T20 World Cup 2021: ಸ್ಕಾಟ್ಲೆಂಡ್, ಐರ್ಲೆಂಡ್: ಟಿ20 ಕ್ರಿಕೆಟ್​ನಲ್ಲಿ ಇವರದ್ದೇ ಆಟ

T20 World Cup 2021 ಚುಟುಕು ಕ್ರಿಕೆಟ್ ಕದನ ಶುರುವಾಗಿದೆ. ಮೊದಲಾರ್ಧದಲ್ಲಿ ಅರ್ಹತಾ ಸುತ್ತಿನ ಪಂದ್ಯಗಳು ನಡೆಯುತ್ತಿದೆ. ಈ ಸುತ್ತಿನಲ್ಲಿ 2 ಗುಂಪುಗಳಿದ್ದು, ಈ ಎರಡು ಗ್ರೂಪ್​ಗಳಲ್ಲಿ ಅಗ್ರಸ್ಥಾನ ಪಡೆಯುವ 4 ತಂಡಗಳು ಸೂಪರ್ 12ಗೆ ಎಂಟ್ರಿ ಕೊಡಲಿದೆ. ಗ್ರೂಪ್ ಎ ನಲ್ಲಿ ಶ್ರೀಲಂಕಾ, ಐರ್ಲೆಂಡ್, ನೆದರ್ಲ್ಯಾಂಡ್ಸ್, ನಮೀಬಿಯಾ ತಂಡಗಳಿದ್ದರೆ, ಗ್ರೂಪ್ ಬಿನಲ್ಲಿ ಬಾಂಗ್ಲಾದೇಶ, ಸ್ಕಾಟ್ಲೆಂಡ್, ಪಪುವಾ ನ್ಯೂಗಿನಿಯಾ, ಓಮಾನ್​ ತಂಡಗಳಿವೆ. ಇಲ್ಲಿ ಮೇಲ್ನೋಟಕ್ಕೆ ಶ್ರೀಲಂಕಾ ಹಾಗೂ ಬಾಂಗ್ಲಾದೇಶ ತಂಡಗಳು ಬಲಿಷ್ಠವಾಗಿ ಕಂಡರೂ, ಈ ಇಬ್ಬರಿಗೂ ಸವಾಲೆಸುವ ಸಾಮರ್ಥ್ಯ ಹೊಂದಿರುವ ತಂಡಗಳಾಗಿ ಸ್ಕಾಟ್ಲೆಂಡ್ ಹಾಗೂ ಐರ್ಲೆಂಡ್​ ತಂಡಗಳಿವೆ. ಹೀಗಾಗಿ ಕ್ರಿಕೆಟ್ ಅಂಗಳದ ಶಿಶು ಎನಿಸಿಕೊಂಡಿರುವ ಸ್ಕಾಟ್ಲೆಂಟ್ ಹಾಗೂ ಐರ್ಲೆಂಡ್ ಈ ಬಾರಿ ಸೂಪರ್ 12 ಹಂತಕ್ಕೇರಲಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.

ಇದನ್ನು ಪುಷ್ಠೀಕರಿಸುವಂತೆ ಮೊದಲ ಪಂದ್ಯದಲ್ಲೇ ಸ್ಕಾಟ್ಲೆಂಡ್​ ಬಲಿಷ್ಠ ಬಾಂಗ್ಲಾದೇಶ ತಂಡಕ್ಕೆ ಸೋಲುಣಿಸಿದೆ. ಇತ್ತೀಚೆಗಷ್ಟೇ ತವರಿನಲ್ಲಿ ನಡೆದ ಆಸ್ಟ್ರೇಲಿಯಾ, ನ್ಯೂಜಿಲೆಂಡ್ ವಿರುದ್ದ ಸರಣಿ ಗೆದ್ದು ಬೀಗಿದ್ದ ಬಾಂಗ್ಲಾ ಆಟಗಾರರಿಗೆ ಮೊದಲ ಪಂದ್ಯದಲ್ಲೇ ಸ್ಕಾಟ್ಲೆಂಟ್ ಶಾಕ್ ನೀಡಿದೆ. ಕೇವಲ 140 ರನ್​ಗಳಿಸಿದರೂ, ಶಕೀಬ್ ಅಲ್ ಹಸನ್, ಮುಷ್ಫಿಕುರ್ ರೆಹಮಾನ್, ಮಹದುಲ್ಲಾ ರಂತಹ ಸ್ಟಾರ್ ಆಟಗಾರರನ್ನೇ ಕಟ್ಟಿಹಾಕಿ ಸ್ಕಾಟ್ಲೆಂಡ್ 6 ರನ್​ಗಳ ರೋಚಕ ಜಯ ಸಾಧಿಸಿದೆ.

