ಕ್ರಿಕೆಟ್ ತಂಡ ಖರೀದಿಸಿದ ಯುಜ್ವೇಂದ್ರ ಚಹಲ್ ಗೆಳತಿ

Champions League t10: ಚಾಂಪಿಯನ್ಸ್ ಲೀಗ್ ಟಿ10 ಎಂಬುದು ಮಾಜಿ ಆಟಗಾರರ ಹತ್ತು ಓವರ್ಗಳ ಪಂದ್ಯಾವಳಿ. ಈ ಟೂರ್ನಿಯಲ್ಲಿ ಒಟ್ಟು 8 ತಂಡಗಳು ಕಣಕ್ಕಿಳಿಯಲಿವೆ. ಈಗಾಗಲೇ 8 ಫ್ರಾಂಚೈಸಿಗಳು ಟೂರ್ನಿಗಾಗಿ ಸಿದ್ಧತೆಗಳನ್ನು ಆರಂಭಿಸಿದ್ದು, ಅದರಂತೆ ಆಗಸ್ಟ್ 22 ರಿಂದ ನೂತನ ಟಿ10 ಲೀಗ್ ಶುರುವಾಗಲಿದೆ.

Yuzvendra Chahal - Rj Mahvash

ಝಾಹಿರ್ ಯೂಸುಫ್ |
Updated on: Jul 09, 2025 | 11:55 AM

ಟೀಮ್ ಇಂಡಿಯಾ ಆಟಗಾರ ಯುಜ್ವೇಂದ್ರ ಚಹಲ್ ಅವರ ಗೆಳತಿ ಆರ್ಜೆ ಮಹ್ವಾಶ್ ಮತ್ತೆ ಸುದ್ದಿಯಲ್ಲಿದ್ದಾರೆ. ಈ ಬಾರಿ ಸುದ್ದಿಯಾಗಿರುವುದು ಕ್ರಿಕೆಟ್ ತಂಡದ ಖರೀದಿಯೊಂದಿಗೆ ಎಂಬುದು ವಿಶೇಷ. ಇಂಡಿಯನ್ ಪ್ರೀಮಿಯರ್ ಲೀಗ್ ವೇಳೆ ಚಹಲ್ ಜೊತೆ ಕಾಣಿಸಿಕೊಂಡಿದ್ದ ಮಹ್ವಾಶ್ ಇದೀಗ ಚಾಂಪಿಯನ್ಸ್ ಲೀಗ್ ಟಿ10 ಟೂರ್ನಿಯಲ್ಲಿ ತಂಡವೊಂದನ್ನು ಖರೀದಿಸಿದ್ದಾರೆ.

ಅಂತಾರಾಷ್ಟ್ರೀಯ ಕ್ರಿಕೆಟ್ನಿಂದ ನಿವೃತ್ತರಾಗಿರುವ ಆಟಗಾರರನ್ನು ಒಳಗೊಂಡಿರುವ ಹೊಸ ಟಿ10 ಲೀಗ್ ಶೀಘ್ರದಲ್ಲೇ ಶುರುವಾಗಲಿದೆ. ಚಾಂಪಿಯನ್ ಲೀಗ್ ಟಿ10 ಹೆಸರಿನಲ್ಲಿ ಮೂಡಿಬರಲಿರುವ ಈ ಟೂರ್ನಿಯ ಫ್ರಾಂಚೈಸಿ ಒಂದಕ್ಕೆ ಆರ್ಜೆ ಮಹ್ವಾಶ್ ಸಹ-ಮಾಲೀಕರಾಗಿದ್ದಾರೆ. ಒಟ್ಟು 8 ತಂಡಗಳು ಈ ಟೂರ್ನಿಯಲ್ಲಿ ಕಣಕ್ಕಿಳಿಯಲಿದ್ದು, ಇದರಲ್ಲಿ ಒಂದು ತಂಡಕ್ಕೆ ಮಹ್ವಾಶ್ ಬಂಡವಾಳ ಹೂಡಿದ್ದಾರೆ.

ಆರ್ಜೆ ಮಹ್ವಾಶ್ ಯಾರು?

ಆರ್ಜೆ ಮಹ್ವಾಶ್ ಭಾರತದ ಅತ್ಯಂತ ಜನಪ್ರಿಯ ರೇಡಿಯೋ ಜಾಕಿ. ಹಾಗೆಯೇ ಸೋಷಿಯಲ್ ಮೀಡಿಯಾ ಇಂಫುಲೆನ್ಸರ್. ಈ ಹಿಂದೆ ಅವರು ಚಿತ್ರರಂಗದಲ್ಲೂ ಗುರುತಿಸಿಕೊಂಡಿದ್ದರು. ಚಾಂಪಿಯನ್ಸ್ ಟ್ರೋಫಿ 2025ರ ವೇಳೆ ಮಹ್ವಾಶ್ ಟೀಮ್ ಇಂಡಿಯಾ ಸ್ಪಿನ್ನರ್ ಯುಜ್ವೇಂದ್ರ ಚಹಲ್ ಕಾಣಿಸಿಕೊಂಡಿದ್ದರು. ಇದರೊಂದಿಗೆ ಚಹಲ್, ಮಹ್ವಾಶ್ ಜೊತೆ ಡೇಟಿಂಗ್ ಮಾಡುತ್ತಿದ್ದಾರೆ ಎಂಬ ಸುದ್ದಿಗಳು ಹರಿದಾಡಲಾರಂಭಿಸಿತು.

ಇದನ್ನು ಪುಷ್ಠೀಕರಿಸುವಂತೆ ಆರ್ಜೆ ಮಹ್ವಾಶ್ ಇಂಡಿಯನ್ ಪ್ರೀಮಿಯರ್ ಲೀಗ್ ವೇಳೆಯೂ ಯುಜ್ವೇಂದ್ರ ಚಹಲ್ ಜೊತೆ ಕಾಣಿಸಿಕೊಂಡರು. ಅಷ್ಟೇ ಅಲ್ಲದೆ ಪಂಜಾಬ್ ಕಿಂಗ್ಸ್ ತಂಡದ ಟೀಮ್ ಬಸ್ನಲ್ಲಿ ಚಹಲ್ ಜೊತೆ ತೆರಳಿದ್ದರಿಂದ ಇಬ್ಬರ ನಡುವೆ ಪ್ರೇಮಾಂಕುರವಾಗಿ ಎಂಬ ಸುದ್ದಿಗಳು ಹುಟ್ಟಿಕೊಂಡಿದ್ದವು. ಇದಾಗ್ಯೂ ಚಹಲ್ ಆಗಲಿ, ಮಹ್ವಾಶ್ ಆಗಲಿ ಈ ಬಗ್ಗೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.

ಇದೀಗ ಟಿ10 ಲೀಗ್ನಲ್ಲಿ ತಂಡವೊಂದನ್ನು ಖರೀದಿಸುವ ಮೂಲಕ ಆರ್ಜೆ ಮಹ್ವಾಶ್ ಕ್ರಿಕೆಟ್ ಅಂಗಳಕ್ಕೂ ಕಾಲಿಟ್ಟಿದ್ದಾರೆ. ಈ ಮೂಲಕ ಚುಟುಕು ಕ್ರಿಕೆಟ್ನಲ್ಲಿ ಬಂಡವಾಳ ಹೂಡಿ ಅದೃಷ್ಟ ಪರೀಕ್ಷೆ ನಡೆಸಲು ಮುಂದಾಗಿದ್ದಾರೆ.