IND vs ENG: 3 ಕ್ಯಾಚ್ ಡ್ರಾಪ್, 12 ನೋ ಬಾಲ್; ತಪ್ಪು ತಿದ್ದಿಕೊಳ್ಳದ ಟೀಂ ಇಂಡಿಯಾ
India's Poor Fielding Costs Them in Edgbaston Test: ಎಡ್ಜ್ಬಾಸ್ಟನ್ನಲ್ಲಿ ನಡೆದ ಭಾರತ-ಇಂಗ್ಲೆಂಡ್ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಶುಭಮನ್ ಗಿಲ್ ಅವರ ಅದ್ಭುತ ದ್ವಿಶತಕದ ಹೊರತಾಗಿಯೂ, ಭಾರತ ತಂಡದ ಕಳಪೆ ಬೌಲಿಂಗ್ ಮತ್ತು ಫೀಲ್ಡಿಂಗ್ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ಭಾರತ ತಂಡ ಕೈಬಿಟ್ಟ ಕ್ಯಾಚ್ಗಳು ಮತ್ತು ಕಳಪೆ ಬೌಲಿಂಗ್ ಇಂಗ್ಲೆಂಡ್ ತಂಡಕ್ಕೆ ವರವಾಗಿದೆ. ಭಾರತದ ಬ್ಯಾಟಿಂಗ್ ಉತ್ತಮವಾಗಿದ್ದರೂ, ಬೌಲಿಂಗ್ ಮತ್ತು ಫೀಲ್ಡಿಂಗ್ನಲ್ಲಿ ಸುಧಾರಣೆ ಅತ್ಯಗತ್ಯ.
Updated on: Jul 04, 2025 | 9:17 PM
ಇಂಗ್ಲೆಂಡ್ನಲ್ಲಿ ನಡೆಯುತ್ತಿರುವ ಭಾರತ ಮತ್ತು ಇಂಗ್ಲೆಂಡ್ (India vs England) ನಡುವಿನ ಟೆಸ್ಟ್ ಸರಣಿಯ ಎರಡನೇ ಪಂದ್ಯದಲ್ಲೂ ಭಾರತ ತಂಡದ ಕಳೆಪ ಬೌಲಿಂಗ್ ಹಾಗೂ ಫೀಲ್ಡಿಂಗ್ ಮುಂದುವರೆದಿದೆ. ಸರಣಿಯಲ್ಲಿ ಟೀಂ ಇಂಡಿಯಾದ ಬ್ಯಾಟ್ಸ್ಮನ್ಗಳು ನಿರಂತರವಾಗಿ ರನ್ ಗಳಿಸುತ್ತಿದ್ದರೆ, ಬೌಲಿಂಗ್ ಮತ್ತು ಫೀಲ್ಡಿಂಗ್ನಲ್ಲಿ ಅದೇ ನಿರಾಶಾದಾಯಕ ಪ್ರದರ್ಶನ ಮುಂದುವರೆದಿದೆ. ಲೀಡ್ಸ್ ಟೆಸ್ಟ್ನಲ್ಲಿ, ಕಳಪೆ ಬೌಲಿಂಗ್ ಮತ್ತು ಅತ್ಯಂತ ಕೆಟ್ಟ ಫೀಲ್ಡಿಂಗ್ ಟೀಂ ಇಂಡಿಯಾದ ಸೋಲಿಗೆ ಪ್ರಮುಖ ಕಾರಣಗಳಾಗಿದ್ದವು. ಇದೀಗ ಎಡ್ಜ್ಬಾಸ್ಟನ್ನಲ್ಲಿ ನಡೆಯುತ್ತಿರುವ ಎರಡನೇ ಟೆಸ್ಟ್ ಪಂದ್ಯದಲ್ಲೂ ಇದೇ ಪರಿಸ್ಥಿತಿ ಎದುರಾಗಿದೆ. ಮೊದಲ ಇನ್ನಿಂಗ್ಸ್ನಲ್ಲಿ ಟೀಂ ಇಂಡಿಯಾ 587 ರನ್ ಬಾರಿಸಿದೆಯಾದರೂ ಬೌಲರ್ಗಳು ಮತ್ತು ಫೀಲ್ಡಿಂಗ್ನಲ್ಲಿನ ಅಶಿಸ್ತು ಇಂಗ್ಲೆಂಡ್ ತಂಡಕ್ಕೆ ವರವಾಗಿ ಪರಿಣಮಿಸಿದೆ.
