IPL 2024: ಮೊದಲ 250+ ಸ್ಕೋರ್: ಅಂದು RCB ಪರ ಯಾರ್ಯಾರು ಎಷ್ಟು ರನ್ಗಳಿಸಿದ್ದರು? ಇಲ್ಲಿದೆ ಮಾಹಿತಿ
IPL 2024: ಇಂಡಿಯನ್ ಪ್ರೀಮಿಯರ್ ಲೀಗ್ (IPL) ಇತಿಹಾಸದಲ್ಲೇ ಮೊದಲ ಬಾರಿ 250 ಕ್ಕಿಂತ ಹೆಚ್ಚು ರನ್ ಕಲೆಹಾಕಿದ ದಾಖಲೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಹೆಸರಿನಲ್ಲಿದೆ. ಐಪಿಎಲ್ 2013 ರಲ್ಲಿ ಆರ್ಸಿಬಿ 263 ರನ್ ಬಾರಿಸಿ ದಾಖಲೆ ಬರೆದಿತ್ತು. ಇದೀಗ IPL 2024 ರಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ 277 ರನ್ ಬಾರಿಸಿ ಸನ್ರೈಸರ್ಸ್ ಹೈದರಾಬಾದ್ ಹಳೆಯ ದಾಖಲೆಯನ್ನು ಅಳಿಸಿ ಹಾಕಿದ್ದಾರೆ.
IPL 2024: ದಾಖಲೆಯ 263 ರನ್ಗಳು. 11 ವರ್ಷಗಳ ಹಿಂದೆ ಐಪಿಎಲ್ನಲ್ಲಿ ಆರ್ಸಿಬಿ ಕಲೆಹಾಕಿದ 263 ರನ್ಗಳ ಸ್ಕೋರ್ಕಾರ್ಡ್ ಮತ್ತೆ ಮುನ್ನಲೆಗೆ ಬಂದಿದೆ. ಇದಕ್ಕೆ ಮುಖ್ಯ ಕಾರಣ ಸನ್ರೈಸರ್ಸ್ ಹೈದರಾಬಾದ್ ತಂಡವು ಮುಂಬೈ ಇಂಡಿಯನ್ಸ್ ವಿರುದ್ಧ 277 ರನ್ ಬಾರಿಸಿ ದಾಖಲೆ ಬರೆದಿರುವುದು.
ಅಂದರೆ ಐಪಿಎಲ್ ಇತಿಹಾಸದಲ್ಲೇ ಕೇವಲ 3 ತಂಡಗಳು ಮಾತ್ರ 250 ಕ್ಕಿಂತ ಹೆಚ್ಚು ರನ್ ಕಲೆಹಾಕಿದೆ. 2013 ರಲ್ಲಿ ಆರ್ಸಿಬಿ 263 ರನ್ಗಳಿಸಿದರೆ, 2023 ರಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ 257 ರನ್ ಬಾರಿಸಿತು. ಇದೀಗ ಸನ್ರೈಸರ್ಸ್ ಹೈದರಾಬಾದ್ 277 ರನ್ ಸಿಡಿಸಿ ಹೊಸ ಇತಿಹಾಸ ನಿರ್ಮಿಸಿದೆ.
ಇದಾಗ್ಯೂ ಐಪಿಎಲ್ ಇತಿಹಾಸದಲ್ಲಿ ಮೂಡಿಬಂದ ಮೊದಲ 250+ ರನ್ಗಳ ದಾಖಲೆ ಈಗಲೂ ವಿಶೇಷ ದಾಖಲೆಯಾಗಿಯೇ ಉಳಿದಿದೆ. ಈ ದಾಖಲೆಯ ಇನಿಂಗ್ಸ್ನಲ್ಲಿ ಅಂದು ಆರ್ಸಿಬಿ ಪರ ಯಾರ್ಯಾರು ಎಷ್ಟೆಷ್ಟು ರನ್ ಕಲೆಹಾಕಿದ್ದರು? ಎಂಬುದರ ಸಂಪೂರ್ಣ ಮಾಹಿತಿ ಈ ಕೆಳಗಿನಂತಿದೆ...
2013, ಏಪ್ರಿಲ್ 23...ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಹಾಗೂ ಪುಣೆ ವಾರಿಯರ್ಸ್ ತಂಡಗಳು ಮುಖಾಮುಖಿಯಾಗಿತ್ತು. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಪುಣೆ ವಾರಿಯರ್ಸ್ ತಂಡದ ನಾಯಕ ಆರೋನ್ ಫಿಂಚ್ ಫೀಲ್ಡಿಂಗ್ ಆಯ್ದುಕೊಂಡಿದ್ದರು.
