Virat Kohli: ಕಿಂಗ್ ಕೊಹ್ಲಿ ಎಂಟ್ರಿಗೆ 14 ವರ್ಷಗಳು..!

ಆಗಸ್ಟ್ 18, 2008…ಶ್ರೀಲಂಕಾ ವಿರುದ್ದದ ಏಕದಿನ ಸರಣಿಯಿಂದ ವೀರೇಂದ್ರ ಸೆಹ್ವಾಗ್, ಸಚಿನ್ ತೆಂಡೂಲ್ಕರ್ ಸೇರಿದಂತೆ ಪ್ರಮುಖ ಆಟಗಾರರು ಹೊರಗುಳಿದಿದ್ದರು. ಪ್ರಮುಖ ಆಟಗಾರರ ಅನುಪಸ್ಥಿತಿಯಲ್ಲಿ ಆಗಷ್ಟೇ ಟೀಮ್ ಇಂಡಿಯಾಗೆ (Team India) ಅಂಡರ್​ 19 ವಿಶ್ವಕಪ್ ಗೆದ್ದುಕೊಟ್ಟಿದ್ದ ಯುವ ನಾಯಕನನ್ನು ಆಯ್ಕೆ ಮಾಡಲಾಗಿತ್ತು. ಇತ್ತ ಸೆಹ್ವಾಗ್ ಅನುಪಸ್ಥಿತಿಯಲ್ಲಿ ಆರಂಭಿಕನಾಗಿ ಯಾರನ್ನು ಕಣಕ್ಕಿಳಿಯಲ್ಲಿದ್ದಾರೆ ಎಂಬ ಪ್ರಶ್ನೆಯೊಂದು ಹಲವರಲ್ಲಿತ್ತು. ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡಿದ್ದ ಟೀಮ್ ಇಂಡಿಯಾ ಪರ ಯುವ ತರುಣನೊಬ್ಬ ಬ್ಯಾಟಿಂಗ್​ಗೆ ಇಳಿದಿದ್ದರು. ಅದು ಕೂಡ ಗೌತಮ್ ಗಂಭೀರ್ ಜೊತೆ ಎಂಬುದು ವಿಶೇಷ.

ಕೇವಲ 2 ಎಸೆತಗಳನ್ನು ಎದುರಿಸಿದ ಗಂಭೀರ್ ಮೊದಲ ಓವರ್​ನಲ್ಲೇ ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿ ಹೊರ ನಡೆದರು. ಇತ್ತ ಚೊಚ್ಚಲ ಪಂದ್ಯವಾಡುತ್ತಿದ್ದ ಯುವ ಆಟಗಾರ ಒತ್ತಡಕ್ಕೊಳಗಾಗಿತ್ತು. ಏಕೆಂದರೆ ಅಂದಿನ ಶ್ರೇಷ್ಠ ಎಡಗೈ ವೇಗಿ ಚಮಿಂಡಾ ವಾಸ್, ಬಲಗೈ ವೇಗಿ ನುವಾನ್ ಕುಲಸೇಕರರನ್ನು ಎದುರಿಸುವುದು ಅಂದುಕೊಂಡಷ್ಟು ಸುಲಭವಾಗಿರಲಿಲ್ಲ. ಇದಾಗ್ಯೂ ಆ ಆಟಗಾರ ಬರೋಬ್ಬರಿ 22 ಎಸೆತಗಳನ್ನು ಎದುರಿಸಿದರು. ಈ ನಡುವೆ ಒಂದು ಫೋರ್ ಬಾರಿಸಿ ಬೌಂಡರಿ ಖಾತೆಯನ್ನು ತೆರೆದರು.

ಆದರೆ 12 ರನ್​ಗಳಿಸಿದ್ದ ವೇಳೆ ನುವಾನ್ ಕುಲಸೇಕರ ಎಸೆತವನ್ನು ಗುರುತಿಸುವಲ್ಲಿ ಎಡವಿ ಎಲ್​ಬಿಡಬ್ಲ್ಯೂ ಆಗಿ ಭಾರದ ಹೆಜ್ಜೆಯೊಂದಿಗೆ ಪೆವಿಲಿಯನ್​ಗೆ ಮರಳಿದರು. ಅಂದು ಕೇವಲ 12 ರನ್​ಗಳಿಸಿ ನೋವಿನಲ್ಲೇ ಹೆಜ್ವೆ ಹಾಕುತ್ತಿದ್ದ ಆ ದುಂಡು ಮುಖದ ಯುವಕನ ನೋಡಿ ಯಾರೂ ಕೂಡ ಈತ ಕ್ರಿಕೆಟ್ ಅಂಗಳವನ್ನು ಆಳಲಿದ್ದಾರೆ ಎಂದು ಊಹಿಸಿರಲು ಕೂಡ ಸಾಧ್ಯವಿಲ್ಲ. ಆದರೆ ಆ ಬಳಿಕ ನಡೆದಿದ್ದೆಲ್ಲಾ ಇತಿಹಾಸ.

