20 ಸಿಕ್ಸ್, 21 ಫೋರ್: ದಾಖಲೆಯ ಮೊತ್ತ ಕಲೆಹಾಕಿದ ಸೌರಾಷ್ಟ್ರ

ಸೈಯ್ಯದ್ ಮುಷ್ತಾಕ್ ಅಲಿ ಟಿ20 ಟೂರ್ನಿಯ ಪಂದ್ಯದಲ್ಲಿ ಬರೋಬ್ಬರಿ 266 ರನ್ ಬಾರಿಸಿ ಸೌರಾಷ್ಟ್ರ ತಂಡವು ಭರ್ಜರಿ ದಾಖಲೆ ನಿರ್ಮಿಸಿದೆ. ಅದು ಕೂಡ ಬಲಿಷ್ಠ ಬರೋಡಾ ತಂಡದ ವಿರುದ್ಧ ಎಂಬುದು ವಿಶೇಷ. ಇಂದೋರ್​​ನಲ್ಲಿ ನಡೆದ ಈ ಪಂದ್ಯದಲ್ಲಿ ಸೌರಾಷ್ಟ್ರ ಮತ್ತು ಬರೋಡಾ ತಂಡಗಳು ಮುಖಾಮುಖಿಯಾಗಿದ್ದವು.

ಈ ಪಂದ್ಯದಲ್ಲಿ ಟಾಸ್ ಗೆದ್ದ ಸೌರಾಷ್ಟ್ರ ತಂಡದ ನಾಯಕ ಜಯದೇವ್ ಉನಾದ್ಕಟ್ ಬ್ಯಾಟಿಂಗ್ ಆಯ್ದುಕೊಂಡಿದ್ದರು. ನಾಯಕನ ನಿರ್ಧಾರವನ್ನು ಸಮರ್ಥಿಸುವಂತೆ ಬ್ಯಾಟ್ ಬೀಸಿದ ಸೌರಾಷ್ಟ್ರ ತಂಡದ ಆರಂಭಿಕ ದಾಂಡಿಗ ಹಾರ್ವಿಕ್ ದೇಸಾಯಿ ಕೇವಲ 39 ಎಸೆತಗಳಲ್ಲಿ 4 ಸಿಕ್ಸ್ ಹಾಗೂ 9 ಫೋರ್​​​ಗಳೊಂದಿಗೆ 76 ರನ್ ಚಚ್ಚಿದರು.

ಮತ್ತೊಂದೆಡೆ ತಾರಂಗ್ ಗೋಯೆಲ್ 15 ಎಸೆತಗಳಲ್ಲಿ 4 ಸಿಕ್ಸ್ ಹಾಗೂ 3 ಫೋರ್​​​ಗಳೊಂದಿಗೆ 40 ರನ್ ಸಿಡಿಸಿದರು. ಇನ್ನು ರುಚಿತ್ ಅತಿರ್ 30 ಎಸೆತಗಳಲ್ಲಿ 5 ಸಿಕ್ಸ್ ಹಾಗೂ 3 ಫೋರ್​​​ಗಳೊಂದಿಗೆ 57 ರನ್ ಬಾರಿಸಿದರೆ, 6ನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ಜಯ್ ಗೋಯಿಲ್ ಕೇವಲ 18 ಎಸೆತಗಳಲ್ಲಿ 6 ಭರ್ಜರಿ ಸಿಕ್ಸ್ ಹಾಗೂ 2 ಫೋರ್​​ಗಳೊಂದಿಗೆ 53 ರನ್​ ಚಚ್ಚಿದರು. ಈ ಮೂಲಕ ಸೌರಾಷ್ಟ್ರ ತಂಡವು 20 ಓವರ್​​​ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 266 ರನ್ ಕಲೆಹಾಕಿತು.

267 ರನ್​​​ಗಳ ಕಠಿಣ ಗುರಿ:

ಸೌರಾಷ್ಟ್ರ ನೀಡಿದ ಕಠಿಣ ಗುರಿ ಬೆನ್ನತ್ತಿದ ಬರೋಡಾ ತಂಡವು ಉತ್ತಮ ಆರಂಭ ಪಡೆಯುವಲ್ಲಿ ವಿಫಲವಾಯಿತು. ಕೇವಲ 29 ರನ್​​​ಗಳಿಸುವಷ್ಟರಲ್ಲಿ 3 ವಿಕೆಟ್ ಕಳೆದುಕೊಂಡ ಬರೋಡಾ ತಂಡಕ್ಕೆ ಶಶ್ವಂತ್ ರಾವತ್ (38) ಆಸರೆಯಾದರು. ಇದಾಗ್ಯೂ ಉಳಿದ ಬ್ಯಾಟರ್​​​ಗಳಿಂದ ನಿರೀಕ್ಷಿತ ಪ್ರದರ್ಶನ ಮೂಡಿಬಂದಿರಲಿಲ್ಲ.

