IPL 2024: ಹಾರ್ದಿಕ್ ಪಾಂಡ್ಯಗಾಗಿ “ಗ್ರೀನ್” ಸಿಗ್ನಲ್ ನೀಡಿ ಸಂಕಷ್ಟಕ್ಕೆ ಸಿಲುಕಿದ RCB
IPL 2024: ಐಪಿಎಲ್ 2024 ರಲ್ಲಿ ಆರ್ಸಿಬಿ ಇದುವರೆಗೆ 5 ಪಂದ್ಯಗಳನ್ನಾಡಿದ್ದು, ಈ ವೇಳೆ 4 ಮ್ಯಾಚ್ಗಳಲ್ಲಿ ಸೋತಿದೆ. ಇನ್ನು ಗೆದ್ದಿರುವುದು ಪಂಜಾಬ್ ಕಿಂಗ್ಸ್ ವಿರುದ್ಧ ಮಾತ್ರ. ಇದೀಗ 1 ಗೆಲುವು-ನಾಲ್ಕು ಸೋಲುಗಳೊಂದಿಗೆ ಆರ್ಸಿಬಿ IPL 2024 ರ ಅಂಕ ಪಟ್ಟಿಯಲ್ಲಿ 8ನೇ ಸ್ಥಾನದಲ್ಲಿದೆ. ಅಲ್ಲದೆ ಮುಂದಿನ ಪಂದ್ಯದಲ್ಲಿ ಆರ್ಸಿಬಿ ತಂಡವು ಮುಂಬೈ ಇಂಡಿಯನ್ಸ್ ತಂಡವನ್ನು ಎದುರಿಸಲಿದೆ.
ಈ ಬಾರಿಯ ಇಂಡಿಯನ್ ಪ್ರೀಮಿಯರ್ ಲೀಗ್ (IPL 2024) ಹರಾಜಿಗೂ ಮುನ್ನ ಭರ್ಜರಿ ಟ್ರೇಡಿಂಗ್ ಪ್ರಕ್ರಿಯೆಗಳು ನಡೆದಿದ್ದವು. ಈ ಟ್ರೇಡಿಂಗ್ ಪ್ರಕ್ರಿಯೆ ಮೂಲಕ ಗುಜರಾತ್ ಟೈಟಾನ್ಸ್ ತಂಡದ ನಾಯಕ ಹಾರ್ದಿಕ್ ಪಾಂಡ್ಯರನ್ನು ಖರೀದಿಸುವಲ್ಲಿ ಮುಂಬೈ ಇಂಡಿಯನ್ಸ್ ತಂಡ ಯಶಸ್ವಿಯಾಗಿತ್ತು. ಹೀಗೆ ಪಾಂಡ್ಯರ ಖರೀದಿಗೆ ತೆರೆಮರೆಯಲ್ಲಿ ನೆರವಿಗೆ ನಿಂತದ್ದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಎಂಬುದು ವಿಶೇಷ.
ಅಂದರೆ ಮುಂಬೈ ಇಂಡಿಯನ್ಸ್ ಫ್ರಾಂಚೈಸಿಯು ಹಾರ್ದಿಕ್ ಪಾಂಡ್ಯರನ್ನು ಖರೀದಿಸಬೇಕಿದ್ದರೆ ತನ್ನ ಹರಾಜು ಮೊತ್ತದಲ್ಲಿ 15 ಕೋಟಿ ರೂ. ಹೊಂದಿರಬೇಕಿತ್ತು. ಈ ಮೊತ್ತಕ್ಕಾಗಿ ಮುಂಬೈ ಇಂಡಿಯನ್ಸ್ ಆರ್ಸಿಬಿ ಜೊತೆ ಡೀಲ್ ಕುದುರಿಸುವಲ್ಲಿ ಯಶಸ್ವಿಯಾಗಿತ್ತು.
ಅದರಂತೆ ಮುಂಬೈ ಇಂಡಿಯನ್ಸ್ ತಂಡದಲ್ಲಿದ್ದ ಕ್ಯಾಮರೋನ್ ಗ್ರೀನ್ ಅವರನ್ನು ಆರ್ಸಿಬಿಗೆ 17.5 ಕೋಟಿ ರೂ.ಗೆ ಮಾರಾಟ ಮಾಡಿದ್ದರು. ಅಲ್ಲದೆ ಆ ಮೊತ್ತದಲ್ಲಿ ಹಾರ್ದಿಕ್ ಪಾಂಡ್ಯರನ್ನು ಟ್ರೇಡಿಂಗ್ ಮೂಲಕ ಖರೀದಿಸುವಲ್ಲಿ ಮುಂಬೈ ಇಂಡಿಯನ್ಸ್ ಯಶಸ್ವಿಯಾಯಿತು.
