IND vs PAK: ಪಾಕ್ ತಂಡವನ್ನು 87 ರನ್ಗೆ ಆಲೌಟ್ ಮಾಡಿದ್ದ ಟೀಮ್ ಇಂಡಿಯಾ..!
India vs Pakistan: ದುಬೈನ ಇಂಟರ್ನ್ಯಾಷನಲ್ ಮೈದಾನದಲ್ಲಿ ನಡೆಯಲಿರುವ ಪಾಕಿಸ್ತಾನ್ ವಿರುದ್ದದ ಪಂದ್ಯದಲ್ಲಿ ಟೀಮ್ ಇಂಡಿಯಾ ಭರ್ಜರಿ ಜಯ ಸಾಧಿಸಿ ಇದಕ್ಕಿಂತಲೂ ಸ್ಮರಣೀಯ ಗೆಲುವು ತಂದುಕೊಡಲಿದ್ದಾರಾ ಕಾದು ನೋಡಬೇಕಿದೆ.
Updated on: Aug 28, 2022 | 5:55 PM
India vs Pakistan: ಪಾಕಿಸ್ತಾನ್ ವಿರುದ್ದ ಭಾರತಕ್ಕೆ ಹೀನಾಯ ಸೋಲು ಎನ್ನುವಾಗ ಕಣ್ಮುಂದೆ ಬರುವ ಚಿತ್ರಣ 2021 ರ ಟಿ20 ವಿಶ್ವಕಪ್ನಲ್ಲಿನ 10 ವಿಕೆಟ್ಗಳ ಪರಾಜಯ. ಆದರೆ ಇದಕ್ಕೂ ಮುನ್ನವೇ ಅಂದರೆ 1985 ರಲ್ಲಿ ಪಾಕಿಸ್ತಾನ್ ತಂಡವನ್ನು ಟೀಮ್ ಇಂಡಿಯಾ ಕೇವಲ 87 ರನ್ಗಳಿಗೆ ಆಲೌಟ್ ಮಾಡಿತ್ತು ಎಂಬುದು ಅನೇಕರಿಗೆ ಗೊತ್ತಿಲ್ಲ. 1985 ರಲ್ಲಿ ಭಾರತ, ಪಾಕಿಸ್ತಾನ್, ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ನಡುವೆ ಯುಎಇನಲ್ಲಿ ಚತುಷ್ಕೋನ ಏಕದಿನ ಸರಣಿ ಆಯೋಜಿಸಲಾಗಿತ್ತು. ಈ ಸರಣಿಯ ಮೊದಲ ಪಂದ್ಯದಲ್ಲಿ ಭಾರತ ಹಾಗೂ ಪಾಕಿಸ್ತಾನ್ ತಂಡಗಳು ಮುಖಾಮುಖಿಯಾಗಿತ್ತು. ಟಾಸ್ ಗೆದ್ದ ಪಾಕ್ ತಂಡದ ನಾಯಕ ಜಾವೇದ್ ಮಿಯಾಂದಾದ್ ಬೌಲಿಂಗ್ ಆಯ್ದುಕೊಂಡರು.
ನಾಯಕ ನಿರೀಕ್ಷೆಯನ್ನು ಹುಸಿಗೊಳಿಸಿದಂತೆ ಮಾರಕ ದಾಳಿ ಸಂಘಟಿಸಿದ ಇಮ್ರಾನ್ ಖಾನ್ ನೇತೃತ್ವದ ಪಾಕಿಸ್ತಾನದ ವೇಗದ ಬೌಲರ್ಗಳು ಭಾರತೀಯ ಬ್ಯಾಟ್ಸ್ಮನ್ಗಳಿಗೆ ಆಘಾತ ನೀಡಿದರು. ಪರಿಣಾಮ ಟೀಮ್ ಇಂಡಿಯಾ 34 ರನ್ಗಳಿಗೆ 5 ವಿಕೆಟ್ ಕಳೆದುಕೊಂಡಿತ್ತು. ರವಿಶಾಸ್ತ್ರಿ 0, ಕ್ರಿಸ್ ಶ್ರೀಕಾಂತ್ 6, ದಿಲೀಪ್ ವೆಂಗ್ ಸರ್ಕಾರ್ 1, ಸುನಿಲ್ ಗವಾಸ್ಕರ್ 2 ಮತ್ತು ಮೊಹಿಂದರ್ ಅಮರನಾಥ್ 5 ರನ್ ಗಳಿಸಿ ಔಟಾಗಿದ್ದರು. ವಿಶೇಷ ಎಂದರೆ ಮೊದಲ ಐದು ವಿಕೆಟ್ಗಳನ್ನು ಇಮ್ರಾನ್ ಖಾನ್ ಒಬ್ಬರೇ ಉರುಳಿಸಿದ್ದರು.
