IND vs AUS: 400 ರನ್ಗಳಿಗೆ ಮೊದಲ ಇನ್ನಿಂಗ್ಸ್ ಮುಗಿಸಿದ ಭಾರತ; 223 ರನ್ ಮುನ್ನಡೆ
IND vs AUS: ನಾಗ್ಪುರದ ವಿದರ್ಭ ಕ್ರಿಕೆಟ್ ಅಸೋಸಿಯೇಷನ್ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಭಾರತ ಹಾಗೂ ಆಸ್ಟ್ರೇಲಿಯಾ ನಡುವಿನ ಮೊದಲ ಟೆಸ್ಟ್ ಪಂದ್ಯದಲ್ಲಿ ಟೀಂ ಇಂಡಿಯಾ 400 ರನ್ಗಳಿಗೆ ತನ್ನ ಮೊದಲ ಇನ್ನಿಂಗ್ಸ್ ಮುಗಿಸಿದೆ.
Updated on:Feb 11, 2023 | 11:51 AM
ನಾಗ್ಪುರದ ವಿದರ್ಭ ಕ್ರಿಕೆಟ್ ಅಸೋಸಿಯೇಷನ್ ಸ್ಟೇಡಿಯಂನಲ್ಲಿ (Nagpur Test) ನಡೆಯುತ್ತಿರುವ ಭಾರತ ಹಾಗೂ ಆಸ್ಟ್ರೇಲಿಯಾ (India vs Australia) ನಡುವಿನ ಮೊದಲ ಟೆಸ್ಟ್ ಪಂದ್ಯದಲ್ಲಿ ಟೀಂ ಇಂಡಿಯಾ 400 ರನ್ಗಳಿಗೆ ತನ್ನ ಮೊದಲ ಇನ್ನಿಂಗ್ಸ್ ಮುಗಿಸಿದೆ. ಈ ಮೂಲಕ ಭಾರತ ಮೊದಲ ಇನ್ನಿಂಗ್ಸ್ನಲ್ಲಿ 223 ರನ್ ಮುನ್ನಡೆ ಸಾಧಿಸಿದೆ. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಆಸ್ಟ್ರೇಲಿಯಾ ಮೊದಲು ಬ್ಯಾಟಿಂಗ್ ಮಾಡಿ ಕೇವಲ 177 ರನ್ಗಳಿಗೆ ಆಲೌಟ್ ಆಗಿತ್ತು. ಇದಕ್ಕೆ ಉತ್ತರವಾಗಿ ಭಾರತ (Team India) ತನ್ನ ಮೊದಲ ಇನ್ನಿಂಗ್ಸ್ನಲ್ಲಿ 400 ರನ್ ಗಳಿಸಿದೆ. ಈ ಮುನ್ನಡೆಯನ್ನು ಗಮನಿಸಿದರೆ ಆಸ್ಟ್ರೇಲಿಯಾ ವಿರುದ್ಧ ಭಾರತದ ಗೆಲುವು ನಿಶ್ಚಿತ ಎಂತಲೇ ಹೇಳಲಾಗುತ್ತಿದೆ. 2010ರ ನಂತರ ಭಾರತ ತಂಡದ ಟೆಸ್ಟ್ ದಾಖಲೆಯನ್ನು ಗಮನಿಸಿದರೆ, ನಾಗ್ಪುರ ಟೆಸ್ಟ್ಗೆ ಮೊದಲು, ಭಾರತ 2010 ರಿಂದ 10 ಟೆಸ್ಟ್ಗಳಲ್ಲಿ 200 ಕ್ಕೂ ಹೆಚ್ಚು ರನ್ಗಳ ಮುನ್ನಡೆ ಸಾಧಿಸಿದ್ದು, ಈ ಎಲ್ಲಾ ಪಂದ್ಯಗಳಲ್ಲಿ ಭಾರತ ಗೆಲುವು ಸಾಧಿಸಿದೆ.
