Ugadi Yearly Horoscope 2022: ಯುಗಾದಿ ವರ್ಷ ಭವಿಷ್ಯ: ಮೇಷದಿಂದ ಮೀನರಾಶಿಯ ತನಕ ದ್ವಾದಶ ರಾಶಿ ಫಲ
Ugadi Varshaphal 2022: 2022ರ ಏಪ್ರಿಲ್ 2ರಂದು (ಶನಿವಾರ) ಶುಭಕೃತ್ನಾಮ ಸಂವತ್ಸರ ಆರಂಭವಾಗುತ್ತದೆ. ಇದನ್ನು ನಾವೆಲ್ಲ ಯುಗಾದಿ ಎನ್ನುತ್ತೇವೆ. ಆ ದಿನದ ವಿಶೇಷ ಏನೆಂದರೆ, ಪಂಚಾಂಗ ಶ್ರವಣ. ಪಂಚಾಂಗವನ್ನು ಕೇಳುವುದು ಅಂತ ಇದರ ಅರ್ಥ. ಹೇಗೆ ಒಂದು ಹಣಕಾಸು ವರ್ಷ ಅಂದಾಗ ಆಯಾ ಕಂಪೆನಿ ಅಥವಾ ಸಂಸ್ಥೆಗೆ ಅನುಗುಣವಾಗಿ ಇಂಥ ತಿಂಗಳಿಂದ ಈ ತಿಂಗಳು ಅಂತ ನಿರ್ಧಾರ ಆಗಿರುತ್ತದೋ ಅದೇ ರೀತಿ ಯುಗಾದಿಯಿಂದ ಮತ್ತೊಂದು ಯುಗಾದಿ ತನಕ ಒಂದು ಸಂವತ್ಸರ ಆಗುತ್ತದೆ. ಜನ್ಮ ರಾಶಿಗೆ ಅನುಗುಣವಾಗಿ ಏನು ಫಲ ದೊರೆಯುತ್ತದೆ, ಗೋಚಾರ ಫಲಗಳು ಏನು ಹೇಳುತ್ತವೆ ಎಂದು ತಿಳಿಯಲಾಗುತ್ತದೆ. ಆದಾಯ- ವ್ಯಯ, ಆರೋಗ್ಯ-ಅನಾರೋಗ್ಯ, ಸುಖ-ದುಃಖ ಇತ್ಯಾದಿಗಳ ಚಿಂತನೆಯನ್ನೂ ಹಾಗೂ ಪ್ರಥಮ, ದ್ವಿತೀಯ ಹಾಗೂ ತೃತೀಯ ಎಂಬ ವಿಂಗಡಣೆ ಮಾಡಿ, ಕಂದಾಯ ಫಲವನ್ನೂ ಚಿಂತನೆ ಮಾಡಲಾಗುತ್ತದೆ. ಗೋಚಾರದಲ್ಲಿನ ಪ್ರಮುಖ ಗ್ರಹಗಳನ್ನು ಆಧಾರವಾಗಿ ಇಟ್ಟುಕೊಂಡು, ಈ ಫಲವನ್ನು ತಿಳಿಸಲಾಗುತ್ತದೆ. ಏನಿದು ಪ್ರಮುಖ ಗ್ರಹಗಳು? ಹೀಗೆ ಆಲೋಚಿಸಿದ ತಕ್ಷಣ ನೆನಪಾಗುವುದು ಗುರು- ಶನಿಯಾದರೆ, ಆ ಮೇಲೆ ರಾಹು-ಕೇತು ನೆನಪಾಗುತ್ತವೆ. ಇದೀಗ ಶುಭಕೃತ್ನಾಮ ಸಂವತ್ಸರದಲ್ಲಿ ಮೇಷದಿಂದ ಮೀನದ ತನಕ ಹನ್ನೆರಡು ರಾಶಿಗಳ ಮೇಲೆ ಫಲಗಳೇನು ಎಂಬುದನ್ನು ತಿಳಿಯೋಣ.
