Harshal Patel: IPL​ನ ಸಾರ್ವಕಾಲಿಕ ದಾಖಲೆ ಮುರಿಯುವ ಸನಿಹದಲ್ಲಿ ಹರ್ಷಲ್​ ಪಟೇಲ್

ಐಪಿಎಲ್​ನಲ್ಲಿ (IPL 2021) ಆರ್​ಸಿಬಿ (RCB) ವೇಗಿ ಹರ್ಷಲ್ ಪಟೇಲ್ (Harshal Patel) ವಿಕೆಟ್ ಬೇಟೆ ಮುಂದುವರೆದಿದೆ. ಮುಂಬೈ ಇಂಡಿಯನ್ಸ್ (Mumbai Indians) ವಿರುದ್ದ ಹ್ಯಾಟ್ರಿಕ್ ​ನೊಂದಿಗೆ 4 ವಿಕೆಟ್ ಪಡೆದಿದ್ದ​ ಹರ್ಷಲ್ ರಾಜಸ್ಥಾನ್ ರಾಯಲ್ಸ್​ ವಿರುದ್ದ 3 ವಿಕೆಟ್ ಉರುಳಿಸಿದ್ದಾರೆ. ಇದರೊಂದಿಗೆ ಐಪಿಎಲ್​ ಸೀಸನ್​ 14ರ ವಿಕೆಟ್​ಗಳ ಸಂಖ್ಯೆಯನ್ನು 26ಕ್ಕೇರಿಸಿದ್ದಾರೆ. ಈ ಮೂಲಕ ಐಪಿಎಲ್​ ಇತಿಹಾಸದಲ್ಲೇ ಭಾರತದ ಅತ್ಯಂತ ಯಶಸ್ವಿ ದೇಶೀಯ ಬೌಲರ್​ ಎನಿಸಿಕೊಂಡಿದ್ದಾರೆ. ಹೌದು, ಹರ್ಷಲ್ ಪಟೇಲ್ ಇದುವರೆಗೆ ಟೀಮ್ ಇಂಡಿಯಾವನ್ನು (Team India) ಪ್ರತಿನಿಧಿಸಿಲ್ಲ. ಭಾರತ ತಂಡವನ್ನು ಪ್ರತಿನಿಧಿಸದೇ ಐಪಿಎಲ್​ನಲ್ಲಿ ಅತೀ ಹೆಚ್ಚು ವಿಕೆಟ್​ ಪಡೆದ ಬೌಲರ್ ಎಂಬ ದಾಖಲೆಯನ್ನು ಹರ್ಷಲ್ ಪಟೇಲ್ ಬರೆದಿದ್ದಾರೆ. ಇದಕ್ಕೂ ಮುನ್ನ ಈ ದಾಖಲೆ ಯಜುವೇಂದ್ರ ಚಹಲ್​ ಹೆಸರಿನಲ್ಲಿತ್ತು.

ಚಹಲ್ 2015 ರ ಐಪಿಎಲ್ ಸೀಸನ್​ನಲ್ಲಿ ಆರ್​ಸಿಬಿ ಪರ 23 ವಿಕೆಟ್ ಪಡೆದಿದ್ದರು. ಈ ವೇಳೆ ಚಹಲ್ ಭಾರತ ತಂಡವನ್ನು ಪ್ರತಿನಿಧಿಸಿರಲಿಲ್ಲ. ಅದರಂತೆ ಕಳೆದ 6 ವರ್ಷಗಳಿಂದ ಐಪಿಎಲ್​ನಲ್ಲಿ ಮಿಂಚಿದ್ದ ದೇಶೀಯ ಬೌಲರುಗಳ ಪಟ್ಟಿಯಲ್ಲಿ ಚಹಲ್ ಅಗ್ರಸ್ಥಾನದಲ್ಲಿದ್ದರು. ಇದೀಗ 26 ವಿಕೆಟ್ ಉರುಳಿಸುವ ಮೂಲಕ ಹರ್ಷಲ್ ಪಟೇಲ್ ಚಹಲ್ ದಾಖಲೆಯನ್ನು ಮುರಿದಿದ್ದಾರೆ. ಅಷ್ಟೇ ಅಲ್ಲದೆ ಐಪಿಎಲ್​ ಸಾರ್ವಕಾಲಿಕ ದಾಖಲೆ ಮುರಿಯಲು ಹರ್ಷಲ್ ಪಟೇಲ್​ಗೆ ಕೇವಲ 6 ವಿಕೆಟ್​ಗಳ ಅವಶ್ಯಕತೆಯಿದೆ.

