ಬಿಗ್ ಬ್ಯಾಷ್ ಪಂದ್ಯವನ್ನಾಡಲು ಹೆಲಿಕಾಪ್ಟರ್​ನಲ್ಲಿ ಬಂದಿಳಿದ ವಾರ್ನರ್; ವಿಡಿಯೋ ನೋಡಿ

ಕೆಲವೇ ದಿನಗಳ ಹಿಂದೆ ಟೆಸ್ಟ್ ಹಾಗೂ ಏಕದಿನ ಕ್ರಿಕೆಟ್​ಗೆ ತನ್ನ ತವರು ಮೈದಾನವಾದ ಸಿಡ್ನಿಯಲ್ಲೇ ವಿದಾಯ ಹೇಳಿದ್ದ ಆಸ್ಟ್ರೇಲಿಯಾದ ಆರಂಭಿಕ ಆಟಗಾರ ಡೇವಿಡ್ ವಾರ್ನರ್ (David Warner) ಇದೀಗ ಬಿಗ್ ಬ್ಯಾಷ್ ಲೀಗ್​ನಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಬಿಗ್ ಬ್ಯಾಷ್​ನಲ್ಲಿ (Big Bash League) ಇಂದು ಸಿಡ್ನಿ ಥಂಡರ್ ಮತ್ತು ಸಿಡ್ನಿ ಸಿಕ್ಸರ್ಸ್ ತಂಡಗಳ ನಡುವೆ ಪಂದ್ಯ ನಡೆಯಿತು. ಈ ಪಂದ್ಯ ಆರಂಭಕ್ಕೂ ಮುನ್ನ ಸಿಡ್ನಿ ಥಂಡರ್ ಪರ ಕಣಕ್ಕಿಳಿಯುವ ಸಲುವಾಗಿ ಡೇವಿಡ್ ವಾರ್ನರ್ ಸಿಡ್ನಿ ಮೈದಾನಕ್ಕೆ ಆಗಮಿಸಿದರು. ಸಿಡ್ನಿ ಮೈದಾನಕ್ಕೆ ವಾರ್ನರ್ ಆಗಮನ ಹೇಗಿತ್ತೆಂದರೆ ಕ್ರಿಕೆಟ್ ಇತಿಹಾಸದಲ್ಲೇ ಕ್ರಿಕೆಟಿಗೊಬ್ಬನಿಗೆ ಈ ರೀತಿಯ ಗ್ಯ್ರಾಂಡ್ ಎಂಟ್ರಿ ಹಿಂದೆಂದೂ ಸಿಕ್ಕಿರಲಿಲ್ಲ. ವಾಸ್ತವವಾಗಿ ರಾಷ್ಟ್ರೀಯ ತಂಡಕ್ಕೆ ವಿದಾಯ ಹೇಳಿದ್ದ ಬಳಿಕ ಟಿ20 ಲೀಗ್​ನಲ್ಲಿ ಕಣಕ್ಕಿಳಿಯುತ್ತಿರುವ ವಾರ್ನರ್​ರನ್ನು ಹೆಲಿಕಾಪ್ಟರ್ (helicopter) ಮೂಲಕ ನೇರವಾಗಿ ಸಿಡ್ನಿ ಮೈದಾನಕ್ಕೆ ಕರೆತರಲಾಯಿತು. ಈ ಮೂಲಕ ಕ್ರಿಕೆಟ್ ಇತಿಹಾಸದಲ್ಲಿ ಕ್ರಿಕೆಟಿಗನೊಬ್ಬ ಕ್ರಿಕೆಟ್ ಮೈದಾನಕ್ಕೆ ಹೆಲಿಕಾಪ್ಟರ್​ನಲ್ಲಿ ಬಂದಿಳಿದ ದಾಖಲೆ ಡೇವಿಡ್ ವಾರ್ನರ್ ಹೆಸರಿನಲ್ಲಿ ದಾಖಲಾಯಿತು.

ಅಷ್ಟಕ್ಕೂ ವಾರ್ನರ್ ಅವರ ಈ ರೀತಿಯ ಗ್ರ್ಯಾಂಡ್ ಎಂಟ್ರಿಯ ಹಿಂದೆ ಕಾರಣವೂ ಇದೆ. ಅದೆನೆಂದರೆ ಇಂದು ವಾರ್ನರ್ ಅವರ ಸಹೋದರ ವೈವಾಹಿಕ ಜೀವನಕ್ಕೆ ಕಾಲಿರಿಸಿದರು. ಹಾಗಾಗಿ ಸಹೋದರನ ಮದುವೆಯಲ್ಲಿ ಪಾಲ್ಗೊಂಡ ವಾರ್ನರ್ ಆ ನಂತರ ಬಿಗ್ ಬ್ಯಾಷ್ ಪಂದ್ಯವನ್ನಾಡಲು ಹೆಲಿಕಾಪ್ಟರ್‌ ಏರಿದರು. ಇದರಿಂದಾಗಿಯೇ ವಾರ್ನರ್ ಪಂದ್ಯದ ಆರಂಭಕ್ಕೂ ಮುನ್ನ ಕ್ರೀಡಾಂಗಣವನ್ನು ತಲುಪಲುನ ಸಾಧ್ಯವಾಯಿತು.

