IPL 2022: ಚೆನ್ನೈ- ಮುಂಬೈ ಬೇರೆ ಬೇರೆ! ಗುಂಪುಗಳ ವಿಂಗಡಣೆಯಲ್ಲಿ ಬಿಸಿಸಿಐ ಮಾಸ್ಟರ್ ಪ್ಲಾನ್
IPL 2022: ಈ ಬಾರಿ 8ರ ಬದಲಿಗೆ 10 ತಂಡಗಳು ಲೀಗ್‌ನಲ್ಲಿ ಪಾಲ್ಗೊಳ್ಳಲಿವೆ. ಇದೇ ಕಾರಣಕ್ಕೆ ಈ ಬಾರಿಯ ಲೀಗ್ ಬದಲಾದ ಮಾದರಿಯಲ್ಲಿ ನಡೆಯಲಿದೆ. ಈ ಬಾರಿ ತಂಡಗಳು ರಾಬಿನ್ ಸುತ್ತಿನಲ್ಲಿ (ಎಲ್ಲ ತಂಡಗಳು ಪರಸ್ಪರ ವಿರುದ್ಧವಾಗಿ ಆಡುತ್ತವೆ) ಮಾದರಿಯಲ್ಲಿ ಪಂದ್ಯಗಳನ್ನು ಆಡುವುದಿಲ್ಲ.
Updated on: Feb 25, 2022 | 5:14 PM
ಐಪಿಎಲ್ 2022 (IPL 2022)ರ ವೇಳಾಪಟ್ಟಿಯನ್ನು ಬಿಸಿಸಿಐ (BCCI) ಶುಕ್ರವಾರ ಪ್ರಕಟಿಸಿದೆ. ಐಪಿಎಲ್ 15 ನೇ ಸೀಸನ್ ಮಾರ್ಚ್ 26 ರಿಂದ ಪ್ರಾರಂಭವಾಗಲಿದ್ದು, ಅದರ ಫೈನಲ್ ಮೇ 29 ರಂದು ನಡೆಯಲಿದೆ. ಕೊರೊನಾ (Corona) ಕಾರಣ, ಮಹಾರಾಷ್ಟ್ರದಲ್ಲಿಯೇ ಎಲ್ಲಾ ಪಂದ್ಯಗಳನ್ನು ಆಯೋಜಿಸಲು ನಿರ್ಧರಿಸಲಾಗಿದೆ. ಈ ಬಾರಿ 8ರ ಬದಲಿಗೆ 10 ತಂಡಗಳು ಲೀಗ್‌ನಲ್ಲಿ ಪಾಲ್ಗೊಳ್ಳಲಿವೆ. ಇದೇ ಕಾರಣಕ್ಕೆ ಈ ಬಾರಿಯ ಲೀಗ್ ಬದಲಾದ ಮಾದರಿಯಲ್ಲಿ ನಡೆಯಲಿದೆ. ಈ ಬಾರಿ ತಂಡಗಳು ರಾಬಿನ್ ಸುತ್ತಿ (robin round)ನಲ್ಲಿ (ಎಲ್ಲ ತಂಡಗಳು ಪರಸ್ಪರ ವಿರುದ್ಧವಾಗಿ ಆಡುತ್ತವೆ) ಮಾದರಿಯಲ್ಲಿ ಪಂದ್ಯಗಳನ್ನು ಆಡುವುದಿಲ್ಲ. ಆದರೆ ಎಲ್ಲಾ ಲೀಗ್ ಪಂದ್ಯಗಳನ್ನು ಗುಂಪು ಹಂತದಲ್ಲಿ ಆಡಲಾಗುತ್ತದೆ.
ಲಕ್ನೋ ಸೂಪರ್ ಜೈಂಟ್ಸ್ ಮತ್ತು ಗುಜರಾತ್ ಟೈಟಾನ್ಸ್ ಸೇರ್ಪಡೆಯೊಂದಿಗೆ, ಲೀಗ್ ಈಗ 10 ತಂಡಗಳನ್ನು ಹೊಂದಿದೆ. ಈ 10 ತಂಡಗಳನ್ನು ತಲಾ ಐದರಂತೆ ಎರಡು ಗುಂಪುಗಳಾಗಿ ವಿಂಗಡಿಸಲಾಗಿದೆ. ಪ್ರತಿ ತಂಡವು ಉಳಿದ ಒಂಬತ್ತು ತಂಡಗಳ ವಿರುದ್ಧ ಪಂದ್ಯಗಳನ್ನು ಆಡಬೇಕಾಗುತ್ತದೆ. ಆದರೆ ಯಾವ ತಂಡದ ವಿರುದ್ಧ ಎಷ್ಟು ಪಂದ್ಯಗಳನ್ನು ಆಡುತ್ತದೆ ಎಂಬುದನ್ನು ಗುಂಪಿನ ಪ್ರಕಾರ ನಿರ್ಧರಿಸಲಾಗುತ್ತದೆ. ಬಿಸಿಸಿಐ ಕೂಡ ಗುಂಪನ್ನು ವಿಭಜಿಸಲು ವಿಶೇಷ ವಿಧಾನವನ್ನು ಅಳವಡಿಸಿಕೊಂಡಿದೆ.