ಅಭ್ಯಾಸ ಪಂದ್ಯಗಳಿಂದಲೇ ಪ್ರದರ್ಶನ ನೀಡುತ್ತಾ ಬಂದಿರುವ ಸ್ಕಾಟ್ಲೆಂಡ್, ನೆದರ್‌ಲ್ಯಾಂಡ್ಸ್ ಮತ್ತು ನಮೀಬಿಯಾ ವಿರುದ್ಧ ಸತತ ಗೆಲುವಿನೊಂದಿಗೆ ಇದೀಗ ಟಿ20 ವಿಶ್ವಕಪ್ ಆರಂಭಿಸಿತ್ತು. ಇದೀಗ ಬಾಂಗ್ಲಾ ತಂಡಕ್ಕೆ ಸೋಲುಣಿಸಿ ಟಿ20 ವಿಶ್ವಕಪ್​ ಅಭಿಯಾನವನ್ನು ಭರ್ಜರಿಯಾಗಿ ಆರಂಭಿಸಿದ್ದಾರೆ. ಅದರಲ್ಲೂ ತಂಡದ ಆರಂಭಿಕ ಬ್ಯಾಟ್ಸ್​​ಮನ್​ 28 ವರ್ಷದ ಜಾರ್ಜ್ ಮುನ್ಸಿ ಕಳೆದ 5 ಇನಿಂಗ್ಸ್​ಗಳಲ್ಲಿ ಮೂರು ಅರ್ಧ ಶತಕ ಬಾರಿಸಿದ್ದಾರೆ. ಹಾಗೆಯೇ ಪ್ರಸ್ತುತ ಟಿ20 ರ್ಯಾಕಿಂಗ್​ನಲ್ಲಿ ಮುನ್ಸಿ 22ನೇ ಸ್ಥಾನ ಅಲಂಕರಿಸಿದ್ದಾರೆ. ಇನ್ನು ತಂಡದಲ್ಲಿ ಆರು ಬೌಲರುಗಳಿರುವುದು ಸ್ಕಾಟ್ಲೆಂಟ್ ಬೌಲಿಂಗ್ ವಿಭಾಗವನ್ನು ಮತ್ತಷ್ಟು ಬಲಿಷ್ಠವಾಗಿಸಿದೆ. ಇದೇ ಕಾರಣದಿಂದ ಬಾಂಗ್ಲಾ ಬ್ಯಾಟ್ಸ್​ಮನ್​ಗಳು ರನ್​ಗಳಿಸಲು ಪರದಾಡಿದ್ದರು.

ಇನ್ನು ಐರ್ಲೆಂಡ್ ವಿಷಯಕ್ಕೆ ಬಂದರೆ, ಎಲ್ಲರಿಗೂ ತಿಳಿದಿರುವಂತೆ ಇದೊಂದು ಫಿನಿಕ್ಸ್ ತಂಡ. ಯಾವಾಗ ಬೇಕಿದ್ದರೂ ಯಾವುದೇ ಪಂದ್ಯವನ್ನು ಗೆಲ್ಲಬಲ್ಲ ಸಾಮರ್ಥ್ಯ ಹೊಂದಿರುವ ತಂಡ. ಇದಕ್ಕೆ ಸಾಕ್ಷಿಯೇ ಈ ತಂಡವು ಇಂಗ್ಲೆಂಡ್​ ಸೋಲುಣಿಸಿರುವುದು. 2011 ರ ವಿಶ್ವಕಪ್​ ಪಂದ್ಯದಲ್ಲಿ ಇಂಗ್ಲೆಂಡ್ ನೀಡಿದ 327 ರನ್​ಗಳ ಬೃಹತ್ ಮೊತ್ತವನ್ನು ಬೆನ್ನತ್ತಿದ ಐರ್ಲೆಂಡ್ 49.1 ಓವರ್​ನಲ್ಲಿ 329 ರನ್​ಗಳಿಸಿ ಭರ್ಜರಿ ಜಯ ಸಾಧಿಸಿತು.

ಇದಾಗಿ ದಶಕಗಳು ಕಳೆದರೂ, ತಂಡವು ಸಾಂಘಿಕ ಪ್ರದರ್ಶನವನ್ನೇ ನಂಬಿದೆ ಎಂಬುದಕ್ಕೆ ಮತ್ತೊಮ್ಮೆ ಇಂಗ್ಲೆಂಡ್​ಗೆ ಸೋಲುಣಿಸಿರುವುದೇ ಸಾಕ್ಷಿ. ಕಳೆದ ವರ್ಷ ನಡೆದ ಪಂದ್ಯದಲ್ಲಿ ಇಂಗ್ಲೆಂಡ್ ನೀಡಿದ 328 ರನ್​ಗಳ ಬೃಹತ್ ಗುರಿಯನ್ನು ಬೆನ್ನತ್ತಿದ ಐರ್ಲೆಂಡ್ ತಂಡವು ಕೇವಲ 3 ವಿಕೆಟ್ ನಷ್ಟಕ್ಕೆ 329 ಬಾರಿಸಿ ಭರ್ಜರಿ ಜಯ ತನ್ನದಾಗಿಸಿಕೊಂಡಿತು. ಅಷ್ಟೇ ಅಲ್ಲದೆ ಕಳೆದ ಕೆಲ ವರ್ಷಗಳಿಂದ ಐರ್ಲೆಂಡ್ ತಂಡವು ವೆಸ್ಟ್ ಇಂಡೀಸ್, ಇಂಗ್ಲೆಂಡ್, ಅಫ್ಘಾನಿಸ್ತಾನ್​ನಂತಹ ಬಲಿಷ್ಠ ತಂಡಗಳ ವಿರುದ್ದವೇ ಏಕದಿನ ಕ್ರಿಕೆಟ್​ನಲ್ಲಿ 300 ಅಧಿಕ ರನ್ ಬಾರಿಸಿ ಅಬ್ಬರಿಸಿದೆ.

