ಡಿಆರ್‌ಎಸ್ ದುರ್ಬಳಕೆಗೆ ಬ್ರೇಕ್; ಸ್ಟಂಪಿಂಗ್ ನಿಯಮದಲ್ಲಿ ಪ್ರಮುಖ ಬದಲಾವಣೆ ಮಾಡಿದ ಐಸಿಸಿ..!

ಅಂತರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ (ICC) ಕಳೆದ ತಿಂಗಳು ಆಟದ ನಿಯಮಗಳಲ್ಲಿ ಕೆಲವು ಪ್ರಮುಖ ಬದಲಾವಣೆಗಳನ್ನು ಮಾಡಿತ್ತು. ಅದರಂತೆ ಈ ಎಲ್ಲಾ ನಿಯಮಗಳು 2024 ರ ಹೊಸ ವರ್ಷದ ಆರಂಭದೊಂದಿಗೆ ಜಾರಿಗೆ ಬಂದಿದ್ದರೂ ಅವುಗಳ ಬಗ್ಗೆ ಯಾವುದೇ ಅಧಿಕೃತ ಪ್ರಕಟಣೆಯನ್ನು ಮಾಡಲಾಗಿಲ್ಲ. ಈ ಎಲ್ಲಾ ನಿಯಮಗಳು ಜನವರಿ 3 ರಿಂದ ಆರಂಭವಾದ ಭಾರತ vs ದಕ್ಷಿಣ ಆಫ್ರಿಕಾ (India vs South Africa) ಹಾಗೂ ಆಸ್ಟ್ರೇಲಿಯಾ ಮತ್ತು ಪಾಕಿಸ್ತಾನ (Australia vs Pakistan) ನಡುವಿನ ಟೆಸ್ಟ್ ಪಂದ್ಯಕ್ಕೆ ಅನ್ವಯಿಸುತ್ತವೆ ಎಂದು ಹೇಳಲಾಗಿತ್ತು. ಆದರೆ ಆ ಬಗ್ಗೆ ಯಾವುದೇ ಸ್ಪಷ್ಟನೆ ಹೊರಬಿದ್ದಿಲ್ಲ. ಆದರೆ ಐಸಿಸಿ ಬದಲಾಯಿಸಿರುವ ನಿಯಮಗಳಲ್ಲಿ ಪ್ರಮುಖವಾದದ್ದು ಸ್ಟಂಪಿಂಗ್ ನಿಯಮ. ವಾಸ್ತವವಾಗಿ, ವಿಕೆಟ್ ಕೀಪರ್ ಮನವಿ ಮೇರೆಗೆ ಮೂರನೇ ಅಂಪೈರ್ ಸ್ಟಂಪಿಂಗ್ ಅನ್ನು ಪರಿಶೀಲಿಸುವ ಮೊದಲು ಕ್ಯಾಚ್ ಅನ್ನು ಪರಿಶೀಲಿಸುತ್ತಿದ್ದರು. ಆದರೆ ಬದಲಾಗಿರುವ ಹೊಸ ನಿಯಮಗಳ ಪ್ರಕಾರ, ಸ್ಟಂಪಿಂಗ್ ವಿಮರ್ಶೆಯಲ್ಲಿ ಸ್ಟಂಪಿಂಗ್ ಅನ್ನು ಮಾತ್ರ ಪರಿಶೀಲಿಸಲಾಗುತ್ತದೆ.