ಈ ಹಂತದಲ್ಲಿ ಕಣಕ್ಕಿಳಿದ ಯುವ ದಾಂಡಿಗ ಮೊಹಮ್ಮದ್ ಅಜರುದ್ದೀನ್ ಪಾಕ್ ಬೌಲರ್ಗಳನ್ನು ನಿರಾಯಾಸವಾಗಿ ಎದುರಿಸಿದರು. ಪರಿಣಾಮ ಅಜರ್ ಬ್ಯಾಟ್ನಿಂದ 47 ಮತ್ತು ನಾಯಕ ಕಪಿಲ್ ದೇವ್ 30 ರನ್ ಮೂಡಿಬಂತು. ಆದರೆ ಇವರಿಬ್ಬರ ವಿಕೆಟ್ ಪತನದೊಂದಿಗೆ ಟೀಮ್ ಇಂಡಿಯಾ 42.4 ಓವರ್ಗಳಲ್ಲಿ 125 ರನ್ಗಳಿಗೆ ಆಲೌಟ್ ಆಯಿತು. ಅಂದು 10 ಓವರ್ ಗಳಲ್ಲಿ 14 ರನ್ ನೀಡಿ 6 ವಿಕೆಟ್ ಪಡೆದು ಇಮ್ರಾನ್ ಖಾನ್ ಮಿಂಚಿದ್ದರು.
ಕೇವಲ 126 ರನ್ಗಳ ಸುಲಭ ಟಾರ್ಗೆಟ್ ಪಡೆದ ಪಾಕಿಸ್ತಾನ್ ತಂಡವೇ ಗೆಲ್ಲಲಿದೆ ಎಂದು ಎಲ್ಲರೂ ಭಾವಿಸಿದ್ದರು. ಆದರೆ ಸುಲಭವಾಗಿ ಸೋಲೊಪ್ಪಿಕೊಳ್ಳುವಂತಹ ಮನಸ್ಥಿತಿ ನಾಯಕ ಕಪಿಲ್ ದೇವ್ ಅವರದ್ದಾಗಿತ್ತು. ಬೌಲಿಂಗ್ ಹಾಗೂ ಫೀಲ್ಡಿಂಗ್ನಲ್ಲಿ ವಿಶೇಷ ಪ್ಲ್ಯಾನ್ಗಳನ್ನು ರೂಪಿಸಿದರು.