ಮೇಷ: ಭಾಗ್ಯಾಧಿಪತಿ (9ನೇ ಮನೆ ಧನು) ಹಾಗೂ ವ್ಯಯಾಧಿಪತಿ (12ನೇ ಮನೆ ಮೀನ) ಆದ ಗುರು ಈ ಸಂವತ್ಸರದಲ್ಲಿ ವ್ಯಯ ಸ್ಥಾನದಲ್ಲೇ (ಹನ್ನೆರಡರಲ್ಲೇ) ಇರುವುದರಿಂದ ಸಿಕ್ಕಾಪಟ್ಟೆ ಖರ್ಚಿರುತ್ತದೆ. ಅನಾರೋಗ್ಯ ಸಮಸ್ಯೆಗಳು ಬಿಟ್ಟೂಬಿಡದೆ ಕಾಡಬಹುದು. ಜನ್ಮರಾಶಿಗೆ ರಾಹು ಪ್ರವೇಶಿಸುವುದರಿಂದ ಒಂದಲ್ಲ ಒಂದು ಬಗೆಯ ಚಿಂತೆ, ಅಸಮಾಧಾನ ಕಾಡುತ್ತಲೇ ಇರುತ್ತದೆ. ಏಳನೇ ಮನೆಯಲ್ಲಿನ ಕೇತು ಸಂಸಾರದಲ್ಲಿ ಜಗಳ, ಭಿನ್ನಾಭಿಪ್ರಾಯವನ್ನು ಮೂಡಿಸುತ್ತದೆ. ಏಪ್ರಿಲ್ ತಿಂಗಳ ಎರಡನೇ ಭಾಗದಿಂದ ಕುಂಭ ರಾಶಿಗೆ ಪ್ರವೇಶಿಸುವ ಶನಿಯು ಲಾಭಾಧಿಪತಿಯಾಗಿ ಲಾಭ ಸ್ಥಾನದಲ್ಲೇ ಈ ಸಂವತ್ಸರದಲ್ಲಿ (ಜುಲೈನಿಂದ ಜನವರಿ ತನಕ ಮಕರದಲ್ಲಿ ವಕ್ರಿಯಾಗಿ ಸಂಚರಿಸಲಿದೆ) ಆರು ತಿಂಗಳ ಕಾಲ ಇರುವುದರಿಂದ ನ್ಯಾಯಯುತವಾಗಿ ಸಿಗಬೇಕಾದದ್ದರಲ್ಲಿ ತಪ್ಪಲ್ಲ. ಆದರೆ ಅಂದುಕೊಂಡ ಸಮಯಕ್ಕೆ ದೊರೆಯದಂತೆ ಆಗಬಹುದು. ಈ ವರ್ಷ ಗುರುವಿನ ಆರಾಧನೆ ಮಾಡಿ.
ವೃಷಭ: ಲಾಭಾಧಿಪತಿ (ಹನ್ನೊಂದನೇ ಮನೆ) ಹಾಗೂ ಆಯುಷ್ಯ ಸ್ಥಾನಾಧಿಪತಿ (ಎಂಟನೇ ಮನೆ) ಗುರುವು ಲಾಭ ಸ್ಥಾನದಲ್ಲೇ ಇರುವುದರಿಂದ ವ್ಯಾಪಾರ- ವ್ಯವಹಾರಗಳಲ್ಲಿ ಲಾಭ ಕಾಣಬಹುದು. ಕೆಲಸಗಳಲ್ಲಿ ಜಯ, ಮನೆ ನಿರ್ಮಾಣಕ್ಕೆ, ವಾಹನ ಖರೀದಿಗೆ, ಸೈಟು ಖರೀದಿಗೆ ಎಲ್ಲ ಬೆಂಬಲ ಸಿಗುತ್ತದೆ. ಕೆಲವರಿಗೆ ವಿದೇಶ ನೆಲದಲ್ಲೇ ಸ್ಥಿರವಾಗುವ ಅವಕಾಶಗಳಿವೆ. ಹನ್ನೆರಡರಲ್ಲಿ ರಾಹು ಇರಲಿದ್ದು, ಆಲೋಚಿಸಿ, ಖರ್ಚು ಮಾಡಿ. ಪ್ರತಿಷ್ಠೆಯ ಬೆನ್ನು ಬಿದ್ದು, ಕಂಡಾಪಟ್ಟೆ ಖರ್ಚು ಮಾಡಿ, ಸಾಲದ ಸಮಸ್ಯೆಗೆ ಸಿಲುಕಿಕೊಳ್ಳುತ್ತೀರಿ. ಯಾವ ನಿರ್ಧಾರ ತೆಗೆದುಕೊಳ್ಳುವ ಮುನ್ನ ಲೆಕ್ಕಾಚಾರ ಸರಿ ಇರಲಿ. ಈ ವರ್ಷದಲ್ಲಿ ಬಹುಪಾಲು ಸಮಯ ಹತ್ತನೇ ಮನೆಯಲ್ಲಿ ಶನಿ ಇರಲಿದ್ದು, ಉದ್ಯೋಗ ಸ್ಥಳದಲ್ಲಿ ಅನುಕೂಲ ಸಂದರ್ಭ ಇದು. ಸಟ್ಟಾ ವ್ಯವಹಾರ, ಜೂಜಿನಿಂದ ದೂರ ಇರುವುದು ಒಳ್ಳೆಯದು. ಅದನ್ನೂ ಮೀರಿಯೂ ಮುಂದುವರಿದಲ್ಲಿ ತಲೆ ತಗ್ಗಿಸುವಂಥ ಸ್ಥಿತಿ ಎದುರಾಗುತ್ತದೆ.
