ಕ್ರಿಸ್ ಗೇಲ್ ಭರ್ಜರಿ ಹಿಟ್​ನೊಂದಿಗೆ ಚಾಂಪಿಯನ್​ ಪಟ್ಟ ಅಲಂಕರಿಸಿದ ಪೇಟ್ರಿಯಟ್ಸ್‌

ವೆಸ್ಟ್ ಇಂಡೀಸ್​ನಲ್ಲಿ ನಡೆದ ಹೊಸ ಮಾದರಿಯ ಕ್ರಿಕೆಟ್​ ಟೂರ್ನಿ ದಿ ಸಿಕ್ಸ್ಟಿ ಲೀಗ್​ಗೆ ತೆರೆಬಿದ್ದಿದೆ. ಫೈನಲ್ ಪಂದ್ಯದಲ್ಲಿ ಟ್ರಿನ್​ಬಾಗೊ ನೈಟ್​ ರೈಡರ್ಸ್​ ವಿರುದ್ದ ಗೆಲುವು ದಾಖಲಿಸುವ ಮೂಲಕ ಸೇಂಟ್ ಕಿಟ್ಸ್ ಅ್ಯಂಡ್ ನೆವಿಸ್ ಪೇಟ್ರಿಯಟ್ಸ್‌ ತಂಡವು ಚೊಚ್ಚಲ ಚಾಂಪಿಯನ್ ಆಗಿ ಹೊರಹೊಮ್ಮಿದೆ. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಪೇಟ್ರಿಯಟ್ಸ್‌ ತಂಡದ ನಾಯಕ ಎವಿನ್ ಲೂಯಿಸ್ ಬೌಲಿಂಗ್ ಆಯ್ದುಕೊಂಡಿದ್ದರು.

ಅದರಂತೆ ಮೊದಲು ಬ್ಯಾಟ್ ಮಾಡಿದ ಟ್ರಿನ್​ಬಾಗೊ ನೈಟ್ ರೈಡರ್ಸ್ ತಂಡವು ಉತ್ತಮ ಆರಂಭ ಪಡೆದಿರಲಿಲ್ಲ. ನಾಯಕ ಸುನೀಲ್ ನರೈನ್ (0) ಮೊದಲ ಓವರ್​ನಲ್ಲೇ ಶೂನ್ಯಕ್ಕೆ ಔಟಾಗಿದ್ದರು. ಇನ್ನು ಮತ್ತೋರ್ವ ಆರಂಭಿಕ ವೆಬ್​ಸ್ಟರ್ ಕೇವಲ 5 ರನ್​ಗಳಿಗೆ ಇನಿಂಗ್ಸ್ ಅಂತ್ಯಗೊಳಿಸಿದ್ದರು. ಈ ವೇಳೆ ಕಣಕ್ಕಿಳಿದ ಸ್ಪೋಟಕ ಬ್ಯಾಟ್ಸ್​ಮನ್ ಆಂಡ್ರೆ ರಸೆಲ್ ಕೇವಲ 13 ಎಸೆತಗಳಲ್ಲಿ 3 ಸಿಕ್ಸರ್​ನೊಂದಿಗೆ 22 ರನ್ ಚಚ್ಚಿದರು. ಆದರೆ ಎವಿನ್ ಲೂಯಿಸ್ ಎಸೆದ ಅತ್ಯುತ್ತಮ ಥ್ರೋಗೆ ರನೌಟ್ ಆಗುವ ಮೂಲಕ ರಸೆಲ್ ಹೊರನಡೆದರು. ಇನ್ನು ಟಿಮ್ ಸೈಫರ್ಟ್​ 25 ಎಸೆತಗಳಲ್ಲಿ 37 ರನ್ ಬಾರಿಸುವ ಮೂಲಕ ನಿಗದಿತ 10 ಓವರ್​ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ ತಂಡದ ಮೊತ್ತವನ್ನು 83 ಕ್ಕೆ ತಂದು ನಿಲ್ಲಿಸಿದರು.

84 ರನ್​ಗಳ ಸುಲಭ ಗುರಿ ಪಡೆದ ಸೇಂಟ್ ಕಿಟ್ಸ್ ಅ್ಯಂಡ್ ನೆವಿಸ್ ಪೇಟ್ರಿಯಟ್ಸ್‌ ತಂಡಕ್ಕೆ ಆಂಡ್ರೆ ಫ್ಲೆಚರ್ ಹಾಗೂ ಎವಿನ್ ಲೂಯಿಸ್ ಬಿರುಸಿನ ಆರಂಭ ಒದಗಿಸಿದ್ದರು. 4.4 ಓವರ್​ಗಳಲ್ಲಿ 53 ರನ್​ ಕಲೆಹಾಕಿದ ಈ ಜೋಡಿ ತಂಡದ ಗೆಲುವನ್ನು ಖಚಿತಪಡಿಸಿದರು. ಈ ಹಂತದಲ್ಲಿ ಲೂಯಿಸ್ (32) ಔಟಾದರೆ, ಆ ಬಳಿಕ ಬಂದ ರುದರ್​ಫೋರ್ಡ್ (4) ಕೂಡ ಬೇಗನೆ ನಿರ್ಗಮಿಸಿದರು. ಇನ್ನು ಡೆವಾಲ್ಡ್ ಬ್ರೆವಿಸ್ ಎದುರಿಸಿದ ಮೊದಲ ಎಸೆತದಲ್ಲೇ ಕ್ಲೀನ್ ಬೌಲ್ಡ್ ಆದರು.

ಈ ವೇಳೆ ಫ್ಲೆಚರ್ (27) ಜೊತೆಗೂಡಿದ ಕ್ರಿಸ್ ಗೇಲ್ 15 ರನ್ ಬಾರಿಸುವ ಮೂಲಕ ಬೌಂಡರಿಯೊಂದಿಗೆ ತಂಡಕ್ಕೆ ಗೆಲುವು ತಂದುಕೊಟ್ಟರು. ಈ ಮೂಲಕ 9.4 ಓವರ್​ಗಳಲ್ಲಿ ಗುರಿ ಮುಟ್ಟುವ ಮೂಲಕ ಸೇಂಟ್ ಕಿಟ್ಸ್ ಅ್ಯಂಡ್ ನೆವಿಸ್ ಪೇಟ್ರಿಯಟ್ಸ್‌ ತಂಡ ರೋಚಕ ಜಯದೊಂದಿಗೆ ಚಾಂಪಿಯನ್ ಪಟ್ಟ ಅಲಂಕರಿಸಿತು.

Published On - 3:05 pm, Mon, 29 August 22