ಜುಲೈ 2 ರಂದು ಬರ್ಮಿಂಗ್ಹ್ಯಾಮ್ನ ಎಡ್ಜ್ಬಾಸ್ಟನ್ನಲ್ಲಿ ಪ್ರಾರಂಭವಾದ ಎರಡನೇ ಟೆಸ್ಟ್ ಪಂದ್ಯದ ಎರಡು ದಿನಗಳು ಸಂಪೂರ್ಣವಾಗಿ ಟೀಂ ಇಂಡಿಯಾದ ಹೆಸರಿನಲ್ಲಿತ್ತು. ನಾಯಕ ಶುಭಮನ್ ಗಿಲ್ ಅವರ ಐತಿಹಾಸಿಕ ದ್ವಿಶತಕದ ಆಧಾರದ ಮೇಲೆ ಟೀಂ ಇಂಡಿಯಾ 587 ರನ್ ಗಳಿಸಿತು. ಅವರಲ್ಲದೆ, ರವೀಂದ್ರ ಜಡೇಜಾ ಮತ್ತು ಯಶಸ್ವಿ ಜೈಸ್ವಾಲ್ ಕೂಡ ಅತ್ಯುತ್ತಮ ಇನ್ನಿಂಗ್ಸ್ ಆಡಿದರು. ಇದರ ನಂತರ, ಬೌಲರ್ಗಳು ಕೂಡ ಕೇವಲ 25 ರನ್ಗಳಿಗೆ 3 ವಿಕೆಟ್ಗಳನ್ನು ಪಡೆಯುವ ಮೂಲಕ ಟೀಂ ಇಂಡಿಯಾಕ್ಕೆ ಉತ್ತಮ ಆರಂಭವನ್ನು ನೀಡಿದರು. ಅದೇ ರೀತಿ, ಮೂರನೇ ದಿನದ ಆರಂಭವೂ ಭಾರತ ತಂಡಕ್ಕೆ ಅತ್ಯುತ್ತಮವಾಗಿತ್ತು. ಜೋ ರೂಟ್ ಮತ್ತು ಬೆನ್ ಸ್ಟೋಕ್ಸ್ ಅವರ ವಿಕೆಟ್ಗಳು ಎರಡನೇ ಓವರ್ನಲ್ಲಿಯೇ ಪತನಗೊಂಡವು.
ಅವಕಾಶ ಕೈಚೆಲ್ಲಿದ ಭಾರತ
ಇಷ್ಟೆಲ್ಲಾ ಉತ್ತಮ ಕೆಲಸ ಮಾಡಿದರೂ, ಟೀಂ ಇಂಡಿಯಾ ಮತ್ತೊಮ್ಮೆ ತನ್ನ ಫೀಲ್ಡಿಂಗ್ನಲ್ಲಿ ನಿರಾಶೆ ಮೂಡಿಸಿದೆ. ಕೊನೆಯ ಟೆಸ್ಟ್ ಪಂದ್ಯದಲ್ಲಿ, ಟೀಂ ಇಂಡಿಯಾ ಕನಿಷ್ಠ 7-8 ಕ್ಯಾಚ್ಗಳನ್ನು ಕೈಬಿಟ್ಟಿತು, ಇದು ಸೋಲಿಗೆ ಕಾರಣವಾಯಿತು. ಎಡ್ಜ್ಬಾಸ್ಟನ್ನಲ್ಲಿ ಈ ವಿಷಯದಲ್ಲಿ ಟೀಂ ಇಂಡಿಯಾ ಉತ್ತಮ ಆರಂಭವನ್ನು ಹೊಂದಿತ್ತು ಮತ್ತು ನಾಯಕ ಶುಭಮನ್ ಗಿಲ್, ಕೆಎಲ್ ರಾಹುಲ್ ಮತ್ತು ಕರುಣ್ ನಾಯರ್ ಯಾವುದೇ ತಪ್ಪಿಲ್ಲದೆ ಸ್ಲಿಪ್ನಲ್ಲಿ ಕ್ಯಾಚ್ಗಳನ್ನು ಪಡೆದರು. ಆದರೆ ಮೂರನೇ ದಿನ, ಟೀಂ ಇಂಡಿಯಾ ಒಂದೊಂದಾಗಿ 3 ಕ್ಯಾಚ್ಗಳನ್ನು ಕೈಬಿಟ್ಟಿತು. ಇವುಗಳಲ್ಲಿ, ಜೇಮೀ ಸ್ಮಿತ್ ಎರಡು ಬಾರಿ ಲೈಫ್ಲೈನ್ ಪಡೆದದರೆ, ಹ್ಯಾರಿ ಬ್ರೂಕ್ ಅವರ ಕ್ಯಾಚ್ ಅನ್ನು ಒಮ್ಮೆ ಕೈಬಿಡಲಾಯಿತು.
