ಈತನೇ ನಮ್ಮ ತಂಡದ ‘ಎಕ್ಸ್ ಫ್ಯಾಕ್ಟರ್’; 15 ವಿಶ್ವ ನಾಯಕರ ಮುಂದೆ ಘರ್ಜಿಸಿದ ರೋಹಿತ್ ಶರ್ಮಾ
T20 World Cup 2022: ಈ ವರ್ಷ ಇದುವರೆಗೆ ಆಡಿರುವ 23 ಟಿ20 ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಸೂರ್ಯ 801 ರನ್ ಗಳಿಸಿದ್ದಾರೆ. ಈ ವೇಳೆ 186 ಕ್ಕಿಂತ ಹೆಚ್ಚು ಸ್ಟ್ರೈಕ್ ರೇಟ್ನಲ್ಲಿ ಬ್ಯಾಟ್ ಬೀಸಿರುವ ಸೂರ್ಯ, 1 ಶತಕ ಹಾಗೂ 6 ಅರ್ಧ ಶತಕಗಳನ್ನು ಬಾರಿಸಿದ್ದಾರೆ.
Updated on:Oct 15, 2022 | 11:08 AM
ಬುಮ್ರಾ, ಜಡೇಜಾ ಅಲಭ್ಯತೆಯ ನಡುವೆಯೂ ಟಿ20 ವಿಶ್ವಕಪ್ಗೆ (T20 World Cup 2022) ತಯಾರಿ ನಡೆಸಿರುವ ಟೀಂ ಇಂಡಿಯಾ ಗೆಲುವಿನ ಭರವಸೆಯೊಂದಿಗೆ ಆಸೀಸ್ ನಾಡಿಗೆ ಕಾಲಿಟ್ಟಿದೆ. ಆದರೆ ಕಾಂಗರೂ ನಾಡಲ್ಲಿ ಸಿಹಿ- ಕಹಿ ಅನುಭವ ಪಡೆದಿರುವ ರೋಹಿತ್ (Rohit Sharma) ಪಡೆ ಆಡಿರುವ 2 ಅಭ್ಯಾಸ ಪಂದ್ಯಗಳಲ್ಲಿ ಒಂದರಲ್ಲಿ ಗೆದ್ದಿದ್ದರೆ, ಮತ್ತೊಂದರಲ್ಲಿ ಸೋಲನುಭವಿಸಿದೆ. ಈಗ ಅ.23 ರಂದು ಬದ್ಧವೈರಿಯನ್ನು ಎದುರಿಸಲಿರುವ ಭಾರತಕ್ಕೆ ಆರಂಭವೇ ತೀರ ಕಠಿಣವಾಗಿದೆ. ಏಕೆಂದರೆ ಕಳೆದ ಬಾರಿ ನಡೆದಿದ್ದ ವಿಶ್ವಕಪ್ನಲ್ಲಿ ಟೀಂ ಇಂಡಿಯಾ ಪಾಕ್ ಎದುರು 10 ವಿಕೆಟ್ಗಳ ಹೀನಾಯ ಸೋಲು ಅನುಭವಿಸಿತ್ತು. ಹೀಗಾಗಿ ಹಳೆಯ ಕಹಿಯನ್ನು ಮರೆತು ರೋಹಿತ್ ಪಡೆ ಪಾಕ್ ವಿರುದ್ಧ ಕಣಕ್ಕಿಳಿಯಬೇಕಿದೆ. ಇದಕ್ಕೆ ಸರ್ವಸನ್ನದ್ದವಾಗಿರುವ ನಾಯಕ ರೋಹಿತ್, ವಿಶ್ವದ 16 ನಾಯಕರ ಮುಂದೆ ತನ್ನ ತಂಡದ ಸಾಮಥ್ಯ್ರವನ್ನು ಎಳೆಎಳೆಯಾಗಿ ಬಿಚ್ಚಿಟ್ಟಿದ್ದಾರೆ. ಅದರಲ್ಲೂ ತಂಡದಲ್ಲಿರುವ ಅದೊಂದು ಆಟಗಾರನ ಬಗ್ಗೆ ಇತರ ತಂಡಗಳು ಎಚ್ಚರವಾಗಿರುವಂತೆ ಸೂಚನೆ ಕೂಡ ನೀಡಿದ್ದಾರೆ.
ವಾಸ್ತವವಾಗಿ ಟಿ20 ವಿಶ್ವಕಪ್ 2022 ಪ್ರಾರಂಭವಾಗುವ ಮೊದಲು, ಮೆಲ್ಬೋರ್ನ್ನಲ್ಲಿ ಎಲ್ಲಾ ತಂಡಗಳ ನಾಯಕರ ಪತ್ರಿಕಾಗೋಷ್ಠಿಯನ್ನು ಆಯೋಜಿಸಲಾಗಿತ್ತು. ಈ ಪತ್ರಿಕಾಗೋಷ್ಠಿಯಲ್ಲಿ ಎಲ್ಲಾ ತಂಡಗಳ ನಾಯಕರು ತಮ್ಮ ತಮ್ಮ ಅಭಿಪ್ರಾಯವನ್ನು ಹಂಚಿಕೊಂಡರು. ಜೊತೆಗೆ ತಮ್ಮ ತಂಡದ ಉದ್ದೇಶ ಹಾಗೂ ತಂಡದ ಸಾಮರ್ಥ್ಯದ ಬಗ್ಗೆ ವಿವರಿಸಿದ ನಾಯಕರು, ತಮ್ಮ ತಂಡದ ಪ್ರಮುಖ ಆಟಗಾರರ ಬಗ್ಗೆಯೂ ಮಾಹಿತಿ ಹಂಚಿಕೊಂಡರು. ಹಾಗೆಯೇ ಟೀಂ ಇಂಡಿಯಾದ ನಾಯಕ ರೋಹಿತ್ ಶರ್ಮಾ ಕೂಡ ತನ್ನ ಸರದಿ ಬಂದಾಗ, ತಂಡದ ಸ್ಫೋಟಕ ಬ್ಯಾಟರ್ ಸೂರ್ಯಕುಮಾರ್ ಯಾದವ್ ಅವರನ್ನು ಹಾಡಿಹೊಗಳಿದರು.
