ಭರ್ಜರಿ ಸೆಂಚುರಿ ಸಿಡಿಸಿ ಅಬ್ಬರಿಸಿದ ಮೊನಾಂಕ್ ಪಟೇಲ್

ನೆದರ್​ಲೆಂಡ್ಸ್​ನ ಸ್ಪೋರ್ಟ್‌ಪಾರ್ಕ್ ಮೈದಾನದಲ್ಲಿ ನಡೆದ ಏಕದಿನ ವಿಶ್ವಕಪ್ ಲೀಗ್-2 ಪಂದ್ಯದಲ್ಲಿ ಅಮೆರಿಕ (ಯುಎಸ್​ಎ) ತಂಡದ ನಾಯಕ ಮೊನಾಂಕ್ ಪಟೇಲ್ ಭರ್ಜರಿ ಶತಕ ಸಿಡಿಸಿ ಮಿಂಚಿದ್ದಾರೆ. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಕೆನಡಾ ತಂಡವು ಬೌಲಿಂಗ್ ಆಯ್ದುಕೊಂಡಿತ್ತು. ಅದರಂತೆ ಇನಿಂಗ್ಸ್ ಆರಂಭಿಸಿದ ಅಮೆರಿಕ ತಂಡಕ್ಕೆ ಸ್ಟೀವನ್ ಟೇಲರ್ (27) ಹಾಗೂ ಸ್ಮಿತ್ ಪಟೇಲ್ ಉತ್ತಮ ಆರಂಭ ಒದಗಿಸಿದ್ದರು.

ಮೊದಲ ವಿಕೆಟ್​ಗೆ 75 ರನ್​ಗಳ ಜೊತೆಯಾಟವಾಡಿದ ಬಳಿಕ ಸ್ಮಿತ್ ಪಟೇಲ್ (63) ಔಟಾದರು. ಈ ವೇಳೆ ಕಣಕ್ಕಿಳಿದ ನಾಯಕ ಮೊನಾಂಕ್ ಪಟೇಲ್ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದರು. ಆರಂಭದಲ್ಲಿ ತುಸು ಎಚ್ಚರಿಕೆಯ ಬ್ಯಾಟಿಂಗ್​ಗೆ ಒತ್ತು ನೀಡಿದ ಮೊನಾಂಕ್ ಆ ಬಳಿಕ ಸ್ಪೋಟಕ ಇನಿಂಗ್ಸ್ ಆಡಿದರು.

ಪರಿಣಾಮ 95 ಎಸೆತಗಳಲ್ಲಿ 5 ಭರ್ಜರಿ ಸಿಕ್ಸ್ ಹಾಗೂ 7 ಫೋರ್​ಗಳೊಂದಿಗೆ ಅಜೇಯ 121 ರನ್​ ಚಚ್ಚಿದ್ದರು. ಮತ್ತೊಂದೆಡೆ ಮೊನಾಂಕ್ ಪಟೇಲ್​ಗೆ ಉತ್ತಮ ಸಾಥ್ ನೀಡಿದ ಶಯಾನ್ ಜಹಾಂಗೀರ್ 47 ಎಸೆತಗಳಲ್ಲಿ 57 ರನ್ ಸಿಡಿಸಿದರು. ಈ ಮೂಲಕ ಅಮೆರಿಕ ತಂಡವು 50 ಓವರ್​ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 304 ರನ್​ ಕಲೆಹಾಕಿತು.

305 ರನ್​ಗಳ ಕಠಿಣ ಗುರಿ ಬೆನ್ನತ್ತಿದ ಕೆನಡಾ ತಂಡಕ್ಕೆ ಆರೋನ್ ಜಾನ್ಸನ್ ಸ್ಪೋಟಕ ಆರಂಭ ಒದಗಿಸಿದ್ದರು. ಮೊದಲ ಓವರ್​ನಿಂದಲೇ ಬಿರುಸಿನ ಬ್ಯಾಟಿಂಗ್ ಪ್ರದರ್ಶಿಸಿದ ಜಾನ್ಸನ್ 41 ಎಸೆತಗಳಲ್ಲಿ 4 ಭರ್ಜರಿ ಸಿಕ್ಸ್ ಹಾಗೂ 7 ಫೋರ್​ಗಳೊಂದಿಗೆ 55 ರನ್ ಸಿಡಿಸಿದರು.