ಅದರಂತೆ ಇನಿಂಗ್ಸ್ ಆರಂಭಿಸಿದ ಆರ್ಸಿಬಿ ತಂಡಕ್ಕೆ ಕ್ರಿಸ್ ಗೇಲ್ ಹಾಗೂ ತಿಲಕರತ್ನೆ ದಿಲ್ಶಾನ್ ಸ್ಪೋಟಕ ಆರಂಭ ಒದಗಿಸಿದ್ದರು. ಅದರಲ್ಲೂ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿದ ಗೇಲ್ ಸಿಕ್ಸ್-ಫೋರ್ಗಳ ಸುರಿಮಳೆಗೈದರು. ಅತ್ತ ಯೂನಿವರ್ಸ್ ಬಾಸ್ನ ಅಬ್ಬರದಿಂದ ಪುಣೆ ವಾರಿಯರ್ಸ್ ಬೌಲರ್ಗಳು ಲಯ ತಪ್ಪಿದರು. ಪರಿಣಾಮ ಗೇಲ್ ಕೇವಲ 30 ಎಸೆತಗಳಲ್ಲಿ ಶತಕ ಪೂರೈಸಿ ಹೊಸ ಇತಿಹಾಸ ನಿರ್ಮಿಸಿದರು.
ಅಷ್ಟೇ ಅಲ್ಲದೆ 66 ಎಸೆತಗಳಲ್ಲಿ 17 ಸಿಕ್ಸ್ ಹಾಗೂ 13 ಫೋರ್ನೊಂದಿಗೆ ಅಜೇಯ 175 ರನ್ ಬಾರಿಸಿ ಐಪಿಎಲ್ನಲ್ಲಿ ಹೊಸ ದಾಖಲೆಯನ್ನೂ ಕೂಡ ಬರೆದರು.
ಮತ್ತೊಂದೆಡೆ ತಿಲಕರತ್ನೆ ದಿಲ್ಶಾನ್ ಆರಂಭದಲ್ಲಿ ತುಸು ಬಿರುಸಿನ ಬ್ಯಾಟಿಂಗ್ ನಡೆಸಿದರೂ, ಆ ಬಳಿಕ ನಿಧಾನಗತಿಯ ಬ್ಯಾಟಿಂಗ್ಗೆ ಒತ್ತು ನೀಡಿದರು. ಪರಿಣಾಮ 36 ಎಸೆತಗಳನ್ನು ಎದುರಿಸಿದ ದಿಲ್ಶಾನ್ 5 ಫೋರ್ನೊಂದಿಗೆ 33 ರನ್ಗಳಿಸಿ ಲೂಕ್ ರೈಟ್ಗೆ ವಿಕೆಟ್ ಒಪ್ಪಿಸಿದ್ದರು. ಆದರೆ ಇದಕ್ಕೂ ಮುನ್ನ ಗೇಲ್ ಜೊತೆ ಮೊದಲ ವಿಕೆಟ್ಗೆ 167 ರನ್ಗಳ ಭರ್ಜರಿ ಜೊತೆಯಾಟವಾಡಿದ್ದರು.
ಆ ನಂತರ ಬಂದ ವಿರಾಟ್ ಕೊಹ್ಲಿ 9 ಎಸೆತಗಳಲ್ಲಿ 1 ಭರ್ಜರಿ ಸಿಕ್ಸ್ನೊಂದಿಗೆ 11 ರನ್ಗಳಿಸಿದರೂ ಅಶೋಕ್ ದಿಂಡಾ ಅವರ ಅತ್ಯುತ್ತಮ ಫೀಲ್ಡಿಂಗ್ನಿಂದಾಗಿ ರನೌಟ್ ಆಗಿ ಹೊರ ನಡೆದರು.
ಇನ್ನು ನಾಲ್ಕನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಎಬಿ ಡಿವಿಲಿಯರ್ಸ್ ಅಕ್ಷರಶಃ ಅಬ್ಬರಿಸುವ ಮೂಲಕ ಪಂದ್ಯವನ್ನು ಮತ್ತೊಂದು ಮಜಲಿನತ್ತ ಕೊಂಡೊಯ್ದರು. ಕೇವಲ 8 ಎಸೆತಗಳನ್ನು ಎದುರಿಸಿದ್ದ ಎಬಿಡಿ 3 ಭರ್ಜರಿ ಸಿಕ್ಸ್ ಹಾಗೂ 3 ಫೋರ್ನೊಂದಿಗೆ 31 ರನ್ ಬಾರಿಸಿ ಮಿಚೆಲ್ ಮಾರ್ಷ್ಗೆ ವಿಕೆಟ್ ಒಪ್ಪಿಸಿದ್ದರು. ಅಷ್ಟರಲ್ಲಾಗಲೇ ಆರ್ಸಿಬಿ ತಂಡದ ಮೊತ್ತ 250 ರ ಗಡಿದಾಟಿತ್ತು.
