ಏನಿದು ‘ಹಾರ್ವೆಸ್ಟ್ ಮೂನ್’? ಸೆ. 26 ರಂದು ಹಗಲಿನಲ್ಲಿಯೇ ಗರಿಷ್ಠ ಪ್ರಕಾಶತೆ ಪಡೆಯಲಿದೆ ಅಪರೂಪದ ಹುಣ್ಣಿಮೆ ಚಂದ್ರ!
ಸೆಪ್ಟೆಂಬರ್ 26 ರಂದು ಗೋಚರಿಸಲಿರುವ 'ಹಾರ್ವೆಸ್ಟ್ ಮೂನ್' ವರ್ಷದ ಸುಂದರ ಹುಣ್ಣಿಮೆ. ಸೂರ್ಯಾಸ್ತದ ತಕ್ಷಣವೇ ಮೂಡಿಬರುವ ಈ ಚಂದ್ರ ಬಂಗಾರದ ಬಣ್ಣದಲ್ಲಿ ಕಂಗೊಳಿಸಲಿದ್ದಾನೆ. ಬೆಳೆ ಕೊಯ್ಲಿಗೆ ರೈತರಿಗೆ ನೆರವಾಗುತ್ತಿದ್ದ ಕಾರಣ ಈ ಹೆಸರು ಬಂದಿದೆ. ಸೆಪ್ಟೆಂಬರ್ 25 ಮತ್ತು 26 ರಂದು ಪೂರ್ವ ದಿಗಂತದಲ್ಲಿ ಇದನ್ನು ಯಾವುದೇ ಬೈನಾಕುಲರ್ ಅಥವಾ ಟೆಲಿಸ್ಕೋಪ್ ಇಲ್ಲದೆಯೂ ಇದನ್ನು ಸ್ಪಷ್ಟವಾಗಿ ವೀಕ್ಷಿಸಬಹುದು.
ಬ್ರಹ್ಮಾಂಡದ ವಿಸ್ಮಯಗಳಲ್ಲಿ ಒಂದಾದ ‘ಹಾರ್ವೆಸ್ಟ್ ಮೂನ್’ (Harvest Moon) ಈ ವರ್ಷ ಸೆಪ್ಟೆಂಬರ್ 26 ರಂದು ಸಂಭವಿಸಲಿದೆ. ಪ್ರಸಕ್ತ ವರ್ಷದ ಅತ್ಯಂತ ಸುಂದರ ಮತ್ತು ಸಾಂಸ್ಕೃತಿಕವಾಗಿ ಮಹತ್ವದ ಹುಣ್ಣಿಮೆಯ ಚಂದ್ರನಾಗಿ ಇದು ಗೋಚರಿಸಲಿದ್ದು, ಖಗೋಳಾಸಕ್ತರಲ್ಲಿ ಹೆಚ್ಚಿನ ಕುತೂಹಲ ಮೂಡಿಸಿದೆ. ಖಗೋಳಶಾಸ್ತ್ರಜ್ಞರ ಪ್ರಕಾರ, ಈ ಬಾರಿಯ ಹಾರ್ವೆಸ್ಟ್ ಮೂನ್ ಗರಿಷ್ಠ ಪ್ರಮಾಣದ ಪ್ರಕಾಶತೆಯನ್ನು ಹಗಲಿನ ವೇಳೆಯಲ್ಲೇ ತಲುಪಲಿದೆ. ಆದಾಗ್ಯೂ, ಸೆಪ್ಟೆಂಬರ್ 25 ರ ರಾತ್ರಿ ಮತ್ತು ಸೆಪ್ಟೆಂಬರ್ 26 ರ ರಾತ್ರಿ – ಎರಡೂ ದಿನಗಳಲ್ಲೂ ಸಾಮಾನ್ಯ ಕಣ್ಣುಗಳಿಗೆ ಚಂದ್ರನು ಶೇ. 100 ರಷ್ಟು ಪೂರ್ಣ ಪ್ರಮಾಣದಲ್ಲೇ ಪ್ರಕಾಶಮಾನವಾಗಿ ಕಂಗೊಳಿಸಲಿದ್ದಾನೆ.
ಸೂರ್ಯಾಸ್ತದ ಬೆನ್ನಲ್ಲೇ ಮೂಡಿಬರಲಿರುವ ಬೆಳದಿಂಗಳು:
ಶರತ್ಕಾಲದ ವಿಷುವತ್ ಸಂಕ್ರಾಂತಿಯ ಸಮಯದಲ್ಲಿ ಭೂಮಿಯ ದಿಗಂತಕ್ಕೆ ಚಂದ್ರನ ಕಕ್ಷೆಯ ಕೋನವು ತೀರಾ ಕಡಿಮೆಯಿರುತ್ತದೆ. ಇದರಿಂದಾಗಿ, ಸಾಮಾನ್ಯ ದಿನಗಳಲ್ಲಿ ಚಂದ್ರನು ಪ್ರತಿದಿನ 50 ನಿಮಿಷ ತಡವಾಗಿ ಮೂಡಿದರೆ, ಈ ಸಮಯದಲ್ಲಿ ಕೇವಲ 20 ರಿಂದ 30 ನಿಮಿಷಗಳ ಅಂತರದಲ್ಲೇ ಮೂಡುತ್ತಾನೆ. ಹೀಗಾಗಿ, ಸೂರ್ಯಾಸ್ತದ ತಕ್ಷಣವೇ ಸತತ ಕೆಲವು ದಿನಗಳ ಕಾಲ ಪ್ರಕಾಶಮಾನವಾದ ಬೆಳದಿಂಗಳ ಬೆಳಕು ಲಭ್ಯವಾಗುತ್ತದೆ.