ಅದರಲ್ಲೂ ತಂಡದ ಚೇಸ್ ಮಾಸ್ಟರ್ ಎನಿಸಿಕೊಂಡಿರುವ ಪಾಲ್ ಸ್ಟರ್ಲಿಂಗ್, ಡೇವಿಡ್ ವಿಲ್ಲೆ ಈ ಬಾರಿ ಕೂಡ ಐರ್ಲೆಂಡ್ ಬಳಗದಲ್ಲಿದ್ದಾರೆ. ಇನ್ನು 15 ಸದಸ್ಯ ತಂಡದಲ್ಲಿ ಎಂಟು ಮಂದಿ 21 ರಿಂದ 25 ವಯಸ್ಸಿನವರು ಎಂಬುದು ವಿಶೇಷ. ಹಾಗೆಯೇ ಪ್ರಸ್ತುತ ಟಿ20 ರ್ಯಾಕಿಂಗ್​ನಲ್ಲಿ ಪಾಲ್ ಸ್ಟರ್ಲಿಂಗ್ 15ನೇ ಸ್ಥಾನ ಅಲಂಕರಿಸಿದ್ದಾರೆ. ಅಂದರೆ ಟಿ20 ರ್ಯಾಕಿಂಗ್​ನಲ್ಲಿ ಮೊದಲ ಐವತ್ತು ಸ್ಥಾನಗಳಲ್ಲಿ ಪ್ರಸ್ತುತ ಟೀಮ್ ಇಂಡಿಯಾದ 5 ಆಟಗಾರರು ಸ್ಥಾನ ಪಡೆದಿದ್ದರೆ, ಐರ್ಲೆಂಡ್​ನ ಮೂವರು ಆಟಗಾರರು ಸ್ಥಾನ ಪಡೆದಿದ್ದಾರೆ. ಅದೇ ರೀತಿ ಟಾಪ್​ 50 ನಲ್ಲಿ ಸ್ಕಾಟ್ಲೆಂಡ್​ನ 5 ಆಟಗಾರರು ಸ್ಥಾನ ಕಾಣಿಸಿಕೊಂಡಿದ್ದಾರೆ. ಅಂದರೆ ಟಿ20 ಕ್ರಿಕೆಟ್​ನಲ್ಲಿ ಸ್ಕಾಟ್ಲೆಂಡ್ ಹಾಗೂ ಐರ್ಲೆಂಡ್ ಆಟಗಾರರು ವಿಶ್ವದ ಟಾಪ್ ತಂಡಗಳ ಆಟಗಾರರಿಗೆ ಸವಾಲೆಸುವಂತೆ ಉತ್ತಮ ಪ್ರದರ್ಶನ ನೀಡುತ್ತಿದ್ದಾರೆ. ಈ ಎಲ್ಲಾ ಕಾರಣಗಳಿಂದ ಈ ಎರಡು ತಂಡಗಳು ಸೂಪರ್-12 ಗೆ ಎಂಟ್ರಿ ಕೊಟ್ಟರೆ ಬಲಿಷ್ಠರು ಎನಿಸಿಕೊಂಡ ತಂಡಗಳಿಗೆ ದೊಡ್ಡ ಸವಾಲಾಗುವುದರಲ್ಲಿ ಡೌಟೇ ಇಲ್ಲ. ಏಕೆಂದರೆ ಈ ಎರಡು ತಂಡಗಳಿಗೆ ಸೋಲಿನ ಆತಂಕ ಇಲ್ಲ…ಹೇಗಾದ್ರೂ ಮಾಡಿ ಗೆಲ್ಲುದೊಂದೇ ಅವರ ಮಂತ್ರ.

ಇದನ್ನೂ ಓದಿ: 1985 ರಿಂದ 2021: 25 ಕ್ಕೂ ಹೆಚ್ಚು ಬಾರಿ ಬದಲಾದ ಟೀಮ್ ಇಂಡಿಯಾ ಜೆರ್ಸಿ

ಇದನ್ನೂ ಓದಿ: IPL 2021: ಈ ಬಾರಿಯ ಐಪಿಎಲ್​ನಲ್ಲಿ ಕಾರು ಸಿಕ್ಕಿದ್ದು ಯಾರಿಗೆ ಗೊತ್ತಾ?

ಇದನ್ನೂ ಓದಿ: IPL 2021 award winners: ಯಾರಿಗೆ ಯಾವ ಪ್ರಶಸ್ತಿ: ಇಲ್ಲಿದೆ ಸಂಪೂರ್ಣ ಪಟ್ಟಿ