IND vs ENG: ಟೆಸ್ಟ್ ಇತಿಹಾಸದಲ್ಲೇ ಅತ್ಯಂತ ಕೆಟ್ಟ ಬೌಲಿಂಗ್; ಬೇಡದ ದಾಖಲೆ ಬರೆದ ಕನ್ನಡಿಗ ಪ್ರಸಿದ್ಧ್ ಕೃಷ್ಣ
ಕ್ಯಾಚ್ ಬಿಟ್ಟ ಸುಂದರ್- ಪಂತ್
ಮೊದಲನೆಯದಾಗಿ, ವಾಷಿಂಗ್ಟನ್ ಸುಂದರ್ ಸ್ಮಿತ್ ಅವರ ಕ್ಯಾಚ್ ಅನ್ನು ತಮ್ಮದೇ ಬೌಲಿಂಗ್ನಲ್ಲಿ ಕೈಬಿಟ್ಟರು. ಇದು ಇನ್ನಿಂಗ್ಸ್ನ 42 ನೇ ಓವರ್ನಲ್ಲಿ ಸಂಭವಿಸಿತು. ಆ ಸಮಯದಲ್ಲಿ ಸ್ಮಿತ್ 91 ರನ್ಗಳಿಸಿ ಆಡುತ್ತಿದ್ದರು. ಈ ಅವಕಾಶವನ್ನು ಬಳಸಿಕೊಂಡ ಸ್ಮಿತ್ ಕೇವಲ 80 ಎಸೆತಗಳಲ್ಲಿ ಶತಕ ಗಳಿಸಿದರು. ಇದಾದ ನಂತರ, 54 ನೇ ಓವರ್ನಲ್ಲಿ, ನಿತೀಶ್ ಕುಮಾರ್ ರೆಡ್ಡಿ ಅವರ ಮೊದಲ ಎಸೆತದಲ್ಲಿ ಸ್ಮಿತ್ ಅವರ ಕ್ಯಾಚ್ ಮತ್ತೆ ಮಿಸ್ ಆಯಿತು. ಈ ಬಾರಿ ರಿಷಭ್ ಪಂತ್ ಸ್ವಲ್ಪ ಕಷ್ಟಕರವಾದ ಅವಕಾಶವನ್ನು ತಪ್ಪಿಸಿಕೊಂಡರು. ಆಗ ಸ್ಮಿತ್ 121 ರನ್ ಬಾರಿಸಿ ಆಡುತ್ತಿದ್ದರು.
ಅದೇ ರೀತಿ, ಹ್ಯಾರಿ ಬ್ರೂಕ್ ಅವರ ಕ್ಯಾಚ್ ಕೂಡ ಮಿಸ್ ಆಯಿತು. ರವೀಂದ್ರ ಜಡೇಜಾ ಅವರ ಬೌಲಿಂಗ್ನಲ್ಲಿ ಬ್ರೂಕ್ ಕಟ್ ಶಾಟ್ ಆಡಿದರು. ಆದರೆ ಸ್ಲಿಪ್ನಲ್ಲಿ ನಿಂತಿದ್ದ ಗಿಲ್ಗೆ ಕ್ಯಾಚ್ ಹಿಡಿಯಲು ಸಾಧ್ಯವಾಗಲಿಲ್ಲ. ಆ ಸಮಯದಲ್ಲಿ ಬ್ರೂಕ್ 63 ರನ್ ಬಾರಿಸಿದ್ದರು. ನಂತರ ಅವರು ಅದ್ಭುತ ಶತಕವನ್ನು ಪೂರೈಸಿದರು.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