ಮಿಥುನ: ಗುರು ಗ್ರಹವು ಹತ್ತನೇ ಮನೆಯಲ್ಲಿ ಇರುವುದರಿಂದ ಉದ್ಯೋಗ ಸ್ಥಾನದಲ್ಲಿ ಪ್ರಗತಿ ನಿರೀಕ್ಷಿಸಬಹುದು. ಶುಭ ಸಮಾರಂಭಗಳು, ದೊಡ್ಡ ಕಾರ್ಯಕ್ರಮಗಳಿಗೆ ಮುಂಚೂಣಿಯಲ್ಲಿ ನಿಂತು ನಡೆಸಿಕೊಡಬೇಕಾಗುತ್ತದೆ. ಈ ಸಂವತ್ಸರದಲ್ಲಿ ಶನಿ ಆರು ತಿಂಗಳು ಎಂಟನೇ ಮನೆ ಹಾಗೂ ಒಂಬತ್ತನೇ ಮನೆಯಲ್ಲಿ ಆರು ತಿಂಗಳು ಸಂಚರಿಸುತ್ತದೆ. ಇಷ್ಟು ಕಾಲ ಇದ್ದಂತೆ ಈಗಲೂ ಆರೋಗ್ಯದ ಬಗ್ಗೆ ಜಾಗ್ರತೆ ಇರಬೇಕು. ದೂರ-ಭಾರ ಪ್ರಯಾಣ ಮಾಡುವವರು ಎಚ್ಚರದಿಂದ ಇರಿ. ಮಾಡಿದ ಕೆಲಸವನ್ನೇ ಮತ್ತೆ ಮತ್ತೆ ಮಾಡಬೇಕಾದೀತು. ಅಂದುಕೊಂಡಂತೆ ಎಲ್ಲವೂ ಸಾಗುವುದಿಲ್ಲ. ಹಾಗಂತ ಮುಂದಕ್ಕೆ ಹಾಕಬೇಡಿ. ಹನ್ನೊಂದರಲ್ಲಿ ರಾಹು ಸಂಚಾರದಿಂದ ಸೈಟ್- ಜಮೀನು ಖರೀದಿಸುತ್ತೀರಿ. ಕೆಲವರು ಸಾಲ ಮಾಡಿ ಮನೆ ನಿರ್ಮಿಸಬಹುದು. ಐದನೇ ಮನೆಯಲ್ಲಿ ಕೇತು ಸಂಚರಿಸಲಿದ್ದು, ಮಕ್ಕಳು ಯಾರ ಜತೆಗೆ ಸ್ನೇಹ ಮಾಡುತ್ತಿದ್ದಾರೆ, ಅವರ ಆರೋಗ್ಯ ಹೇಗಿದೆ, ಅಭ್ಯಾಸಗಳೇನು ಎಂಬುದರ ಮೇಲೆ ಕಣ್ಣಿರಲಿ.
ಕರ್ಕಾಟಕ: ಒಂಬತ್ತನೇ ಸ್ಥಾನಾಧಿಪತಿಯಾದ ಗುರು ಅದೇ ಮನೆಯಲ್ಲೇ ಇರಲಿದ್ದು, ತಂದೆ ಕಡೆಯಿಂದ ಬರಬೇಕಾದ ಆಸ್ತಿಗಳು ಅಥವಾ ಈಗಾಗಲೇ ಇರುವಂಥ ವ್ಯಾಜ್ಯಗಳು ಇತ್ಯರ್ಥ ಆಗುತ್ತವೆ. ನಿರೀಕ್ಷೆಯೇ ಮಾಡದ ರೀತಿಯಲ್ಲಿ ದುಡ್ಡು ಬರುತ್ತದೆ. ಕೆಲವು ಹೆಣ್ಣುಮಕ್ಕಳು ಚಿನ್ನಾಭರಣ ಕೊಳ್ಳಬಹುದು. ವಿಲಾಸಿ ವಸ್ತುಗಳನ್ನು ಖರೀದಿಸುವದಕ್ಕೆ ಹಣಕಾಸಿನ ಕೊರತೆ ಇದ್ದರೂ ಅದು ನೀಗುತ್ತದೆ. ಶನಿ ಗ್ರಹವು ಆರು ತಿಂಗಳು ಏಳನೇ ಮನೆಯಲ್ಲಿ, ಆರು ತಿಂಗಳು ಎಂಟರಲ್ಲಿ ಸಂಚರಿಸುವುದರಿಂದ ನೀವು ಮಾಡಿರದ ತಪ್ಪಿಗೆ ಕೇಳಬಾರದ ಮಾತುಗಳನ್ನು ಕೇಳಬೇಕಾಗುತ್ತದೆ. ಮಾನಸಿಕ ಹಿಂಸೆ ಆಗುತ್ತದೆ. ಇನ್ನು ನೀವು ವೃತ್ತಿಯಿಂದಲೇ ವಾಹನ ಚಾಲಕರಾಗಿದ್ದಲ್ಲಿ ಬಹಳ ಎಚ್ಚರದಿಂದ ಇರಬೇಕು. ಜತೆಗೆ ಅಪರೂಪಕ್ಕೆ ವಾಹನ ಓಡಿಸುವಂಥವರಾಗಿದ್ದರೂ ಏಕಾಗ್ರತೆಯನ್ನು ಕಳೆದುಕೊಳ್ಳದಿರಿ. ಅಪಘಾತ ಸಂಭವನೀಯತೆ ಇದೆ. ಬೇರೆಯವರಿಗೆ ವಸ್ತುಗಳಿಗೆ ಆಸೆ ಪಡಬೇಡಿ. ತಂದೆ-ತಾಯಿ ಆರೋಗ್ಯದ ಬಗ್ಗೆ ಕೂಡ ಲಕ್ಷ್ಯ ಇರಲಿ.
