IND vs BAN: ಇದೆಂಥಾ ಫಿಲ್ಡಿಂಗ್..? 10 ಎಸೆತಗಳಲ್ಲಿ 4 ಕ್ಯಾಚ್ ಕೈಚೆಲ್ಲಿದ ಟೀಂ ಇಂಡಿಯಾ..!
India Women's Fielding Nightmare: 2026ರ ಐಸಿಸಿ ಮಹಿಳಾ ಟಿ20 ವಿಶ್ವಕಪ್ನಲ್ಲಿ ಭಾರತ ತಂಡದ ಫೀಲ್ಡಿಂಗ್ ಕಳಪೆಯಾಗಿದ್ದು, ನಿರ್ಣಾಯಕ ಪಂದ್ಯಗಳಲ್ಲಿ ಕೈಚೆಲ್ಲಿದ ಕ್ಯಾಚ್ಗಳು ಸೋಲಿಗೆ ಕಾರಣವಾಗಿವೆ. ದಕ್ಷಿಣ ಆಫ್ರಿಕಾ ಮತ್ತು ಬಾಂಗ್ಲಾದೇಶದ ವಿರುದ್ಧದ ಪಂದ್ಯಗಳಲ್ಲಿ ಪ್ರಮುಖ ಕ್ಯಾಚ್ಗಳನ್ನು ಕೈಬಿಡಲಾಗಿದೆ. ಈ ಟೂರ್ನಿಯಲ್ಲಿ ಭಾರತ ಒಟ್ಟು 10 ಕ್ಯಾಚ್ಗಳನ್ನು ಕೈಬಿಟ್ಟಿದ್ದು, ತಂಡದ ಪ್ರದರ್ಶನದ ಮೇಲೆ ಗಂಭೀರ ಪರಿಣಾಮ ಬೀರಿದೆ. ಫೀಲ್ಡಿಂಗ್ ಸುಧಾರಣೆ ಅತ್ಯಗತ್ಯ.
2026 ರ ಐಸಿಸಿ ಮಹಿಳಾ ಟಿ20 ವಿಶ್ವಕಪ್ನಲ್ಲಿ (Women’s T20 World Cup 2026) ಭಾರತ ತಂಡದ ಫೀಲ್ಡಿಂಗ್ ಅತ್ಯಂತ ಕಳಪೆಯಾಗಿದೆ. ಈ ಕಳಪೆ ಫೀಲ್ಡಿಂಗ್ನಿಂದಾಗಿ, ಟೀಂ ಇಂಡಿಯಾ ಹಿಂದಿನ ದಕ್ಷಿಣ ಆಫ್ರಿಕಾ ವಿರುದ್ಧದ ಪಂದ್ಯದಲ್ಲಿ ಸೋತಿತು. ಇದೀಗ ಬಾಂಗ್ಲಾದೇಶ ವಿರುದ್ಧದ ನಿರ್ಣಾಯಕ ಪಂದ್ಯದಲ್ಲೂ ಭಾರತ ತಂಡ ಅದೇ ತಪ್ಪನ್ನು ಪುನರಾವರ್ತಿಸಿದೆ. ಮ್ಯಾಂಚೆಸ್ಟರ್ನ ಓಲ್ಡ್ ಟ್ರಾಫರ್ಡ್ನಲ್ಲಿ ನಡೆದ ಈ ಪಂದ್ಯದಲ್ಲಿ, ಭಾರತೀಯ ಆಟಗಾರ್ತಿಯರು ಕೇವಲ 10 ಎಸೆತಗಳ ಅಂತರದಲ್ಲಿ 4 ಕ್ಯಾಚ್ಗಳನ್ನು ಕೈಬಿಟ್ಟರು. ಅದರಲ್ಲೂ ಕೇವಲ 4 ಎಸೆತಗಳಲ್ಲಿ 3 ಕ್ಯಾಚ್ಗಳನ್ನು ಕೈಬಿಟ್ಟಿದ್ದು ತಂಡದ ಕಳಪೆ ಫಿಲ್ಡಿಂಗ್ಗೆ ಹಿಡಿದ ಕೈಗನ್ನಡಿಯಾಗಿತ್ತು.
