IPL 2022 Auction: ಐಪಿಎಲ್ ಅಂಗಳದಲ್ಲಿ ಜೂನಿಯರ್ ಮಾಲಿಂಗ

ಐಪಿಎಲ್ ಮೆಗಾ ಹರಾಜಿನಲ್ಲಿ ಒಟ್ಟು 590 ಆಟಗಾರರು ಕಾಣಿಸಿಕೊಳ್ಳಲಿದ್ದಾರೆ. ಇದರಲ್ಲಿ 370 ಭಾರತೀಯ ಕ್ರಿಕೆಟಿಗರಿದ್ದರೆ, 220 ವಿದೇಶಿ ಆಟಗಾರರಿದ್ದಾರೆ. ಈ ವಿದೇಶಿ ಆಟಗಾರರ ಪಟ್ಟಿಯಲ್ಲಿ ಶ್ರೀಲಂಕಾ 23 ಆಟಗಾರರು ಸ್ಥಾನ ಪಡೆದಿದ್ದಾರೆ. ಅದರಲ್ಲೊಬ್ಬರು 19 ವರ್ಷದ ಮಥೀಶ ಪತಿರಾನ. ಶ್ರೀಲಂಕಾ ಈ ಯುವ ಕ್ರಿಕೆಟಿಗ ಇದೀಗ ಮೆಗಾ ಹರಾಜಿಗೂ ಮುನ್ನವೇ ಎಲ್ಲರ ಗಮನ ಸೆಳೆದಿದ್ದಾರೆ. ಇದಕ್ಕೆ ಕಾರಣ ಈತನ ಬೌಲಿಂಗ್ ಶೈಲಿ. ಹೌದು, ಮಥೀಶ ಪತಿರಾನರ ಬೌಲಿಂಗ್ ಶೈಲಿಯು ಯಾರ್ಕರ್ ಮಾಂತ್ರಿಕ ಲಸಿತ್ ಮಾಲಿಂಗನ ನೆನಪಿಸುತ್ತದೆ. ವೇಗ ಹಾಗೂ ನಿಖರ ದಾಳಿ ಮೂಲಕ ಐಪಿಎಲ್​ನಲ್ಲಿ 170 ವಿಕೆಟ್ ಉರುಳಿಸಿರುವ ಮಾಲಿಂಗ ಹೊಸ ಅವತಾರದಂತೆ ಇದೀಗ ಮಥೀಶ ಪತಿರಾನ ಎಂಟ್ರಿ ಕೊಟ್ಟಿದ್ದಾರೆ.

ಮಾಲಿಂಗ ರೀತಿಯಲ್ಲೇ ಚೆಂಡೆಸೆಯುವ ಮಥೀಶ ಐಪಿಎಲ್ 2022 ರ ಮೆಗಾ ಹರಾಜಿನಲ್ಲಿ 20 ಲಕ್ಷ ರೂ ಮೂಲ ಬೆಲೆಯೊಂದಿಗೆ ಕಾಣಿಸಿಕೊಂಡಿದ್ದಾರೆ. ಈಗಾಗಲೇ ಶ್ರೀಲಂಕಾದಲ್ಲಿ ಹೊಸ ಮಾಲಿಂಗ ಎಂದು ಗುರುತಿಸಿಕೊಂಡಿರುವ ಮಥೀಶ ‘ಸ್ಲಿಂಗಿ’ ಬೌಲಿಂಗ್ ಆಕ್ಷನ್‌ನಿಂದ ಹೊಸ ಸಂಚಲನ ಸೃಷ್ಟಿಸಿದ್ದಾರೆ.

