Shravana Masa: ಶ್ರಾವಣ ಮಾಸದಲ್ಲಿ ಗುರುವಿನ ಬಲ ಹೆಚ್ಚಿಸಿಕೊಳ್ಳಲು ಶಕ್ತಿಶಾಲಿ ಆಧ್ಯಾತ್ಮಿಕ ಪರಿಹಾರಗಳು

ಶ್ರಾವಣ ಮಾಸವು ಅತ್ಯಂತ ಪವಿತ್ರವಾದ ಸಮಯ. ಈ ದಿನಗಳಲ್ಲಿ ಶಿವ ಹಾಗೂ ವಿಷ್ಣುವಿನ ಆರಾಧನೆ ಮಾಡುವುದರಿಂದ ಜೀವನದ ಎಲ್ಲ ಕಷ್ಟ-ಕಾರ್ಪಣ್ಯಗಳು ದೂರವಾಗಿ, ಧನಾತ್ಮಕ ಶಕ್ತಿ ಹೆಚ್ಚಾಗುತ್ತದೆ. ವಿಶೇಷವಾಗಿ ಜಾತಕದಲ್ಲಿ ಗುರು (ಬೃಹಸ್ಪತಿ) ಗ್ರಹ ದುರ್ಬಲವಾಗಿದ್ದು, ಜೀವನದಲ್ಲಿ ಹಲವು ಸವಾಲುಗಳನ್ನು ಎದುರಿಸುತ್ತಿರುವವರಿಗೆ ಈ ಮಾಸ ಅತ್ಯುತ್ತಮ ಅವಕಾಶವಾಗಿದೆ ಎಂದು ನಂಬಲಾಗಿದೆ.

ಶಿವಾರಾಧನೆ ಮತ್ತು ಶಕ್ತಿಶಾಲಿ ತಿಲಕ ಧಾರಣೆ:

ಶ್ರಾವಣದ ಪ್ರತಿ ಸೋಮವಾರದಂದು ಶಿವನಿಗೆ ಅತ್ಯಂತ ಪ್ರಿಯವಾದ ಬಿಲ್ವಪತ್ರೆ ಹಾಗೂ ವಿಶೇಷ ಹೂವುಗಳಿಂದ ಶ್ರದ್ಧೆಯಿಂದ ಪೂಜೆ ಸಲ್ಲಿಸಬೇಕು. ಪೂಜೆ ಪೂರ್ಣಗೊಂಡ ನಂತರ, ಅರಿಶಿನ ಅಥವಾ ಕುಂಕುಮದಿಂದ ತಯಾರಿಸಿದ ತಿಲಕವನ್ನು ತಪ್ಪದೇ ಹಣೆಯ ಮೇಲೆ ಧಾರಣೆ ಮಾಡಿಕೊಳ್ಳಬೇಕು. ಶ್ರಾವಣ ಮಾಸದ ಪ್ರತಿ ಸೋಮವಾರ ಈ ಸರಳ ನಿಯಮವನ್ನು ಪಾಲಿಸುವುದರಿಂದ ಜಾತಕದಲ್ಲಿ ದುರ್ಬಲವಾಗಿರುವ ಗುರು ಗ್ರಹವು ಬಲಗೊಂಡು, ಜೀವನದಲ್ಲಿ ಎದುರಾಗುವ ಸಕಲ ಅಡೆತಡೆಗಳು ನಿವಾರಣೆಯಾಗುತ್ತವೆ ಹಾಗೂ ಎಲ್ಲಾ ರೀತಿಯ ಸಂತೋಷ ಲಭಿಸುತ್ತದೆ.

ಶ್ರೀ ಮಹಾವಿಷ್ಣುವಿನ ಕೃಪೆ ಮತ್ತು ಪೂಜಾ ವಿಧಾನ:

ಗುರು ಬಲ ಹೆಚ್ಚಿಸಿಕೊಳ್ಳಲು ಶಿವನೊಂದಿಗೆ ಶ್ರೀ ಮಹಾವಿಷ್ಣುವಿನ ಆರಾಧನೆಯೂ ಅತ್ಯಂತ ಫಲದಾಯಕ. ಪ್ರತಿ ದಿನ ಬೆಳಿಗ್ಗೆ ಸ್ನಾನದ ನಂತರ ಶುಚಿರ್ಭೂತರಾಗಿ ವಿಷ್ಣುವನ್ನು ಭಕ್ತಿಯಿಂದ ಪೂಜಿಸಬೇಕು. ಸ್ವಾಮಿಗೆ ಹಾಲಿನ ಅಭಿಷೇಕ ಮಾಡಿ, ಕುಂಕುಮ ಹೂವು (ಕೆಸರಿ), ತುಲಸಿ ಹಾಗೂ ಸಿಹಿ ತಿನಿಸುಗಳನ್ನು ನೈವೇದ್ಯವಾಗಿ ಅರ್ಪಿಸಬೇಕು. ಶ್ರಾವಣ ಮಾಸದುದ್ದಕ್ಕೂ ಮಹಾವಿಷ್ಣುವನ್ನು ಈ ರೀತಿ ಆರಾಧಿಸುವುದರಿಂದ ಗುರುವಿನ ಕೃಪಾಕಟಾಕ್ಷ ದೊರೆತು ಜೀವನದಲ್ಲಿ ಶುಭ ಫಲಗಳು ಉಂಟಾಗುತ್ತವೆ.

