ಸ್ಯಾನ್​ ಫ್ರಾನ್ಸಿಸ್ಕೋ ಟು ಬೆಂಗಳೂರು; 17 ಗಂಟೆಗಳ ನಾನ್​ಸ್ಟಾಪ್ ವಿಮಾನಯಾನದ ನೇತೃತ್ವ ವಹಿಸಿದ ಏರ್ ಇಂಡಿಯಾ ಮಹಿಳಾ ಪೈಲಟ್ ತಂಡ

ಬೆಂಗಳೂರು: ಸ್ಯಾನ್ ಫ್ರಾನ್ಸಿಸ್ಕೋ ಹಾಗೂ ಬೆಂಗಳೂರು ನಡುವೆ ಏರ್ ಇಂಡಿಯಾದ ಮೊದಲ ನಾನ್​ಸ್ಟಾಪ್ ವಿಮಾನ ಜನವರಿ 9ರಂದು ಸ್ಯಾನ್ ಫ್ರಾನ್ಸಿಸ್ಕೋದಿಂದ ಹಾರಾಟ ಆರಂಭಿಸಿದೆ. ಆ ಮೂಲಕ, ಜಗತ್ತಿನ ಎರಡು ತಂತ್ರಜ್ಞಾನ ಕೇಂದ್ರಗಳನ್ನು ವಿಮಾನ ಸಂಧಿಸಲಿದೆ. ಅಮೆರಿಕಾದ ಸ್ಯಾನ್ ಫ್ರಾನ್ಸಿಸ್ಕೋ ನಗರವನ್ನು ಸಿಲಿಕಾನ್ ವ್ಯಾಲಿ ಎಂದು ಕರೆಯಲಾಗುತ್ತದೆ. ಬೆಂಗಳೂರು ಭಾರತದ ಸಿಲಿಕಾನ್ ವ್ಯಾಲಿ ಎಂಬ ಅನ್ವರ್ಥನಾಮ ಪಡೆದುಕೊಂಡಿದೆ. ಈ ಎರಡೂ ಟೆಕ್ ಹಬ್​ಗಳಿಗೆ ಸಂಪರ್ಕ ಕಲ್ಪಿಸುವ ವಿಮಾನಯಾನ ನಾಳೆ (ಜ.11) ಮಧ್ಯಾಹ್ನ 3.45ಕ್ಕೆ ಬೆಂಗಳೂರು ತಲುಪಲಿದೆ. ಇದಷ್ಟೇ ಅಲ್ಲ, ಈ ಕಠಿಣ ಪ್ರಯಾಣವನ್ನು ಸಂಪೂರ್ಣ ಮಹಿಳಾ ಪೈಲೆಟ್​ಗಳೇ ನಿರ್ವಹಿಸುತ್ತಿರುವುದು ವಿಶೇಷ.

ಸ್ಯಾನ್ ಫ್ರಾನ್ಸಿಸ್ಕೋ-ಬೆಂಗಳೂರು ನಡುವಿನ ವಿಮಾನ AI 176 ಶನಿವಾರ ಹಾಗೂ ಮಂಗಳವಾರ ಕಾರ್ಯನಿರ್ವಹಿಸಲಿದೆ. ಬೋಯೆಂಗ್ 777-200LR VT ALG ವಿಮಾನವು 238 ಪ್ರಯಾಣಿಕರನ್ನು ಹೊತ್ತೊಯ್ಯುವ ಸಾಮರ್ಥ್ಯ ಹೊಂದಿದೆ. ಪ್ರಥಮ ದರ್ಜೆಯ 8, ಬ್ಯುಸಿನೆಸ್ ದರ್ಜೆಯ 35, ಎಕನಮಿ ದರ್ಜೆಯ 195 ಸೀಟುಗಳ ವ್ಯವಸ್ಥೆಯನ್ನು ವಿಮಾನ ಹೊಂದಿದೆ. ಜೊತೆಗೆ, ವಿಮಾನದಲ್ಲಿ 4 ಕಾಕ್ ಪಿಟ್​ಗಳು, 12 ಕ್ಯಾಬಿನ್​ಗಳು ಇರಲಿವೆ.

ವಿಮಾನವನ್ನು ಮಹಿಳಾ ಪೈಲಟ್​ಗಳೇ ಚಲಾಯಿಸುತ್ತಿರುವುದು ಮತ್ತೊಂದು ವಿಶೇಷ. ಕ್ಯಾಪ್ಟನ್ ಜೋಯಾ ಅಗರ್​ವಾಲ್ (P1), ಕ್ಯಾಪ್ಟನ್ ಪಾಪಗರಿ ತನ್ಮಯಿ (P1), ಕ್ಯಾಪ್ಟನ್ ಆಕಾಂಶಾ ಸೋನಾವರೆ (P2) ಹಾಗೂ ಕ್ಯಾಪ್ಟನ್ ಶಿವಾನಿ ಮನ್ಹಾಸ್ (P2) ಈ ವಿಮಾನದಲ್ಲಿ ಕಾರ್ಯನಿರ್ವಹಿಸಲಿದ್ದಾರೆ.