11 ಪಂದ್ಯಗಳಿಂದ 26 ವಿಕೆಟ್​ ಪಡೆದಿರುವ ಹರ್ಷಲ್ ಪಟೇಲ್ ಮುಂದಿನ ಮೂರು ಪಂದ್ಯಗಳಿಂದ 7 ವಿಕೆಟ್​ ಉರುಳಿಸಿದರೆ, ಐಪಿಎಲ್​ ಇತಿಹಾಸದಲ್ಲೇ ಸೀಸನ್​ವೊಂದರ ಅತ್ಯಂತ ಯಶಸ್ವಿ ಬೌಲರ್​ ಎನಿಸಿಕೊಳ್ಳಲಿದ್ದಾರೆ. ಪ್ರಸ್ತುತ ಈ ದಾಖಲೆ ಸಿಎಸ್​ಕೆ ಆಲ್​ರೌಂಡರ್​ ಡ್ವೇನ್ ಬ್ರಾವೊ ಹೆಸರಿನಲ್ಲಿದೆ. ಬ್ರಾವೊ ಐಪಿಎಲ್ 2013 ರಲ್ಲಿ ಸಿಎಸ್​ಕೆ ಪರ 32 ವಿಕೆಟ್ ಉರುಳಿಸಿದ್ದರು. ಇದು ಸೀಸನ್​ವೊಂದರಲ್ಲಿ ಬೌಲರೊಬ್ಬರ ಅತೀ ಶ್ರೇಷ್ಠ ದಾಖಲೆಯಾಗಿ ಉಳಿದಿದೆ. ಇದೀಗ ಈ ದಾಖಲೆಯನ್ನು ಸರಿಗಟ್ಟಲು ಹರ್ಷಲ್ ಪಟೇಲ್ 6 ವಿಕೆಟ್​ಗಳ ಅವಶ್ಯಕತೆಯಿದ್ದು, ಹಾಗೆಯೇ 7 ವಿಕೆಟ್​ ಪಡೆದರೆ ಹೊಸ ಇತಿಹಾಸ ನಿರ್ಮಾಣವಾಗಲಿದೆ. ಸದ್ಯ ಆರ್​ಸಿಬಿ ಲೀಗ್​ ಹಂತದಲ್ಲಿ ಇನ್ನೂ 3 ಪಂದ್ಯಗಳನ್ನು ಆಡಬೇಕಿದೆ. ಈ ಪಂದ್ಯದಲ್ಲಿ ಒಂದರಲ್ಲಿ ಜಯಿಸಿದರೂ ಪ್ಲೇ ಆಫ್ ಆಡುವುದು ಬಹುತೇಕ ಖಚಿತ ಎನ್ನಬಹುದು. ಇದರಿಂದ ಪ್ಲೇ ಆಫ್​ ಪಂದ್ಯ ಆಡುವ ಅವಕಾಶ ಕೂಡ ಹರ್ಷಲ್​ಗೆ ದೊರೆಯುವ ಸಾಧ್ಯತೆಯಿದ್ದು, ಹೀಗಾಗಿ ನಾಲ್ಕು ಪಂದ್ಯಗಳಲ್ಲಿ 7 ವಿಕೆಟ್ ಉರುಳಿಸಿ ಐಪಿಎಲ್​ನಲ್ಲಿ ಹೊಸ ಇತಿಹಾಸ ನಿರ್ಮಿಸುವ ಅವಕಾಶ ಹರ್ಷಲ್ ಪಟೇಲ್ ಮುಂದಿದೆ.

ಇದನ್ನೂ ಓದಿ: IPL 2021: ಇದು ಅಂತಿಂಥ ಗೆಲುವಲ್ಲ…ಮುಂಬೈ ದಾಖಲೆಯನ್ನು ಅಳಿಸಿ ಹಾಕಿದ RCB

ಇದನ್ನೂ ಓದಿ: IPL 2021: RCB ಪರ ಹ್ಯಾಟ್ರಿಕ್ ವಿಕೆಟ್ ಪಡೆದ ಮೂವರು ಬೌಲರುಗಳು ಇವರೇ..!

ಇದನ್ನೂ ಓದಿ: Crime News: ತಾಯಿಗೆ ಅನೈತಿಕ ಸಂಬಂಧ: ಅದನ್ನೇ ಬಂಡವಾಳ ಮಾಡಿಕೊಂಡ ಮಗಳು

ಇದನ್ನೂ ಓದಿ: Mumbai Indians: ಸಾಲು ಸಾಲು ಪಂದ್ಯ ಸೋತು ಮುಂಬೈ ಪ್ಲೇ ಆಫ್ ಪ್ರವೇಶಿಸಿತ್ತು..!

(Harshal Patel now just 6 wickets away from all time IPL record)