ಕ್ಯಾಚ್ ಹಿಡಿಯುವುದೇ ಗೊತ್ತಿಲ್ಲ
- ಬಾಂಗ್ಲಾದೇಶ ಇನ್ನಿಂಗ್ಸ್ನ ಮೂರನೇ ಓವರ್ನಲ್ಲಿ ಯಾಸ್ತಿಕಾ ಭಾಟಿಯಾ ಕ್ಯಾಚ್ ಬಿಟ್ಟರು. ಶ್ರೀ ಚರಣ್ ಬೌಲ್ ಮಾಡಿದ ಈ ಓವರ್ನ ಐದನೇ ಎಸೆತವನ್ನು ಜೂರಿಯಾ ಫಿರ್ದೌಸ್ ಹೈ ಶಾಟ್ ಆಡಿದರು. ಆದರೆ ಸ್ಕ್ವೇರ್ ಲೆಗ್ನಲ್ಲಿದ್ದ ಯಾಸ್ತಿಕಾ ಭಾಟಿಯಾ ಕ್ಯಾಚ್ ಹಿಡಿಯಲಿಲ್ಲ.
- ನಾಲ್ಕನೇ ಓವರ್ನ ಕೊನೆಯ ಎಸೆತದಲ್ಲಿ ಎರಡನೇ ಕ್ಯಾಚ್ ಡ್ರಾಪ್. ರೇಣುಕಾ ಸಿಂಗ್ ಬೌಲ್ ಮಾಡಿದ ಈ ಓವರ್ನ ಕೊನೆಯ ಎಸೆತವನ್ನು ಫಿರ್ದೌಸ್ ಹೈ ಶಾಟ್ ಆಡಿದರು. ಆದರೆ ರಾಧಾ ಯಾದವ್ ಡೀಪ್ ಮಿಡ್ವಿಕೆಟ್ನಲ್ಲಿ ಸರಳ ಕ್ಯಾಚ್ ಕೈಚೆಲ್ಲಿದರು.
- ಶ್ರೀ ಚರಣಿ ಎಸೆದ ಐದನೇ ಓವರ್ನ ಎರಡನೇ ಎಸೆತದಲ್ಲಿ ಶೋಭನಾ ನೀಡಿದ ಕ್ಯಾಚ್ ಅನ್ನು ನಂದನಿ ಶರ್ಮಾ ಕೈಬಿಟ್ಟರು.
- ಇನ್ನು ಅದೇ ಓವರ್ನ ಮೂರನೇ ಎಸೆತದಲ್ಲಿ ಫಿರ್ದೌಸ್ ನೀಡಿದ ಕ್ಯಾಚ್ ಅನ್ನು ಮತ್ತೊಮ್ಮೆ ನಂದನಿ ಶರ್ಮಾ ಕೈಬಿಟ್ಟರು.
- ಇದರರ್ಥ ಬಾಂಗ್ಲಾದೇಶದ ಆರಂಭಿಕ ಆಟಗಾರ್ತಿ ಫಿರ್ದೌಸ್ಗೆ ಮೂರು ಜೀವದಾನಗಳನ್ನು ನೀಡಲಾಯಿತು. ಅಲ್ಲದೆ ಶ್ರೀ ಚರಣಿ ಅವರ ಬೌಲಿಂಗ್ನಲ್ಲಿ ಮೂರು ಕ್ಯಾಚ್ಗಳನ್ನು ಕೈಬಿಡಲಾಯಿತು. ಅಂತಿಮವಾಗಿ ಫಿರ್ದೌಸ್ ನಂದಿನಿ ಶರ್ಮಾ ಅವರ ಬೌಲಿಂಗ್ನಲ್ಲಿ ಔಟಾದರಾದರೂ ಆ ಹೊತ್ತಿಗೆ ಅವರು 31 ಎಸೆತಗಳಲ್ಲಿ 33 ರನ್ ಬಾರಿಸಿದ್ದರು.