ಇದನ್ನೂ ಓದಿ

Team India: 7 ತಿಂಗಳಲ್ಲಿ 7 ನಾಯಕರು: ವಿಶೇಷ ದಾಖಲೆ ಬರೆದ ಟೀಮ್ ಇಂಡಿಯಾ

ಸಚಿನ್, ಧೋನಿಗೂ ಸಿಕ್ಕಿಲ್ಲ ಈ ಗೌರವ: ಇಂಗ್ಲೆಂಡ್ ಕ್ರಿಕೆಟ್ ಸ್ಟೇಡಿಯಂಗೆ ಭಾರತೀಯ ಕ್ರಿಕೆಟಿಗನ ಹೆಸರು..!

Cheteshwar Pujara: ಒಟ್ಟು 997 ರನ್​: ಕೌಂಟಿ ಕ್ರಿಕೆಟ್​ನಲ್ಲಿ ಹೊಸ ಇತಿಹಾಸ ಬರೆದ ಪೂಜಾರ

T20 World Cup 2022: ಟಿ20 ವಿಶ್ವಕಪ್​ನಲ್ಲಿ ಕಣಕ್ಕಿಳಿಯುವ 16 ತಂಡಗಳು ಫೈನಲ್

ಅಂದು ಭಾರದ ಹೆಜ್ಜೆಯಾಗಿದ್ದ ಇದೇ ತರುಣ ಆ ಬಳಿಕ 70 ಶತಕ ಸಿಡಿಸಿ ಎದೆಯುಬ್ಬಿಸಿ ಪೆವಿಲಿಯನ್​ಗೆ ಮರಳಿದ್ದ…ಅಷ್ಟೇ ಅಲ್ಲದೆ ಕ್ರಿಕೆಟ್ ಅಂಗಳದ ಹೊಸ ಕಿಂಗ್ ಆಗಿ ರಾಜ್ಯಭಾರ ಆರಂಭಿಸಿದ್ದ. ಮೊದಲ ಪಂದ್ಯದ ವೇಳೆ ವಿರಾಟ್ ಕೊಹ್ಲಿ ಹೆಸರಿನೊಂದಿಗೆ ಕಾಣಿಸಿಕೊಂಡಿದ್ದ ಯುವ ಬ್ಯಾಟ್ಸ್​ಮನ್ ಆ ಬಳಿಕ ಕಿಂಗ್ ಕೊಹ್ಲಿಯಾಗಿ ಬದಲಾಗಿದ್ದರು.

ಅಂದಹಾಗೆ ಕಿಂಗ್ ಕೊಹ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿ ಇಂದಿಗೆ 14 ವರ್ಷಗಳಾಗಿವೆ. ಈ 14 ವರ್ಷಗಳಲ್ಲಿ ಹಲವು ಏಳು ಬೀಳುಗಳನ್ನು ನೋಡಿರುವ ಕೊಹ್ಲಿ ಈ ದಶಕ ಶ್ರೇಷ್ಠ ಬ್ಯಾಟ್ಸ್​ಮನ್ ಆಗಿ ಗುರುತಿಸಿಕೊಂಡಿದ್ದಾರೆ.

ಇದೀಗ ಟೀಮ್ ಇಂಡಿಯಾ ಪರ 262 ಏಕದಿನ ಪಂದ್ಯಗಳನ್ನು ಆಡಿರುವ ವಿರಾಟ್ ಕೊಹ್ಲಿ 253 ಇನಿಂಗ್ಸ್​ನಲ್ಲಿ 12344 ರನ್​ ಕಲೆಹಾಕಿದ್ದಾರೆ. ಈ ವೇಳೆ ಕೊಹ್ಲಿಯ ಬ್ಯಾಟ್​ನಿಂದ 43 ಶತಕ ಹಾಗೂ 64 ಅರ್ಧಶತಕಗಳು ಮೂಡಿಬಂದಿವೆ. ಹಾಗೆಯೇ 173 ಟೆಸ್ಟ್ ಇನಿಂಗ್ಸ್​ಗಳಿಂದ 8074 ರನ್ ಬಾರಿಸಿದ್ದಾರೆ. ಈ ವೇಳೆ 7 ದ್ವಿಶತಕ, 27 ಶತಕ ಹಾಗೂ 28 ಅರ್ಧಶತಕ ಸಿಡಿಸಿದ್ದಾರೆ.

ಇನ್ನು ಟಿ20 ಕ್ರಿಕೆಟ್​ನಲ್ಲೂ ರನ್ ಸರದಾರನಾಗಿ ಮೆರೆದಿರುವ ಕಿಂಗ್ ಕೊಹ್ಲಿ 99 ಪಂದ್ಯಗಳಿಂದ 3308 ರನ್​ ಕಲೆಹಾಕಿದ್ದಾರೆ. ಈ ಭರ್ಜರಿ ಇನಿಂಗ್ಸ್​ ವೇಳೆ 30 ಅರ್ಧಶತಕ ಸಿಡಿಸಿ ಸಂಭ್ರಮಿಸಿದ್ದಾರೆ. ಅಂದರೆ ಚೊಚ್ಚಲ ಪಂದ್ಯದಲ್ಲಿ ಕೇವಲ 12 ರನ್​ಗಳಿಸಿ ಔಟಾಗಿದ್ದ ಅದೇ ತರುಣ ಇದೀಗ ಕ್ರಿಕೆಟ್ ಅಂಗಳದ ರನ್​ ಮೆಷಿನ್ ಆಗಿ ಗುರುತಿಸಿಕೊಂಡಿರುವುದು ವಿಶೇಷ.

Published On - 11:55 am, Thu, 18 August 22