ಈತನೇ ನಮ್ಮ’ಎಕ್ಸ್ ಫ್ಯಾಕ್ಟರ್’
ಪತ್ರಿಕಾಗೋಷ್ಠಿಯಲ್ಲಿ ಸೂರ್ಯಕುಮಾರ್ ಯಾದವ್ ಬಗ್ಗೆ ಮಾತನಾಡಿದ ರೋಹಿತ್ ಶರ್ಮಾ, ಸೂರ್ಯಕುಮಾರ್ ಯಾದವ್ ನಮ್ಮ ತಂಡದ ಎಕ್ಸ್-ಫ್ಯಾಕ್ಟರ್. ಈ ಬಾರಿಯ ಟಿ20 ವಿಶ್ವಕಪ್ನಲ್ಲೂ ಅವರು ತಮ್ಮ ಅದ್ಭುತ ಫಾರ್ಮ್ ಅನ್ನು ಮುಂದುವರಿಸುತ್ತಾರೆ ಎಂದು ನಾನು ಭಾವಿಸುತ್ತೇನೆ. ಎದುರಾಳಿ ಬೌಲರ್ಗಳ ಮೇಲೆ ದಾಳಿ ಮಾಡಲು ಅವರು ತಮ್ಮ ಕೌಶಲ್ಯಗಳನ್ನು ಪೂರ್ಣ ಪ್ರಮಾಣದಲ್ಲಿ ಬಳಸುತ್ತಾರೆ ಎಂದು ಹೇಳಿಕೊಂಡಿದ್ದಾರೆ.
ರೋಹಿತ್ ಮಾತಿನಲ್ಲೂ ಅರ್ಥವಿದೆ
ಸೂರ್ಯಕುಮಾರ್ ಯಾದವ್ ಬಗ್ಗೆ ರೋಹಿತ್ ಶರ್ಮಾ ಕೇವಲ ಗಾಳಿಯಲ್ಲಿ ಗುಂಡು ಹಾರಿಸಿಲ್ಲ. ಬದಲಿಗೆ, ಈ ವರ್ಷ ಸೂರ್ಯಕುಮಾರ್ ಅವರ ಆಟವೇ ಇದಕ್ಕೆ ಸಾಕ್ಷಿಯಾಗಿದೆ. ಈ ವರ್ಷ ಇದುವರೆಗೆ ಆಡಿರುವ 23 ಟಿ20 ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಸೂರ್ಯ 801 ರನ್ ಗಳಿಸಿದ್ದಾರೆ. ಈ ವೇಳೆ 186 ಕ್ಕಿಂತ ಹೆಚ್ಚು ಸ್ಟ್ರೈಕ್ ರೇಟ್ನಲ್ಲಿ ಬ್ಯಾಟ್ ಬೀಸಿರುವ ಸೂರ್ಯ, 1 ಶತಕ ಹಾಗೂ 6 ಅರ್ಧ ಶತಕಗಳನ್ನು ಬಾರಿಸಿದ್ದಾರೆ.
ಟಿ20 ವಿಶ್ವಕಪ್ಗೆ ಭಾರತ ತಂಡ: ರೋಹಿತ್ ಶರ್ಮಾ (ನಾಯಕ), ಕೆಎಲ್ ರಾಹುಲ್ (ಉಪನಾಯಕ), ವಿರಾಟ್ ಕೊಹ್ಲಿ, ಸೂರ್ಯಕುಮಾರ್ ಯಾದವ್, ದೀಪಕ್ ಹೂಡಾ, ರಿಷಭ್ ಪಂತ್ (ವಿಕೆಟ್-ಕೀಪರ್), ದಿನೇಶ್ ಕಾರ್ತಿಕ್ (ವಿಕೆಟ್-ಕೀಪರ್), ಹಾರ್ದಿಕ್ ಪಾಂಡ್ಯ, ಆರ್.ಅಶ್ವಿನ್, ಯುಜ್ವೇಂದ್ರ ಚಹಾಲ್, ಅಕ್ಸರ್ ಪಟೇಲ್, ಭುವನೇಶ್ವರ್ ಕುಮಾರ್, ಹರ್ಷಲ್ ಪಟೇಲ್, ಅರ್ಷದೀಪ್ ಸಿಂಗ್, ಮೊಹಮ್ಮದ್ ಶಮಿ.
Published On - 11:06 am, Sat, 15 October 22
