IND vs SA: 43 ದಿನಗಳ ಬಯೋ ಬಬಲ್; ಡಿ. 16 ರಂದು ದಕ್ಷಿಣ ಆಫ್ರಿಕಾಕ್ಕೆ ತೆರಳಲಿದೆ ಭಾರತ ತಂಡ
IND vs SA: ಭಾರತೀಯ ತಂಡವು ಡಿಸೆಂಬರ್ 12 ರಂದು ಸಂಜೆ ಮುಂಬೈನಲ್ಲಿ ಸಮಾವೇಶಗೊಳ್ಳಲಿದ್ದು, ಅಲ್ಲಿಂದ ಮುಂದಿನ 3 ದಿನಗಳ ಕಾಲ ಹೋಟೆಲ್ನಲ್ಲಿ ಕ್ವಾರಂಟೈನ್ ಮಾಡಲಾಗುವುದು.
ಇನ್ನು ಕೆಲವೇ ದಿನಗಳಲ್ಲಿ ಭಾರತ ಕ್ರಿಕೆಟ್ ತಂಡದ ದಕ್ಷಿಣ ಆಫ್ರಿಕಾ ಪ್ರವಾಸ ಆರಂಭವಾಗಲಿದೆ. ದಕ್ಷಿಣ ಆಫ್ರಿಕಾದಲ್ಲಿ ಕೊರೊನಾ ವೈರಸ್ನ ಓಮಿಕ್ರಾನ್ ರೂಪಾಂತರದ ಬೆದರಿಕೆಯ ನಡುವೆ ಭಾರತ ತಂಡವು ಈ ಪ್ರವಾಸವನ್ನು ನಡೆಸುತ್ತಿದೆ. ಈ ಅಪಾಯದ ದೃಷ್ಟಿಯಿಂದ, ಸರಣಿಯ ವೇಳಾಪಟ್ಟಿಯನ್ನು ಬದಲಾಯಿಸಲಾಗಿದೆ. ಇದರೊಂದಿಗೆ ದಕ್ಷಿಣ ಆಫ್ರಿಕಾದಲ್ಲಿ ಟೀಂ ಇಂಡಿಯಾದ ಚಟುವಟಿಕೆಗಳಲ್ಲೂ ಬದಲಾವಣೆಯಾಗಿದೆ. ಟೆಸ್ಟ್ ಹಾಗೂ ಏಕದಿನ ಸರಣಿಗಾಗಿ ದಕ್ಷಿಣ ಆಫ್ರಿಕಾಕ್ಕೆ ತೆರಳಲಿರುವ ಭಾರತ ತಂಡ ಇದೀಗ ಮುಂದಿನ ಒಂದೂವರೆ ತಿಂಗಳ ಕಾಲ ಕಠಿಣ ಬಯೋ ಬಬಲ್ನಲ್ಲಿ ಕಾಲ ಕಳೆಯಬೇಕಾಗಿದೆ. ಪೂರ್ವನಿರ್ಧರಿತ ವೇಳಾಪಟ್ಟಿಯಲ್ಲಿ ಟೀಮ್ ಇಂಡಿಯಾ ಯಾವುದೇ ರೀತಿಯ ಕ್ವಾರಂಟೈನ್ನಲ್ಲಿ ಇರುವಂತಿರಲಿಲ್ಲ. ಆದರೆ ಬದಲಾದ ಪರಿಸ್ಥಿತಿಯಲ್ಲಿ, ಈಗ ಭಾರತವನ್ನು ತೊರೆಯುವ ಮೊದಲು ಮತ್ತು ದಕ್ಷಿಣ ಆಫ್ರಿಕಾದಲ್ಲಿ ಕೊನೆಯ ಪಂದ್ಯದವರೆಗೆ ಸುಮಾರು 43 ದಿನಗಳ ಕಾಲ ಬಯೋ ಬಬಲ್ನಲ್ಲೇ ಇರಬೇಕಾಗುತ್ತದೆ. ಭಾರತ ತಂಡ ಡಿಸೆಂಬರ್ 16 ರಂದು ದಕ್ಷಿಣ ಆಫ್ರಿಕಾಕ್ಕೆ ತೆರಳಲಿದೆ.