ಸಿಂಹ: ನೀವು ಯಾವುದೇ ವ್ಯಕ್ತಿ, ವಿಚಾರದ ಪರ ನಿಲ್ಲುವಾಗ ಪೂರ್ವಾಪರ ತಿಳಿದುಕೊಳ್ಳಿ. ಏನನ್ನಾದರೂ ದಕ್ಕಿಸಿಕೊಳ್ಳಬಲ್ಲೆ ಎಂಬ ಹುಂಬತನ ಬೇಡ. ಪ್ರಮುಖ ಒಪ್ಪಂದಗಳನ್ನು ಮಾಡಿಕೊಳ್ಳುವಾಗ ಕಾನೂನು ಪರಿಣತರು, ತಜ್ಞರ ಸಲಹೆಯನ್ನು ಪಡೆದುಕೊಳ್ಳಿ. ಈ ಹಿಂದೆ ಮಾಡಿದ್ದ ಯಾವುದೋ ಸಣ್ಣ ತಪ್ಪು ದೊಡ್ಡ ಮಟ್ಟದಲ್ಲಿ ತಲೆಬೇನೆ ಆಗುವಂಥ ಸ್ಥಿತಿಯನ್ನು ಎಂಟನೇ ಮನೆಯ ಗುರು ತರಬಹುದು. ಪಾರ್ಟಿಗಳನ್ನು ಸಾಧ್ಯವಾದಷ್ಟೂ ಕಡಿಮೆ ಮಾಡಿ, ಬಾಯಿ ಕಟ್ಟಿ. ಆರು ಮತ್ತು ಏಳನೇ ಸ್ಥಾನದಲ್ಲಿ ಹೀಗೆ ಎರಡರಲ್ಲೂ ಆರಾರು ತಿಂಗಳು ಶನಿ ಸಂಚಾರ ಇರಲಿದೆ. ಈ ಕಾರಣಕ್ಕೆ ಫಲಗಳು ಮಿಶ್ರ ಆಗಿರುತ್ತವೆ. ಮಕರದಲ್ಲಿ ಶನಿ ಸಂಚರಿಸುವ ವೇಳೆ ಧನಾಗಮ, ಶತ್ರುಗಳ ದಮನ ಇತ್ಯಾದಿ ಫಲಗಳನ್ನು ಪಡೆಯುತ್ತೀರಿ. ಪ್ರಮುಖ ಕೆಲಸ ಅಥವಾ ನಿರ್ಧಾರಗಳನ್ನು ಈ ಸಮಯದಲ್ಲಿ ಮಾಡಿ. ಎಂಟರಲ್ಲಿ ರಾಹು ಸಂಚಾರ ಇರುವಾಗ ಕೆಟ್ಟ ಕೆಲಸಗಳ ಬಗ್ಗೆ ಆಸಕ್ತಿ ಹೆಚ್ಚಾಗುತ್ತದೆ. ಮೂರನೇ ಮನೆಯಲ್ಲಿ, ಅಂದರೆ ತುಲಾದಲ್ಲಿ ಕೇತು ಇರುವಾಗ ವಿವಿಧ ಬಗೆಯಲ್ಲಿ ಅನುಕೂಲ ಇದೆ.
