ಟೆಸ್ಟ್ ಕ್ರಿಕೆಟ್ನಲ್ಲಿ ‘ಫಾಲೋಆನ್’ ಎಂದರೇನು? ಇದರ ನಿಯಮಗಳೇನು?
ಟೆಸ್ಟ್ ಪಂದ್ಯದಲ್ಲಿ ಎದುರಾಳಿ ತಂಡವನ್ನು ಸಂಪೂರ್ಣವಾಗಿ ಕಟ್ಟಿಹಾಕಿದರೂ ಮತ್ತು ಭಾರಿ ರನ್ಗಳ ಮುನ್ನಡೆ ಸಿಕ್ಕರೂ ಸಹ, ನಾಯಕರು ಕೆಲವೊಮ್ಮೆ ಫಾಲೋಆನ್ ನೀಡುವ ಗೋಜಿಗೆ ಹೋಗುವುದಿಲ್ಲ. ನೋಡುಗರಿಗೆ ಹಾಗೂ ಕ್ರಿಕೆಟ್ ಪ್ರೇಮಿಗಳಿಗೆ ಆರಂಭದಲ್ಲಿ ಇದು ಆಶ್ಚರ್ಯ ತಂದರೂ, ಇದರ ಹಿಂದೆ ನಾಯಕರ ಚಾಣಾಕ್ಷ ರಣತಂತ್ರ ಮತ್ತು ದೀರ್ಘಾವಧಿಯ ಪಂದ್ಯದ ಲೆಕ್ಕಾಚಾರಗಳು ಅಡಗಿರುತ್ತವೆ.
ಟೆಸ್ಟ್ ಕ್ರಿಕೆಟ್ ಅತಿ ಹೆಚ್ಚು ತಾಳ್ಮೆ ಮತ್ತು ರಣತಂತ್ರಗಳಿಂದ ಕೂಡಿದ ಆಟ. ಇಲ್ಲಿ ಪಂದ್ಯದ ದಿಕ್ಕನ್ನೇ ಬದಲಿಸುವ ಹಲವು ನಿಯಮಗಳಿದ್ದು, ಅವುಗಳಲ್ಲಿ ಅತ್ಯಂತ ರೋಮಾಂಚಕ ಹಾಗೂ ಚರ್ಚೆಗೊಳಗಾಗುವ ನಿಯಮವೆಂದರೆ ‘ಫಾಲೋಆನ್’ (Follow-on). ಪ್ರಸ್ತುತ ನಡೆಯುತ್ತಿರುವ ಭಾರತ ಮತ್ತು ಶ್ರೀಲಂಕಾ ನಡುವಿನ 2ನೇ ಟೆಸ್ಟ್ ಪಂದ್ಯದ ಹಿನ್ನೆಲೆಯಲ್ಲಿ, ಈ ಫಾಲೋಆನ್ ನಿಯಮ ಎಂದರೇನು? ಇದನ್ನು ಯಾವಾಗ ಮತ್ತು ಹೇಗೆ ಹೇರಲಾಗುತ್ತದೆ? ಇದರ ಹಿಂದಿರುವ ಲೆಕ್ಕಾಚಾರಗಳೇನು ಎಂಬುದರ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಫಾಲೋಆನ್ ಎಂದರೇನು?
ಸಾಮಾನ್ಯವಾಗಿ ಐದು ದಿನಗಳ ಟೆಸ್ಟ್ ಪಂದ್ಯದಲ್ಲಿ ಎರಡೂ ತಂಡಗಳು ತಲಾ ಎರಡು ಇನ್ನಿಂಗ್ಸ್ ಆಡುತ್ತವೆ. ಅಂದರೆ, ಮೊದಲು ಬ್ಯಾಟ್ ಮಾಡಿದ ತಂಡ ತನ್ನ ಮೊದಲ ಇನ್ನಿಂಗ್ಸ್ ಮುಗಿಸಿದ ನಂತರ, ಎರಡನೇ ತಂಡ ತನ್ನ ಮೊದಲ ಇನ್ನಿಂಗ್ಸ್ ಆಡುತ್ತದೆ. ಆ ಬಳಿಕ ನಿಯಮದ ಪ್ರಕಾರ ಮತ್ತೆ ಮೊದಲ ತಂಡ ತನ್ನ ಎರಡನೇ ಇನ್ನಿಂಗ್ಸ್ ಬ್ಯಾಟಿಂಗ್ ಮಾಡಬೇಕಾಗುತ್ತದೆ.
