ನವರಾತ್ರಿಯ ಸಮಯದಲ್ಲಿ 9 ದೇವತೆಗಳನ್ನೇ ಏಕೆ ಪೂಜಿಸಲಾಗುತ್ತದೆ? ಪೌರಾಣಿಕ ಕಥೆ ಮತ್ತು ಮಹತ್ವ ಇಲ್ಲಿದೆ

ಹಿಂದೂ ಧರ್ಮದಲ್ಲಿ ನವರಾತ್ರಿ ಹಬ್ಬಕ್ಕೆ ಅತ್ಯಂತ ವಿಶೇಷ ಹಾಗೂ ಪವಿತ್ರವಾದ ಸ್ಥಾನವಿದೆ. ಶಕ್ತಿ ದೇವಿಯ ಆರಾಧನೆಗೆ ಮೀಸಲಾದ ಈ ಒಂಬತ್ತು ದಿನಗಳಲ್ಲಿ ಜಗನ್ಮಾತೆಯ ವಿವಿಧ ರೂಪಗಳನ್ನು ಅತ್ಯಂತ ಶ್ರದ್ಧೆ ಮತ್ತು ಭಕ್ತಿಯಿಂದ ಪೂಜಿಸಲಾಗುತ್ತದೆ. ಹಿಂದೂ ಶಕ್ತಿ ಸಂಪ್ರದಾಯದಲ್ಲಿ ದೇವಿಗೆ 64 ಯೋಗಿನಿಗಳು ಹಾಗೂ 10 ಮಹಾವಿದ್ಯೆಗಳು ಸೇರಿದಂತೆ ಅಪಾರ ಸಂಖ್ಯೆಯ ರೂಪಗಳಿವೆ. ಹೀಗಿದ್ದರೂ, ನವರಾತ್ರಿಯ ಈ ಪವಿತ್ರ ದಿನಗಳಲ್ಲಿ ಕೇವಲ ‘ನವದುರ್ಗೆ’ ಎಂದು ಕರೆಯಲ್ಪಡುವ ದುರ್ಗಾ ದೇವಿಯ ಒಂಬತ್ತು ರೂಪಗಳನ್ನು ಮಾತ್ರ ಏಕೆ ಪೂಜಿಸಲಾಗುತ್ತದೆ ಎಂಬ ಪ್ರಶ್ನೆ ಮೂಡುವುದು ಸಹಜ. ಇದರ ಹಿಂದಿರುವ ಧಾರ್ಮಿಕ ನಂಬಿಕೆ, ಜ್ಯೋತಿಷ್ಯದ ಮಹತ್ವ ಹಾಗೂ ಪೌರಾಣಿಕ ಕಥೆಯ ಕುರಿತು ಜ್ಯೋತಿಷಿ ಚಂದ್ರೇಶ್ ಶರ್ಮಾ ಅವರು ನೀಡಿರುವ ಮಾಹಿತಿ ಇಲ್ಲಿದೆ.

ಶಕ್ತಿ ಆರಾಧನೆ ಮತ್ತು ನವದುರ್ಗೆಯರ ಮಹತ್ವ:

ಜ್ಯೋತಿಷಿ ಚಂದ್ರೇಶ್ ಶರ್ಮಾ ಅವರ ಪ್ರಕಾರ, ಹಿಂದೂ ಧರ್ಮದಲ್ಲಿ ದುರ್ಗಾ ದೇವಿಯನ್ನು ಶಕ್ತಿ, ಧೈರ್ಯ ಮತ್ತು ಸಮಗ್ರ ಸೃಷ್ಟಿಯ ಮೂಲ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ದೇವಿಯನ್ನು ಆರಾಧಿಸಲು ಹಾಗೂ ಪೂಜಿಸಲು ಸಂಪ್ರದಾಯದಲ್ಲಿ ಹಲವು ರೀತಿಯ ಮಾರ್ಗಗಳಿವೆ. ಶಕ್ತಿ ಸಂಪ್ರದಾಯದಲ್ಲಿ 64 ಯೋಗಿನಿಗಳು ಮತ್ತು 10 ಮಹಾವಿದ್ಯೆಗಳಿಗೆ ವಿಶಿಷ್ಟ ಸ್ಥಾನವಿದ್ದರೂ, ನವದುರ್ಗೆಯರ ಆರಾಧನೆಯ ಹಿಂದೆ ಪ್ರತ್ಯೇಕವಾದ ಆಧ್ಯಾತ್ಮಿಕ ಮತ್ತು ಧಾರ್ಮಿಕ ನಂಬಿಕೆಗಳಿವೆ. ದೇವಿಯ ಈ ಒಂಬತ್ತು ರೂಪಗಳು ಭಕ್ತರಿಗೆ ಶಕ್ತಿ ಮತ್ತು ಮಾರ್ಗದರ್ಶನವನ್ನು ನೀಡುವ ಪ್ರಮುಖ ಮಾಧ್ಯಮಗಳಾಗಿವೆ.