ದಿಗಂತದಲ್ಲಿ ಬಂಗಾರದ ಬಣ್ಣದಲ್ಲಿ ಕಂಗೊಳಿಸಲಿರುವ ಚಂದ್ರ:
ಸಂಜೆ ವೇಳೆಯಲ್ಲಿ ಚಂದ್ರನು ಮೂಡುವಾಗ, ಚಂದ್ರನ ಬೆಳಕು ವಾತಾವರಣದ ದಪ್ಪ ಪದರದ ಮೂಲಕ ಹಾದುಬರುತ್ತದೆ. ಈ ಪ್ರಕ್ರಿಯೆಯಲ್ಲಿ ಸಣ್ಣ ತರಂಗಾಂತರದ ನೀಲಿ ಬೆಳಕು ಚದುರಿಹೋಗಿ, ಚಂದ್ರನು ಸಾಮಾನ್ಯ ಬಿಳಿ ಬಣ್ಣದ ಬದಲಾಗಿ ಆಕರ್ಷಕ ಬಂಗಾರದ ಅಥವಾ ಕೇಸರಿ ಬಣ್ಣದಲ್ಲಿ ಕಂಗೊಳಿಸುತ್ತಾನೆ.
ಇದನ್ನೂ ಓದಿ: ಮಂತ್ರ ಪಠಣ ಮಾಡುವಾಗ ಕಣ್ಣುಗಳನ್ನು ಏಕೆ ಮುಚ್ಚಬೇಕು? ಆಧ್ಯಾತ್ಮಿಕ ಕಾರಣ ಇಲ್ಲಿದೆ
‘ಹಾರ್ವೆಸ್ಟ್ ಮೂನ್’ ಹಿನ್ನೆಲೆ ಮತ್ತು ಸಾಂಸ್ಕೃತಿಕ ಮಹತ್ವ:
ವಿದ್ಯುತ್ ದೀಪಗಳಿಲ್ಲದ ಕಾಲದಲ್ಲಿ, ಶರತ್ಕಾಲದ ಬೆಳೆಗಳನ್ನು ಕೊಯ್ಲು (Harvest) ಮಾಡಲು ರೈತರಿಗೆ ರಾತ್ರಿಯ ವೇಳೆಯೂ ಈ ಬೆಳದಿಂಗಳು ನೆರವಾಗುತ್ತಿತ್ತು. ಈ ಕಾರಣಕ್ಕಾಗಿಯೇ ಇದನ್ನು ‘ಹಾರ್ವೆಸ್ಟ್ ಮೂನ್’ ಎಂದು ಕರೆಯಲಾಗುತ್ತದೆ. ಪೂರ್ವ ಏಷ್ಯಾದ ದೇಶಗಳಲ್ಲಿ ಈ ಹುಣ್ಣಿಮೆಯನ್ನು ‘ಮಧ್ಯ-ಶರತ್ಕಾಲದ ಹಬ್ಬ’ ಅಥವಾ ‘ಮೂನ್ಕೇಕ್ ಫೆಸ್ಟಿವಲ್’ ಎಂದು ಆಚರಿಸಲಾಗುತ್ತದೆ.
ಹಾರ್ವೆಸ್ಟ್ ಮೂನ್ ವೀಕ್ಷಿಸುವುದು ಹೇಗೆ?
ಈ ಅಪರೂಪದ ಚಂದ್ರನನ್ನು ವೀಕ್ಷಿಸಲು ಸೆಪ್ಟೆಂಬರ್ 25 ಮತ್ತು 26 ರಂದು ಸೂರ್ಯಾಸ್ತದ ತಕ್ಷಣವೇ ಪೂರ್ವ ದಿಗಂತದತ್ತ ನೋಡಬೇಕಾಗುತ್ತದೆ. ಯಾವುದೇ ಅಡೆತಡೆಗಳಿಲ್ಲದ ವಿಶಾಲವಾದ ಸ್ಥಳದಲ್ಲಿ ನಿಂತು ನೋಡಿದರೆ ಬಂಗಾರದ ಬಣ್ಣದಲ್ಲಿ ಮೂಡುವ ಚಂದ್ರನ ನೈಜ ಸೌಂದರ್ಯವನ್ನು ಕಣ್ಣುಂಬಿಕೊಳ್ಳಬಹುದು. ಯಾವುದೇ ಬೈನಾಕುಲರ್ ಅಥವಾ ಟೆಲಿಸ್ಕೋಪ್ ಇಲ್ಲದೆಯೂ ಇದನ್ನು ಸ್ಪಷ್ಟವಾಗಿ ವೀಕ್ಷಿಸಬಹುದು.
ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