಷ್ಟೇ ಅಲ್ಲದೆ ಎಕ್ಸ್‌ಪ್ರೆಸ್, ಲಿಮಿಟೆಡ್ ಸ್ಟಾಪ್ ಹಾಗೂ ಡೀಲಕ್ಸ್ ಬಸ್‌ಗಳಿಗೂ ಉಚಿತ ಪ್ರಯಾಣ ಸೌಲಭ್ಯವನ್ನು ವಿಸ್ತರಿಸಲಾಗಿದೆ. ಜೊತೆಗೆ, ನಗರ ಮತ್ತು ಗ್ರಾಮೀಣ ಪ್ರದೇಶಗಳನ್ನು ಸಂಪರ್ಕಿಸುವ ಮೊಫುಸಿಲ್ ಸಾಮಾನ್ಯ ಬಸ್‌ಗಳು ಮತ್ತು 40 ಕಿಲೋಮೀಟರ್‌ಗಿಂತಲೂ ಹೆಚ್ಚಿನ ದೂರ ಸಂಚರಿಸುವ ಘಾಟ್ ರಸ್ತೆಗಳ ಸಾಮಾನ್ಯ ಬಸ್‌ಗಳಿಗೂ ಈ ಸೌಲಭ್ಯ ಅನ್ವಯವಾಗಲಿದೆ.
மாண்புமிகு தமிழ்நாடு முதலமைச்சர் திரு.ச.ஜோசப் விஜய் அவர்கள், “வெற்றிப் பயணம்” திட்டத்தை தேசத்தந்தை மகாத்மா காந்தியடிகளின் பிறந்த நாளான இன்று (2.10.2026), சென்னை, கோயம்பேடு பேருந்து முனையத்திலிருந்து மகளிருக்குக் கட்டணமில்லாப் பேருந்துப் பயணச்சீட்டை வழங்கித் தொடங்கி வைத்தார்.… pic.twitter.com/MyS45Ilsy0
— CMOTamilNadu (@CMOTamilnadu) October 2, 2026
ರಾಜ್ಯದ 7 ಸಾರಿಗೆ ಸಂಸ್ಥೆಗಳು ನಿರ್ವಹಿಸುವ ಒಟ್ಟು 12,692 ಸರ್ಕಾರಿ ಬಸ್‌ಗಳು ಈ ಯೋಜನೆಯ ವ್ಯಾಪ್ತಿಗೆ ಬರಲಿವೆ. ಇದು ರಾಜ್ಯದ ಒಟ್ಟು ಪರಿಶಿಷ್ಟ ಬಸ್ ಪಡೆಯ ಸುಮಾರು ಶೇ. 69ರಷ್ಟು ಹಾಗೂ ದೈನಂದಿನ ಸಿಂಗಲ್ ಟ್ರಿಪ್ ಪ್ರಯಾಣದ ಶೇ. 85ರಷ್ಟು ಭಾಗವನ್ನು ಒಳಗೊಳ್ಳುತ್ತದೆ. ಮಹಿಳೆಯರು ಉದ್ಯೋಗ ಸ್ಥಳಗಳಿಗೆ, ಶಿಕ್ಷಣ ಸಂಸ್ಥೆಗಳಿಗೆ, ಆಸ್ಪತ್ರೆಗಳಿಗೆ ಹಾಗೂ ತಮ್ಮ ದಿನನಿತ್ಯದ ಅಗತ್ಯ ಕೆಲಸಗಳಿಗೆ ಪ್ರಯಾಣದ ವೆಚ್ಚದ ಚಿಂತೆಯಿಲ್ಲದೆ ತೆರಳಲು ಈ ಯೋಜನೆ ನೆರವಾಗಲಿದೆ.