ಹಾಗೆಯೇ 5ನೇ ಕ್ರಮಾಂಕದಲ್ಲಿ ಆಡಿದ ಸೌರವ್ ತಿವಾರಿ 2 ಎಸೆತಗಳಲ್ಲಿ 2 ರನ್ಗಳಿಸಿ ಅಶೋಕ್ ದಿಂಡಾಗೆ ವಿಕೆಟ್ ಒಪ್ಪಿಸಿದರೆ, 6ನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ರವಿ ರಾಂಪಾಲ್ ಶೂನ್ಯಕ್ಕೆ ಔಟಾಗಿದ್ದರು. ಇದರೊಂದಿಗೆ ಆರ್ಸಿಬಿ ತಂಡವು ನಿಗದಿತ 20 ಓವರ್ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 263 ರನ್ಗಳಿಸಿತು.
264 ರನ್ಗಳ ಬೃಹತ್ ಟಾರ್ಗೆಟ್ ಪಡೆದ ಪುಣೆ ವಾರಿಯರ್ಸ್ ಪರ ಸ್ಟೀವ್ ಸ್ಮಿತ್ 31 ಎಸೆತಗಳಲ್ಲಿ 41 ರನ್ಗಳಿಸಿದ್ದು ಗರಿಷ್ಠ ಸ್ಕೋರ್. ಅಲ್ಲದೆ ನಿಗದಿತ 20 ಓವರ್ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ ಕೇವಲ 133 ರನ್ಗಳಿಸುವ ಮೂಲಕ ಪುಣೆ ವಾರಿಯರ್ಸ್ ತಂಡವು 130 ರನ್ಗಳ ಅಂತರದಿಂದ ಹೀನಾಯವಾಗಿ ಸೋಲೊಪ್ಪಿಕೊಂಡಿತ್ತು. ಈ ದಾಖಲೆಯ ಪಂದ್ಯದ ಉಭಯ ತಂಡಗಳ ಪ್ಲೇಯಿಂಗ್ 11 ಈ ಕೆಳಗಿನಂತಿದೆ...
ಪುಣೆ ವಾರಿಯರ್ಸ್ ಪ್ಲೇಯಿಂಗ್ 11: ಆರೋನ್ ಫಿಂಚ್ (ನಾಯಕ) , ರಾಬಿನ್ ಉತ್ತಪ್ಪ ( ವಿಕೆಟ್ ಕೀಪರ್ ) , ಯುವರಾಜ್ ಸಿಂಗ್ , ಸ್ಟೀವ್ ಸ್ಮಿತ್ , ಲೂಕ್ ರೈಟ್ , ಮಿಚೆಲ್ ಮಾರ್ಷ್ , ಮಿಥುನ್ ಮನ್ಹಾಸ್ , ಭುವನೇಶ್ವರ್ ಕುಮಾರ್ , ಈಶ್ವರ್ ಪಾಂಡೆ , ಅಲಿ ಮುರ್ತಾಜಾ , ಅಶೋಕ್ ದಿಂಡಾ.
ಆರ್ಸಿಬಿ ಪ್ಲೇಯಿಂಗ್ 11: ತಿಲಕರತ್ನೆ ದಿಲ್ಶನ್ , ಕ್ರಿಸ್ ಗೇಲ್ , ವಿರಾಟ್ ಕೊಹ್ಲಿ (ನಾಯಕ) , ಎಬಿ ಡಿವಿಲಿಯರ್ಸ್ , ಸೌರಭ್ ತಿವಾರಿ , ಅರುಣ್ ಕಾರ್ತಿಕ್ ( ವಿಕೆಟ್ ಕೀಪರ್ ) , ರವಿ ರಾಂಪಾಲ್ , ವಿನಯ್ ಕುಮಾರ್ , ಮುರಳಿ ಕಾರ್ತಿಕ್ , ಆರ್ ಪಿ ಸಿಂಗ್ , ಜಯದೇವ್ ಉನಾದ್ಕಟ್.