ಆದರೆ, ಮೊದಲ ಇನ್ನಿಂಗ್ಸ್ನಲ್ಲಿ ಎದುರಾಳಿ ತಂಡ ಅತ್ಯಂತ ಕಡಿಮೆ ರನ್ಗಳಿಗೆ ಆಲೌಟ್ ಆದಾಗ, ಮುನ್ನಡೆ ಸಾಧಿಸಿದ ತಂಡವು ಅವರಿಗೆ ಸತತವಾಗಿ ತಮ್ಮ ಎರಡನೇ ಇನ್ನಿಂಗ್ಸ್ ಆಡುವಂತೆ ಸೂಚಿಸಬಹುದು. ಇದನ್ನೇ ‘ಫಾಲೋಆನ್ ಹೇರುವುದು’ ಎನ್ನಲಾಗುತ್ತದೆ.
ಫಾಲೋಆನ್ ಹೇರಲು ಇರುವ ಮುಖ್ಯ ನಿಯಮಗಳೇನು?
ಮೆರಿಲಿಬೋನ್ ಕ್ರಿಕೆಟ್ ಕ್ಲಬ್ (MCC) ಕ್ರಿಕೆಟ್ ನಿಯಮ 14ರ ಪ್ರಕಾರ, ಫಾಲೋಆನ್ ನೀಡಲು ರನ್ಗಳ ಮುನ್ನಡೆಯ ಅಂತರ ಮುಖ್ಯವಾಗಿರುತ್ತದೆ. ಪಂದ್ಯದ ದಿನಗಳ ಆಧಾರದ ಮೇಲೆ ಈ ನಿಯಮಗಳು ಹೀಗಿವೆ:
5 ದಿನಗಳ ಟೆಸ್ಟ್ ಪಂದ್ಯ: ಮೊದಲು ಬ್ಯಾಟಿಂಗ್ ಮಾಡಿದ ತಂಡವು ಎದುರಾಳಿ ತಂಡಕ್ಕಿಂತ ಕನಿಷ್ಠ 200 ರನ್ಗಳ ಭಾರಿ ಮುನ್ನಡೆ ಸಾಧಿಸಿರಬೇಕು.
ಉದಾಹರಣೆಗೆ: ಕೊಲಂಬೊದಲ್ಲಿ ನಡೆಯುತ್ತಿರುವ ಟೆಸ್ಟ್ ಪಂದ್ಯದಲ್ಲಿ ಭಾರತ ಮೊದಲ ಇನ್ನಿಂಗ್ಸ್ನಲ್ಲಿ 503 ರನ್ ಗಳಿಸಿದೆ. ಅತ್ತ ಶ್ರೀಲಂಕಾ ತಂಡ ಫಾಲೋಆನ್ ತಪ್ಪಿಸಿಕೊಳ್ಳಲು ಮೊದಲ ಇನಿಂಗ್ಸ್ನಲ್ಲಿ ಕನಿಷ್ಠ 303 ರನ್ ಗಳಿಸಲೇಬೇಕು. ಒಂದು ವೇಳೆ ಶ್ರೀಲಂಕಾ 303 ಅಥವಾ ಅದಕ್ಕಿಂತ ಕಡಿಮೆ ರನ್ಗಳಿಗೆ ಆಲೌಟ್ ಆದರೆ ಭಾರತ ಫಾಲೋಆನ್ ಹೇರಲು ಅರ್ಹತೆ ಪಡೆಯುತ್ತದೆ.
ಅಂದರೆ 5 ದಿನಗಳ ಟೆಸ್ಟ್ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ತಂಡ ಮೊದಲ ಇನಿಂಗ್ಸ್ನಲ್ಲಿ 200 ರನ್ಗಳ ಮುನ್ನಡೆ ಪಡೆದರೆ ಫಾಲೋಆನ್ ಹೇರಬಹುದು. ಇದರಿಂದ ಮೊದಲ ಇನಿಂಗ್ಸ್ ಆಡಿದ 2ನೇ ತಂಡವು ಮೊದಲ ಇನಿಂಗ್ಸ್ ಮುಕ್ತಾಯದ ಬೆನ್ನಲ್ಲೇ ದ್ವಿತೀಯ ಇನಿಂಗ್ಸ್ ಆಡಬೇಕಾಗುತ್ತದೆ.