ಇದನ್ನೂ ಓದಿ: ಶ್ರಾವಣ ಮಾಸದಲ್ಲಿ ಅಷ್ಟಲಕ್ಷ್ಮಿ ರಾಜಯೋಗ; ಈ 4 ರಾಶಿಗೆ ಒಲಿಯಲಿದೆ ಅಪಾರ ಧನಸಂಪತ್ತು!

ದಾನಧರ್ಮ ಮತ್ತು ದೇವಾಲಯ ಸೇವೆ:

ಜಾತಕದಲ್ಲಿ ಗುರು ಗ್ರಹದ ಶಕ್ತಿಯನ್ನು ವೃದ್ಧಿಸಲು ದಾನ ಮತ್ತು ಧಾರ್ಮಿಕ ಕಾರ್ಯಗಳು ನೆರವಾಗುತ್ತವೆ. ಈ ಪವಿತ್ರ ಮಾಸದಲ್ಲಿ ಹಳದಿ ಬಣ್ಣದ ವಸ್ತುಗಳು, ಧಾನ್ಯಗಳು ಅಥವಾ ಬಟ್ಟೆಗಳನ್ನು ದಾನ ಮಾಡುವುದು ಶ್ರೇಷ್ಠ. ಇದರೊಂದಿಗೆ, ಪ್ರತಿ ಸೋಮವಾರ ಮತ್ತು ಶುಕ್ರವಾರದಂದು ನಿಯಮಿತವಾಗಿ ದೇವಾಲಯಗಳಿಗೆ ಭೇಟಿ ನೀಡಿ, ದೇವರ ಸನ್ನಿಧಿಯಲ್ಲಿ ದೀಪಗಳನ್ನು ಅರ್ಪಿಸಿ ಪ್ರಾರ್ಥಿಸಬೇಕು. ಹಾಗೆಯೇ ಬಡವರಿಗೆ ಉಡುಪುಗಳನ್ನು ದಾನ ಮಾಡುವುದರಿಂದ ದೈವಿಕ ಅನುಗ್ರಹ ಪ್ರಾಪ್ತಿಯಾಗುತ್ತದೆ.

ಹಿರಿಯರ ಆಶೀರ್ವಾದ ಮತ್ತು ಧನಾತ್ಮಕ ಜೀವನ:

ಗುರು ಗ್ರಹವು ಜ್ಞಾನ ಮತ್ತು ಗೌರವದ ಸಂಕೇತವಾಗಿದೆ. ಆದ್ದರಿಂದ ಪೂಜೆ-ಪುನಸ್ಕಾರಗಳ ಜೊತೆಗೆ ದೈನಂದಿನ ಜೀವನದಲ್ಲಿ ಧನಾತ್ಮಕ ನಡೆನುಡಿಗಳನ್ನು ಅಳವಡಿಸಿಕೊಳ್ಳುವುದು ಅತ್ಯಗತ್ಯ. ಹೆತ್ತ ತಂದೆ-ತಾಯಿ, ಮನೆಯ ಹಿರಿಯರು ಮತ್ತು ಶಿಕ್ಷಕರನ್ನು ಮನಃಪೂರ್ವಕವಾಗಿ ಗೌರವಿಸಿ ಅವರ ಆಶೀರ್ವಾದ ಪಡೆಯಬೇಕು. ಹಿರಿಯರಿಗೆ ನೀಡುವ ಗೌರವ ಹಾಗೂ ಬಡವರಿಗೆ ಮಾಡುವ ಸಹಾಯವು ಜಾತಕದಲ್ಲಿ ಗುರುವಿನ ಸ್ಥಿತಿಯನ್ನು ಬಲಪಡಿಸಿ, ಕಷ್ಟಗಳನ್ನು ನಿವಾರಿಸಿ ಶಾಶ್ವತ ಸುಖ-ಶಾಂತಿಯನ್ನು ನೀಡುತ್ತದೆ ಎಂಬ ನಂಬಿಕೆಯಿದೆ.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