ಇದನ್ನೂ ಓದಿ: ತಮಿಳುನಾಡಿನ ವೆಲ್ಲೂರಿನಲ್ಲಿ ಚರ್ಚ್‌ನ ಛಾವಣಿ ಕುಸಿತ; ಮೂವರು ಕಾರ್ಮಿಕರ ಸಾವು, 11 ಮಂದಿಗೆ ಗಾಯ
ಪ್ರಯಾಣಿಕರೊಂದಿಗೆ ಸಿಎಂ ವಿಜಯ್ ಸಂವಾದ:
ಯೋಜನೆಯ ಶುಭಾರಂಭದ ವೇಳೆ ಮುಖ್ಯಮಂತ್ರಿ ವಿಜಯ್ ಅವರು ಬಸ್ ಪ್ರಯಾಣಿಕರೊಂದಿಗೆ ನೇರವಾಗಿ ಸಂವಾದ ನಡೆಸಿ, ಮಹಿಳೆಯರಿಗೆ ಉಚಿತ ಬಸ್ ಟಿಕೆಟ್‌ಗಳನ್ನು ವಿತರಿಸಿದರು. ತಮಿಳುನಾಡಿನ ಆಡಳಿತಾರೂಢ ‘ತಮಿಳಗ ವೆಟ್ರಿ ಕಳಗಂ’ (ಟಿವಿಕೆ) ಪಕ್ಷದ ಹೆಸರನ್ನು ಆಧರಿಸಿ ಈ ಯೋಜನೆಗೆ ‘ವೆಟ್ರಿ ಪಯಣಂ’ ಎಂದು ನಾಮಕರಣ ಮಾಡಲಾಗಿದೆ. ಸಾರಿಗೆ ವೆಚ್ಚದ ಹೊರೆಯಿಂದಾಗಿ ಮಹಿಳೆಯರು ಶಿಕ್ಷಣ, ಉದ್ಯೋಗ ಮತ್ತು ಇತರೆ ಅವಕಾಶಗಳಿಂದ ವಂಚಿತರಾಗಬಾರದು ಎಂಬ ಉದ್ದೇಶದಿಂದ ಆಗಸ್ಟ್ 24ರಂದು ತಮಿಳುನಾಡು ವಿಧಾನಸಭೆಯಲ್ಲಿ ಈ ಯೋಜನೆ ವಿಸ್ತರಣೆಯನ್ನು ಘೋಷಿಸಲಾಗಿತ್ತು.
ಈ ಮೊದಲು ಉಚಿತ ಪ್ರಯಾಣದ ಸೌಲಭ್ಯವು ಕೇವಲ ನಿಗದಿತ ಸಾಧಾರಣ ಬಸ್‌ಗಳಿಗೆ ಮಾತ್ರ ಸೀಮಿತವಾಗಿತ್ತು. ಆದರೆ, ಪ್ರಸ್ತುತ ವಿಸ್ತರಣೆಯಿಂದಾಗಿ ಹೆಚ್ಚಿನ ಸಂಖ್ಯೆಯ ಹಾಗೂ ವೈವಿಧ್ಯಮಯ ಸರ್ಕಾರಿ ಬಸ್‌ಗಳು ಮಹಿಳೆಯರಿಗೆ ಉಚಿತವಾಗಿ ಲಭ್ಯವಾಗಲಿವೆ. ಈ ಯೋಜನೆಯ ಸುಗಮ ಅನುಷ್ಠಾನಕ್ಕಾಗಿ ಎಲ್ಲಾ ಬಸ್‌ಗಳಲ್ಲಿನ ಎಲೆಕ್ಟ್ರಾನಿಕ್ ಟಿಕೆಟಿಂಗ್ ಯಂತ್ರಗಳನ್ನು ತಾಂತ್ರಿಕವಾಗಿ ಸಂಯೋಜಿಸಿ, ಪ್ರಾಯೋಗಿಕ ಪರೀಕ್ಷೆಗಳನ್ನು ಪೂರ್ಣಗೊಳಿಸಲಾಗಿತ್ತು. ಇದರಿಂದ ನಗರ ಮತ್ತು ಗ್ರಾಮೀಣ ಪ್ರದೇಶಗಳ ನಡುವೆ ಪ್ರಯಾಣಿಸುವ ಲಕ್ಷಾಂತರ ಮಹಿಳೆಯರಿಗೆ ಹೆಚ್ಚಿನ ಸಾರಿಗೆ ನಮ್ಯತೆ ದೊರೆಯಲಿದೆ.
ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
