IPL 2022: ಐಪಿಎಲ್ ಇತಿಹಾಸದ ಬೆಸ್ಟ್ ಓಪನರ್ ಯಾರು ಗೊತ್ತಾ?
IPL Records: ಕೆಲ ಆರಂಭಿಕರು ಐಪಿಎಲ್ನ ರನ್ ಮೆಷಿನ್ಗಳಾಗಿ ಗುರುತಿಸಿಕೊಂಡಿದ್ದಾರೆ. ಹಾಗಿದ್ರೆ ಐಪಿಎಲ್ನಲ್ಲಿ ಅತ್ಯಧಿಕ ರನ್ಗಳಿಸಿದ ಆರಂಭಿಕ ಆಟಗಾರ ಯಾರು ನೋಡೋಣ...
ಐಪಿಎಲ್ ಸೀಸನ್ 15 ಆರಂಭಕ್ಕೆ ದಿನಗಣನೆ ಶುರುವಾಗಿದೆ. ಈಗಾಗಲೇ ಎಲ್ಲಾ ತಂಡಗಳು ಕ್ರಿಕೆಟ್ ಕದನಕ್ಕಾಗಿ ಅಭ್ಯಾಸವನ್ನು ಆರಂಭಿಸಿದ್ದಾರೆ. ಅದರಲ್ಲೂ ಈ ಬಾರಿ ಎಲ್ಲಾ ತಂಡಗಳಲ್ಲೂ ಬಲಿಷ್ಠ ಓಪನರ್ಸ್ಗಳಿರುವುದು ವಿಶೇಷ. ಇವರಲ್ಲಿ ಕೆಲ ಆರಂಭಿಕರು ಐಪಿಎಲ್ನ ರನ್ ಮೆಷಿನ್ಗಳಾಗಿ ಗುರುತಿಸಿಕೊಂಡಿದ್ದಾರೆ. ಹಾಗಿದ್ರೆ ಐಪಿಎಲ್ನಲ್ಲಿ ಅತ್ಯಧಿಕ ರನ್ಗಳಿಸಿದ ಆರಂಭಿಕ ಆಟಗಾರ ಯಾರು ನೋಡೋಣ...
ಶಿಖರ್ ಧವನ್: ಐಪಿಎಲ್ ಇತಿಹಾಸದಲ್ಲೇ ಅತ್ಯಂತ ಯಶಸ್ವಿ ಆರಂಭಿಕನೆಂದರೆ ಶಿಖರ್ ಧವನ್. ಡೆಲ್ಲಿ ಕ್ಯಾಪಿಟಲ್ಸ್ ಹಾಗೂ ಸನ್ರೈರ್ಸರ್ ಹೈದರಾಬಾದ್ ಪರ ಆಡಿರುವ ಧವನ್ ಆರಂಭಿಕರಾಗಿ ಒಟ್ಟು 5197 ರನ್ ಗಳಿಸಿದ್ದಾರೆ. ಇದರಲ್ಲಿ ಎರಡೂ ಶತಕಗಳೂ ಕೂಡ ಒಳಗೊಂಡಿವೆ.
ಡೇವಿಡ್ ವಾರ್ನರ್: ಆಸ್ಟ್ರೇಲಿಯಾದ ಆರಂಭಿಕ ಆಟಗಾರ ಡೇವಿಡ್ ವಾರ್ನರ್ ಅತ್ಯಂತ ಯಶಸ್ವಿ ಐಪಿಎಲ್ ಓಪನರ್ಗಳ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದ್ದಾರೆ. ಡೆಲ್ಲಿ ಡೇರ್ ಡೆವಿಲ್ಸ್ (ಈಗ ಡೆಲ್ಲಿ ಕ್ಯಾಪಿಟಲ್ಸ್) ಹಾಗೂ ಸನ್ರೈಸರ್ಸ್ ಹೈದರಾಬಾದ್ ಪರ ಆಡಿರುವ ವಾರ್ನರ್ ಆರಂಭಿಕರಾಗಿ 4792 ರನ್ ಕಲೆಹಾಕಿದ್ದಾರೆ.