4 ಅಥವಾ 3 ದಿನಗಳ ಪಂದ್ಯ: ಪಂದ್ಯದ ಅವಧಿ ಕಡಿಮೆಯಿದ್ದಾಗ ಕನಿಷ್ಠ 150 ರನ್ಗಳ ಮುನ್ನಡೆ ಸಾಕಾಗುತ್ತದೆ.
2 ದಿನಗಳ ಪಂದ್ಯ: ಕನಿಷ್ಠ 100 ರನ್ಗಳ ಮುನ್ನಡೆ ಇರಬೇಕು.
1 ದಿನದ ಪಂದ್ಯ: ಕನಿಷ್ಠ 75 ರನ್ಗಳ ಮುನ್ನಡೆ ಇರಬೇಕು.
ವಿಶೇಷ ನಿಯಮ:
ಒಂದು ವೇಳೆ 5 ದಿನಗಳ ಟೆಸ್ಟ್ ಪಂದ್ಯದ ಮೊದಲನೇ ದಿನದಾಟವು ಮಳೆ ಅಥವಾ ಹವಾಮಾನ ವೈಪರೀತ್ಯದಿಂದಾಗಿ ಒಂದೂ ಎಸೆತ ಕಾಣದೆ ಸಂಪೂರ್ಣವಾಗಿ ರದ್ದಾದರೆ, ಆಗ ಫಾಲೋಆನ್ ನಿಯಮವು 200 ರನ್ಗಳಿಂದ 150 ರನ್ಗಳಿಗೆ ಇಳಿಕೆಯಾಗುತ್ತದೆ.
ಫಾಲೋಆನ್ ಹೇರುವುದು ಕಡ್ಡಾಯವೇ?
ಇಲ್ಲ, ಫಾಲೋಆನ್ ಅರ್ಹತೆ ಪಡೆದ ತಕ್ಷಣ ಅದನ್ನು ಎದುರಾಳಿ ತಂಡದ ಮೇಲೆ ಹೇರಲೇಬೇಕು ಎಂಬ ಯಾವುದೇ ಕಡ್ಡಾಯ ನಿಯಮವಿಲ್ಲ. ಇದು ಸಂಪೂರ್ಣವಾಗಿ ಮುನ್ನಡೆ ಸಾಧಿಸಿದ ತಂಡದ ನಾಯಕನ ನಿರ್ಧಾರವಾಗಿರುತ್ತದೆ. ನಾಯಕ ತಾನೇ ಸ್ವತಃ ಎರಡನೇ ಇನ್ನಿಂಗ್ಸ್ ಬ್ಯಾಟಿಂಗ್ ಮಾಡಲು ಕ್ರೀಸ್ಗೆ ಇಳಿಯುವ ನಿರ್ಧಾರವನ್ನೂ ತೆಗೆದುಕೊಳ್ಳಬಹುದು.
ಫಾಲೋಆನ್ ಏಕೆ ನೀಡುತ್ತಾರೆ?
ಇನ್ನಿಂಗ್ಸ್ ಗೆಲುವಿನ ಅವಕಾಶ: ಎದುರಾಳಿ ತಂಡವನ್ನು ಎರಡನೇ ಇನ್ನಿಂಗ್ಸ್ನಲ್ಲೂ ಮೊದಲ ಇನ್ನಿಂಗ್ಸ್ನ ಹಿನ್ನಡೆಗಿಂತ ಕಡಿಮೆ ರನ್ಗಳಿಗೆ ಆಲೌಟ್ ಮಾಡಿದರೆ, ಆ ತಂಡಕ್ಕೆ ‘ಇನ್ನಿಂಗ್ಸ್ ಹಾಗೂ ರನ್ಗಳ ಭರ್ಜರಿ ಗೆಲುವು’ ಸಿಗುತ್ತದೆ. ಅಲ್ಲದೆ ಮತ್ತೆ ಬ್ಯಾಟಿಂಗ್ ಮಾಡುವ ಅಗತ್ಯವಿರುವುದಿಲ್ಲ.