Full journey of David Warner in Helicopter to SCG for Big Bash match. 🔥

– What an entry…..!!!!pic.twitter.com/TwTsQe9954

— Johns. (@CricCrazyJohns) January 12, 2024

ವಿಡಿಯೋ ಹಂಚಿಕೊಂಡ ಬಿಬಿಎಲ್

ಡೇವಿಡ್ ವಾರ್ನರ್ ಹೆಲಿಕಾಪ್ಟರ್ ಮೂಲಕ ಮೈದಾನಕ್ಕೆ ಎಂಟ್ರಿಕೊಟ್ಟ ವಿಡಿಯೋವನ್ನು BBL ನ ಅಧಿಕೃತ ಸೋಶಿಯಲ್ ಮೀಡಿಯಾ ಖಾತೆಯಲ್ಲಿ ಪೋಸ್ಟ್ ಮಾಡಲಾಗಿದೆ. ಮೈದಾನಕ್ಕೆ ಹೆಲಿಕಾಪ್ಟರ್​ನಲ್ಲಿ ಬಂದ ಬಳಿಕ ಚಾನೆಲ್ 7 ಗೆ ನೀಡಿದ ಹೇಳಿಕೆಯಲ್ಲಿ ವಾರ್ನರ್, ಈ ರೈಡ್ ತುಂಬಾ ಚೆನ್ನಾಗಿತ್ತು. ಮೇಲಿನಿಂದ ಸಿಡ್ನಿಯನ್ನು ನೋಡುವುದು ವಿಭಿನ್ನ ಸಂತೋಷ, ಅದು ಸಾಕಷ್ಟು ಅದ್ಭುತವಾಗಿತ್ತು. ಕಳೆದ ವಾರ ಈ ಮೈದಾನದಲ್ಲಿ ನನಗೆ ಬಹಳ ವಿಶೇಷವಾದ ಕ್ಷಣವಾಗಿತ್ತು (ವಾರ್ನರ್ ಇದೇ ಮೈದಾನದಲ್ಲಿ ಟೆಸ್ಟ್ ಕ್ರಿಕೆಟ್​ಗೆ ವಿದಾಯ ಹೇಳಿದ್ದರು) ಎಂದರು.

ವಾರ್ನರ್ ತಂಡಕ್ಕೆ ಸೋಲು

ಇನ್ನು ಪಂದ್ಯದ ವಿಚಾರಕ್ಕೆ ಬಂದರೆ ಸಿಡ್ನಿ ಥಂಡರ್ ಮತ್ತು ಸಿಡ್ನಿ ಸಿಕ್ಸರ್ಸ್ ತಂಡಗಳ ನಡುವೆ ಪಂದ್ಯದಲ್ಲಿ ವಾರ್ನರ್ ಪ್ರತಿನಿಧಿಸಿದ್ದ ಸಿಡ್ನಿ ಥಂಡರ್ ತಂಡ 19 ರನ್​ಗಳ ಸೋಲು ಅನುಭವಿಸಿತು. ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಸಿಡ್ನಿ ಸಿಕ್ಸರ್ಸ್ ತಂಡ ನಿಗದಿತ 20 ಓವರ್​ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 151 ರನ್ ಕಲೆಹಾಕಿತು. ಈ ಗುರಿ ಬೆನ್ನಟ್ಟಿದ ಸಿಡ್ನಿ ಥಂಡರ್ ತಂಡ 20ನೇ ಓವರ್​ನಲ್ಲಿ ತನ್ನೇಲ್ಲ ವಿಕೆಟ್ ಕಳೆದುಕೊಂಡು 132 ರನ್​ ಕೆಲಹಾಕಲಷ್ಟೇ ಶಕ್ತವಾಯಿತು. ಈ ಪಂದ್ಯದಲ್ಲಿ ವಾರ್ನರ್ 39 ಎಸೆತಗಳನ್ನು ಎದುರಿಸಿ 1 ಬೌಂಡರಿ ಹಾಗೂ 2 ಸಿಕ್ಸರ್ ನೆರವಿನಿಂದ 37 ರನ್ ಕಲೆಹಾಕಿದರು.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 7:46 pm, Fri, 12 January 24