ಕ್ರಿಸ್ ಗೇಲ್: ವೆಸ್ಟ್ ಇಂಡೀಸ್ ದಂತಕಥೆ ಕ್ರಿಸ್ ಗೇಲ್ ಐಪಿಎಲ್ನ ಡೇಂಜರಸ್ ಬ್ಯಾಟ್ಸ್ಮನ್ ಪ್ರಸ್ತುತ ಪಂಜಾಬ್ ಕಿಂಗ್ಸ್ ಪರ 3ನೇ ಕ್ರಮಾಂಕದಲ್ಲಿ ಆಡುತ್ತಿದ್ದಾರೆ. ಇದಕ್ಕೂ ಮುನ್ನ ಗೇಲ್ ಕೆಕೆಆರ್, ಆರ್ಸಿಬಿ ಹಾಗೂ ಪಂಜಾಬ್ ಪರ ಇನಿಂಗ್ಸ್ ಆರಂಭಿಸಿದ್ದರು. ಈ ವೇಳೆ ಆರಂಭಿಕರಾಗಿ 6 ಶತಕಗಳೊಂದಿಗೆ ಒಟ್ಟು 4480 ರನ್ ಗಳಿಸಿದ್ದಾರೆ. ಈ ಮೂಲಕ ಐಪಿಎಲ್ನ ಬೆಸ್ಟ್ ಓಪನರ್ಗಳ ಪಟ್ಟಿಯಲ್ಲಿ 3ನೇ ಸ್ಥಾನ ಅಲಂಕರಿಸಿದ್ದಾರೆ.
ಗೌತಮ್ ಗಂಭೀರ್: ಕ್ರಿಕೆಟ್ ವೃತ್ತಿಜೀವನಕ್ಕೆ ಗುಡ್ ಬೈ ಹೇಳಿರುವ ಟೀಮ್ ಇಂಡಿಯಾ ಮಾಜಿ ಆಟಗಾರ ಗೌತಮ್ ಗಂಭೀರ್ ಕೂಡ ಬೆಸ್ಟ್ ಓಪನರ್ ಪಟ್ಟಿಯಲ್ಲಿದ್ದಾರೆ. ಡೆಲ್ಲಿ, ಕೆಕೆಆರ್ ಪರ ಆರಂಭಿಕರಾಗಿ ಆಡಿರುವ ಗೌತಮ್ ಗಂಭೀರ್ 3597 ರನ್ಗಳಿಸಿ ಅತ್ಯಂತ ಯಶಸ್ವಿ ಆರಂಭಿಕರ ಪಟ್ಟಿಯಲ್ಲಿ 4ನೇ ಸ್ಥಾನದಲ್ಲಿದ್ದಾರೆ.
ಅಜಿಂಕ್ಯ ರಹಾನೆ: ಬೆಸ್ಟ್ ಆರಂಭಿಕರ ಪಟ್ಟಿಯಲ್ಲಿ ರಹಾನೆ ಹೆಸರು ಅಚ್ಚರಿ ಮೂಡಿಸಬಹುದು. ಆದರೆ ರಾಜಸ್ಥಾನ್ ರಾಯಲ್ಸ್ , ಪುಣೆ ಸೂಪರ್ ಜೈಂಟ್ಸ್ ಹಾಗೂ ಡೆಲ್ಲಿ ಕ್ಯಾಪಿಟಲ್ಸ್ ಪರ ಆಡಿರುವ ಅಜಿಂಕ್ಯ ರಹಾನೆ ಆರಂಭಿಕರಾಗಿ ಯಶಸ್ವಿಯಾಗಿದ್ದರು. ಇದಕ್ಕೆ ಸಾಕ್ಷಿಯಾಗಿಯೇ ಅವರು ಓಪನರ್ ಆಗಿ 3462 ರನ್ ಗಳಿಸಿರುವುದು. ಈ ವೇಳೆ ರಹಾನೆ ಎರಡು ಶತಕಗಳನ್ನು ಕೂಡ ಬಾರಿಸಿದ್ದರು ಎಂಬುದು ವಿಶೇಷ.