9 ನೇ ಸಂಖ್ಯೆಯ ರಹಸ್ಯ ಮತ್ತು ಆಧ್ಯಾತ್ಮಿಕ ಪಯಣ:

ಸಂಖ್ಯಾಶಾಸ್ತ್ರ (Numerology) ಮತ್ತು ಆಧ್ಯಾತ್ಮಿಕ ದೃಷ್ಟಿಕೋನದಲ್ಲಿ ‘9’ ಎಂಬ ಸಂಖ್ಯೆಗೆ ಅತ್ಯಂತ ವಿಶೇಷವಾದ ಮಹತ್ವವಿದೆ. ಈ ಸಂಖ್ಯೆಯನ್ನು ಸಂಪೂರ್ಣತೆ, ಶಕ್ತಿ ಹಾಗೂ ಪರಿಪೂರ್ಣತೆಯ ಸಂಕೇತವಾಗಿ ನೋಡಲಾಗುತ್ತದೆ. ನವದುರ್ಗೆಯರ ಒಂಬತ್ತು ರೂಪಗಳು ಒಬ್ಬ ಭಕ್ತನ ಆಧ್ಯಾತ್ಮಿಕ ಸಾಧನೆಯ ವಿವಿಧ ಹಂತಗಳನ್ನು ಪ್ರತಿನಿಧಿಸುತ್ತವೆ. ಮೊದಲ ದಿನ ಶೈಲಪುತ್ರಿ ದೇವಿಯ ಪೂಜೆಯಿಂದ ಪ್ರಾರಂಭವಾಗುವ ಈ ಆರಾಧನೆಯು, ಒಂಬತ್ತನೇ ದಿನದ ಸಿದ್ಧಿದಾತ್ರಿ ದೇವಿಯ ಪೂಜೆಯೊಂದಿಗೆ ಮುಕ್ತಾಯಗೊಳ್ಳುತ್ತದೆ. ಇದು ಭಕ್ತನ ಅಂತರಂಗದ ಸಾಧನೆ ಮತ್ತು ಆಧ್ಯಾತ್ಮಿಕ ಪೂರ್ಣತೆಯನ್ನು ಸೂಚಿಸುತ್ತದೆ.

ನವರಾತ್ರಿಯ ಒಂಬತ್ತು ದಿನಗಳು ಸಾಧಕರಿಗೆ ಆತ್ಮಾವಲೋಕನ ಮಾಡಿಕೊಳ್ಳಲು, ಸ್ವಯಂ ನಿಯಂತ್ರಣ ಸಾಧಿಸಲು, ಭಕ್ತಿಯನ್ನು ಹೆಚ್ಚಿಸಿಕೊಳ್ಳಲು ಮತ್ತು ಸಕಾರಾತ್ಮಕತೆಯತ್ತ ಸಾಗಲು ಉತ್ತಮ ಅವಕಾಶವನ್ನು ನೀಡುತ್ತವೆ. ಆದ್ದರಿಂದಲೇ ಈ ದಿನಗಳಲ್ಲಿ ದೇವಿಯ ಒಂಬತ್ತು ರೂಪಗಳ ಪೂಜೆಗೆ ಹೆಚ್ಚಿನ ಪ್ರಾಶಸ್ತ್ಯವನ್ನು ನೀಡಲಾಗಿದೆ ಎಂದು ಚಂದ್ರೇಶ್‌ಜಿ ವಿವರಿಸುತ್ತಾರೆ.

ನವದುರ್ಗೆಯರ 9 ರೂಪಗಳು ಮತ್ತು ಅವುಗಳ ವಿಶಿಷ್ಟ ಗುಣಲಕ್ಷಣಗಳು:

ನವರಾತ್ರಿಯ ಸಮಯದಲ್ಲಿ ಪ್ರತಿದಿನವೂ ದುರ್ಗಾ ದೇವಿಯ ನಿರ್ದಿಷ್ಟ ರೂಪವನ್ನು ಪೂಜಿಸುವ ಪದ್ಧತಿಯಿದೆ. ಮೊದಲ ದಿನ ಶೈಲಪುತ್ರಿ, ಎರಡನೇ ದಿನ ಬ್ರಹ್ಮಚಾರಿಣಿ, ಮೂರನೇ ದಿನ ಚಂದ್ರಘಂಟಾ, ನಾಲ್ಕನೇ ದಿನ ಕೂಷ್ಮಾಂಡಾ, ಐದನೇ ದಿನ ಸ್ಕಂದಮಾತಾ, ಆರನೇ ದಿನ ಕಾತ್ಯಾಯನಿ, ಏಳನೇ ದಿನ ಕಾಳರಾತ್ರಿ, ಎಂಟನೇ ದಿನ ಮಹಾಗೌರಿ ಮತ್ತು ಒಂಬತ್ತನೇ ದಿನ ಸಿದ್ಧಿದಾತ್ರಿ ದೇವಿಯನ್ನು ಆರಾಧಿಸಲಾಗುತ್ತದೆ.