ಎದುರಾಳಿ ತಂಡಕ್ಕೆ ಲಾಭ

ಡಿಆರ್​ಎಸ್​ಗೆ ಸಂಬಂಧಿಸಿದ ಕೆಲವು ನಿಯಮಗಳು ಡಿಸೆಂಬರ್ 2023 ರಲ್ಲಿ ಜಾರಿಗೆ ಬಂದಿದ್ದವು. ಅದರಂತೆ ಎದುರಾಳಿ ತಂಡವು ಬ್ಯಾಟರ್​ನ ಸ್ಟಂಪಿಂಗ್‌ಗಾಗಿ ಮನವಿ ಮಾಡಿದರೆ, ಫೀಲ್ಡ್ ಅಂಪೈರ್, ಮೂರನೇ ಅಂಪೈರ್​ಗೆ ಮನವಿ ಕಳುಹಿಸುತ್ತಿದ್ದರು. ಮೊದಲು ಕ್ಯಾಚ್ ಔಟ್ ಅನ್ನು ಪರಿಶೀಲಿಸುತ್ತಿದ್ದ ಮೂರನೇ ಅಂಪೈರ್, ಆ ಬಳಿಕ ಸ್ಟಂಪಿಂಗ್‌ ಅನ್ನು ಪರಿಶೀಲಿಸುತ್ತಿದ್ದರಯ. ಎದುರಾಳಿ ತಂಡಗಳು ಹಲವು ಬಾರಿ ಇದರ ಲಾಭ ಪಡೆದು ಸ್ಟಂಪಿಂಗ್‌ಗೆ ಡಿಆರ್‌ಎಸ್ ಬಳಸಿ ಬ್ಯಾಟ್ಸ್‌ಮನ್‌ಗಳನ್ನು ಕ್ಯಾಚ್ ಔಟ್ ಮಾಡಿರುವ ಹಲವು ನಿದರ್ಶನಗಳಿವೆ.

ಕ್ಯಾಚ್ ಔಟ್​ಗೆ ಪ್ರತ್ಯೇಕ ಮನವಿ

ಈಗ ಐಸಿಸಿಯ ಹೊಸ ನಿಯಮದ ಪ್ರಕಾರ, ಯಾವುದೇ ತಂಡವು ಸ್ಟಂಪಿಂಗ್‌ಗೆ ಸಂಬಂಧಿಸಿದಂತೆ ಮೇಲ್ಮನವಿ ಸಲ್ಲಿಸಿದರೆ, ಅದು ಮೂರನೇ ಅಂಪೈರ್‌ಗೆ ಹೋದಾಗ, ಅವರು ಸೈಡ್-ಆನ್ ರಿಪ್ಲೇಗಳನ್ನು ನೋಡುವ ಮೂಲಕ ಅದನ್ನು ಪರಿಶೀಲಿಸುತ್ತಾರೆ. ಇದಲ್ಲದೆ, ಫೀಲ್ಡಿಂಗ್ ತಂಡವು ಕ್ಯಾಚ್ ಔಟ್​ಗೆ ಮನವಿ ಮಾಡಬೇಕಾದರೆ ಅವರು ಮತ್ತೆ ಡಿಆರ್ಎಸ್ ತೆಗೆದುಕೊಳ್ಳಬೇಕಾಗುತ್ತದೆ.

ಈ ನಿಯಮಗಳಲ್ಲಿ ಬದಲಾವಣೆ

ಇದರ ಹೊರತಾಗಿ, ಮೈದಾನದ ಗಾಯದ ಸಮಯದಲ್ಲಿ ಆಟವನ್ನು ನಿಲ್ಲಿಸಲು ಐಸಿಸಿ ಈಗ ಸಮಯ ಮಿತಿಯನ್ನು ನಿಗದಿಪಡಿಸಿದೆ. ಇದರಲ್ಲಿ ಆಟಗಾರನು ಮೈದಾನದಲ್ಲಿ ಗಾಯಗೊಂಡರೆ, ಆಟವನ್ನು ಕೇವಲ 4 ನಿಮಿಷಗಳ ಕಾಲ ನಿಲ್ಲಿಸಲಾಗುತ್ತದೆ. ಇದಲ್ಲದೆ, ಈಗ ಮೂರನೇ ಅಂಪೈರ್‌ಗೆ ಮುಂಭಾಗದ ಪಾದವನ್ನು ಹೊರತುಪಡಿಸಿ ಎಲ್ಲಾ ರೀತಿಯ ನೋ-ಬಾಲ್‌ಗಳನ್ನು ಪರಿಶೀಲಿಸುವ ಅಧಿಕಾರವಿದೆ.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