ಇನ್ನು ಮೂರನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಪರ್ಗತ್ ಸಿಂಗ್ 42 ರನ್​ಗಳ ಕೊಡುಗೆ ನೀಡಿದರೆ, ಹರ್ಷ್ ಠಾಕರ್ 77 ರನ್​ ಸಿಡಿಸಿದರು. ಹಾಗೆಯೇ 7ನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ದಿಲ್ಲನ್ ಹೇಲಿಗರ್ 56 ರನ್ ಬಾರಿಸುವ ಮೂಲಕ ಕೆನಡಾ ತಂಡಕ್ಕೆ ಗೆಲುವಿನ ಆಸೆ ಚಿಗುರಿಸಿದ್ದರು.

ಆದರೆ ಅಂತಿಮ ಹಂತದಲ್ಲಿ ಉತ್ತಮ ದಾಳಿ ಸಂಘಟಿಸಿದ ಅಮೆರಿಕ ಬೌಲರ್​ಗಳು ಕೆನಡಾ ತಂಡವನ್ನು 50 ಓವರ್​ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 290 ರನ್​ಗಳಿಗೆ ನಿಯಂತ್ರಿಸುವಲ್ಲಿ ಯಶಸ್ವಿಯಾದರು. ಈ ಮೂಲಕ ಅಮೆರಿಕ ತಂಡವು 14 ರನ್​ಗಳ ರೋಚಕ ಜಯ ಸಾಧಿಸಿದೆ.

ಕೆನಡಾ ಪ್ಲೇಯಿಂಗ್ 11: ಆರೋನ್ ಜಾನ್ಸನ್ , ದಿಲ್ಪ್ರೀತ್ ಬಾಜ್ವಾ , ಆದಿತ್ಯ ವರದರಾಜನ್ , ನಿಕೋಲಸ್ ಕಿರ್ಟನ್ (ನಾಯಕ) , ಪರ್ಗತ್ ಸಿಂಗ್ , ಹರ್ಷ್ ಠಾಕರ್ , ಶ್ರೇಯಸ್ ಮೊವ್ವಾ (ವಿಕೆಟ್ ಕೀಪರ್) , ಸಾದ್ ಬಿನ್ ಜಾಫರ್ , ದಿಲ್ಲನ್ ಹೇಲಿಗರ್ , ಕಲೀಮ್ ಸನಾ , ಜೆರೆಮಿ ಗಾರ್ಡನ್.

ಇದನ್ನೂ ಓದಿ: Virat Kohli: ವಿರಾಟ್ ಕೊಹ್ಲಿ ಹರಾಜಿನಲ್ಲಿ ಕಾಣಿಸಿಕೊಂಡರೆ 30 ಕೋಟಿ ರೂ. ಗ್ಯಾರಂಟಿ..!

ಅಮೆರಿಕ ಪ್ಲೇಯಿಂಗ್ 11: ಸ್ಟೀವನ್ ಟೇಲರ್ , ಸ್ಮಿತ್ ಪಟೇಲ್ , ಮೊನಾಂಕ್ ಪಟೇಲ್ (ನಾಯಕ) , ಆರೋನ್ ಜೋನ್ಸ್ , ಮಿಲಿಂದ್ ಕುಮಾರ್ , ಶಯಾನ್ ಜಹಾಂಗೀರ್ , ಹರ್ಮೀತ್ ಸಿಂಗ್ , ಶಾಡ್ಲಿ ವ್ಯಾನ್ ಶಾಲ್ಕ್ವಿಕ್ , ಜಸ್ದೀಪ್ ಸಿಂಗ್ , ಅಭಿಷೇಕ್ ಪರಾಡ್ಕರ್ , ನೋಸ್ತೂಶ್ ಕೆಂಜಿಗೆ.