ಐದು ತಂಡಗಳಾಗಿ ವಿಂಗಡಣೆ
ಎ ಗುಂಪಿನಲ್ಲಿ ಮುಂಬೈ ಇಂಡಿಯನ್ಸ್, ಕೋಲ್ಕತ್ತಾ ನೈಟ್ ರೈಡರ್ಸ್, ರಾಜಸ್ಥಾನ ರಾಯಲ್ಸ್, ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಲಕ್ನೋ ಸೂಪರ್ ಜೈಂಟ್ಸ್ ತಂಡಗಳು ಸೇರಿವೆ. ಮತ್ತೊಂದೆಡೆ, ಬಿ ಗುಂಪಿನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್, ಸನ್ ರೈಸರ್ಸ್ ಹೈದರಾಬಾದ್, ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಪಂಜಾಬ್ ಕಿಂಗ್ಸ್ ಮತ್ತು ಗುಜರಾತ್ ಟೈಟಾನ್ಸ್ ತಂಡಗಳು ಇರುತ್ತವೆ. ಬಿಸಿಸಿಐ ಗುಂಪನ್ನು ವಿಭಜಿಸಿದ್ದು ಮಾತ್ರವಲ್ಲದೆ ಅದಕ್ಕಾಗಿ ವಿಶೇಷ ತಂತ್ರ ರೂಪಿಸಿದೆ.
ಗುಂಪು ವಿಂಗಡಣೆ ಹೇಗೆ?
ಗುಂಪುಗಳ ಹಂಚಿಕೆಗೆ ಬಿಸಿಸಿಐ ಕೂಡ ವಿಶೇಷ ವಿಧಾನವನ್ನು ಅಳವಡಿಸಿಕೊಂಡಿದೆ. ಇದಕ್ಕಾಗಿ, ಮಂಡಳಿಯು ಎಲ್ಲಾ 10 ತಂಡಗಳನ್ನು ಅವರ ಗೆದ್ದ ಪ್ರಶಸ್ತಿಗಳ ಸಂಖ್ಯೆ ಮತ್ತು ನಂತರ ಹೆಚ್ಚಿನ ಸಂಖ್ಯೆಯ ಫೈನಲ್‌ಗಳ ಆಧಾರದ ಮೇಲೆ ಕ್ರಮವಾಗಿ ಇರಿಸಿದೆ. ಈ ಅರ್ಥದಲ್ಲಿ ಮುಂಬೈ 5 ಪ್ರಶಸ್ತಿಗಳೊಂದಿಗೆ ಅಗ್ರಸ್ಥಾನದಲ್ಲಿದೆ. ಇದಾದ ನಂತರ ಚೆನ್ನೈ, ಕೋಲ್ಕತ್ತಾ, ಹೈದರಾಬಾದ್ ಮತ್ತು ರಾಜಸ್ಥಾನ ತಂಡಗಳನ್ನು ಅನುಕ್ರಮವಾಗಿ ಇರಿಸಲಾಗಿದೆ. ಹೈದರಾಬಾದ್ ಮತ್ತು ರಾಜಸ್ಥಾನ ತಲಾ 1 ಪ್ರಶಸ್ತಿಯನ್ನು ಗೆದ್ದುಕೊಂಡಿವೆ. ಆದರೆ ಹೈದರಾಬಾದ್ 2 ಫೈನಲ್‌ಗಳನ್ನು ಆಡಿದೆ, ಆದ್ದರಿಂದ ಅದು ರಾಜಸ್ಥಾನಕ್ಕಿಂತ ಮೇಲಿದೆ.
ಈ ಐದು ತಂಡಗಳ ನಂತರ, ಹೆಚ್ಚು ಫೈನಲ್‌ಗಳನ್ನು ಆಡಿದ ತಂಡಗಳಿಗೆ ಸ್ಥಾನ ನೀಡಲಾಗಿದೆ. ಅದರ ಆಧಾರದ ಮೇಲೆ ಬೆಂಗಳೂರು (3 ಫೈನಲ್‌ಗಳು) ಆರನೇ ಸ್ಥಾನದಲ್ಲಿದೆ. ದೆಹಲಿ ಮತ್ತು ಪಂಜಾಬ್ ತಲಾ 1 ಫೈನಲ್‌ಗಳನ್ನು ಆಡಿವೆ. ಆದ್ದರಿಂದ ಈ ಎರಡು ತಂಡಗಳನ್ನು ‘ವರ್ಣಮಾಲೆಯ ಕ್ರಮ'(alphabetical order) ಆಧಾರದ ಮೇಲೆ ಶ್ರೇಯಾಂಕಗೊಳಿಸಲಾಗಿದೆ. ಅದೇ ಸಮಯದಲ್ಲಿ, ಲಕ್ನೋ ಮತ್ತು ಗುಜರಾತ್‌ನಲ್ಲಿ ಫ್ರಾಂಚೈಸಿಯ ಬೆಲೆಯ ಆಧಾರದ ಮೇಲೆ ಆದ್ಯತೆಯನ್ನು ನಿರ್ಧರಿಸಲಾಗಿದೆ. ಈ ಮೂಲಕ ಎಲ್ಲ 10 ತಂಡಗಳನ್ನು ಒಂದೊಂದಾಗಿ ಎ ಮತ್ತು ಬಿ ಗುಂಪುಗಳಾಗಿ ವಿಂಗಡಿಸಲಾಗಿದೆ.
ಇದನ್ನೂ ಓದಿ:IPL 2022: ಆರ್ಸಿಬಿಗೆ ಚೆನ್ನೈ ಎದುರಾಳಿ! ಯಾವ ತಂಡ ಯಾರ ವಿರುದ್ಧ ಎಷ್ಟು ಪಂದ್ಯಗಳನ್ನು ಆಡಲಿದೆ? ಇಲ್ಲಿದೆ ವಿವರ