ಕನ್ಯಾ: ಈ ರಾಶಿಯವರಿಗೆ ಹೇಳುವುದಕ್ಕೆ ಹಲವು ಶುಭ ಫಲಗಳಿವೆ. ಆರನೇ ಮನೆಯಲ್ಲಿ, ಅಂದರೆ ಕುಂಭ ರಾಶಿಯಲ್ಲಿ ಶನಿ ಸಂಚರಿಸುವಾಗ ಆರೋಗ್ಯ ಚೆನ್ನಾಗಿ ಆಗುತ್ತದೆ. ಒಂದಲ್ಲಾ ಒಂದು ಕಡೆಯಿಂದ ಹಣ ಹರಿದು ಬರುತ್ತದೆ. ಮಕ್ಕಳಿಗಾಗಿ ಪ್ರಯತ್ನಿಸುತ್ತಿರುವ ಆರೋಗ್ಯವಂತ ದಂಪತಿಗೆ ಶುಭ ಸುದ್ದಿ ಇದೆ. ಈ ವರ್ಷದಲ್ಲಿ ಸಂತಾನ ಐದನೇ ಮನೆಯಲ್ಲಿ ಆರು ತಿಂಗಳು ಶನಿ ಇರುವಾಗ ಹುಷಾರಾಗಿರಿ. ಏಳರಲ್ಲಿ ಗುರು ಸಂಚರಿಸುವಾಗ ಮದುವೆಗಾಗಿ ಪ್ರಯತ್ನಿಸುತ್ತಿರುವವರು ಯಶಸ್ಸು ಕಾಣಬಹುದು. ಪಾಲುದಾರಿಕೆ ವ್ಯವಹಾರದಲ್ಲಿ ಲಾಭ ಜಾಸ್ತಿ ಆಗುತ್ತದೆ. ಆದರೆ ಕುಟುಂಬದ ಇತರ ಸದಸ್ಯರ ಅಭಿಪ್ರಾಯಗಳನ್ನೂ ಗೌರವಿಸಿ. ಎಂಟರಲ್ಲಿ ರಾಹು ಹಾಗೂ ಎರಡರಲ್ಲಿನ ಕೇತು ಒಂದಿಷ್ಟು ಸವಾಲಗುಗಳನ್ನು ತಂದೊಡ್ಡಬಹುದು. ಆದರೆ ಅದನ್ನು ಎದುರಿಸುವಂಥ ಚಾಕಚಕ್ಯತೆ ನಿಮ್ಮಲ್ಲಿ ಇದೆ. ಆದರೆ ಮೈಮರೆಯದೆ ವರ್ತಿಸಿ.
ತುಲಾ: ಈ ರಾಶಿಯಿಂದ ನಾಲ್ಕು ಮತ್ತು ಐದರಲ್ಲಿ ಶನಿ ಸಂಚಾರ ಮಾಡುವುದರಿಂದ ಎಲ್ಲ ಕೆಲಸದಲ್ಲೂ ಒಂದಲ್ಲಾ ಒಂದು ಸಮಸ್ಯೆ ಇರುತ್ತದೆ. ಮಾತನಾಡಿ ಕೆಲವು ಕೆಲಸ ಕೈಯಾರೆ ಹಾಳು ಮಾಡಿಕೊಳ್ಳುತ್ತಾರೆ. ಸಂಬಂಧಪಡದ, ಗೊತ್ತಿಲ್ಲದ ವಿಚಾರದಲ್ಲಿ ಬಾಯಿ ತೆರೆಯದೆ ಸುಮ್ಮನಿರಬೇಕು. ಇನ್ನು ಆರನೇ ಮನೆಯಲ್ಲಿ ಗುರು ಸಂಚಾರದ ಸಮಯದಲ್ಲಿ ಶತ್ರುಗಳ ಹಿಂಸೆ ಹಿಂದಿನಷ್ಟು ಇರದೆ ಕಡಿಮೆ ಆಗುತ್ತದೆ. ಆರನೇ ಮನೆ ಅಧಿಪತಿಯಾಗಿ ಅಲ್ಲೇ ಇರುವುದು ನೆಮ್ಮದಿಯ ಸಂಗತಿ. ಆದರೆ ವಿದ್ಯಾರ್ಥಿಗಳಿಗೆ ಒಳ್ಳೆಯದಲ್ಲ. ಯಾರೊಂದಿಗೆ ಸ್ನೇಹ ಮಾಡುತ್ತಿದ್ದೀವಿ ಎಂಬ ಬಗ್ಗೆ ನಿಗಾ ಇರಬೇಕು. ಇಲ್ಲದಿದ್ದಲ್ಲಿ ಎಲ್ಲರ ಮುಂದೆ ಮರ್ಯಾದೆ ಹೋಗುತ್ತದೆ. ಸುಖಾಸುಮ್ಮನೆ ಅಪರಾಧಿ ಸ್ಥಾನದಲ್ಲಿ ನಿಲ್ಲಬೇಕಾಗುತ್ತದೆ. ದೊರೆಯುವ ಅವಕಾಶಗಳು ಎಲ್ಲವೂ ನನ್ನ ಪಾಲಿಗೆ ಇರಲಿ ಎಂಬ ಧೋರಣೆ ಬೇಡ. ಆಗ ಜತೆಗೆ ಕೆಲಸ ಮಾಡುವವರಿಂದಲೇ ನಷ್ಟ ಆಗುತ್ತದೆ. ಜನ್ಮದಲ್ಲೇ ಕೇತು ಇದ್ದು, ದೇವತಾ ಕಾರ್ಯಗಳಿಗೆ ಮನಸ್ಸು ಸೆಳೆಯುತ್ತದೆ.