ಸಮಯದ ಉಳಿತಾಯ: ಪಂದ್ಯದ ಮುಂದಿನ ದಿನಗಳಲ್ಲಿ ಮಳೆಯಾಗುವ ಮುನ್ಸೂಚನೆ ಇದ್ದಾಗ ಅಥವಾ ಪಂದ್ಯ ಡ್ರಾದತ್ತ ಸಾಗದಂತೆ ತಡೆಯಲು ನಾಯಕರು ತಕ್ಷಣವೇ ಫಾಲೋಆನ್ ಜಾರಿಗೊಳಿಸಿ ಪಂದ್ಯವನ್ನು ಬೇಗ ಮುಗಿಸಲು ಪ್ರಯತ್ನಿಸುತ್ತಾರೆ.
ಕೆಲವೊಮ್ಮೆ ಯಾಕೆ ಫಾಲೋಆನ್ ನೀಡಲ್ಲ?
ಬೌಲರ್ಗಳ ಆಯಾಸ: ಮೊದಲ ಇನ್ನಿಂಗ್ಸ್ನಲ್ಲಿ ಸತತವಾಗಿ ಬೌಲಿಂಗ್ ಮಾಡಿ ಸುಸ್ತಾಗಿರುವ ಬೌಲರ್ಗಳಿಗೆ ವಿಶ್ರಾಂತಿ ನೀಡಲು ನಾಯಕರು ಬಯಸುತ್ತಾರೆ. ತಕ್ಷಣವೇ ಫಾಲೋಆನ್ ನೀಡಿದರೆ ಬೌಲರ್ಗಳು ದಣಿದು ರನ್ ಬಿಟ್ಟುಕೊಡುವ ಸಾಧ್ಯತೆ ಇರುತ್ತದೆ.
ನಾಲ್ಕನೇ ಇನ್ನಿಂಗ್ಸ್ ಬ್ಯಾಟಿಂಗ್ ಭೀತಿ: ಟೆಸ್ಟ್ ಪಂದ್ಯದ 4 ಮತ್ತು 5ನೇ ದಿನಗಳಲ್ಲಿ ಪಿಚ್ ಸಂಪೂರ್ಣವಾಗಿ ಹದಗೆಟ್ಟಿರುತ್ತದೆ. ಒಂದು ವೇಳೆ ಫಾಲೋಆನ್ ಪಡೆದ ಎದುರಾಳಿ ತಂಡ ಎರಡನೇ ಇನ್ನಿಂಗ್ಸ್ನಲ್ಲಿ ಭಾರಿ ರನ್ ಕಲೆಹಾಕಿದರೆ, ಕೊನೆಯ ಇನ್ನಿಂಗ್ಸ್ನಲ್ಲಿ ಗುರಿ ಬೆನ್ನಟ್ಟುವುದು ಕಷ್ಟವಾಗಬಹುದು ಎಂಬ ಆತಂಕವಿರುತ್ತದೆ.
ಇದನ್ನೂ ಓದಿ: ಇಂಗ್ಲೆಂಡ್ ತಂಡದಿಂದ ಬ್ರೈಡನ್ ಕಾರ್ಸ್ ಅಮಾನತು!
ಕ್ರಿಕೆಟ್ ಇತಿಹಾಸದಲ್ಲಿ ಫಾಲೋಆನ್ ಪಡೆದ ತಂಡಗಳೇ ತಿರುಗಿಬಿದ್ದು ಪಂದ್ಯ ಗೆದ್ದ ಉದಾಹರಣೆಗಳೂ ಇವೆ. 2001ರ ಕೋಲ್ಕತ್ತಾ ಟೆಸ್ಟ್ನಲ್ಲಿ ಭಾರತವು ಆಸ್ಟ್ರೇಲಿಯಾ ವಿರುದ್ಧ ಫಾಲೋಆನ್ ಪಡೆದೂ ಕೂಡ ಗೆದ್ದಿತ್ತು. ಹೀಗಾಗಿ, ಭಾರತ ಮತ್ತು ಶ್ರೀಲಂಕಾ ನಡುವಣ 2ನೇ ಟೆಸ್ಟ್ ಪಂದ್ಯದಲ್ಲಿ ಫಾಲೋಆನ್ ಪರಿಸ್ಥಿತಿ ಎದುರಾದರೆ ನಾಯಕರ ರಣತಂತ್ರ ಹೇಗಿರಲಿದೆ ಎಂಬುದು ಕುತೂಹಲಕಾರಿಯಾಗಿದೆ.