ಇದನ್ನೂ ಓದಿ: ನವರಾತ್ರಿಯ 9 ದಿನಗಳ ಮಹತ್ವವೇನು? ನವದುರ್ಗೆಯ ಒಂಬತ್ತು ರೂಪಗಳ ವಿಶೇಷತೆ ತಿಳಿಯಿರಿ

ಪ್ರತಿಯೊಂದು ರೂಪಕ್ಕೂ ತನ್ನದೇ ಆದ ವಿಶೇಷ ಗುಣ ಮತ್ತು ಮಹತ್ವವಿದೆ. ದೇವಿಯ ಕೆಲವು ರೂಪಗಳು ಧೈರ್ಯ, ಶೌರ್ಯ ಮತ್ತು ತಪಸ್ಸನ್ನು ಸಂಕೇತಿಸಿದರೆ, ಇನ್ನು ಕೆಲವು ರೂಪಗಳು ಬುದ್ಧಿವಂತಿಕೆ, ಮಾತೃತ್ವ, ಕರುಣೆ, ನಿರ್ಭಯತೆ ಹಾಗೂ ಸಾಧನೆಯನ್ನು ಪ್ರತಿನಿಧಿಸುತ್ತವೆ. ಈ ಒಂಬತ್ತು ರೂಪಗಳ ಆರಾಧನೆಯ ಮೂಲಕ ಭಕ್ತರು ದೇವಿಯ ವಿವಿಧ ಶಕ್ತಿಗಳನ್ನು ಸ್ಮರಿಸಿ ಆಶೀರ್ವಾದ ಪಡೆಯುತ್ತಾರೆ.

ಮಹಿಷಾಸುರ ಮರ್ಧಿನಿ ಕಥೆ ಮತ್ತು ಧಾರ್ಮಿಕ ಹಿನ್ನೆಲೆ:

ನವರಾತ್ರಿಯ ಆಚರಣೆಯು ಮಹಿಷಾಸುರನೆಂಬ ರಕ್ಕಸನ ಸಂಹಾರದ ಪೌರಾಣಿಕ ಕಥೆಯೊಂದಿಗೆ ನಿಕಟ ನಂಟು ಹೊಂದಿದೆ. ಈ ಕಥೆಯು ನವರಾತ್ರಿಯ ಧಾರ್ಮಿಕ ಮಹತ್ವವನ್ನು ಮತ್ತಷ್ಟು ಹೆಚ್ಚಿಸುತ್ತದೆ. ಧಾರ್ಮಿಕ ನಂಬಿಕೆಗಳ ಪ್ರಕಾರ, ಮಹಿಷಾಸುರನ ಉಪಟಳ ಮತ್ತು ದೌರ್ಜನ್ಯಗಳಿಂದ ತ್ರಿಲೋಕಗಳು ತಪಿಸಿಹೋದಾಗ, ದೇವತೆಗಳೆಲ್ಲರೂ ಶಕ್ತಿ ದೇವಿಯನ್ನು ಆಹ್ವಾನಿಸಿ ಪ್ರಾರ್ಥಿಸಿದರು. ಆಗ ದೇವತೆಗಳ ತೇಜಸ್ಸಿನಿಂದ ದುರ್ಗಾದೇವಿಯು ಆವಿರ್ಭವಿಸಿ, ಮಹಿಷಾಸುರನ ವಿರುದ್ಧ ಸುದೀರ್ಘ ಹೋರಾಟ ನಡೆಸಿದಳು. ಅಂತಿಮವಾಗಿ ಅವನನ್ನು ಸಂಹರಿಸಿ ಧರ್ಮವನ್ನು ಪುನಃ ಸ್ಥಾಪಿಸಿದಳು. ಈ ಮಹತ್ಕಾರ್ಯದ ನೆನಪಿಗಾಗಿ ಮತ್ತು ಸತ್ಯದ ವಿಜಯದ ಸಂಕೇತವಾಗಿ ನವರಾತ್ರಿಯಲ್ಲಿ ದೇವಿಯ ಒಂಬತ್ತು ರೂಪಗಳನ್ನು ಪೂಜಿಸಲಾಗುತ್ತದೆ.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