ವೃಶ್ಚಿಕ: 3 ಮತ್ತು 4ರಲ್ಲಿ ಶನಿ ಸಂಚಾರ ಇರಲಿದ್ದು, ಏಪ್ರಿಲ್ನಿಂದ ಜುಲೈ ತನಕ ಮುಖ್ಯ ನಿರ್ಧಾರಗಳಿಗೆ ಒಂದಕ್ಕೆ ನಾಲ್ಕು ಸಲ ಆಲೋಚಿಸಬೇಕು. ಆತುರಾತುರ ತೀರ್ಮಾನ ಬೇಡ. ಐದನೇ ಮನೆಯಲ್ಲಿ ಗುರು ಸಂಚರಿಸುವಾಗ ಉತ್ತಮ ಸಮಯ. ನಿಮ್ಮ ರಾಶಿಯ ದ್ವಿತೀಯ ಸ್ಥಾನಾಧಿಪತಿ ಪಂಚಮ ಸ್ಥಾನಲ್ಲಿ ಸಂಚರಿಸುವುದರಿಂದ ದೊಡ್ಡ ಮೊತ್ತದ ಹಣ ದೊರೆಯುವ ಅವಕಾಶ ಇದೆ. ಸಾಲ ಸಿಗುತ್ತದೆ ಎಂಬ ಏಕೈಕ ಕಾರಣಕ್ಕೆ ಪಡೆಯುವುದು ಸರಿಯಲ್ಲ. ಹನ್ನೆರಡನೇ ಮನೆಯ ಕೇತು ಹಾಗೂ ಆರನೇ ಮನೆಯಲ್ಲಿ ರಾಹು ಸಂಚರಿಸಲಿದೆ. ಎಷ್ಟು ಹಣ ಬಂದರೂ ಅದನ್ನು ಉಳಿಸಿಕೊಳ್ಳುವುದೇ ಕಷ್ಟ ಆಗುತ್ತದೆ. ದೇವತಾ ಕಾರ್ಯಗಳಿಗೆ ಹಣ ವ್ಯಯಿಸುವುದರಿಂದ ಅಷ್ಟರ ಮಟ್ಟಿಗೆ ಮಾನಸಿಕವಾದ ನೆಮ್ಮದಿ, ದೈವಾನುಗ್ರಹ ನಿಮ್ಮ ಪಾಲಿಗೆ ದೊರೆಯಲಿದೆ. ನಿಮ್ಮ ಪಾಲಿಗೆ ಹೇಗೂ ಸಮಾನರಲ್ಲದವರ ಜತೆಗೆ ಹಗೆತನ ಬೇಡ. ಅವಮಾನಕ್ಕೆ ಗುರಿ ಆಗುತ್ತೀರಿ. ಇನ್ನು ಶನಿಯು ಮಕರದಲ್ಲಿ ಇರುವಾಗ ಎಷ್ಟು ಲಾಭ ಬಂದರೆ ಅಷ್ಟಕ್ಕೆ ತೃಪ್ತರಾಗಿ.
ಧನುಸ್ಸು: ಏಳರಾಟ ಶನಿಯ ಪ್ರಭಾವದಿಂದ ಯುಗಾದಿ ನಂತರ ನಿರಾಳ ಆಗಲಿದ್ದೀರಿ. ಕುಂಭ ರಾಶಿಯಲ್ಲಿ ಶನಿ ಪ್ರವೇಶಿಸಿದ ನಂತರ ಅದರ ಪಾಸಿಟಿವ್ ಬದಲಾವಣೆಗಳು ಕಂಡುಬರಲಿವೆ. ಬಹಳ ಸಮಯದಿಂದ ತೀರಿಸುವುದಕ್ಕೆ ಆಗದಿದ್ದ ಸಾಲ ತೀರಿಸಲು, ಕಾಯಿಲೆಗೆ ಸೂಕ್ತ ಔಷಧ ಪಡೆಯಲು ಸೂಕ್ತ ಸಮಯ. ನಿಮ್ಮ ಸಾಮರ್ಥ್ಯವನ್ನು ಸಾಬೀತು ಮಾಡಿಕೊಳ್ಳುವ ಅವಕಾಶ ಸಿಗಲಿದೆ. ಆತ್ಮವಿಶ್ವಾಸ ಜಾಸ್ತಿ ಆಗಲಿದೆ. ಇನ್ನು ನಾಲ್ಕರಲ್ಲಿನ ಗುರುವು ಸ್ನೇಹಿತರನ್ನು ದೂರ ಮಾಡಬಹುದು. ಮಾತಿನ ಮೇಲೆ ನಿಗಾ ಮಾಡಿ. ಈ ಸಮಯದಲ್ಲಿ ನಿಮ್ಮ ಆಂತರಿಕೆ ಧೈರ್ಯ ಜಾಸ್ತಿ ಆಗಲಿದೆ. ಆದರೆ ಹುಂಬತನ ಬೇಡ. ಐದನೇ ಮನೆಯಲ್ಲಿ ರಾಹು ಇರುವುದರಿಂದ ಸಮತಾನ ಸ್ಥಾನದಲ್ಲಿ ಇರುವವರಿಗೆ ಆರೋಗ್ಯ ಸಮಸ್ಯೆಗಳು ಕಾಡಲಿವೆ. ಯಾರ ಬಗ್ಗೆಯೂ ತಿರಸ್ಕಾರ ಮನೋಭಾವನೆ ಬೇಡ. 11ರಲ್ಲಿ ಕೇತು ಸಂಚಾರ ವೇಳೆ ನಿಮಗೆ ರಾಜಾತಿಥ್ಯ ಸಿಗಲಿದೆ.