ಸದ್ಯ ಐಸಿಸಿ ಅಂಡರ್-19 ಕ್ರಿಕೆಟ್ ವಿಶ್ವಕಪ್‌ನಲ್ಲಿ ಶ್ರೀಲಂಕಾ ತಂಡವನ್ನು ಪ್ರತಿನಿಧಿಸಿರುವ ಈ ಯುವ ವೇಗಿ ಮೂರು ಪಂದ್ಯಗಳಲ್ಲಿ 25.80 ಸರಾಸರಿಯಲ್ಲಿ ಮತ್ತು ಪ್ರತಿ ಓವರ್‌ಗೆ 5.60 ರನ್‌ಗಳ ಎಕಾನಮಿ ರೇಟ್​ನಲ್ಲಿ 5 ವಿಕೆಟ್‌ಗಳನ್ನು ಪಡೆದಿದ್ದಾರೆ. ಇದಕ್ಕೂ ಮುನ್ನ ಕ್ಯಾಂಡಿಯ ಟ್ರಿನಿಟಿ ಕಾಲೇಜ್‌ಗಾಗಿ ಆಡಿದ ತಮ್ಮ ಚೊಚ್ಚಲ ಪಂದ್ಯದಲ್ಲಿ ಆರು ವಿಕೆಟ್‌ಗಳನ್ನು ಉರುಳಿಸಿ ಮಿಂಚಿದ್ದರು.

ಈತನ ಮಾರಕ ಬೌಲಿಂಗ್ ಕಾರಣದಿಂದಲೇ ಈ ಹಿಂದೆ ಚೆನ್ನೈ ಸೂಪರ್ ಕಿಂಗ್ಸ್​ ತಂಡವು ನೆಟ್ ಬೌಲರ್ ಆಗಿ ಕರೆಸಿಕೊಂಡಿತ್ತು. ಇದೀಗ ಮೆಗಾ ಹರಾಜಿನಲ್ಲಿ ಕಾಣಿಸಿಕೊಂಡಿರುವ ಮಥೀಶ ಪತಿರಾನ ಅವರನ್ನು ಸಿಎಸ್​ಕೆ ತಂಡವೇ ಖರೀದಿಸಲಿದೆಯಾ ಎಂಬ ಪ್ರಶ್ನೆಯೊಂದು ಹುಟ್ಟಿಕೊಂಡಿದೆ. ಒಟ್ಟಿನಲ್ಲಿ ಐಪಿಎಲ್​ನಲ್ಲಿ ಅತ್ಯಂತ ಯಶಸ್ವಿ ಬೌಲರ್ ಎನಿಸಿಕೊಂಡಿರುವ ಲಸಿತ್ ಮಾಲಿಂಗ ಶೈಲಿಯಲ್ಲೇ ಮಾರಕ ಯಾರ್ಕರ್​ಗಳ ಮೂಲಕ ಗಮನ ಸೆಳೆದಿರುವ ಮಥೀಶ ಪತಿರಾನ ಫೆಬ್ರವರಿ 12 ಮತ್ತು 13 ರಂದು ನಡೆಯಲಿರುವ ಮೆಗಾ ಹರಾಜಿನಲ್ಲಿ ಯಾವುದಾದರೂ ತಂಡ ಖರೀದಿಸುವ ವಿಶ್ವಾಸದಲ್ಲಿದ್ದಾರೆ.

ಇದನ್ನೂ ಓದಿ: IPL 2022 auction: ಮೆಗಾ ಹರಾಜಿನಲ್ಲಿ ಕಾಣಿಸಿಕೊಳ್ಳಲಿರುವ 590 ಆಟಗಾರರ ಹೆಸರು ಇಲ್ಲಿದೆ

ಇದನ್ನೂ ಓದಿ: IPL 2022: ಮೆಗಾ ಹರಾಜಿನಲ್ಲಿ 590 ಆಟಗಾರರು: ಯಾವ ದೇಶದಿಂದ ಎಷ್ಟು ಆಟಗಾರರು? ಇಲ್ಲಿದೆ ಸಂಪೂರ್ಣ ಪಟ್ಟಿ

ಇದನ್ನೂ ಓದಿ: Jason Holder: ಡಬಲ್ ಹ್ಯಾಟ್ರಿಕ್ ಪಡೆದು ವಿಶ್ವ ದಾಖಲೆ ನಿರ್ಮಿಸಿದ ಜೇಸನ್ ಹೋಲ್ಡರ್

(IPL 2022 Auction: ’New Lasith Malinga’ in town)