ಕ್ಯಾಪ್ಟನ್ ಜೋಯಾ ಅಗರ್​ವಾಲ್ 8,000 ಗಂಟೆಗಳ ವಿಮಾನ ಹಾರಾಟ ಅವಧಿ ಅನುಭವವನ್ನು ಹೊಂದಿದ್ದಾರೆ. ಹತ್ತು ವರ್ಷಗಳಿಗೂ ಅಧಿಕ, 2,500 ಗಂಟೆಗಳಿಗೂ ಹೆಚ್ಚು ಕಾಲ B-777 ವಿಮಾನ ಚಲಾವಣೆಯಲ್ಲಿ ತೊಡಗಿಸಿಕೊಂಡ ಅನುಭವ ಪಡೆದಿದ್ದಾರೆ.

ಸ್ಯಾನ್ ಫ್ರಾನ್ಸಿಸ್ಕೋ ಹಾಗೂ ಬೆಂಗಳೂರು ನಡುವೆ ಸುಮಾರು 13,993 ಕಿಲೋ ಮೀಟರ್​ಗಳಷ್ಟು ಅಂತರವಿದೆ. ಎರಡೂ ನಗರಗಳು ವಿಶ್ವದ ವಿರುದ್ಧ ದಿಕ್ಕುಗಳಲ್ಲಿದ್ದು, 13.5 ಗಂಟೆಗಳಷ್ಟು ಸಮಯ ವ್ಯತ್ಯಾಸವನ್ನು ಹೊಂದಿದೆ. ಈ ದಾರಿ ಕ್ರಮಿಸಲು, ಗಾಳಿಯ ವೇಗವನ್ನು ಹೊಂದಿಕೊಂಡು, ಸುಮಾರು 17 ಗಂಟೆಗಳಿಗೂ ಹೆಚ್ಚು ಕಾಲ ವಿಮಾನ ಹಾರಾಟ ನಡೆಸಬೇಕಿದೆ.

ವಿಮಾನ ಹಾರಾಟದ ಈ ಮಾರ್ಗವು ಸುರಕ್ಷಿತವಾದ, ವೇಗದ ದಾರಿ ಎಂದು ಗುರುತಿಸಿಕೊಂಡಿದೆ. ಇದು ಜಗತ್ತಿಗೆ ಸುತ್ತುವರಿದು ಹಾರಾಡುವಂಥ ವಿಮಾನವಾಗಲಿದೆ. ಗಾಳಿಯ ವೇಗ, ಮತ್ತಿತರ ಮಾನದಂಡಗಳಿಗೆ ಅನುಗುಣವಾಗಿ, ವಿಮಾನವು ಭೂಮಿಯ ಧ್ರುವ ಮಾರ್ಗದ ಮೂಲಕವೂ ಹಾರಾಟ ನಡೆಸುವ ಸಾಧ್ಯತೆ ಇದೆ. ಹಾಗಾದರೆ, ಪ್ರಯಾಣದ ಅವಧಿ ಮತ್ತಷ್ಟು ಕಡಿಮೆಯಾಗಲಿದೆ. ಆ ಮೂಲಕ, ಇಂಧನ ಉಳಿತಾಯ, ಕಾರ್ಬನ್ ಹೊರಸೂಸುವಿಕೆಯ ಮಿತಗೊಳಿಸಲೂ ಸಹಕಾರಿಯಾಗಲಿದೆ. ಇದು ಭಾರತದಲ್ಲಿ ಕಾರ್ಯನಿರ್ವಹಿಸುವ ಅತಿ ದೂರದ ನಾನ್​ಸ್ಟಾಪ್ ವಾಣಿಜ್ಯ ವಿಮಾನ ಹಾರಾಟವಾಗಲಿದೆ.

ನಾಗರಿಕ ವಿಮಾನಯಾನ ಸಚಿವ ಹರ್ದೀಪ್ ಸಿಂಗ್ ಪುರಿ ಮಹಿಳಾ ಪೈಲೆಟ್ ತಂಡವನ್ನು ಶ್ಲಾಘಿಸಿದ್ದಾರೆ. ಜಗತ್ತಿನಲ್ಲೇ ಭಾರತದ ಮಹಿಳೆಯರು ಅತಿ ಎತ್ತರದಲ್ಲಿದ್ದಾರೆ ಎಂದು ಏರ್​ ಇಂಡಿಯಾ ಟ್ವೀಟ್ ಮಾಡಿ ಪ್ರಶಂಸೆ ವ್ಯಕ್ತಪಡಿಸಿದೆ.

Way to go girls!Professional, qualified & confident, the all women cockpit crew takes off from San Francisco to Bengaluru on @airindiain's flight to fly over North Pole.Our Nari Shakti achieves a historic first. pic.twitter.com/X46cs73dQu

— Hardeep Singh Puri (@HardeepSPuri) January 10, 2021

?? We are pleased to welcome @airindiain's first-ever nonstop flights between San Francisco and Bangalore (Bengaluru), India! This new service represents the only nonstop flights between the United States and Bengaluru.

✈️ https://t.co/G5bWCNUank pic.twitter.com/k7XiiWODov

— San Francisco International Airport (SFO) ✈️? (@flySFO) January 9, 2021

ಏರ್ ಇಂಡಿಯಾ ಹರಾಜು ಪ್ರಕ್ರಿಯೆಗೆ EOI ಸಲ್ಲಿಸಿದ ಟಾಟಾ, ಅಮೆರಿಕಾ ಮೂಲದ ಇಂಟರಪ್ಸ್ ಇನ್ಕ್

Published On - 6:41 pm, Sun, 10 January 21