ಮಕರ: ನಿಮ್ಮದೇ ರಾಶಿ ಹಾಗೂ ಎರಡರಲ್ಲಿ ಶನಿ ಸಂಚರಿಸುವಾಗ ಆರೋಗ್ಯ, ಹಣಕಾಸು ವಿಚಾರ ಮಹತ್ವ ಪಡೆದುಕೊಳ್ಳಲಿದೆ. ಆದರೆ ಸದಾ ಮಾನಸಿಕ ಚಿಂತೆ ಕಾಡುತ್ತದೆ. ಸಿಕ್ಕಾಪಟ್ಟೆ ತಿಂದು ಆರೋಗ್ಯ ಹಾಳು ಮಾಡಿಕೊಳ್ಳಲಿದ್ದೀರಿ. ಜತೆಗೆ ತೂಕಕ್ಕೆ ಸಂಬಂಧಿಸಿದ ಅನಾರೋಗ್ಯಗಳು ಕಾಡಲಿವೆ. ಹಣ ಹೆಚ್ಚು ಖರ್ಚಾದರೂ ಪರವಾಗಿಲ್ಲ, ಯಾರಿಗೂ ಬೇಜಾರಾಗದಂತೆ ನೋಡಿಕೊಳ್ಳುತ್ತೇನೆ ಎಂದು ಹೊರಡಬೇಡಿ. ಅದು ಖಂಡಿತಾ ಸಾಧ್ಯವಾಗಲ್ಲ, ಮತ್ತಷ್ಟು ಸಾಲಗಾರರಾಗುತ್ತೀರಿ. ಮೂರರಲ್ಲಿ ಗುರು ಸಂಚರಿಸುವಾಗ ಬುದ್ಧಿ ಸ್ಥಿಮಿತದಲ್ಲಿ ಇರಿಸಿಕೊಳ್ಳಿ. ನಾಲ್ಕರಲ್ಲಿ ರಾಹು ಸಂಚರಿಸುವಾಗ ನಿಮ್ಮದೇ ಹಣ, ಆಸ್ತಿ, ಅಧಿಕಾರವನ್ನು ಬಳಸಿ, ಅನುಕೂಲ ಪಡೆಯುವುದಕ್ಕೆ ಆಗದಂಥ ಸ್ಥಿತಿ ಏರ್ಪಡುತ್ತದೆ. ತಾಯಿಯವರ ಆರೋಗ್ಯದ ಲಕ್ಷ್ಯ ಮಾಡಿ. ನಿಮ್ಮ ಎಲೆಕ್ಟ್ರಾನಿಕ್ ವಸ್ತುಗಳ ಬಗ್ಗೆ ನಿಗಾ ಮಾಡಿ. ಹತ್ತನೇ ಮನೆಯಲ್ಲಿ ಕೇತು ಸಂಚರಿಸುವಾಗ ದಾರಿ ತಪ್ಪುವಂಥ ಸಾಧ್ಯತೆ ಇದೆ.