ಆದರೆ ಇತ್ತ ಹಾರ್ದಿಕ್ ಪಾಂಡ್ಯಗಾಗಿ ಮುಂಬೈ ಇಂಡಿಯನ್ಸ್ ಫ್ರಾಂಚೈಸಿಯ ನೆರವಿಗೆ ನಿಂತ ಆರ್ಸಿಬಿ ಇದೀಗ ಸಂಕಷ್ಟಕ್ಕೆ ಸಿಲುಕಿದೆ. ಏಕೆಂದರೆ 17.5 ಕೋಟಿ ರೂ. ನೀಡಿ ಖರೀದಿಸಿದ ಕ್ಯಾಮರೋನ್ ಗ್ರೀನ್ ಕಡೆಯಿಂದ ಅತ್ಯಂತ ಕಳಪೆ ಪ್ರದರ್ಶನ ಮೂಡಿಬರುತ್ತಿದೆ. ಇದಕ್ಕೆ ಸಾಕ್ಷಿ 5 ಪಂದ್ಯಗಳಲ್ಲಿನ ಅಂಕಿ ಅಂಶಗಳು.
RCB ಪರ 5 ಪಂದ್ಯಗಳನ್ನಾಡಿರುವ ಗ್ರೀನ್ ಇದುವರೆಗೆ ಕಲೆಹಾಕಿರುವುದು ಕೇವಲ 68 ರನ್ಗಳು ಮಾತ್ರ. ಅಂದರೆ 107 ರ ಸ್ಟ್ರೈಕ್ ರೇಟ್ನಲ್ಲಿ 17 ರ ಸರಾಸರಿಯಲ್ಲಿ ಮಾತ್ರ ರನ್ ಗಳಿಸಿದ್ದಾರೆ. ಇನ್ನು ಬೌಲಿಂಗ್ನಲ್ಲಿ 11.1 ಓವರ್ ಎಸೆದಿರುವ ಗ್ರೀನ್ 105 ರನ್ ನೀಡಿ ಪಡೆದಿದ್ದು ಕೇವಲ 2 ವಿಕೆಟ್ ಮಾತ್ರ.
ಅಂದರೆ ಮುಂಬೈ ಇಂಡಿಯನ್ಸ್ ಫ್ರಾಂಚೈಸಿಗೆ ಅನುಕೂಲ ಮಾಡಿಕೊಡಲು ಹೋಗಿ ಇದೀಗ ಆರ್ಸಿಬಿ ಸಂಕಷ್ಟಕ್ಕೆ ಸಿಲುಕಿರುದಂತು ನಿಜ. ಈ ಸಂಕಷ್ಟದಿಂದ ಆರ್ಸಿಬಿ ತಂಡವನ್ನು ಕ್ಯಾಮರೋನ್ ಗ್ರಿಣ್ ಪಾರು ಮಾಡ್ತಾರಾ ಎಂಬುದೇ ಈಗ ಪ್ರಶ್ನೆ. ಏಕೆಂದರೆ ಆರ್ಸಿಬಿ ಪರ ಅತೀ ಹೆಚ್ಚು ಮೊತ್ತ ಪಡೆಯುತ್ತಿರುವ ಆಟಗಾರನೆಂದರೆ ಅದು ಕ್ಯಾಮರೋನ್ ಗ್ರೀನ್. ಅದು ಸಹ ಬರೋಬ್ಬರಿ 17.5 ಕೋಟಿ ರೂ. ಇದಾಗ್ಯೂ ಇದುವರೆಗೆ ಗ್ರೀನ್ ಕಡೆಯಿಂದ ನಿರೀಕ್ಷಿತ ಪ್ರದರ್ಶನ ಮಾತ್ರ ಮೂಡಿಬಂದಿಲ್ಲ.
ಒಟ್ಟಿನಲ್ಲಿ ಮುಂಬೈ ಇಂಡಿಯನ್ಸ್ ಫ್ರಾಂಚೈಸಿಯ ನೆರವಿಗೆ ನಿಂತ ಆರ್ಸಿಬಿ ಐದು ಪಂದ್ಯಗಳವರೆಗೆ ದುಬಾರಿ ಬೆಲೆತೆತ್ತಿದೆ. ಇನ್ನುಳಿದ 9 ಪಂದ್ಯಗಳಲ್ಲಿ ಗ್ರೀನ್ ಕಡೆಯಿಂದ ಆರ್ಸಿಬಿಗೆ ಗೆಲುವಿನ ಗ್ರೀನ್ ಸಿಗ್ನಲ್ ಸಿಗಲಿದೆಯಾ ಎಂಬುದೇ ಈಗ ಪ್ರಶ್ನೆ.