ಇಂಗ್ಲಿಷ್ ಪತ್ರಿಕೆ ಟೈಮ್ಸ್ ಆಫ್ ಇಂಡಿಯಾದ ವರದಿಯ ಪ್ರಕಾರ, ಭಾರತೀಯ ತಂಡದ ಈ ಸಂಪೂರ್ಣ ಪ್ರವಾಸವು ಕ್ವಾರಂಟೈನ್ನಿಂದ ಬಯೋ-ಬಬಲ್ಗೆ ಹಾದುಹೋಗುತ್ತದೆ. ಭಾರತೀಯ ತಂಡವು ಡಿಸೆಂಬರ್ 12 ರಂದು ಸಂಜೆ ಮುಂಬೈನಲ್ಲಿ ಸಮಾವೇಶಗೊಳ್ಳಲಿದ್ದು, ಅಲ್ಲಿಂದ ಮುಂದಿನ 3 ದಿನಗಳ ಕಾಲ ಹೋಟೆಲ್ನಲ್ಲಿ ಕ್ವಾರಂಟೈನ್ ಮಾಡಲಾಗುವುದು. ಇದರ ನಂತರ, ಡಿಸೆಂಬರ್ 16 ರಂದು, ಎಲ್ಲಾ ಆಟಗಾರರು ಮತ್ತು ಸಹಾಯಕ ಸಿಬ್ಬಂದಿ ದಕ್ಷಿಣ ಆಫ್ರಿಕಾಕ್ಕೆ ತೆರಳುತ್ತಾರೆ. ಅಲ್ಲಿಯೂ ಟೀಮ್ ಇಂಡಿಯಾ ಆರಂಭದಲ್ಲಿ ಕ್ವಾರಂಟೈನ್ನಲ್ಲಿರುತ್ತದೆ ಮತ್ತು ನಂತರ ಬಯೋ ಬಬಲ್ನಲ್ಲಿಯೇ ಅಭ್ಯಾಸದೊಂದಿಗೆ ಟೆಸ್ಟ್ ಸರಣಿಯು ಡಿಸೆಂಬರ್ 26 ರಿಂದ ಪ್ರಾರಂಭವಾಗಲಿದೆ. ಟೆಸ್ಟ್ ಸರಣಿಯ ಕೊನೆಯ ಪಂದ್ಯವು 11 ರಿಂದ 15 ಜನವರಿ 2022 ರವರೆಗೆ ನಡೆಯಲಿದೆ. ಅಲ್ಲಿಯವರೆಗೆ ಎಲ್ಲಾ ಆಟಗಾರರು ಬಯೋ ಬಬಲ್ನಲ್ಲಿ ಉಳಿಯುತ್ತಾರೆ.
44 ದಿನಗಳ ಕ್ವಾರಂಟೈನ್ ಮತ್ತು ಬಯೋ ಬಬಲ್
ಟೆಸ್ಟ್ ಸರಣಿಯ ನಂತರ ಭಾರತ ಕೂಡ 3 ಪಂದ್ಯಗಳ ODI ಸರಣಿಯನ್ನು ಆಡಬೇಕಿದ್ದು, ಇದರ ಮೊದಲ ಪಂದ್ಯವು ಜನವರಿ 19 ರಂದು ನಡೆಯಲಿದೆ, ಆದರೆ ಕೊನೆಯ ಪಂದ್ಯವು ಜನವರಿ 23 ರಂದು ನಡೆಯಲಿದೆ. ಇಂತಹ ಪರಿಸ್ಥಿತಿಯಲ್ಲಿ, ಟೆಸ್ಟ್ನ ಅನೇಕ ಸದಸ್ಯರು ODI ಸರಣಿಯ ಭಾಗವಾಗಿದ್ದಾರೆ. ಹೀಗಾಗಿ ಅವರೆಲ್ಲರೂ ಇನ್ನೂ ಕೆಲವು ದಿನಗಳನ್ನು ಬಯೋ ಬಬಲ್ನಲ್ಲಿ ಕಳೆಯಬೇಕಾಗಿದೆ. ಈ ರೀತಿಯಾಗಿ, ಭಾರತೀಯ ತಂಡವು ಡಿಸೆಂಬರ್ 12 ರಿಂದ ಜನವರಿ 23 ರವರೆಗೆ ಸುಮಾರು 43 ದಿನಗಳ ಕಾಲ ಕಟ್ಟುನಿಟ್ಟಾದ ಕ್ವಾರಂಟೈನ್ ಮತ್ತು ಬಯೋ ಬಬಲ್ನಲ್ಲಿರುತ್ತದೆ. ಈ ಅವಧಿಯಲ್ಲಿ ಒಟ್ಟು 6 ಪಂದ್ಯಗಳು ನಡೆಯಲಿವೆ. ಕಳೆದ ಒಂದೂವರೆ ವರ್ಷಗಳಲ್ಲಿ ಭಾರತ ತಂಡವು ಕ್ವಾರಂಟೈನ್ ಮತ್ತು ಬಯೋ ಬಬಲ್ನಲ್ಲಿ ದೀರ್ಘಕಾಲ ಕಳೆದಿದೆ.
ಈ ಭಾರತ ಪ್ರವಾಸವು ಡಿಸೆಂಬರ್ 17 ರಿಂದ ಪ್ರಾರಂಭವಾಗಬೇಕಿತ್ತು, ಇದರಲ್ಲಿ 3 ಟೆಸ್ಟ್ ಮತ್ತು 3 ODIಗಳನ್ನು ಹೊರತುಪಡಿಸಿ, 4 ಪಂದ್ಯಗಳ T20 ಸರಣಿಯನ್ನು ಸಹ ಆಡಬೇಕಿತ್ತು. ಆದರೆ ಕೊರೊನಾ ಕಾರಣ, ಡಿಸೆಂಬರ್ 26 ರಿಂದ ಪ್ರವಾಸ ಪ್ರಾರಂಭಿಸಲು ನಿರ್ಧರಿಸಲಾಯಿತು. ಅಲ್ಲದೆ, ಈ ಪ್ರವಾಸದಿಂದ ಟಿ20 ಸರಣಿಯನ್ನು ತೆಗೆದುಹಾಕಲಾಗಿದ್ದು, ಅದಕ್ಕಾಗಿ ಹೊಸ ವೇಳಾಪಟ್ಟಿಯನ್ನು ಪ್ರಕಟಿಸಲಾಗುವುದು.