ಕುಂಭ: ಈಗಾಗಲೇ ಏಳರಾಟ ಶನಿಯ ಪ್ರಭಾವದಲ್ಲೇ ಇದ್ದೀರಿ. ಈ ಮಧ್ಯೆ ಕಷ್ಟಗಳು ಕರಗುವಂಥ ಕೆಲವು ಅನುಕೂಲಗಳು ಇವೆ. ಜನ್ಮ ರಾಶಿ ಹಾಗೂ ಹನ್ನೆರಡನೇ ಮನೆಯಲ್ಲಿ ಇರುವ ಶನಿಯು ಸಿಕ್ಕಾಪಟ್ಟೆ ಖರ್ಚಾಗುವ ಸನ್ನಿವೇಶ ಸೃಷ್ಟಿ ಆಗಲಿದೆ. ಏಪ್ರಿಲ್ನಿಂದ ಜುಲೈ ಮಧ್ಯೆ ಜನ್ಮ ರಾಶಿಯಲ್ಲಿ ಶನಿ ಇರುವುದರಿಂದ ಆಯಾಸ, ಸುಸ್ತು ಕಾಡಲಿದೆ. ಎರಡನೇ ಮನೆಯಲ್ಲಿ ಗುರು ಸಂಚರಿಸುವುದರಿಂದ ಹಣಕಾಸು ಹರಿವಿಗೆ ಸಮಸ್ಯೆ ಇಲ್ಲ. ಮನೆ- ಸಮಾಜದಲ್ಲಿ ನಿಮ್ಮ ಮಾತಿಗೆ ಗೌರವ ದೊರೆಯುತ್ತದೆ. ಕುಟುಂಬದಲ್ಲೂ ನೆಮ್ಮದಿ ನೆಲೆಸಲಿದೆ. ಆದಾಯ ಮೂಲ ಜಾಸ್ತಿ ಆಗಲಿದೆ. ಮೂರನೇ ಮನೆಯಲ್ಲಿ, ಮೇಷ ರಾಶಿಯಲ್ಲಿ ರಾಹು ಗ್ರಹ ಸಂಚರಿಸುವಾಗ ಅದೃಷ್ಟ ಪರೀಕ್ಷೆ ಸಮಯ. ವ್ಯಾಪಾರ ಕ್ಷೇತ್ರದಲ್ಲಿ ಇರುವವರಿಗೆ ಆದಾಯ ಜಾಸ್ತಿ ಆಗುತ್ತದೆ. ಹೊಸದಾಗಿ ಉದ್ಯಮವನ್ನು ಆರಂಭಿಸುವುದಕ್ಕೆ ಮತ್ತು ಈಗಿರುವ ಕ್ಷೇತ್ರದಿಂದ ಬೇರೊಂದನ್ನು ಆರಿಸಿಕೊಳ್ಳುವುದಕ್ಕೆ ಅವಕಾಶ ಸಿಗುತ್ತದೆ. ಸೋಮಾರಿತನವನ್ನು ಬಿಟ್ಟು, ಮುಂದುವರಿಯಿರಿ.
ಮೀನ ; ಈ ರಾಶಿಯವರಿಗೆ ಸಾಡೇಸಾತ್ ಶನಿ ಪ್ರಭಾವ ಆರಂಭ ಆಗುತ್ತದೆ. ಈ ವರ್ಷ ಹಣವು ಬರುತ್ತದೆ, ಆದರೆ ಬರುತ್ತದೆ ಅನ್ನೋ ಕಾರಣಕ್ಕೆ ಖರ್ಚುಗಳು ಭಾರವಾಗಿ ಪರಿಣಮಿಸುತ್ತದೆ. ನಿಮಗೆ ಏನು ಬೇಕು ಎಂಬ ಬಗ್ಗೆ ಸರಿಯಾದ ಸ್ಪಷ್ಟತೆ ಇರಲಿ. ಅಗತ್ಯ ಇಲ್ಲದ, ಬಳಕೆ ಮಾಡದ ವಸ್ತುಗಳ ಖರೀದಿಗೆ ಹಣ ಹಾಕದಿರಿ. ಅನಗತ್ಯವಾಗಿ ಹಣ ಖರ್ಚು ಮಾಡಿ, ಅಗತ್ಯಗಳಿಗೆ ಹಣ ಇಲ್ಲದಂತೆ ಆಗಬಹುದು. ಈ ವರ್ಷ ಪೂರ್ತಿ ಗುರು ಗ್ರಹ ಜನ್ಮ ರಾಶ್ಯಾಧಿಪತಿಯಾಗಿ ಜನ್ಮ ರಾಶಿಯಲ್ಲೇ ಇರುತ್ತದೆ. ನಾನಾ ಕಾರಣಗಳಿಗೆ ದುಃಖವನ್ನು ಪಡುತ್ತೀರಿ. ದೇಹಾರೋಗ್ಯ ಕಡಬಹುದು. ಅಂದುಕೊಂಡ ರೀತಿಯಲ್ಲಿ ಯಾವುದೂ ನಡೆಯುವುದಿಲ್ಲ. ಎರಡರಲ್ಲಿ ರಾಹು ಸಂಚರಿಸುವುದರಿಂದ ಆದಾಯದ ರೀತಿ ಬರಬೇಕಾದ ಹಣಕ್ಕೆ ತಡೆ ಆಗುತ್ತದೆ. ಕುಟುಂಬದಲ್ಲಿ ಜಗಳ ಕಾಣಿಸಿಕೊಳ್ಳುತ್ತದೆ. ಎಂಟರಲ್ಲಿ ಕೇತು ಸಂಚರಿಸುವುದರಿಂದ ನಾನಾ ಸಮಸ್ಯೆಗಳು ಆಗಬಹುದು. ಒಂದೇ ಸಲಕ್ಕೆ ಗುರು, ಶನಿ, ರಾಹು, ಕೇತು ಹೀಗೆ ಪ್ರಮುಖ ಗ್ರಹಗಳೆಲ್ಲ ಅನುಕೂಲ ಅಲ್ಲದ ಸ್ಥಿತಿಯಲ್ಲಿ ಬಂದಿವೆ.
Published On - 8:00 am, Wed, 30 March 22