321 ರನ್ಗಳಿಗೆ 7 ವಿಕೆಟ್ ಕಳೆದುಕೊಂಡು ಮೂರನೇ ದಿನದಾಟವನ್ನು ಆರಂಭಿಸಿದ ಭಾರತ ತನ್ನ ಮೊದಲ ಇನ್ನಿಂಗ್ಸ್ ಮೂರನೇ ದಿನದ ಮೊದಲ ಸೆಷನ್ನಲ್ಲಿಯೇ ತನ್ನೆಲ್ಲ ವಿಕೆಟ್ ಕಳೆದುಕೊಂಡು 79 ರನ್ ಕಲೆಹಾಕಿತು. ನಾಗ್ಪುರ ಟೆಸ್ಟ್ನ ಮೊದಲ ಇನಿಂಗ್ಸ್ನಲ್ಲಿ ರೋಹಿತ್ ಹೊರತುಪಡಿಸಿ ಜಡೇಜಾ, ಅಕ್ಷರ್ ಮತ್ತು ಶಮಿ ಬ್ಯಾಟಿಂಗ್ನಲ್ಲಿ ಮಿಂಚಿನ ಪ್ರದರ್ಶಣ ನೀಡಿದರು. ರೋಹಿತ್ ಶರ್ಮಾ ಶತಕ ಬಾರಿಸಿದರೆ, ರವೀಂದ್ರ ಜಡೇಜಾ ಮೂರನೇ ದಿನ 70 ರನ್ ಗಳಿಸಿ ಔಟಾದರು. ಇದಲ್ಲದೇ ಎರಡನೇ ದಿನದಾಟದಲ್ಲಿ ಅರ್ಧಶತಕ ದಾಖಲಿಸಿದ್ದ ಅಕ್ಷರ್ ಪಟೇಲ್ 82 ರನ್ ಗಳಿಸಿ ಔಟಾದರು. ಇವರೊಂದಿಗೆ ಸ್ಫೋಟಕ ಇನ್ನಿಂಗ್ಸ್ ಆಡಿದ ಶಮಿ ಕೂಡ 37 ರನ್ಗಳ ಕೊಡುಗೆ ನೀಡಿದರು.
IND vs AUS: ಭಾರತಕ್ಕೆ ‘RRR’ ಆಸರೆ; ಸಖತ್ ವೈರಲ್ ಆಗ್ತಿದೆ ಕ್ರಿಕೆಟ್ ದೇವರ ಟ್ವೀಟ್
ಮೂರನೇ ದಿನದಾಟ ಹೀಗಿತ್ತು
ಎರಡನೇ ದಿನ ಅಜೇಯರಾಗಿ ಉಳಿದಿದ್ದ ಅಕ್ಷರ್ ಮತ್ತು ಜಡೇಜಾಗೆ ಮೂರನೇ ದಿನದಾಟದಲ್ಲಿ ಹೆಚ್ಚಿನ ಜೊತೆಯಾಟವನ್ನು ಆಡಲು ಸಾಧ್ಯವಾಗಲಿಲ್ಲ. ಈ ಜೋಡಿಯ ಜೊತೆಯಾಟವನ್ನು ಟಾಡ್ ಮರ್ಫಿ ಮುರಿಯುವಲ್ಲಿ ಯಶಸ್ವಿಯಾದರು. ಆದರೆ, ಇದಾದ ಬಳಿಕ ಶಮಿ ಮತ್ತು ಅಕ್ಷರ್ ನಡುವೆ 9ನೇ ವಿಕೆಟ್ಗೆ ಅರ್ಧಶತಕದ ಜೊತೆಯಾಟ ನಡೆಯಿತು. ಇದರಲ್ಲಿ ಶಮಿ ಕೊಡುಗೆ 37 ರನ್. ಇದಾದ ಬಳಿಕ ಸಿರಾಜ್ ಮತ್ತು ಅಕ್ಷರ್ 10ನೇ ವಿಕೆಟ್ಗೆ 20 ರನ್ ಸೇರಿಸಿದರು. ಇದರ ಪರಿಣಾಮ ಮೂರನೇ ದಿನದಾಟದಲ್ಲಿ ಭಾರತ ತನ್ನ ಸ್ಕೋರ್ ಬೋರ್ಡ್ಗೆ 79 ರನ್ಗಳನ್ನು ಸೇರಿಸುವಲ್ಲಿ ಯಶಸ್ವಿಯಾಯಿತು.
ಮರ್ಫಿಗೆ 7 ವಿಕೆಟ್
ಟಾಡ್ ಮರ್ಫಿ ಆಸ್ಟ್ರೇಲಿಯಾದ ಅತ್ಯಂತ ಯಶಸ್ವಿ ಬೌಲರ್ ಆಗಿದ್ದು, ಮೊದಲ ಇನ್ನಿಂಗ್ಸ್ನಲ್ಲಿ 7 ಭಾರತೀಯ ಬ್ಯಾಟ್ಸ್ಮನ್ಗಳನ್ನು ಪೆವಿಲಿಯನ್ಗಟ್ಟುವಲ್ಲಿ ಮರ್ಫಿ ಯಶಸ್ವಿಯಾದರು. ತನ್ನ ಚೊಚ್ಚಲ ಟೆಸ್ಟ್ ಪಂದ್ಯವನ್ನಾಡುತ್ತಿರುವ ಮರ್ಫಿ, ಮೊದಲ ಇನ್ನಿಂಗ್ಸ್ನಲ್ಲಿ 47 ಓವರ್ ಬೌಲ್ ಮಾಡಿ 124 ರನ್ಗಳಿಗೆ 7 ವಿಕೆಟ್ ಪಡೆದರು.
ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 11:33 am, Sat, 11 February 23