ಆಫ್ರಿಕಾ ವಿರುದ್ಧ 3 ಕ್ಯಾಚ್ ಡ್ರಾಪ್
ದಕ್ಷಿಣ ಆಫ್ರಿಕಾ ವಿರುದ್ಧದ ಹಿಂದಿನ ಪಂದ್ಯದಲ್ಲಿ, ಕಳಪೆ ಫೀಲ್ಡಿಂಗ್ನಿಂದಾಗಿ ಟೀಂ ಇಂಡಿಯಾ 6 ವಿಕೆಟ್ಗಳ ಸೋಲನ್ನು ಅನುಭವಿಸಿತು. ದಕ್ಷಿಣ ಆಫ್ರಿಕಾ ವಿರುದ್ಧ ಭಾರತ ತಂಡ ಮೂರು ಕ್ಯಾಚ್ಗಳನ್ನು ಕೈಬಿಟ್ಟಿತು. ಅದರಲ್ಲೂ ಭಾರತದ ಸೋಲಿಗೆ ಕಾರಣರಾದ ಮರಿಜಾನ್ನೆ ಕಪ್ ಅವರದ್ದೇ ಮೂರು ಕ್ಯಾಚ್ಗಳನ್ನು ಕೈಬಿಡಲಾಯಿತು. ಮೊದಲನೆಯ ಕ್ಯಾಚ್ ಅನ್ನು 10 ನೇ ಓವರ್ನಲ್ಲಿ ನಂದಿನಿ ಶರ್ಮಾ ಕೈಬಿಟ್ಟರೆ, 13 ನೇ ಓವರ್ನಲ್ಲಿ ಮತ್ತು 17 ನೇ ಓವರ್ನಲ್ಲಿ ರಾಧಾ ಯಾದವ್ ಕೈಬಿಟ್ಟರು.
IND vs BAN: ನಿರ್ಣಾಯಕ ಪಂದ್ಯದಲ್ಲಿ ಟಾಸ್ ಸೋತ ಭಾರತ; ಪ್ಲೇಯಿಂಗ್ 11ನಲ್ಲಿ 2 ಬದಲಾವಣೆ
10 ಕ್ಯಾಚ್ಗಳನ್ನು ಕೈಚೆಲ್ಲಿರುವ ಭಾರತ
ಈ ಟೂರ್ನಿಯಲ್ಲಿ ಭಾರತ ಕ್ರಿಕೆಟ್ ತಂಡ ಇದುವರೆಗೆ 10 ಕ್ಯಾಚ್ಗಳನ್ನು ಕೈಬಿಟ್ಟಿದೆ. ಬಾಂಗ್ಲಾದೇಶ ವಿರುದ್ಧ ಭಾರತ ನಾಲ್ಕು, ದಕ್ಷಿಣ ಆಫ್ರಿಕಾ ವಿರುದ್ಧ ಮೂರು, ಪಾಕಿಸ್ತಾನ ವಿರುದ್ಧ ಎರಡು ಮತ್ತು ನೆದರ್ಲ್ಯಾಂಡ್ಸ್ ವಿರುದ್ಧ ಒಂದು ಕ್ಯಾಚ್ಗಳನ್ನು ಕೈಬಿಟ್ಟಿದೆ. ಅತಿ ಹೆಚ್ಚು ಕ್ಯಾಚ್ಗಳನ್ನು ಕೈಬಿಟ್ಟ ಪಟ್ಟಿಯಲ್ಲಿ ಭಾರತ ಮೂರನೇ ಸ್ಥಾನದಲ್ಲಿದೆ. ಇಂಗ್ಲೆಂಡ್ ಅತಿ ಹೆಚ್ಚು ಅಂದರೆ 15 ಕ್ಯಾಚ್ಗಳನ್ನು ಕೈಬಿಟ್ಟಿದ್ದರೆ, ನ್ಯೂಜಿಲೆಂಡ್ 14 ಕ್ಯಾಚ್ಗಳನ್ನು ಕೈಬಿಟ್ಟಿದೆ.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 8:29 pm, Thu, 25 June 26