ಅದರಂತೆ ಆರಂಭಿಕ ಆಟಗಾರ ಮೊಯೀನ್ ಅಲಿ ಕೇವಲ 10 ರನ್ಗಳಿಸಿ ರನೌಟ್ ಆದರು. ಇದರ ಬೆನ್ನಲ್ಲೇ 18 ರನ್ಗಳಿಸಿದ್ದ ಮುದಸ್ಸರ್ ನಜರ್ ರೋಜರ್ ಬಿನ್ನಿ ಎಸೆತಕ್ಕೆ ಕ್ಯಾಚ್ ನೀಡಿ ನಿರ್ಗಮಿಸಿದರು. ಈ ವೇಳೆ ಪಂದ್ಯದ ಮೇಲೆ ಹಿಡಿತ ಸಾಧಿಸಿದ ಟೀಮ್ ಇಂಡಿಯಾ ಬೌಲರ್ಗಳು 6 ರನ್ಗಳ ಅಂತರದಲ್ಲಿ 3 ವಿಕೆಟ್ ಕಬಳಿಸಿದರು. ಜಾವೇದ್ ಮಿಯಾಂದಾದ್, ಇಮ್ರಾನ್ ಖಾನ್ ಮತ್ತು ಅಶ್ರಫ್ ಅಲಿ ಮೂವರು ಶೂನ್ಯಕ್ಕೆ ಔಟಾಗಿದ್ದರು. ಪರಿಣಾಮ 41 ರನ್ ಆಗುವಷ್ಟರಲ್ಲಿ ಪಾಕಿಸ್ತಾನ್ 5 ಪ್ರಮುಖ ವಿಕೆಟ್ ಕಳೆದುಕೊಂಡಿತು
ಇದಾದ ಬಳಿಕ ಸಲೀಂ ಮಲಿಕ್ (17) ಹಾಗೂ ರಮೀಜ್ ರಾಜಾ (29) ತಂಡಕ್ಕೆ ಆಸರೆಯಾದರು. ಆದರೆ ಈ ವೇಳೆ ದಾಳಿಗಿಳಿದ ರವಿ ಶಾಸ್ತ್ರಿ ಮಲಿಕ್ ಹಾಗೂ ಮಿಯಾಂದಾದ್ ವಿಕೆಟ್ ಕಬಳಿಸಿ ಬ್ಯಾಟ್ ಟು ಬ್ಯಾಕ್ ಯಶಸ್ಸು ತಂದುಕೊಟ್ಟರು. ನಂತರ ಬಂದ ಇಲಾಯಿ 9 ರನ್ಗಳಿಸಿದರೆ, ತಾಹಿರ್ (1), ತೌಸೀಫ್ ಅಹ್ಮದ್ (0) ಬಹುಬೇಗನೆ ವಿಕೆಟ್ ಒಪ್ಪಿಸಿದರು. ಇನ್ನು ಇಲಾಯಿಯನ್ನು ಮದನ್ ಲಾಲ್ ಔಟ್ ಮಾಡುವ ಮೂಲಕ ಪಾಕಿಸ್ತಾನ್ ತಂಡವನ್ನು 32.5 ಓವರ್ಗಳಲ್ಲಿ ಕೇವಲ 87 ರನ್ಗಳಿಗೆ ಆಲೌಟ್ ಮಾಡಿತು. ಈ ಮೂಲಕ 38 ರನ್ಗಳ ಭರ್ಜರಿ ಜಯ ಸಾಧಿಸಿತು.
ಭಾರತದ ಈ ಗೆಲುವಿನಲ್ಲಿ ವೇಗದ ಬೌಲರ್ಗಳ ಹೊರತಾಗಿ ಸ್ಪಿನ್ನರ್ಗಳು ಕೂಡ ಮಹತ್ವದ ಕೊಡುಗೆ ನೀಡಿದರು. ಕಪಿಲ್ ದೇವ್ 3 ವಿಕೆಟ್ ಪಡೆದು ಮಿಂಚಿದರೆ, ಮತ್ತೊಂದೆಡೆ ಸ್ಪಿನ್ನರ್ಗಳಾದ ರವಿ ಶಾಸ್ತ್ರಿ ಮತ್ತು ಲಕ್ಷ್ಮಣ್ ಶಿವರಾಮಕೃಷ್ಣನ್ ತಲಾ 2 ವಿಕೆಟ್ ಕಬಳಿಸಿದರು. ಇದು ಯುಎಇ ನೆಲದಲ್ಲಿ ಪಾಕಿಸ್ತಾನ ವಿರುದ್ಧದ ಭಾರತದ ಸ್ಮರಣೀಯ ಗೆಲುವುದಾಗಿದೆ.
ಇಂದು ದುಬೈನ ಇಂಟರ್ನ್ಯಾಷನಲ್ ಮೈದಾನದಲ್ಲಿ ನಡೆಯಲಿರುವ ಪಾಕಿಸ್ತಾನ್ ವಿರುದ್ದದ ಪಂದ್ಯದಲ್ಲಿ ಟೀಮ್ ಇಂಡಿಯಾ ಭರ್ಜರಿ ಗೆಲುವು ದಾಖಲಿಸಿ ಇದಕ್ಕಿಂತಲೂ ಸ್ಮರಣೀಯ ಜಯ ತಂದುಕೊಡಲಿದ್ದಾರಾ ಕಾದು ನೋಡಬೇಕಿದೆ.