ಇನ್ನು ಅಂತಿಮ ಹಂತದಲ್ಲಿ ವಿಕೆಟ್ ಕೀಪರ್ ಬ್ಯಾಟರ್ ವಿಷ್ಣು ಸೋಲಂಕಿ 25 ಎಸೆತಗಳಲ್ಲಿ 34 ರನ್ ಬಾರಿಸಿದರು. ಇದಾಗ್ಯೂ ತಂಡದ ಮೊತ್ತವನ್ನು 200ರ ಗಡಿದಾಟಿಸಲು ಸಾಧ್ಯವಾಗಲಿಲ್ಲ. ಅಂತಿಮವಾಗಿ ಬರೋಡಾ ತಂಡವು 20 ಓವರ್​​​ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 188 ರನ್​​ಗಳಿಸಲಷ್ಟೇ ಶಕ್ತರಾದರು. ಈ ಮೂಲಕ ಸೌರಾಷ್ಟ್ರ ತಂಡ 78 ರನ್​​ಗಳ ಭರ್ಜರಿ ಜಯ ಸಾಧಿಸಿದೆ.

ದಾಖಲೆಯ ಮೊತ್ತ:

ದೇಶೀಯ ಅಂಗಳದ ಟಿ20 ಟೂರ್ನಿಯಲ್ಲಿ ಇದು ಎರಡನೇ ಗರಿಷ್ಠ ಸ್ಕೋರ್. 2023 ರಲ್ಲಿ ಪಂಜಾಬ್ ತಂಡವು ಆಂಧ್ರಪ್ರದೇಶ ವಿರುದ್ಧ 20 ಓವರ್​​ಗಳಲ್ಲಿ 275/6 ರನ್ ಬಾರಿಸಿರುವುದು ದಾಖಲೆಯ ಮೊತ್ತವಾಗಿದೆ. ಇದೀಗ 266 ರನ್​​​ಗಳೊಂದಿಗೆ ಈ ಪಟ್ಟಿಯಲ್ಲಿ ಸೌರಾಷ್ಟ್ರ ತಂಡವು ದ್ವಿತೀಯ ಸ್ಥಾನ ಅಲಂಕರಿಸಿದೆ.

ಹಾಗೆಯೇ ಪಂಜಾಬ್ ಬಳಿಕ ಸೈಯ್ಯದ್ ಮುಷ್ತಾಕ್ ಅಲಿ ಟೂರ್ನಿಯಲ್ಲಿ 260+ ಸ್ಕೋರ್​ ಗಳಿಸಿದ 2ನೇ ತಂಡ ಎಂಬ ದಾಖಲೆಯನ್ನು ಸೌರಾಷ್ಟ್ರ ತನ್ನದಾಗಿಸಿಕೊಂಡಿದೆ.

ಬರೋಡಾ ಪ್ಲೇಯಿಂಗ್ 11: ಮಿತೇಶ್ ಪಟೇಲ್ , ನಿನಾದ್ ಅಶ್ವಿನ್‌ಕುಮಾರ್ ರಥ್ವಾ , ಶಿವಾಲಿಕ್ ಶರ್ಮಾ , ಕೃನಾಲ್ ಪಾಂಡ್ಯ (ನಾಯಕ) , ವಿಷ್ಣು ಸೋಲಂಕಿ (ವಿಕೆಟ್ ಕೀಪರ್) , ಭಾನು ಪಾನಿಯಾ , ಅತಿತ್ ಶೇಠ್ , ಅಭಿಮನ್ಯು ಸಿಂಗ್ ರಜಪೂತ್ , ಲುಕ್ಮಾನ್ ಮೇರಿವಾಲಾ , ಶಾಶ್ವತ್ ರಾವತ್ , ಆಕಾಶ್ ಮಹಾರಾಜ್ ಸಿಂಗ್.

ಇದನ್ನೂ ಓದಿ: 1642 ಎಸೆತಗಳಲ್ಲಿ ಭರ್ಜರಿ ದಾಖಲೆ ಬರೆದ ಹ್ಯಾರಿಸ್ ರೌಫ್

ಸೌರಾಷ್ಟ್ರ ಪ್ಲೇಯಿಂಗ್ 11: ಹಾರ್ವಿಕ್ ದೇಸಾಯಿ (ವಿಕೆಟ್ ಕೀಪರ್) , ತರಂಗ್ ಗೊಯೆಲ್ , ಸಮ್ಮರ್ ಗಜ್ಜರ್ , ರುಚಿತ್ ಅಹಿರ್ , ಅಂಕುರ್ ಪನ್ವರ್ , ಚಿರಾಗ್ ಜಾನಿ , ಧರ್ಮೇಂದ್ರಸಿನ್ಹ್ ಜಡೇಜಾ , ಪ್ರೇರಕ್ ಮಂಕಡ್ , ಜಯದೇವ್ ಉನಾದ್ಕಟ್ (ನಾಯಕ) , ವಿಶ್ವರಾಜ್ ಜಡೇಜಾ , ಜಯ್ ಗೋಯಿಲ್ .